Xustificación do Plan:
O Plan Dixital, como documento que pretende regular a relación coa tecnoloxía neste centro educativo, está fundamentado na normativa vixente no momento da súa elaboración:
• Art. 111 bis, Art. 121 e Art. 132 da Lei Orgánica 2/2006, de 3 de maio, de Educación (LOE)
• Disposición adicional quinta da Resolución do 17 de xuño de 2021, da Secretaría Xeral de Educación e Formación Profesional, pola que se ditan instrucións para o desenvolvemento das ensinanzas de EI, EP, ESO e bacharelato no curso académico 2021-2022.
• Resolución do 3 de setembro de 2021, da Secretaría Xeral de Educación e Formación Profesional, pola que se ditan instrucións para o deseño, elaboración e implementación do Plan Dixital nos centros docentes sostidos con fondos públicos da Comunidade Autónoma de Galicia para o curso 2021-2022.
Contribución do PD no centro e contribución ao Proxecto Educativo:
O centro existe unha alta porcentaxe de alumnado estranxeiro, así como unha alta porcentaxe de alumnado de integración tardía. Tamén acolle unha gran cantidade de alumnado con Necesidades Específicas de Apoio Educativo (NEAE) e con dificultades que precisan unha resposta educativa axeitada, con medidas e accións de atención á diversidade. Esta casuística precisa unha resposta educativa axeitada, que se recolle nunha serie de plans e programas específicos a través do Proxecto Educativo do centro. No eido tecnolóxico, o Plan Dixital será o que recolla as actuacións que vaian encamiñadas a mellorar a competencia dixital do alumnado, de xeito que contribúe de maneira directa a acadar os obxectivos plasmados no Proxecto Educativo, especialmente o relacionado coa alfabetización dixital.
No Proxecto Educativo recóllese que cada grupo clase ten asignada unha hora semanal de traballo na Aula de Informática. Por falta de infraestrutura e recursos tecnolóxicos, nunha sesión só pode acudir a metade do grupo. Desta maneira, un alumno só ten acceso a esta Aula unha hora cada quince días.
Outro espazo do centro que debe xogar un papel relevante no desenvolvemento da competencia dixital do alumnado é a biblioteca escolar. Débese potenciar o uso dos recursos tecnolóxicos dos que dispón (monitor dixital, robots, placas Makey Makey, etc.).
Coa aplicación deste Plan Dixital durante o curso 2023/2024, preténdese mellorar os equipos dispoñibles no centro e fomentar o uso da Aula Virtual por parte do alumnado, así como implantar EDIXGAL en 5º de primaria, tanto no centro como na casa. Tamén se busca potenciar a competencia dixital do profesorado e fomentar a colaboración entre eles, creando e compartindo recursos dixitais a través da Aula Virtual.
Durante o vindeiro curso continuarase sensibilizando ao conxunto do profesorado do centro sobre as posibilidades educativas e tecnolóxicas, así como implantar EDIXGAL en 5º e 6º de primaria.
Por outra banda, seguirase promovendo o uso das TIC para favorecer as aprendizaxes do alumnado e estimular a súa capacidade crítica para traballar coa información extraída de Internet. Do mesmo xeito, continuarase a facilitar o seu uso ao alumnado con NEAE e empregaranse tamén como medio para a comunicación entre compañeiros e outros centros.
Proceso de elaboración:
Na elaboración do Plan Dixital (en adiante, PD) participou o Equipo de Dinamización do PD, encargado de plasmar no documento a realidade do centro en materia tecnolóxica e os obxectivos e accións que se levarán a cabo para mellorala. Seguíronse sempre as pautas e recomendacións que foron facendo os asesores ADIX, tanto nas reunións semanais como nas formacións que deron.
Para coñecer o punto de partida, comezamos poñendo en marcha o SELFIE durante os meses de novembro e decembro. O coordinador encargouse de organizar e recoller as preguntas da enquisa, así como de enviar o enlace a todos os mestres do claustro. Os catro membros do equipo de dinamización foron dando pautas para completalo e recordando os prazos para facelo.
Xa no segundo trimestre, co SELFIE xa completado, o equipo de dinamización do PD explicou nun claustro a temporalización das fases para elaborar o Plan Dixital, comezando pola realización do test CDD en fprofe durante o mes de febreiro por parte do profesorado do centro. A función do equipo consistiu en supervisar a súa realización e resolver as dúbidas que puidesen xurdir.
O seguinte paso foi reflexionar sobre os datos do Test CDD e do SELFIE. O equipo ao conxunto analizou os datos, de xeito individual, para poder identificar as debilidades, ameazas, fortalezas e oportunidades do centro en relación coas TIC. A continuación, nunha posta en común, cada un fixo as súas aportacións para realizar o DAFO do centro seguindo as instrucións ditadas polos mentores ADIX.
O coordinador do equipo de dinamización do PD implantou a ferramenta BOARD na Aula Virtual para facilitar o traballo cooperativo. Deste xeito, todos os membros do equipo puideron completar a táboa do DAFO coa información extraída do SELFIE, despois de identificar debilidades, ameazas, fortalezas e oportunidades do centro de xeito individual, en relación coas TIC, e de poñelas en común nunha xuntanza grupal.
Co DAFO cumprimentado e revisado polo asesor ADIX do centro, o equipo de dinamización comezou a elaborar os obxectivos para o Plan de Acción. Formularon un obxectivo prioritario conxuntamente e o coordinador encargouse de elaborar os restantes, que posteriormente revisaron e seleccionaron todos os membros do equipo.
O coordinador do equipo de dinamización encargouse de elaborar o Plan Dixital, seguindo as directrices do asesor ADIX do centro e tendo en conta as aportacións dos membros restantes do equipo.
No proceso de implantación e avaliación será clave a participación do equipo directivo, tanto pola súa visión global como pola súa capacidade de mobilizar os recursos necesarios para levalo a cabo.
