a. Datos básicos do centro
Nome do centro: CEIP Plurilingüe Santa María
Dirección: Rúa Enrique Saavedra s/n Correo: ceip.santamaria.fonsagrada@edu.xunta.gal
Páxina web: http://www.edu.xunta.gal/centros/ceipsantamariafonsagrada Etapas educativas: Infantil e Primaria Nº de alumnado e profesorado: 85 / 14
b. Contextualización do Plan Dixital no centro. Contribución ao Proxecto Educativo do Centro
O CEIP Santa María está ubicado no concello de A Fonsagrada, situado no extremo centro-oriental da provincia de Lugo, formando un conxunto montañoso que constitúe unha fronteira natural coa Comunidade Autónoma de Asturias. O centro pertence a un entorno principalmente rural, polo que o sector primario é a base da súa economía centrado especialmente na gandaría e na explotación forestal. O sector secundario é menos importante, destacan algunhas pequenas empresas de transformación de madeira, elaboración de produtos cárnicos, fabricación de pensos.... O sector terciario foi medrando nos últimos anos.
O centro da vila é o lugar onde se concentran a maior parte das actividades comerciais e núcleos financeiros e profesionais. O nivel económico e cultural da poboación é medio-baixo. O alumnado do centro é de lugares moi dispersos xa que o concello é moi extenso. Este alumnado vive, en moitos casos, en aldeas de escasa poboación, dándose casos de nenos e nenas que non só son fillos únicos, senón que tamén son os únicos do seu pobo, polo que o colexio é o único lugar onde poden relacionarse con outras persoas da súa idade.
Despois de analizar o entorno social e a comunidade educativa para a elaboración do noso plan dixital, chegamos á conclusión de que este pode ser de moita axuda para conectar a toda a comunidade educativa. Por exemplo, tendo en conta plataformas dixitais como Abalar, redes sociais, aulas virtuais,...
Este Plan Dixital elabórase en base ao Plan Dixital do curso anterior (22/23), partindo das debilidades, fincándose nas fortalezas. Actualízase tendo en conta as propostas de mellora feitas a final do curso pasado. Este PD aporta información de valía ao Proxecto Educativo xa que os aspectos que nel se recollen contribuirán á mellora das propostas educativas de centro e senta unhas bases para traballar as TIC nas distintas aulas e na comunidade educativa en xeral.
O centro manifesta o interese por continuar colaborando coas propostas da Consellería a nivel de Novas Tecnoloxías. Este Plan Dixital relaciónase á súa vez con outros plans de centro xa que as Novas Tecnoloxías adoitan ter relación con outros aspectos como as titorías, as actividades de grupos e equipos de traballo, ou incluso convocatorias da Consellería tal como: Plans de formación: NMAI (Novos medios audiovisuais interactivos - Uso e elaboración de material didáctico); Internet básico para o profesorado; Introdución ao manexo de ordenadores; Uso de ordenadores para docentes (Aplicación didáctica da informática), Métodos innovadores na xestión na aula de Primaria, Niveis inicial e medio en tecnoloxía da información e comunicación, Elaboración de material interdisciplinar coa EDI, XADEweb, , Abalar, E-dixgal .
Actualmente os Programas de innovación nos que participa son: PROA+, Inclúete, PVAD (Proxecto de vida Activa e Deportiva), Edusaúde, Nutriescolas, Donas de si,...
A implementación do PD dentro da PXA será un dos obxectivos principais de cara ao vindeiro curso escolar 23/24, coa que intentará acadar os obxectivos elaborados dentro do Plan de Acción.
c. Xustificación lexislativa do mesmo
Os decretos e ordes nos que se ampara este Plan Dixital son:
Artigo 30.1 do DECRETO 150/2022, do 8 de setembro, polo que se establece a ordenación e o currículo da educación infantil na Comunidade Autónoma de Galicia.
Artigo 34.1 do DECRETO 155/2022, do 15 de setembro, polo que se establecen a ordenación e o currículo da educación primaria na Comunidade Autónoma de Galicia.
Nestes indícase que: “Os centros docentes deberán incluír dentro do seu proxecto educativo e funcional a súa estratexia dixital a través dun plan dixital de centro, que se concibe como un instrumento para mellorar o desenvolvemento da competencia dixital da comunidade educativa, o uso das tecnoloxías dixitais no proceso de ensino e aprendizaxe e a transformación dos centros en organizacións educativas dixitalmente competentes, e que se concretará anualmente na programación xeral anual a través das correspondentes actuacións”
Nas normativas de desenvolvemento dos anteriores Decretos, concrétase a estrutura, que como mínimo debe contemplar o PD, no seguinte articulado:
Artigo 15 da ORDE do 30 de maio de 2023 pola que se desenvolve o Decreto 150/2022, do 8 de setembro, polo que se establece a ordenación e o currículo da educación infantil na Comunidade Autónoma de Galicia e se regula a avaliación nesa etapa educativa.
Artigo 14 da ORDE do 26 de maio de 2023 pola que se desenvolve o Decreto 155/2022, do 15 de setembro, polo que se establecen a ordenación e o currículo da educación primaria na Comunidade Autónoma de Galicia e se regula a avaliación nesa etapa educativa.
d. Proceso de elaboración Descrición da organización e do proceso de elaboración do PD dentro do Equipo de Dinamización do Plan Dixital
- Realización do Test Selfie durante a última quincena de decembro do 2021. - Docencia do PD o día 24/01/22.
- Realización do Test de Competencia Dixital Docente durante a primeira quincena de febreiro do 2022.
- Docencia do PD o día 14/02/22. - Docencia sobre a elaboración do DAFO 16/03/22.
- Elaboración do DAFO do centro 28/03/22.
- Docencia sobre o deseño e elaboración do Plan de Acción 20/04/22.
- Elaboración do Plan de Acción do centro 03/05/22
- Incorporación do Plan Dixital á plataforma Educalidade no curso 22/23
- Elaboración dun novo Plan Dixital, partindo do anterior, actualizado e revisado, con novos obxectivos e accións para o curso actual: 23/24
