A traxectoria do centro no ámbito das novas tecnoloxías é a seguinte:
No relativo á cuestión da integración do Plan Dixital na PXA (Programación Xeral Anual) dicir que é totalmente coherente co exposto na mesma xa que o noso centro é o máis dixitalizado de Galicia: arredor de 600 alumnos (toda a ESO) dispoñen de ordenador E-Dixgal, e cada vez son máis as materias interesadas en incorporarse ó Proxecto. Isto implica unha aposta forte pola nosa parte pola dixitalización e a formación e implicación do profesorado para adquirir destrezas neste campo. Ademais un profesor do centro é mentor dun equipo ADIX para a implementación do Plan Dixital nos centros educativos asignados. Todo isto permite unha utilización mellor dos recursos dispoñibles e mellora a nosa competencia dixital. Por iso non se observa, ata o momento, ningunha reticencia na comunidade educativa á hora de utilizar tecnoloxías dixitais na práctica docente habitual. A PXA non fai máis que reflectir esta situación.
A realización do DAFO realizouse a partir dos datos recabados do SELFIE, tanto do alumnado coma do profesorado, e do Test de Competencia Dixital do profesorado.
A grandes rasgos obsérvase que as liñas de traballo dos vindeiros anos deberían ir encamiñadas cara a implicar ao alumnado na súa propia avaliación e implicación na súa aprendizaxe, un traballo máis interdisciplinar e inclusivo, ampliando o emprego de recursos abertos e accesibles. Todo elo nun ensino dixital máis xeralizado que non se limite ás materias tecnolóxico-dixitais: a competencia dixital debe ser un obxectivo de todas as materias.
O procedemento de seguimento do desenvolvemento do plan e da consecución de obxectivos será:
- En canto a avaliación procesual, realizarase nas datas reflectidas nas distintas descricións das accións, como mínimo unha vez ao trimestre. Os aspectos a valorar incluirán o estado da execución das accións, a análise e valoración dos resultados e, de ser o caso, as posibles modificacións das accións e as propostas de mellora.
- Antes do 30 de xuño realizarase unha avaliación final que incluirá, entre outros, a valoración do logro dos obxectivos e as propostas de mellora.
Realizadas tódalas accións previstas e indicadas nos seus respectivos seguimentos.
Análise de resultados en canto obxectivos acadados respecto dos propostos inicialmente.
Este Plan Dixital de Centro será exposto na páxina web do IES, no bloque “Centro” e sección “Documentos”, onde se atopan aqueles preceptivos de difusión á comunidade educativa. Na aula virtual “Plan Digital de Centro”, accesible ao claustro, se atopará unha copia e a súa versión editable para ir completando a avaliación procesual.
