- Contextualización do Plan Dixital no centro e contribución ao Proxecto Educativo do Centro.
Características socioeconómicas e culturais do contexto do centro.
O COLEXIO DE EDUCACIÓN INFANTIL E PRIMARIA PLURILINGÜE JOSÉ CORNIDE SAAVEDRA está situado na Avenida da Sardiñeira, 42; no barrio dos Mallos do concello de A Coruña.
É un centro de titularidade pública. É un centro singular, pois está nun contorno urbano escolarizando oitenta e cinco alumnos/as desde 4º de educación infantil ata 6º de educación primaria, pero só ten cinco unidades, todas elas mixtas. Aínda que de xeito provisional este curso 2023/2024, a Inspección Educativa habilitou 3 unidade máis en Primaria que continúan compartindo a mesma aula.
Ocupamos un edificio que foi construído como pavillón de infantil e ten seis aulas das que cinco funcionan como tales, sendo a sexta a biblioteca escolar (este colexio ten un proxecto de Biblioteca escolar desde o ano 2004 e participa no Plan de Mellora das Bibliotecas Escolares desde a súa primeira convocatoria).
Esta situación condiciona a dinámica do centro, en aspectos negativos como o reducido número de espazos comúns, máis tamén incide directamente nun proxecto educativo que ten como eixo fundamental as relacións entre o alumnado, as actuacións conxuntas de todos, a implicación duns alumnos/as nas actividades doutros e, en definitiva coida e estimula as relacións humanas dentro do conxunto da comunidade escolar, na que por suposto tamén incluímos ás familias.
O contorno do colexio é, por un lado, unha zona urbana correspondente ao barrio dos Mallos, cunha poboación de clase media-baixa formada principalmente por asalariados con rendas reducidas. Tamén hai unha notoria presencia de inmigrantes, como consecuencia dos baixos prezos dos alugueiros dos pisos, que na súa maioría son vivendas dos anos 60 e 70. Por outro lado, o centro linda cunha zona industrial, que se está a transformar, co paso da terceira ronda e a conseguinte urbanización. A Avenida de Arteixo nos separa do Parque de Vioño, unha nova urbanización de máis de seiscentas vivendas.
Incardinación e contribución do PD ao Proxecto Educativo.
O Plan Dixital contribúe a un dos fins educativos do centro que aparecen no PE: “O pleno desenvolvemento da personalidade e das capacidades dos alumnos e das alumnas”
Tamén contribúe a acadar os obxectivos do PE:
“Facilitar a adquisición de hábitos intelectuais e técnicas de traballo, así como de coñecementos científicos, técnicos, humanísticos, históricos e artísticos”
“Desenvolver nos alumnos a capacidade de Tratamento da información e competencia dixital”
Relación con outros Plans e proxectos do centro: traxectoria no ámbito das novas tecnoloxías, programas de innovación nos que participa.
O Plan Dixital garda estreita relación co Programa Edixgal no que comezamos a participar no curso 2021/2022.
Garda relación con distintos plans de formación que se fixeron no centro nos últimos cursos sobre competencia dixital.
Tamén se relaciona co programa de innovación “Introdución á robótica en educación primaria” no que participamos nos cursos 2019/2020 e 2020/2021.
Contribución do PD á Programación Xeral Anual do curso 23/24.
O Plan Dixital ten relación directa con un dos obxectivos xerais da programación Xeral Anual do curso 2023/2024 que será "Potenciar o emprego dos medios dixitais na práctica educativa"
O PFPP que se desenvolverá durante este curso terá relación cos Polos Creativos.
- Xustificación do Plan Dixital en relación coa normativa vixente.
Contextualización normativa en relación co Plan Dixital do noso centro:
+ Orde do 30 de maio de 2023 no apartado 12 correspondente a Plans Educativos:
"Os centros docentes deberán incluír dentro do seu proxecto educativo e funcional un plan de lectura, un plan de biblioteca, un plan dixital e un plan de actividades físicas e hábitos saudables, de acordo cos artigos 29, 30 e 31 do Decreto 150/2022, do 8 de setembro"
+ Resolución do 3 de setembro de 2021, da Secretaría xeral de Educación e Formación Profesional, pola que se ditan instrucións para o deseño, elaboración e implementación do Plan Dixital nos centros docentes sostidos con fondos públicos da Comunidade Autónoma de Galicia para o curso 2021-2022.
- Proceso de elaboración.
En setembro de 2021 constituíuse o Equipo Dinamizador do Plan Dixital formado por: a directora e 3 mestres do claustro. Os membros deste equipo participaron no curso 2021/2022 nun grupo de traballo para a elaboración do Plan Dixital seguindo as directrices da Consellería de Educación e enmarcado dentro do PFPP do centro.
En setembro de 2023 constituíuse o Equipo Dinamizador do Plan Dixital formado por: a directora e 3 mestres do claustro. Actualizouse o Plan Dixital tomando como base o que estaba elaborado con anterioridade.
