a) Socio-cultural: Ferrol é unha cidade e concello da provincia da Coruña, pertencente á comarca de Ferrolterra, terceira concentración urbana de Galicia, da cal é capital, sendo a sétima cidade máis habitada de Galicia e a terceira da provincia.
O IES “Concepción Arenal” de Ferrol conta con máis de 90 anos de historia. Públicase a súa creación na Gaceta de Madrid o 17 de agosto de 1927, constituíndose o primeiro claustro o 8 de outubro dese mesmo ano. Nos primeiros anos o centro estaba ubicado nunha sede diferente á actual, nas instalacións da que fora o antigo cárcere. Neses anos era un instituto mixto aínda que as clases estaban separadas por xénero, masculino ou feminino. O 20 de outubro de 1945 o centro cambia a súa sede para a actual na rúa Cuntis, preto da Praza de España. O 8 de abril de 1965 inaugurase a “Sección Feminina” do Instituto nunha construción anexa ao edificio principal, á espera da construción do instituto feminino que empeza a funcionar en xaneiro do 67, cedéndose o mencionado anexo á Escola de peritos durante varios anos. Desde ese curso, 66/67, o IES “Concepción Arenal” foi un centro de ensinanza masculina, ata 80/81 que volve a ser de ensinanza mixta. No ano 1998 incorpóranse ao Centro ensinanzas de formación profesional. Conta con estudos de Bacharelato para adultos e, no presente curso 2023-2024, tamén é sede dos cursos de Capacitación Dixital para persoas adultas.
O IES “Concepción Arenal” está situado en pleno centro da cidade, preto da estación de tren e de autobuses e dos distintos polígonos industriais da comarca no que se ubica a maioría do tecido industrial da zona.
b) Tipos de familias. Aínda que existe un número significativo de familias extensas nas que conviven tres xeracións distintas, a maioría de familias responden ás seguintes características:
a. Familias nucleares nas que un matrimonio convive cos seus fillos, entre un e dous no caso das familias autóctonas e entre dous e tres entre as familias inmigrantes.
b. Un número cada vez maior de familias monoparentais como consecuencia tanto dunha decisión persoal como froito da evolución social dos últimos anos.
A realidade sociocultural da cidade da lugar a un alumnado relativamente homoxéneo, dentro da súa diversidade, cunha convivencia pacífica, con independencia da súa procedencia. No centro están representadas todas as clases sociais, existindo diversidade de intereses, motivacións e capacidades entre o alumnado.
O alumnado de educación secundaria e bacharelato procede do núcleo urbano e do entorno do centro. Os CEIP adscritos ao centro son o Ludy, Belén e Recimil, este último compartido co IES “Sofía Casanova”. O alumnado de ciclos procede, maioritariamente, de toda Galicia, principalmente de Ferrol e a súa contorna e da zona Norte da Comunidade.
Cabe destacar, nos últimos anos, un aumento da porcentaxe de familias en risco dixital derivado da situación económica actual; familias que non contan cos equipamentos necesarios e conexión á rede adecuada para o desenvolvemento das tarefas e familias con descoñecemento do emprego das novas ferramentas dixitais empregadas polo alumnado.
O Plan Dixital forma parte do Proxecto Educativo do Centro. Durante este curso, incorporado á PXA a través do PFPP coma un dos itinerarios principais deste, aberto á participación de todo o profesorado e con previsión de continuidade para os vindeiros cursos tal e como se mostra no Plan de Acción que se desenvolve máis polo miúdo no apartado 3 do presente documento.
A elaboración do Plan Dixital realizouse tendo en conta en todo momento as instrucións dadas polo equipo ADIX asesor do Centro a través da aula virtual creada ao efecto e das dúas sesións de formación recibidas polo equipo encargado da elaboración do documento.
A responsabilidade da elaboración do Plan recaeu no Equipo Directivo -anovado no presente curso- e no Coordinador de TICS, así mesmo fíxose partícipe a todo o profesorado a través da difusión das instrucións, informes, formacións e fases do proxecto a través do correo electrónico e das reunións do claustro de profesorado que se fixeron ao longo do curso.
