1. Introdución
1.1. Datos básicos do centro
O Ies Celanova Celso Emilio Ferreiro está situado no Claustro do Poleiro do Mosteiro de San Salvador de Celanova (Rúa Fernández Losada s/n).
Contamos con web propia, iescelanova.gal, e impartimos ESO, Bacharelato e FP Básica. Durante este curso tivemos de 344 alumnos e alumnas e 42 docentes.
1.2. Contextualización do Plan Dixital no centro. Contribución ao Proxecto Educativo do Centro
O IES Celanova Celso Emilio Ferreiro (http://iescelanova.gal) é un centro cunha personalidade claramente marcada polo lugar onde se atopa: habitamos nun mosteiro bieito e iso condiciona o noso xeito de traballar: o propio edificio é un axente educativo. Conta cun claustro estable e cun alumnado de diversa procedencia xeográfica e diverso nivel socio-cultural, pero en xeral pouco disruptivo, bastante participativo e cun baixo nivel de absentismo. Un dos nosos lastres é a distribución demográfica: unha gran parte deste alumnado está espallado por núcleos moi dispersos da nosa área xeográfica, algúns realmente apartados e faltos de servizos (transporte, sanidade ou mesmo internet). Así, unha das prioridades do centro é actuar como elemento integrador e igualador deste alumnado periférico.
Unha das nosas fortalezas como institución educativa é a Biblioteca. Non só como espazo senlleiro (é a antiga biblioteca do mosteiro) senón como equipo humano e dinámica de traballo. Da biblioteca neste senso amplo parten moitos dos proxectos nos que participamos, así que se configura como unha importante factoría de ideas á hora de realizar actividades de centro, campañas, colaboracións coa comunidade educativa e un longo etcétera. No seu equipo están implicados, dun xeito ou outro, a maioría dos departamentos didácticos, polo que diversos perfiles docentes están a traballar nunha mesma dirección.
É habitual que no centro se traballen metodoloxías activas, traballos por proxectos e interdisciplinares, e é habitual tamén que algúns deles se presenten en formato audiovisual, cuestión que queremos potenciar neste curso.
As razóns mencionadas anteriormente impúlsannos a estar presentes en diversos programas e a participar nalgúns certames, coa finalidade de visibilizar o traballo que aquí se fai e, por que non, aumentar a nosa autoestima como colectivo rural e apartado pero que intenta non ser menos que outros centros con situacións máis favorecedoras: por exemplo, recentemente acadamos varios premios en Educación
por Proxectos, o distintivo de calidade do MEC "Sello de vida saludable" ou o Sello de Cooperación Bibliotecaria concedido polo MEC, así como programas de corte máis científico-tecnolóxico como o proxecto Empoléirate na Ciencia ou o proxecto Road to CERN. Todo elo con metodoloxía por proxectos, interdisciplinar e colaborativa.
No noso entorno o envellecemento da poboación é moi evidente, cunha pirámide de poboación case invertida que ven dada por un éxodo da xuventude á hora de atopar máis e mellores oportunidades formativas e laborais ou mellores servizos. A nosa meta é que o alumnado que queda poida desenvolver todo o seu potencial na medida das nosas posibilidades.
Todo isto non será posible sen que os profesores, é dicir, nós, esteamos na vangarda en canto a metodoloxías, didácticas innovadoras e dominio dos recursos dixitais. Dende fai anos intentar estar á altura nestas cuestión, sendo un dos centros TIC da “primeira xeneración”.
Para continuar a nosa formación durante o curso 22/23 retomaremos o PFPP que iniciamos xa fai dous cursos, e cuxa liña dixital engadimos neste que remata, e trataremos de coordinalo co resto dos programas nos que traballa o centro: CPInnova, Proxecta (en varias liñas) e PLAMBE.
1.1. Breve xustificación do mesmo
As instancias superiores sinalaron este curso 21/22 como o idóneo para poñer en marcha o novo Plan Dixital dos centros, contextualizado na seguinte normativa:
· Art. 111 bis, Art. 121 e Art. 132 da LO 2/2006, de 3 de maio, de Educación
· Disposición adicional quinta da Resolución do 17 de xuño de 2021, da Secretaría Xeral de Educación e Formación Profesional, pola que se ditan instrucións para o desenvolvemento das ensinanzas de EI, EP, ESO e bacharelato no curso académico 2021-2022
· Disposición adicional terceira da Resolución do 18 de xuño de 2021, da Secretaría Xeral de Educación e Formación Profesional, pola que se ditan instrucións para o desenvolvemento dos ciclos formativos de FP do sistema educativo no curso 2021- 2022
· Resolución do 3 de setembro de 2021, da Secretaría xeral de Educación e Formación Profesional, pola que se ditan instrucións para o deseño, elaboración e implementación do Plan Dixital nos centros docentes sostidos con fondos públicos da Comunidade Autónoma de Galicia para o curso 2021-2022
1.2.
1.3. Proceso de elaboración
Comezamos o primeiro claustro 21-22 co aviso inminente de que este curso había a obriga de abordar o proceso de elaboración do Plan Dixital. Tamén con moita présa incluímolo no noso PFPP, e formamos o Equipo de Dinamización.
Sen saber demasiado ben en que acabaría a cousa, fomos realizando as fases pertinentes. Por sorte sempre se nos atendeu cando precisamos axuda, e sen máis, pasamos por todas as fases do proceso: Selfie, Test CDD, Análise Dafo, Plan de Acción e finalmente a redacción deste PD.
