XUSTIFICACIÓN DO PLAN NO CENTRO E CONTRIBUCIÓN AO PROXECTO EDUCATIVO
O CEIP Plurilingüe de Toques atópase situado no concello rural de Toques, cunha extensión de 77,93 km² e está conformado por 10 parroquias, presentando deste xeito unha poboación moi dispersa. O centro dá cabida a todo o alumnado das etapas de Ed. Infantil e Primaria. Non hai centrovde educación secundaria, estando adscritos ao “IES de Melide”, no concello limítrofe de Melide. En canto ao acceso as tecnoloxías, presentanse dificultades para a conectividade por tratarse dunha zona rural pero todo o alumnado ten acceso a conexión a internet. A pesar disto, o seu uso da tecnoloxía redúcese, logo do análise dos datos recadados durante este curso escolar 2021-2022, a un uso lúdico (videoxogos e redes sociais).
Debemos por tanto facer fincapé no emprego e desenvolvemento de metodoloxías que integren o uso das TIC, TAC, e TEP como un vehículo para acadar os obxectivos marcados no currículo e que poñan en valor as posibilidades formativas deste tipo de recursos xa que nos atopámonos nunha realidade na que o alumnado/comunidade educativa descoñece por completo o funcionamento/valor que ten o tratamento da información na rede, a domótica, robótica e programación, realidade virtual ou aumentada ou edición dixital entre moitas outras, para o proceso de ensinanza-aprendizaxe así como para o seu desenvolvemento persoal e profesional. A gran diversidade que nos atopamos nas aulas é outro piar, debendo dar resposta a múltiples situacións con alumnado NEE e NEAE, polo que a introdución de recursos tecnolóxicos na aula terá un impacto moi positivo na inclusión e no desenvolvemento das competencias deste alumnado.
Este plan estará vinculado aos seguintes proxectos do centro: • Contratos-programa e Plan Proxecta • PLAMBE: desenvolvemento dun proxecto documental integrado (PDI) no centro. • Proxectos de aula • EDIXGAL • ABP (aprendizaxe baseado en proxectos) polo que este plan será un dos principais vehículos para a implantación e desenvolvemento desta metodoloxía por parte do profesorado titor e especialista, contemplada no noso PEC (actualizado este presente curso escolar) e que tamén formará parte da programación xeral anual do vindeiro curso escolar.
XUSTIFICACIÓN DO PLAN DIXITAL EN RELACIÓN COA NORMATIVA VIXENTE
Durante o curso escolar 2021-2022 e segundo dita a disposición adicional quinta da Resolución do 17 de xuño de 2021, da Secretaría Xeral de Educación e Formación Profesional, pola que se ditan instrucións para o desenvolvemento das ensinanzas de EI, EP, ESO e bacharelato no curso académico 2021-2022 os centros docentes debemos elaborar un Plan Dixital para o centro educativo para ser desenvolto en cursos posteriores. Este plan foi elaborado segundo as indicacións da Resolución do 3 de setembro de 2021, da Secretaría xeral de Educación e Formación Profesional, pola que se ditan instrucións para o deseño, elaboración e implementación do Plan Dixital nos centros docentes sostidos con fondos públicos da Comunidade Autónoma de Galicia para o curso 2021-2022, para ser implantado e desenvolto por primeira vez no curso 2022- 2023. Para a elaboración deste plan, e segundo a LO 2/2006, de 3 de maio, de Educación, atendendo ao Art. 111 bis e Art. 121, identificamos os sistemas básicos de información empregados para a xestión académica e administrativa así como para o soporte do proceso de ensinanza-aprendizaxe. Toda a información, obxectivos e medidas recollidas neste plan van encamiñadas a potenciar e facilitar o aproveitamento dos recursos existentes no centro, así como para detectar novas necesidades, para unha mellora do proceso de ensinanza-aprendizaxe do alumnado, atención ás necesidades educativas existentes ou posibles do centro e do desenvolvemento e seguimento da actividade educativa e administrativa. Continuaremos a potenciar o emprego de entornas virtuais de aprendizaxe proporcionados pola Consellería de educación (EVA-EDIXGAL e Aula Virtual MOODLE) e o emprego de recursos TIC, TAC e TEP para a aplicación dunha metodoloxía ABP (aprendizaxe baseado en proxectos) por parte do profesorado participante no PDI do centro educativo así como a consecución dos obxectivos recollidos no Proxecto educativo do centro (PEC) por parte de toda a comunidade educativa. . Finalmente, segundo recolle o Art. 132 da LO 2/2006, de 3 de maio, de Educación, a dirección do centro velará pola correcta implantación e desenvolvemento deste plan dixital, promovendo innovacións pedagóxicas, novas formas de organización e facendo chegar á Administración educativa todas as necesidades e plantexamentos da comunidade educativa. Así mesmo velará porque este plan dixital forme parte da planificación e organización do centro e que así se recolla nos respectivos documentos de centro.
PROCESO DE ELABORACIÓN
Para a elaboración deste proxecto tivéronse en conta os seguintes principios: • A resposta á realidade social resultante do uso xeneralizado das tecnoloxías da información e comunicación en múltiples aspectos da vida cotiá. • O enfoque cara unha comprensión integral do impacto persoal e social da tecnoloxía e unha reflexión ética acerca da relación entre tecnoloxías, persoas, economía e medio ambiente. • A transformación dixital que inclúa unha visión da competencia dixital máis moderna e ampla, acorde coas recomendacións europeas relativas ás competencias clave para a aprendizaxe permanente. No caso do noso centro, ao tratarse dun centro de 3 unidades, as funcións correspondentes ao equipo de dinamización do Plan Dixital recaeron sobre a dirección do centro educativo.Para deseñar con éxito a elaboración do plan dixital desenvolvemos no centro un PFPP. En primeiro lugar realizamos unha análise da situación inicial do centro. Para isto empregamos a ferramenta de diagnose SELFIE,para valorar a competencia dixital media do centro e o Test de Competencia Dixital Docente (CDD) que permitiu ter un informe individual do nivel competencial de cada mestre/a. A partir de aquí, e coa información recadada, realizamos unha análise DAFO para seleccionar as liñas fundamentais do noso Plan Dixital. Unha vez sinaladas as liñas de actuación, coa colaboración da totalidade do profesorado do centro e dos informes realizados, marcámonos uns obxectivos smart e actuacións concretas para a consecución de ditos obxectivos que forman parte do Plan de Acción deste plan dixital e que serán desenvoltas durante o curso 2022-2023.
