MATRICULA PARA O VINDEIRO CURSO

INFORMAMOS DE QUE TODO O ALUMNADO QUE SOLICITOU PRAZA PARA O VINDEIRO CURSO NO NOSO CENTRO FOI ADMITIDO E ASIGNADO NA AULA ESCOLLIDA.

 

A FORMALIZACIÓN DE MATRÍCULA A LEVAREMOS A CABO TAL E COMO RECOLLE A NORMATIVA ENTRE OS DÍAS 1 E 10 DE XULLO.

A NOSA ESCOLA

COÑECE A NOSA ESCOLA

 

PARA VISITAS PUNTUAIS CONCERTAR CITA PREVIA

(Teléfono - 986622775 // E-mail - cra.tominho@edu.xunta.gal)

PROPOSTAS SEMANA DO 25 AO 29 DE MAIO

CANTAS PEDRAS TEN A TÚA TORRE

Hoxe propóñoche un desafío moi divertido.

Trátase de construír unha torre con pedras.

Cantas pedras es capaz de amontoar?

Logo de construír a túa torre anímote a que a debuxes nun papel e escribas ao lado o número total de pedras que a conforman.

Que gana de ver as túas construcións!

 

ARTE CON XEO

En diferentes recipientes introduciremos elementos naturais como follas, flores, anacos de froita,ramas… faremos unha composición que nos guste, engadiremos auga e… ao conxelador!

Podemos poñer o extremo dun cordón forte (tipo "trapillo" ou cordón dos zapatos) dentro da auga deixando o outro fóra para que cando o saquemos conxelado poidamos colgalo nunha árbore, nun muro…

Esperar ata o día seguinte que estea conxelado. Sacalo e poñelo no lugar escollido e admirar a nosa obra. Observar canto tempo necesitou estar no conxelador e canto tempo tardou en desaconxelarse.

    

Podedes sacarlle fotos ao resultado e compartilas con quen queirades!

 

BANDEXA DE TRAZADO

Con esta proposta elaboraredes a vosa propia BANDEXA DE TRAZADO, na que poderedes practicar diferentes grafías, letras, trazos...

Necesitaredes:

  1. Sal fino.
  2. Xices de cores.
  3. 1 caixa de forma cadrada e non moi alta (de madeira, un tupper ou incluso unha caixa de zapatos rebaixándolle a altura cun cutter ou unhas tesoiras).
  4. 1 anaco de cartón, un pouco máis estreito que a caixa que escollades.
  5. 1 pinza da roupa.
  6. Anacos de folio.
  7. Rotuladores.

 

Primeiro iredes colocando pequenas cantidades de sal sobre un cartón, e colocando os xices en posición horizontal pintarédela da cor ou cores que máis vos gusten. Faredes isto ata ter pintada todo o sal que necesitedes, tendo en conta o tamaño da caixa que ides empregar para facer a vosa bandexa (o sal simplemente ten que cubrir o fondo da mesma, para que ao facer os trazos estes se marquen mellor). Se non tedes xices ou algún material para darlle un toque de cor ao sal, podedes deixalo branco ou incluso empregar outros materiais como pan raiado ou area.

 

Posteriormente introducides o sal na caixa. Despois elaboraredes nos anacos de papel os modelos de trazado para practicar, debuxándoas con rotulador (poden ser letras, debuxos, liñas rectas, curvas, espirais...).

O anaco de cartón será o soporte para estes modelos, polo que teredes que colocalo en posición vertical nun dos lados da caixa. Empregaredes a pinza da roupa para suxeitar o modelo de papel ao cartón, mentres trazades. Só falta probala, empregando as vosas mans!

 

PELAR OVOS

Material:

  1. 2 ou máis ovos cocidos.
  2. 3 recipientes.
  3. 1 morteiro

A  proposta é pelar ovos cocidos  seguindo un proceso ordenado. Nun bol ou recipiente colocar os ovos cocidos, noutro as cascas e no último os ovos pelados. Coidade que os ovos queden moi ben, sen ningún resto.

Unha vez rematado, nun morteiro machacar a casca dos ovos ata que quede moi finiña.  Esa casca picada podédeslla botar ás plantas, é un abono estupendo.

Por último, podedes facer alguna receita cos ovos cocidos : ensaladas, salpicón…  sorprendédonos!

 

  

 

CONSTRUÍR ALGO QUE FLOTE

Empregando cousiñas que atopes pola túa casa: paus de madeira, esponxas, plastilina.. Tedes que conseguir construír algo que flote na auga. Cando o teñas feito… terás que probalo a ver se o conseguiches!

Logo poderás plasmar nun papel as instrucións e elementos para a súa montaxe.

 

PSICOMOTRICIDADE

O CAMIÑO PARA SER SUPERHEROES

Para rematar o ciclo de superheroes e superheroínas, propoñeremos diferentes probas, que haberá que superar para converterse en verdadeir@s defensor@s das forzas do ben! Velaí van as probas desta semana:

1.- Espello: colocámonos diante do neno/a e el debe imitar os nosos movementos, podemos encadearlle movementos para aumentar a dificultade segundo a idade, e despois tamén podemos imitar nós os movementos que nos propoña.

2.- Escondemos as pezas dun quebracabezas e o neno/a debe buscalas e facelo o antes posible. Podemos marcarlle un tempo límite.

 

MÚSICA

Para a proposta de música desta semana anímovos a ver o vídeo e desfrutar co conto e a canción!

 

INGLÉS

-SHAPES-

 

Quedan poucas semanas para rematar o curso, polo que imos volver a traballar algunhas cousas que xa viran con anterioridade. Comezamos por as formas xeométricas (SHAPES) como as que aparecen na seguinte imaxe.

 

 

Estas son algunhas cancións para bailar e tamén localizar as formas xeométricas. As cancións xa inclúen preguntas sobre as formas xeométricas pero tamén se poden repasar as cores, preguntando por exemplo:What colour is the circle/square/triangle/rectangle? 

SHAPES SONGS WITH DEBBIE DOO:

DANCING SHAPES: 

THE SHAPE SONG:


Se vos apetece, podedes xogar a este MEMORY GAME online.Aínda que nalgunhas cartas só está o nome escrito, hai que fixarse, escoitando con atención, na palabra que din para poder facer as parellas.

https://www.kidslearningville.com/shapes-vocabulary-esl-memory-game-easy/

Para rematar,  podedes escoller unha forma xeométrica, debuxala co dedo nas costas do outro (voso pai/ nai adulto que vos acompaña) e que intente adiviñar cal é (a circle,a square,a triangle,a rectangle,a star,etc.) Logo intercambiades os roles e tócalle adiviñar a quen antes debuxou co dedo! ;) 

 

ATENCIÓN EDUCATIVA

Canción-Conto "Pedro e o lobo"

Unha canción baseada no conto clásico: "Pedro e o lobo" ou "O pastor mentireiro".

Conta a historia dun neno pastor que, ante o aburrimento, divertíase enganando aos veciños.

Reflexionar sobre o valor da honestidade, explicarlle os nenos/as que non se poden dicir mentiras porque o día que conten a verdade ninguén os crerá.

Facer un debuxo relativo a esta historia.

RELIXIÓN

ORDENA AS TÚAS COUSAS E VERÁS QUE BEN CHE VAI

Esta semana imos aprender por que é importante ser ORDENADOS. Nina é moi desordenada e perde as cousas. “Juan el molinero” cóntalle a historia de Claudia, verás o que lle pasa por non pór cada cousa no seu sitio.

 

PROPOSTAS SEMANA 18 AO 22 DE MAIO

LIMPAR CALZADO

NO DÍA A DÍA TEMOS QUE ANDAR LIMPOS E COIDAR O NOSO ASPECTO POLO TANTO IMOS LIMPAR O NOSO CALZADO.

PODEMOS LIMPAR O NOSO  CALZADO E O DAS NOSAS FAMILIAS COMO POR EXEMPLO: ZAPATOS, BOTAS,….

NECESITAMOS :

  1. UN CEPILLO DE CALZADO PARA DARLLE BRILLO.
  2. CREMA DE CALZADO (SE O ZAPATO É NEGRO, CREMA NEGRA. SE É DOUTRA COR CREMA NEUTRA,….).

 

ÁNIMO NENOS E NENAS NESTA AVENTURA DE LIMPAR O CALZADO PARA QUE CADA PISADA NO VOSO CAMIÑO DA VIDA BRILLE COMO UNHA ESTRELA.

  

 

RECITAL DE TRABALINGUAS

Hoxe propóñoche facer coa túa familia un recital de trabalinguas. Cada un de vós, por quendas, recitará os seguintes textos. Quen é capaz de dicilos o máis axiña posible sen mesturar as palabras?

Se aínda o queredes facer máis divertido, podedes poñer unha culler cunha pequena pelota enriba e recitar sen que vos caia a culler nin a pelota. Ah e que non se che escape a risa!

 

 

PÉNDULO DE SAL

Xunta a ciencia, o arte e a física cun péndulo no que o movemento fará as máis sorprendentes creacións. Unha artesanía perfecta para combinar cores.

Materiais

  • Sal de cores (podes facer a sal con po de xiz sobre sal da cociña)
  • Funil
  • Corda
  • Chinchetas
  • Cola quente
  • Papel
  • Fío

Pasos

  1. Coa axuda das chinchetas fai tres buratos, a distancia similar un doutro, no funil.
  2. Corta tres anacos de fío da mesma lonxitude (necesitas que sexan largos para poder colgar do funil dunha zona alta) e ata cada corda a cada un dos buratos. Tamén podes atar o fío ás chinchetas pinchadas con forza no funil.
  3. Colgar o funil dun soporte alto e estable coma unha porta ou un feixe.
  4. Coloca baixo o funil unha cartolina ou papel sobre o que crear os debuxos.
  5. Enche o funil de sal de cores e move o péndulo con suavidade para que se mova dun lugar a outro deixando o rastro da cor.

 

 

EFECTO DOMINÓ OU REACCIÓN EN CADEA

Esta semana imos poñer a proba a nosa paciencia e pulso. Para este xogo necesitaremos obxectos cotiáns como pinzas, lapis de cores, cartas, canicas, … Podes empregar tantos como queiras.

Unha vez teñas recolectados os materiais só tes que comezar a poñelos en equilibrio uns preto dos outros, cantos máis mellor, finalmente... provocar a reacción en cadea tirando o primeiro.

    

 

TRASVASAMENTO DE LÍQUIDOS CON ESPONXA

 

Para esta proposta precisamos dous recipientes e unha esponxa. Tamén imos empregar unha xarra.

O primeiro que facemos é dispor os dous recipientes e a esponxa sobre unha bandexa e colocar a xarra preto dela.

A continuación o neno/a debe encher un dos recipientes con auga empregando a xarra (desprazándose unicamente con ela). Unha vez que o recipiente estea cheo imos pasar a auga para o outro recipiente empregando tan só a esponxa.

 

Ao rematar vertemos a auga de novo na xarra para levala de volta. 

 

PSICOMOTRICIDADE

Con motivo da recente homenaxe que o artista de Bristol “Banksy” lle fixo ao persoal sanitario polo labor impecable que están a levar a cabo, pareceunos o momento perfecto para que os nosos superheroes e superheroinas desta semana sexan xustamente eles, os enfermeiros e enfermeiras.

Os seus superpoderes son: superhabilidade de curar feridas cando nos mancamos, supervelocidade para axudarnos axiña cando estamos enfermos, superesistencia para traballar sen descanso…e o maior poder de todos, dispoñibilidade total para estar sempre aí cando os necesitamos.

1º- CONSTRUÍMOS A NOSA ENFERMERÍA – Co material que teñamos por casa, facemos unha pequena construción na que atenderemos aos nosos pacientes.

2º- EQUIPAMOS A NOSA CONSULTA – Buscamos o material que poderemos empregar para curar aos enfermos: camisetas vellas, teas, coxíns…e podemos elaborar tamén indumentaria axeitada para caracterizarnos.

3º- BUSCAMOS PACIENTES – Algún adulto esconde pola casa diferentes bonecos e temos que atopalos o antes posible (sen desordenar), para levalos á nosa consulta e darlle os coidados que precise. (Non de calquera maneira, non esquezades que somos supersanitarios).

4º- CURAR AOS ENFERMOS – É a hora de darlles todos os coidados necesarios, neste vídeo https://www.youtube.com/watch?v=56PrvOfEqHQ tedes unha canción moi faciliña que podedes aprender para saber o que hai que facer. Asemade podemos aproveitar para limpalos, arranxalos…e por último dalos “de alta” e buscarlles un bo lugar para gardalos e que estean cómodos.

 

PARA REMATAR INTERCAMBIAMOS COIDADOS CON ALGUÉN DA CASA. TUMBADOS RECIBINDO TODAS AS ATENCIÓNS, MÚSICA RELAXANTE, FALADO EN VOZ BAIXIÑA, CARICIAS, UNHA MASAXE, UN POUCO DE ZUME…

 

MÚSICA

Esta semana propóñovos facer un xogo rítmico con culleres e coa música Alunelul.
Necesitaredes dúas culleres non moi grandes para facer o acompañamento rítmico desta melodía.
Déixovos o vídeo para que poidades practicar esta danza.
Espero que desfrutedes coa proposta.

 

INGLÉS

UNDER THE SEA III

Esta semana é a última dedicada ao mar e aos animais que viven nel. Nas anteriores xa vimos moitos nomes dos seres mariños: FISH (peixe), OCTOPUS(polbo), STARFISH (estrela de mar), SHARK (tiburón), etc.

 

O conto THE RAINBOWFISH, é a historia dun colorido peixe que semella un brillante arco da vella.

Os demais peixes dor mar, admírano, e queren ter unhas escamas tan bonitas coma as súas. Entón pídenlle se lles pode dar unha escama, pero o noso protagonista pensa que se regala as súas brillantes escamas xa non vai ser o peixe máis bonito de todas as profundidades do mar... entón, os seus amigos peixes deciden que non queren xogar máis con el.. que pode facer para remedialo?

Para saber que pasa despois e como remata, debes ver o vídeo da ligazón.

*Lembra que aínda que non entendas todo o que din, tes que escoitar con atención porque seguramente hai palabras que si recoñeces (fish, octopus, starfish...) e tamén, os debuxos axudan a comprender o que ocorre no conto.

Por certo! fíxate ben, a ver que outros animais mariños -ademais dos peixes (FISH)- atopas no conto.

 

https://www.youtube.com/watch?v=lQaz0-w-PvA

 

Agora, gustaríame que fixeras o teu propio “RAINBOW FISH”

Aproveitade para traballar as cores: yellow, orange, green, blue, purple, pink...

(Baby shark e familia píntanse de cores neste vídeo https://www.youtube.com/watch?v=frxhDwVezyI )

A técnica escóllela ti en función do que teñas por casa. Hai moitas opcións: collage, reciclando un CD, con plasti, barro, coa silueta da man, estampando ou simplemente debuxando e coloreando. Algunha ideas son as seguintes, pero podes darlle renda solta á túa imaxinación. Ah! E se hai outro animal mariño que tamén che guste, podes facelo.

 

Seguro que quedan preciosos!

 

ATENCIÓN EDUCATIVA

"BOTE DA CALMA"
 
Esta semana propóñovos unha manualidade: facer un "bote de calma".
A finalidade deste "bote" é axudar aos nenos/as a relaxarse cando estean enfadados ou teñan rabechas.
Van ver como a purpurina está moi axitada e pouco a pouco vai baixando e calmándose, iso axudarálles a relaxarse e a controlar as súas emocións.
Que materiais necesitamos?
 
OPCIÓN A: (máis sinxela)
 
-Unha botella de plástico pequena 
-Auga
-Colorante alimenticio
-Purpurina
 
OPCIÓN B:

-Unha botella de plástico pequena
-Auga tibia
-Aceite corporal
-Colorante alimenticio
-Purpurina
 
*Material opcional para que quede máis vistoso: figuriñas pequenas de plástico bóliñas de cores, estreliñas...
 
Preparación:
 
OPCIÓN A: 
 
Encher a botella de auga, engadirlle unhas gotas de colorante alimenticio e a purpurina. Axitar. *Selar o tapón con pegamento ou silicona para maior seguridade.
Para que quede máis vistoso e motivador podedes meterlle algunhas figuriñas de plástico, bóliñas de cores, estreliñas..

OPCIÓN B:
 
Botar na botella a auga tibia ata un pouco máis da metade, engadir unhas gotas de colorante e a purpurina. Axitar.
Posteriormente complétase con aceite corporal. Axítase.
*Selar o tapón con pegamento ou silicona para maior seguridade.
Igualmente ca anterior pódese engadir figuriñas de plástico, bóliñas de cores, estreliñas..
 

Anímovos a que o fagades con axuda da vosa familia e que desfrutedes moito.

 

RELIXIÓN

ACTIVIDADE EN FAMILIA

ANIMAIS DA ARCA DE NOÉ A PARTIR DE CÍRCULOS

PRECISAMOS: Folios, lapis, pinturas.

Imos debuxar animais da Arca de Noé a partir de círculos. Unha actividade moi divertida para facer en familia. ¿Quen vai debuxar?  Pode facelo papá, mamá, avós…..ou nós mesmos. Debuxamos círculos (pode ser cun vaso) e mellor un círculo en cada folla. Despois como fan no vídeo imos debuxando animais ata que adiviñemos que animal é. Ao rematar escribimos o nome e coloreamos.  Que divertido vai ser!!!!!

https://youtu.be/n-FriLAiS9s

 

 

CELEBRACIÓN LETRAS GALEGAS

Ola nenos e nenas! En conmemoración polo DÍA DAS LETRAS GALEGAS 2020 (17 de maio), dende o EDLG propoñémosvos unhas actividades para que fagades dende os vosos fogares e poidades celebrar con nós este fermoso día!

 

1. “A lingua galega tamén cura”. En que consiste? Tedes que escoller unha palabra en galego que cure (de ánimo, esperanza...) nestes tempos que corren (por exemplo: aperta, agarimo, apoio...). Nunha superficie (papel, cartón...) debedes escribila ou representala utilizando os materiais que desexedes (refugallo, material natural...), botádelle imaxinación! Enviádenos as vosas creacións mediante unha foto. Aí van uns exemplos:

  

Tamén podedes realizar unha gravación de voz explicando o motivo da elección desa palabra.

 

2. “As pitas baixo a choiva”. Sóavos? É un libro do escritor homenaxeado este ano polo Día das Letras Galegas: Ricardo Carvalho Calero.

Tedes que deixar voar a vosa creatividade e facer un debuxo inspirado no título da obra. Enviádenos as vosas propostas!

Se queredes afondar máis sobre Ricardo Carvalho Calero e as Letras Galegas, deixamos á vosa disposición os materiais proporcionados polo Seminario Galán. Premendo na seguinte ligazón accederedes a eles.

 

 


 

 

Damos as grazas de corazón a Antonio García Teijeiro, poeta dos nenos, que, xunto con Martiño, nos dedicou a fermosa lectura destes dous poemas seus para conmemorar o Día das Letras Galegas. E con elo animámosvos a todos a ler e xogar coa poesía. Como dixo este poeta: "A poesía é algo útil, que educa a sensibilidade e fai gozar da maxia e da picardía das palabras".

 


PROPOSTAS SEMANA 11-15 MAIO

MENSAXE SECRETA

Que necesitamos?

  1. Unha candea ("vela").
  2. Un folio.
  3. Unha cera ou lapis de cor.

Estás preparad@ para escribir a túa mensaxe secreta?

É moi sinxelo. Soamente debes seguir os seguintes pasos:

  1. Utilizamos a candea como se fose un lapis e escribimos a nosa mensaxe asegurándonos de que ninguén nos ve. No caso do alumnado de menor idade pode facer un debuxo ou representar as letras que queira trazar segundo as súas posibilidades, aínda que non se correspondan exactamente co trazo real, porque para eles eses trazos están a ter unha función importante nun contexto significativo.
  2. Pasamos a cera ou lapis de cor por enriba de todo o folio e aos poucos irase descubrindo a mensaxe.

 

LIMPEZA DE CRISTAIS

Unha das actividades de vida práctica que as nenas e nenos poden levar a cabo na casa é a limpeza de cristais.

Para levala a cabo precisamos:

  1. Pulverizador de auga
  2. Limpia-cristais
  3. Esponxa
  4. Pano seco 

    

 

Primeiro de todo, lévase o material á zona que imos limpar. Comezamos a limpeza de cristais pulverizando auga sobre a superficie, despois pasamos o limpa-cristais de esquerda a dereita e de arriba a abaixo. Recollemos coa axuda dunha esponxa a auga que queda no marco de abaixo e pasamos un pano seco polo cristal para eliminar os restos de humidade. 

Por último recollemos todas as ferramentas e gardámolas no seu sitio. 

 

DETECTIVES DE NÚMEROS

Con esta proposta os nenos/as serán conscientes da funcionalidade e utilidade dos números no noso día a día, concretamente no ámbito do fogar.

A proposta consiste en localizar pola casa todos os números que atopemos: os da temperatura do forno, os que hai nos programas da lavadora, no mando da televisión, no teléfono, na porta, na caixa de correo,... A medida que vaian atopando números pola casa, rexistraranos escribíndoos nun folio/libreta/cartolina e ao lado o lugar ou obxecto no que o atopamos; por exemplo: 

LAVADORA - 0, 30, 40...

FORNO - 100, 150, 180...

MANDO DA TELE - 1, 2, 3, 4, 5....

PORTA - 9

ETC.

E así sucesivamente cos diferentes números e obxectos que vaiamos atopando pola casa. É unha proposta que poderedes realizar en ratiños libres, ao longo de toda a semana, e ir aumentado progresivamente a cantidade de datos rexistrados no voso folio. Tamén podedes rexistrar mediante debuxos, fotos... ou calquera outro sistema que se vos ocorra.

 

Ao rematar, os nenos/as tomarán conciencia da gran cantidade de números que hai no seu fogar nos que habitualmente non reparamos, na utilidade que teñen, da necesidade destes números para que as tarefas domésticas se desenvolvan correctamente... en definitiva, achegaránse a eles dun xeito significativo e funcional.

 

PINTAR CON XEO

INGREDIENTES E MATERIAIS

  1. Auga
  2. Colorante alimentario
  3. Vasos (tantos coma cores queiramos crear).
  4. Unha Bandexa de xeo
  5. Papel
  6. (OPCIONAL) Paus de xeado/depresores. Incluso se non tedes, unha idea pode ser empregar pinzas de madeira desmontadas.

 PROCEDEMENTO

 

Comezaremos por engadir colorante alimentario á auga nos vasos. É importante engadirlle bastante colorante para que o trazo ó pintar sexa máis forte.

Podemos crear tantas cores como queiramos. Tendo as 3 cores primarias (azul, vermello e amarelo) podemos crear tamén outras novas.

Unha vez temos as nosas cores, porémolas na bandexa do xeo (se queremos introduciremos en cada oco os paus) es esta meterémola no conxelador.

Esperaremos a que estea ben conxelado e.... a pintar!

Cando vos apeteza pintar con eles, só tedes que ter papel dispoñible (canto máis grande mellor) e se tedes, pór un cartón debaixo para que o papel resista mellor. Sacades os xeos, deixádelos á vosa disposición e… a crear!

 

POMPEIROS CASEIROS

O primeiro que faremos será cortarlle o cu a unha botella de plástico (para esta parte pedirémoslle axuda a un familiar).

E despois faremos a nosa poción para realizar as pompas. Precisaremos: auga, xabón (mellor tipo lavapratos) e se tedes, glicerina (isto último é opcional, pero se llo engadimos as pompas serán mais grandes).

Unha vez temos a mestura feita, sacámoslle o tapón á botella, mollamos o cu cortado na auga e sopramos lentamente pola boquilla. E... sorpresa: Súperpompas!

 

VARIANTE: SERPENTE DE ESCUMA

Se lle pomos un calcetín na parte cortada do cu da botella e sopramos, conseguiremos facer unha gran serpente de escuma.

 

PROPOSTA EXTRA! PARA CONMEMORAR O DÍA INTERNACIONAL DA FAMILIA!

Logo de elaborar a árbore xenealóxica de aula, propoñémosvos facer a das vosas familias para conmemorar o Día Internacional da Familia.

 

Seguro que tes moitas preguntas sobre a túa familia, como quen eran os pais dos teus avós ou a que se adicaban cando eran mozos e mozas.

Nos próximos días podedes buscar fotos, así como lembrar e descubrir anécdotas desas persoas para despois construír a vosa árbore. Para a súa construción, ao igual que a semana pasada, podedes empregar todos os materiais que se vos ocorran. Das persoas que non atopedes fotos podedes escribir os seus nomes ou debuxar o seu rostro.

Tamén podedes incluír un lema familiar ou o alcume co que é coñecido a vosa familia.

Seguro que descubriredes moitas cousiñas que descoñeciades!

 

PSICOMOTRICIDADE

Continuamos cos superheroes e superheroinas!

MS MARVEL - "KAMALA KHAN"

 

Esta superheroina ten o superpoder de alargar as súas extremidades. Propoñemos construír uns zancos cun par de botes (de tomate por exemplo), aos que lles ataremos cordel e así simular que as nosas pernas son súper longas, coma se foramos a mesmísima Kamala Khan.

AQUAMAN

Desta volta encargarémonos da limpeza da casa. Necesitaremos un par de trapos para colocar nos pés e que os nosos pais nos boten un pouco de auga e xabón polo chan.

Temos que camiñar cos trapos nos pés por enriba da auga como se foramos Aquaman, e así de paso deixar o chan ben limpiño.

 

MÚSICA

Para a proposta de música desta semana só necesitades entrar no vídeo e desfrutar co conto. Anímovos a cantar comigo!


 

INGLÉS

UNDER THE SEA II

Para continuar co mar e os animais que viven nel imos imaxinar que somos un mariño (a sailor) que vai ao mar para explorar as súas profundidades co seu periscopio. Imos comezar cunhas cancións(facendo clic nos ligazóns). Fixádevos ben en todo o que hai baixo o mar!

A SAILOR WENT TO THE SEA https://www.youtube.com/watch?v=nFxAiWkSePk

DOWN IN THE DEEP BLUE SEA https://www.youtube.com/watch?v=7pMEQsk3c5Y

OPEN SHUT THEM  https://www.youtube.com/watch?v=Cx7e729w4YE

THE LITTLE MERMAID https://www.youtube.com/watch?v=3EWCxBegV1E

 

Cal vos gustou máis? Para rematar, imos repasar, coa axuda dun maior, o vocabulario de todo o que atopamos baixo o mar con este  xogo de cartas da ligazón:

https://tiny.cards/decks/Z8P7jAGL/under-the-sea

ATENCIÓN EDUCATIVA

VIDEO-CONTO: "El cazo de Lorenzo"

 
Este conto ensina os nenos/as a aceptar e axudar a tódalas persoas, a respectalas e darlles afecto, aínda que sexan diferentes, pero tamén a observar, descubrir e aceptar a nosas capacidades e limitacións, así como, a importancia de superalas.

Porque todos seremos moito máis felices, se en lugar de ocultalas ou escondernos, aprendemos a convivir con elas e sacarlles o lado positivo, loitando para chegar a  onde queiramos. Explicarlles ós nenos/as que o "cazo" son as distintas dificultades coas que se poden encontrar as persoas, pode significar: non poder camiñar, non ver, non oír, non poder comunicarse... .

Porque ao final... cada un de nós temos un cazo!

Anímovos a que fagades un debuxo de Lorenzo co seu cazo.

RELIXIÓN

O LEÓN DA ARCA DE NOÉ

Esta semana imos facer outro animal da Arca de Noé: un LEÓN moi sinxelo. 

Soamente precisamos de dous rolos de papel hixiénico, unhas tesoiras, un cúter, un pegamento e pintura. Quero ver como vos queda, eu tamén vou facer o meu. Xa temos un elefante e un león, cal será o próximo?

https://youtu.be/H63xdjuaEVA

 

 

 

 

PROPOSTAS SEMANA 4 AO 8 DE MAIO

COIDAMOS AS NOSAS PLANTAS

Con esta proposta traballaremos o respecto pola natureza a través do coidado das plantas que teñades no voso fogar.

Para elo poderedes elaborar unha bandexa/caixa similar a esta, que poderedes gardar ou deixar nun lugar fixo do voso fogar para que cada vez que unha planta necesite coidados, dispoñer de todo o material necesario. 

Necesitaremos:

  1. Unhas tesoiras, preferiblemente pequenas.
  2. Unha cesta ou recipiente para meter as follas.
  3. Un pincel para quitarlles o po.
  4. Unha esponxa.
  5. Un pulverizador (opcional).
  6. Unha xarra/botella de pequeno tamaño.

Comezaremos empregando a tesoira para quitarlle á planta aquelas follas ou anacos que estean secos ou estragados, depositándoos na cestiña. Despois, co pincel, limparémoslle o po que as follas poidan ter enriba, metendo a man por debaixo para suxeitalas tendo coidado de non rompelas. Posteriormente, humedeceremos a esponxa cun pouco de auga e iremos limpando as follas unha por unha. Se dispoñemos de pulverizador, utilizarémolo para humedecer as follas da planta.  Por último empregaremos a xarra para regala na terra.

Semanalmente, poderedes facer unha revisión do estado das plantas da casa e valorar se algunha necesita coidados. Neste caso poderedes coller a caixa/bandexa deseñada nesta proposta e poñervos mans á obra!

 

3 EN RAIA CON TAPAS RECICLADAS

Nenos e Nenas imos xogar ao tres en raia. Para elo necesitamos tapas de cores de botes que teñades na casa e tamén un cartón cadrado e coa axuda das vosas familias debuxamos con rotuladores as liñas para poder xogar ao tres en raia.

O material que necesitamos son tapas de botes, cartón e rotus.

Déixovos un exemplo do tres en raia e a xogar

 

MACEDONIAS E ZUMES

Para calquera hora do día en función da dispoñibilidade das familias: almorzo, sobremesa , merenda ou cea.

Aproveitade para introducir novos sabores, novo vocabulario e diferentes formas de comer as froitas.

OBXECTIVOS:

  1. Descubrir distintas formas de tomar froita
  2. Experimentar coas características sensoriais das froitas (forma, tamaño, textura, cor, olor e sabor)
  3. Desenvolver a motricidade fina (pelar, cortar, espremer)
  4. Incorporar novos sabores e novo vocabulario.
  5. Desenvolver hábitos de orde e hixiene.
  6. Facer transvasamentos de líquidos e sólidos.

 

MATERIAIS:

  1. Froitas variadas
  2. Táboa , coitelo ou pelador
  3. Cunca
  4. Espremedor/batedora de man.
  5. Outros útiles de cociña precisos (panos, vasos/pratos, culleres, escorredoiro, relador…)

**Variante: podedes probar a introducir a froita en ensaladas

 

 

PAPEL RECICLADO

Son moitas as árbores que se tallan no día a día para producir o papel que empregamos nas nosas casas. Por iso, hoxe propóñovos que o fagamos nós mesmos.

Que necesitaremos?

  1. Papeis usados e de xornal.
  2. Auga.
  3. Un batedor/batedor de vaso.
  4. Un cunco.
  5. Unha tea.
  6. Flores ou follas para decorar (opcional).

E agora que facemos?

Seguiremos uns pasos moi sinxeliños:

  1. Cortamos os papeis en anaquiños pequenos e ímolos introducindo no batedor/batedor de vaso.
  2. Engadimos auga e batemos todo ata conseguir unha mestura espesa.
  3. Retiramos a mestura e estendémola sobre unha tea.
  4. Colocamos outra tea enriba e prememos para quitar o exceso de auga.
  5. De xeito opcional podemos poñer na masa húmida flores, follas ou outro material que teñamos a man.
  6. Deixámolo secar e cando se evapore toda a auga xa está listo!


 

 

 

 

PSICOMOTRICIDADE

Terceira entrega de superheroes/superheroinas...

WONDERWOMAN

 

Desta volta, a “muller marabilla”, acompañaranos para axudarnos a sortear diferentes obstáculos. Para facelo colocamos un recorrido circular no que non se poderá tocar en ningún momento o chan, axudándonos de calquera tipo de material: coxíns, cadeiras, mesas...

PROFESOR XAVIER

 O profesor Xavier é famoso por ter a mente máis potente de todos os súper heroes, e por este motivo traemos estas propostas de xogos nos que temos que intentar manexar as bólas sen tocalas, como se o fixeramos coa mente.

MÚSICA

OS LADRÓNS E OS TESOUROS

Para proposta desta semana necesito que imaxinedes que roubastes un tesouro. Agora tedes que fuxir con sixilo co botín, pero tedes que ter coidado porque pode haber alguén que nos descubra.

Pista 1:Ladróns.

Escoitade a música e correde nas puntas dos pés ou camiñade con moito coidado. Nas pequenas pausas podedes parar e asegurarvos de que ninguén vos ve.

Pista 2: Detectives ,tralas pegadas dos ladróns.

Agora tócavos ser os detectives que saen na procura dos ladróns de tesouros.

Non se vos pode esquecer levar una lupa (se non tedes ningunha nas vosas casas podedes facer unha de cartón ou mesmo que sexa unha lupa imaxinaria).

Camiñade seguindo o ritmo da melodía (dando tres pasos e facendo unha parada no paso tres) mentres buscades as pegadas dos ladróns. 

Pista 3: Persecución!

Os detectives non van deixar escapar aos ladróns, pero estes son moi astutos e veloces. Nesta última pista tedes que escoitar a música e crear a propia vosa historia de persecución entre os ladróns e os detectives.

Para facer a persecución necesitaredes a axuda da vosa familia (irmáns, pais, avós). Tedes que facer dous grupos e decidir que grupos serán os ladróns e que grupo os detectives. Podedes colocarvos nun extremo do espazo e o outro equipo no espazo oposto.

Cada vez que se escoite a pista dos ladróns estes moveranse e o mesmo cos detectives.

 

Espero que desfrutedes con esta proposta

INGLÉS

UNDER THE SEA

Esta semana imos tratar sobre o mar (THE SEA) e os animais que viven nel, comezando polos peixes (FISH).

Primeiro, preséntovos a historia dun Rei que quería comer un peixe fresco coa súa familia, polo que decidiu saír a pescar co seu amigo elfo. Lograrían capturar ao peixe máis grande do lago?

(Nenos, lembrade que aínda que non comprendades todo o que din, seguindo e atendendo aos debuxos pódese entender perfectamente o que sucede).

https://www.youtube.com/watch?v=LbX6APmJkEs

Para seguir, unhas cancións. How many fish can you see in the videos? One, two, three, four, five...

https://www.youtube.com/watch?v=gGRvRT0ysFQ

https://www.youtube.com/watch?v=dg0cQtVisLw

https://www.youtube.com/watch?v=GR2o6k8aPlI&t=18s

Por último, podedes debuxar varios peixes de cores e logo recortalos individualmente. Estes deben estar dispostos nunha mesa ou superficie para xogar ao “ What's missing?”.

Para esta actividade son necesarias dúas persoas. Vós pechades os ollos (Close your eyes) e mentres a outra persoa quita un peixe do montón. Cando abrades os ollos (Open your eyes) tedes que adiviñar de que cor é o peixe que falta e dicilo en inglés. Outra variante é quitar varios peixes e, ademais da cor, intentar adiviñar cantos peixes faltan mediante conteo e así repasamos tamén os números en inglés.

ATENCIÓN EDUCATIVA

Curtametraxe : "Rato en venta"

https://www.youtube.com/watch?v=XxvLDL8Smck

Conta a historia dun rato que ten unhas grandes orellas, é o animal que máis custa vender na tenda de animais. Pero chega un neno cunhas calidades especiais que encontra nese animaliño toda a beleza do mundo.

Esta historia resalta o valor da "empatía". A empatía é a capacidade de pórse no lugar do outro e comprender o que sinte ou pensa facendo así que a comunicación sexa respectuosa, entendendo as vivencias, emocións e opinións da outra persoa.

RELIXIÓN

¿ES OBEDIENTE?
Esta semana imos ver por que é importante ser obediente. Obedece ás persoas que nos queren porque o fan polo noso ben. Agora que botamos moito tempo coas nosas familias ás veces cústanos ser obedientes. Con estes pequenos contos de JUAN EL MOLIERO E NINA aprenderemos porque hai que obedecer. NINA non quere tomar o xarope e JUAN cóntalle a historia dun príncipe que foi moi obediente e tivo a súa recompensa e a dun barco chamado LUPO que non fixo caso os seus pais e levou un gran susto. Aaaah, non te perdas a cantiga do final, aprende a ser obediente dunha forma moi divertida como lle gusta a Jesús.

https://youtu.be/DmZOsY7DBOg

 

 

 

 

 

 

 

 

 

 

 

PROPOSTAS SEMANA 27 ABRIL 1 DE MAIO

PINTAMOS CON LA

Para levar a cabo esta actividade precisaremos:

  • La ou fío groso
  • Papel ou cartolina
  • Cola branca
  • Pinturas (poden ser acuarelas, témperas, ceras, rotuladores...)

O primeiro paso será recortar os fíos de la, mollalos na cola e pegalos no papel facendo o deseño que máis nos guste (curvas, liñas rectas, garabatos...)

Unha vez que estea seco e os fíos non se movan podemos coller pinturas para encher os distintos garabatos.

 

CONSTRUÍR E MEDIR

 Obxectivos:

  • Construír creando figuras e formas.
  • Iniciarse nas medidas de lonxitude.
  • Exercitar o conteo.

 Materiais:

  • Calquera material que teñamos na casa ou xardín que non rompa nin perigoso para os nenos e nenas (caixas, paus, tacos de madeira, rolos de papel, pezas de construción, pinzas, coxíns…).
  • Cinta métrica, metro, o noso propio corpo.
  • Papeis e lapis ou rotuladores para debuxar e escribir/cámara de fotos

Con diversos materiais que teñamos na casa ou no xardín podedes facer construcións grandes ou pequenas. Podemos aproveitar a reforzar os conceptos de:

  • Máis baixa que eu
  • Igual que eu
  • Máis alta que eu
  • Tan alta como eu

Se lles apetece poden  representala (debuxala) nun papel, poñerlle nome á súa construción e poñer canto mide de alto e cantas pezas empregou para facela.

 

 

DOBRAMOS CAMISETAS

Hoxe podemos dobrar camisetas dunha forma diferente e divertida, primeiro con axuda e despois sen ela.

Para dobrar camisetas con axuda soamente precisamos un CARTÓN:

  1. Cortamos un cartón en forma de cadrado ou rectángulo, aproximadamente do mesmo tamaño ou un pouco máis que as camisetas que imos a dobrar.
  2. Dividimos e dobramos ben o cartón de forma vertical en tres partes iguais.
  3. Cortamos o cartón polas dúas división horizontais ata a metade soamente.

 XA TEMOS TODO LISTO PARA DOBRAR CAMISETAS:

Agora xa soamente temos que colocar a camiseta enriba do cartón ben estirada e dobrar seguindo 3 pasos fáciles: dobramos a lapela dereita e abrimos, dobramos a lapela esquerda e abrimos, e facemos o mesmo coa lapela inferior. E xa temos a nosa camiseta ben dobradiña e lista para gardar.

 Agora soamente tes que probar a dobrar sen axuda!!!!!

 PUNTOS E CAIXAS

Consiste en unir puntos, pechando o máximo de caixas posible.

Poden xogar dous ou máis xogadores.

Sobre un papel debuxamos varias filas de puntos verticais e outros tantos horizontais. Os xogadores, por quendas, irán debuxando raias verticais e horizontais para conectar dous puntos que aínda non foran unidos. Cando un dos xogadores fai un trazo que pecha un grupo de catro puntos (forma unha caixa) coloca a inicial do seu nome dentro.  Cando tódalas caixas están pechadas, contamos cantas caixas levan cada inicial que obtén un punto por cada unha. Gaña o que consegue máis puntos.

  

Trátase dun xogo moi sinxelo, versátil ao que se pode xogar en calquera lugar. Favorece a práctica dos trazos , a concentración ,atención  e o desfrute de xogar en familia.

  

A ÁRBORE DA PANDEMIA

O agrónomo e guía ambiental Emilio Bertoncini propuxo hai uns días plantar unha árbore para lembrar este momento que estamos a vivir. Como el sinalaba, a pandemia rematará e será recordada nos libros de historia durante moitas décadas, tanto polo que significou como polo cambio que suporá na nosa forma de vida.

Non se trata de plantar para esquecer, senón de transformar a memoria nun signo de esperanza e un xesto positivo cara o planeta. Unha árbore é unha forma de vida e deixará testemuño vivo durante décadas axudando a mellorar o ecosistema.

Propóñovos plantar un aguacate a partir do seu óso. Soamente deberemos seguir uns pasos moi sinxeliños:

  1. Partimos o aguacate á metade e retiramos o seu óso.
  2. Lavámolo moi ben.
  3. Collemos tres escarvadentes e cravámolos ata a metade no óso.
  4. Poñemos auga nun vaso.
  5. Colocamos o óso no vaso.
  6. No caso de ser necesario, podemos poñer máis auga.
  7. En 3 ou 4 semanas comezará a saír a raíz.
  8. Cando a raíz chegue aos 10 cm, retiramos o óso do vaso.
  9. Retiramos os escarvadentes do óso.
  10. Collemos unha maceta non moi grande e poñémoslle pedras no fondo para favorecer a drenaxe. Reenchemos a maceta con terra.
  11. Plantamos e regamos o óso. Colocarémolo de tal xeito que unha metade do óso estará dentro da terra e a outra fóra.
  12. Nun mes aproximadamente comezarán a saír as primeiras follas da nosa árbore.

PSICOMOTRICIDADE

Segunda entrega superheroinas e superheroes...

HULK

Colocamos coxíns polo corredor e explicamos ao neno/a que debemos esmagalos porque dentro deses coxíns hai ferramentas para crear “robots malos”, e que debemos destruílas  (se non vos gusta esta explicación podedes usar outra).

Para facelo debemos achegarnos aos coxíns e saltar sobre eles repetidas veces, unhas veces cun pé, outras cos dous pés xuntos, coa barriga... despois  sentaremos enriba mentres facemos ruídos e xestos coma se foramos Hulk...

IRONMAN

Colocaremos diversos obxectos ao final do corredor, luvas, cubos, pinzas, diademas, botas de auga... etc (o que queirades). Despois poñeremos varios obstáculos (os coxíns utilizados antes por exemplo) no chan antes de chegar aos obxectos. O neno terá que  superar os coxíns saltándoos, subindo enriba, bordeándoos… cada vez de distinta maneira e debe ir levando os obxectos ao final do corredor. Eses obxectos serán os que creen despois a súa armadura de IronMan. Tras collelos todos, podemos vestir o neno de “IronMan caseiro”.

 MÚSICA

IMAXINA QUE ES…

Para a proposta desta semana necesitaredes toda a vosa imaxinación e moitas ganas de divertirvos. (A música a tedes en "adxunto" abaixo de todo)

Pista 1: propóñovos que imaxinedes que sodes PIRATAS. Estades nunha pequena illa deserta ou abordo dun gran barco pirata. Podedes disfrazarvos co que teñades polas vosas casas (usar una tea para a cabeza, facer un parche nun ollo, elaborar un mapa do tesouro…). Deixádevos levar pola música e creade as vosas historias.

 

Pista 2: agora tedes que imaxinar que sodes unhas SEREAS. Seguides na mesma illa pero xa non estades en terra senón no mar. Escoitade a música das sereas e movédevos polo espazo, bailade, improvisade, usade teas para facer desprazamentos…

 

Pista 3: xa por último, propóñovos que escoitedes a última pista de música. Nesta última pista van aparecer os piratas e as sereas. Intentade recoñecer e diferenciar a música dos personaxes, e descubride que pasa ao final… hai unha sorpresa!

Sodes vós os que decidiredes como queredes que remate a historia. 

 

Espero que desfrutedes con esta proposta!

INGLÉS

Seguimos cos animais salvaxes, pero esta vez no seu hábitat: THE JUNGLE. Estades listos para explorar e descubrir que animais se agochan na xungla? Botade un ollo ás seguintes cancións. 

WALKING IN THE JUNGLE: https://www.youtube.com/watch?v=GoSq-yZcJ-4

 

WALKING THROUGH THE JUNGLE: https://www.youtube.com/watch?v=NfDUPPuC2wQ

 

Ademais, na xungla podemos atopar formas xeométricas: TRIANGLE (triángulo), CIRCLE (círculo) or SQUARE(cadrado). A ver cantas e cales recoñecedes neste vídeo:

SHAPES IN THE JUNGLE: https://www.youtube.com/watch?v=FFRerpnAaGY

 

Quen se anima a facer un debuxo dun animal salvaxe usando algunhas formas xeométricas (TRIANGLE, CIRCLE or SQUARE)??

Para continuar, e coa axuda dun maior para manexar o rato, podedes xogar a  “COUNT AND FIND” (contar e atopar) os diferentes animais salvaxes. Cantos hai?

Preme no seguinte enlace para xogar

 

E por último, unha canción que xa coñecedes pero que é ideal para brincar ..like a monkey!

https://www.youtube.com/watch?v=ZhODBFQ2-bQ

ATENCIÓN EDUCATIVA

VIDEO CONTO : "EL PEZ ARCO IRIS"
Un conto que relata o valor da amizade e xenerosidade, o ben que nos podemos sentir cando compartimos algo cos demais, e se lle engadimos que iso que compartimos, é algo moi importante para un mesmo, a sensación é mais especial. Iso é o que lle pasa ao protagonista desta historia.
 
Reflexionar sobre a importancia de compartir. Compartir fai amigos.

Podedes facer unha manualidade relativa o conto que sería debuxar o protagonista do conto "O peixe arco iris" e decorar as súas escamas con calquera tipo de material: ceras, papeis de cores, brillantina...
 
 
RELIXIÓN
 
Esta semana imos facer unha actividade de percepción visual. Temos que  atopar nesta imaxe dunha igrexa unha CRUZ, dúas VENTÁS, tres CANDEAS e catro COROAS DE FLORES. Seguro que o conseguides moi rápido!!!!
 

 

Distribuir contido