Introdución
abalarMóbil é unha aplicación que permite ás familias consultar a información académica de calquera dos seus fillos a través do teléfono móbil.
A Xunta de Galicia, coa finalidade de aumentar o acercamento entre o profesorado e as familias, ofrece estes servizos móbiles de Abalar para permitir aos responsables do alumnado poder seguir a actividade dos seus fillos e fillas desde calquera lugar.
Trátase dunha aplicación móbil para os sistemas operativos máis difundidos: iOS e Android.
A descarga desta aplicación no teléfono móbil faise dende Apple Store (se o sistema operativo é iOS) ou dende Play Store (se o sistema operativo é Android). Pode capturar os seguintes códigos QR para descargar abalarMóbil.
abalarMóbil está dispoñible para que as persoas responsables do alumnado poidan acceder ao seu perfil de espazoAbalar dende o seu teléfono móbil e así utilizar as súas funcionalidades desde calquera lugar de forma cómoda e rápida.
Ao longo desta guía, mostraranse as diferentes funcionalidades e servizos que as familias poden utilizar dende o seu teléfono móbil.
Desde a aplicación poderemos:
- Acceder aos datos persoais.
- Consultar as cualificacións.
- Comprobar e xustificar as faltas de asistencia.
- Consultar o apartado de faltas de conduta.
- Solicitar, anular e consultar o estado dunha titoría.
- Consultar os datos do centro educativo.
- Consultar os avisos ou notificacións.
- Consultar as incidencias.
- Acceder ao servizo de mensaxería.
- Modificar o idioma da aplicación.
- Xestionar as notificacións que se reciben no dispositivo.
- Contactar co servizo técnico.