A rede dos centros. Voz e datos.

Algúns conceptos básicos sobre protocolos e estándares de rede

Un protocolo é un conxunto de regras para comunicarse. A familia de protocolos de Internet TCP/IP é un conxunto de protocolos de rede nos que se basea Internet e que permiten a transmisión de datos entre redes de ordenadores. O protocolo TCP/IP é a base de Internet, serve para enlazar e intercomunicar ordenadores que utilizan diferentes sistemas operativos.

Un enderezo IP é unha etiqueta numérica de 32 bits agrupados en 4 octetos que identifica, de maneira lóxica e xerárquica, a un equipo dentro dunha rede que utilice o protocolo IP (Internet Protocol).

EXEMPLO:

10.63.2.57 (decimal)

01010.01010111111.01010111111.01010111111 (binario)

A máscara de rede é unha etiqueta numérica que serve para delimitar no enderezo IP cal é a parte que se corresponde co enderezo da rede e cal é a que se corresponde co enderezo do propio equipo ou host.

IP dinámica refírese á asignación dinámica (non fixa) dun enderezo IP a un equipo, de maneira que o enderezo IP asignado pode ser diferente cada vez que se conecta.

DHCP (Dynamic Host Configuration Protocol). Protocolo que permite asignar os parámetros de rede de maneira dinámica aos equipos.

Servidor DHCP é o equipo que utilizando o protocolo DHCP asigna a configuración a outros equipos da rede.

(o uso de DHCP é habitual en lugares públicos e fogares)

O enderezo MAC (Media Access Control ou Control de Acceso ao Medio) é un identificador de 48 bits (6 bloques hexadecimais) que corresponde de forma única a unha tarxeta de rede. Adoitase escribir en formato hexadecimal, por exemplo: 00:02:3F:0C:44:E0

Domain Name System (DNS, "Sistema de Nomes de Dominios"). Un sistema de nomenclatura xerárquica para ordenadores, servizos ou calquera recurso conectado a Internet ou a unha rede privada. Este sistema asocia información variada con nomes de dominios asignado a cada un dos participantes. A súa función máis importante é traducir (resolver) nomes intelixibles para as persoas en identificadores binarios asociados cos equipos conectados á rede para poder localizar e direcionar os equipos. É dicir, traduce os nomes de dominio (de uso humano) a enderezos IP (de uso na rede).

Por exemplo :

A páxina www.xunta.es (para as persoas) en realidade é: 85.91.64.232

ou

01010101.01011011.01000000.11101000 (para as máquinas).

O DNS para a rede corporativa dos centros de ensino público é:

10.180.188.75