O IES Lagoa de Antela (Xinzo de Limia, Ourense) foi seleccionado na convocatoria Probleu para levar a cabo o proxecto Refuxios. A nosa proposta foi a única candidatura galega seleccionada nesta convocatoria de financiamiento de proxectos relacionados coa protección da augas oceánicas e continentais, entre máis de​​ 80 candidaturas de 19 países da Unión Europea.

Probleu é un programa europeo promovido polo Institut de Ciències del Mar, Kaunas University of Technology, INOVA+ Innovation Services, Earthwatch Conservation Education and Research Trust, Plymouth Marine Laboratory e Ocean Conservation Trust. Ten como obxectivo impulsar a alfabetización hídrica, un novo concepto que fai fincapé na importancia da educación ambiental ligada á auga como eixo transversal na educación formal. Para facelo, este programa da apoio a unha rede de Escolas Azuis e financia proxectos educativos innovadores sobre o océano ou as aguas continentais que teñan un impacto significativo no alumnado e na cidadanía. 

Refuxios foi seleccionado xunto con outros 10 proxectos que contribúen á compresión e conservacón dos ecosistemas acuáticos, tanto mariños como de auga doce, de escolas de países como Rumanía, Reino Unido, Suecia, Francia, Estonia e España. Así mesmo todos eles contribúen á Misión Europea "Restaurar as nosas augas e océanos”-. Trátase de iniciativas diversas que van dende a creacion de refuxios mariños e pradeiras de Posidonia no CIFP Can Marines en Baleares 

ata a creación de refuxios acuáticos como hotspots de biodiversidade no Centro de formación Folgado S.L.U en Valencia. Todos os proxectos, incluido o noso, comezaron o 1 de abril e terán unha duración de 11 meses.

A nosa proposta ten como obxectivo concienciar ao alumnado do IES Lagoa de Antela sobre o valor ambiental dos pequenos humidais. Facendo alusión a antiga Lagoa de Antela, o alumnado vai deseñar e levar a cabo diversas accións para crear unha zona bio-inclusiva nunha zona do patio, co obxectivo de incrementar a biodiversidade na mesma. Ao longo do proxecto crearase, nela, un pequeno humidal xunto con diversas estruturas para dar refuxio tanto aos animais como ás persoas.  Refuxios é unha propsta multidisciplinar que bota a andar coa colaboración das materias de Educación Plástica Visual e Audiovisual e Bioloxía e Xeoloxía de 1º ESO, e tamén de Lingua Galega e Inglés do mesmo curso. As accións están deseñadas principalmente para os 92 alumnos e alumnas deste curso, pero tamén contaremos con outros niveis nas distintas actividades que levemos a cabo. 

Ao longo deste curso faremos unha serie de actividades para achegar técnicas de construción con materiais naturais, mediante o trenzado ou a cestería, ao alumnado. Tamén faremos especial fincapé na relación entre Arte e Natureza, dando a coñecer propostas artísticas que exploran esta relación como o Land Art. Con todo, o proxecto rematará no curso académico 2024/2025, polo que finalizaremos a creación das estruturas de refuxio durante o curso que ven.

Refuxios pretende involucrar a diferentes entidades e persoas ao longo do proxecto xa que a participación doutros axentes como familias do alumnado ou do concello son outro dos piares da proposta. Trataremos de implicar ao centro veciño, IES Cidade de Antioquía, nalgunhas das actividades e procuraremos sinerxias con outros centros de ensino de Galicia que posúen charcas nas súas instalacións, poñendo en valor este pequeno ecosistema como un valioso recurso educativo. 

ProBleu é un programa coordinado por:

No que participan os seguintes partners: