Dende o Departamento de Tecnoloxía e Física e Química lanzamos o primeiro Consurso de Carriliñas, unha apaixoante competición na cal deberedes combinar coñecementos e creatividade. Propoñémosvos carreiras de carrilanas de tamaño reducido: as carriliñas.
Todos partiredes da mesma base: un taco de madeira de dimensións 4,5 cm de ancho, 4,5 cm de alto e 20 cm de largo. O resto de compoñentes (rodas, aleróns, etc) deberedes conseguilas vós (fabricándoas ou reciclando).
Esta é unha actividade complementaria, polo que a construción da vosa carriliña realizarase no voso tempo libre e coa supervisión da vosa familia.
Qué condicións debe cumprir a túa carriliña?
1. Debe conter na estrutura o taco de madeira inicial ou parte do mesmo (pode dárselle a forma que gustedes ou reducir o seu tamaño).
2. Anchura máxima: 9,2 cm
3. Largura máxima: 20 cm
4. Altura e masa libres (sen restricións)
5. Non debe ter ningún sistema de propulsión (só a gravidade)
Modalidade de participación: podedes participar individualmente ou por equipos, sendo o número máximo de integrantes 3 persoas.
Inscrición: poderedes anotarvos no formulario de inscrición.
Premios. Haberá cinco premios nas seguintes categorías:
-A carriliña máis rápida
-A carriliña máis orixinal
-Premio ao mellor exercicio de reciclaxe
-Premio á mellor enxeñería/mellor deseño
-A carriliña máis lenta
Aínda que sexan pequenas, darán moita guerra seguro!
