Eventos

O programa Radio na Biblio comezou no curso 2017/2018, e coma en outras convocatorias da Asesoría de Bibliotecas, estamos participando dende a súa primeira edición.

Logo de adquirir os recursos técnicos para desenvolver a iniciativa, fomos mellorando a parte técnica ate dispoñer na Biblioteca dun espazo propio: o Laboratorio de Radio.

Unha das características máis salientables é a da financiación que ofrece anualmente para desenvolver obradoiros de Radio co alumnado.

Neste tempo converteuse nunha ferramenta valiosísima para promover a Alfabetización Mediática e Informacional dende o ámbito da Biblioteca Escolar, traballando dun xeito interdisciplinar e achegándonos ao currículo a través das competencias. 

O CEIP A Lama entrou no Plan de Mellora das Bibliotecas Escolares de Galicia no ano 2009, e dende entón participa ininterrumpidamente no programa que anualmente convoca a Consellería de Educación dende a Dirección Xeral de Persoal e Centros.

Este Plan de Mellora foi un revulsivo para a nosa escola, que veu marcar un antes e un despois no noso xeito de entender moitos aspectos educativos: metodoloxía, xestión de recursos, creación de espazos de aprendizaxe, inclusión, multiples alfabetizacións...

Pasar a formar parte desta comunidade aportounos, ademais, unha chea de novas oportunidades, o acceso a outros programas derivados e moita formación no ámbito da adquisición das competencias ALFIN-AMI.

O programa Biblioteca Creativa comezou no curso 2016/2017 como unha experiencia piloto e a denominación Proxecto Escornabots.

Tratábase de achegarse a novas linguaxes dende o ámbito da biblioteca escolar e introducir a robótica como elemento innovador.

Este programa foi pasando por distintas fases ate o actual formato. Na actualidade contamos con bastantes recursos, entre os que podemos destacar os dedicados a: impresión 3D, robótica, creación audiovisual, mellora das competencias matemática, lingüística e en ciencia e tecnoloxía...

Contamos ademais cun espazo propio, ao que denomimamos Laboratorio Creativo e de Radio ao estar vencellado aos dous programas.