Un total de 839 persoas matriculáronse este curso para cursar ensinanzas de inglés nas 7 novas seccións das Escolas Oficiais de Idiomas creadas para o 2012/2013 pola Consellería de Cultura, Educación e Ordenación Universitaria en vilas das catro provincias galegas, en concreto nas Pontes (A Coruña), Burela e Sarria (Lugo), Ribadavia, Celanova e na propia cidade de Ourense, e en Redondela (Pontevedra). Deste xeito, cubríronse o 84,7% das 990 prazas postas a disposición da cidadanía nestas seccións, o que confirma o éxito da iniciativa de crealas por parte do departamento educativo da Xunta de Galicia, ao abeiro do Plan de Potenciación das Linguas Estranxeiras.

Neste sentido cómpre lembrar, ademais, que ao longo da lexislatura se incrementou nun 38,8% o número de matriculados en ensinanzas regradas das Escolas Oficiais de Idiomas, de forma que este curso están inscritas un total de 32.256 alumnas e alumnos, 9.025 máis que no ano académico 2008/2009.

Respecto do curso anterior, o incremento é do 10,7%, con 3.120 estudantes máis, o que foi posible grazas ao incremento de oferta, sobre todo no que atinxe á creación das devanditas seccións, froito do compromiso da Consellería por achegar ás galegas e galegos que non viven nas cidades as ensinanzas de linguas estranxeiras que se ofertan nas EEOOII; unha aposta pola igualdade de oportunidades no acceso ao plurilingüismo.

Datos por idioma e escola

Un ano máis, as ensinanzas máis demandadas son as de inglés, cun total de 20.871 matriculados, seguidas do francés, o alemán e o italiano. Os datos por escolas e seccións reflíctense na seguinte táboa: