A Consellería de Cultura, Educación e Ordenación Universitaria recibiu esta semana a visita de 12 dos participantes no proxecto de estudos a través do cal o departamento educativo da Xunta de Galicia e o distrito polaco de Bedzin están a impulsar intercambios entre ambas as rexións no marco do Programa europeo de Comenius Regio. O director xeral de Educación, Formación Profesional e Innovación Educativa, reuniuse coa delegación polaca, nun encontro no que tamén participaron–en representación dos centros galegos implicados- as directoras do CEIP Froebel e IES A Xunqueira II de Pontevedra, así como o director e técnicos do EFL Don Bosco. Pola parte polaca estiveron presentes o alcalde do distrito de Bedzin, Krzysztof Malczewski, concelleiros e representantes de dita administración así como profesorado e técnicos de centros educativos e asociacións xuvenís  do mesmo distrito.

Durante a xuntanza os asistentes tiveron a oportunidade de afondar nas vantaxes dos intercambios culturais, especialmente no contexto educativo; así como de abordar a posibilidade de establecer colaboracións futuras.  De feito, a finalidade dun proxecto Europeo Comenius Regio, son as colaboracións sostibles no futuro, máis aló da vida do proxecto, 2012-2014.

Os representantes polacos, durante súa estancia en Galicia, tiveron ocasión de visitar outras institucións como o Concello e a Deputación de Pontevedra.

O Camiño como referente

Ao abeiro desta colaboración entre o distrito polaco e Galicia desenvolverase un  proxecto de intercambios para afondar, desde o eido educativo, no coñecemento mutuo de ambas rexións, e estudaranse as herdanzas culturais, valorando a diversidade como elemento de riqueza cultural e tomando o Camiño de Santiago como referente.

Para iso, ao longo do proxecto celebraranse conferencias temáticas con intercambios de boas prácticas, obradoiros e produciranse diversos materiais culturais, coa participación das dúas administracións de ambos países, centros educativos e asociacións.