A Xunta de Galicia proporá na Mesa Sectorial Docente que o vindeiro curso escolar 2025-26 comece o próximo 8 de setembro e remate o 19 de xuño de 2026 para todas as etapas educativas, agás os segundos cursos dos ciclos formativos de grao Básico, Medio e Superior de FP, que rematarán o 15 de xuño. Así se recolle no borrador de orde que a Consellería de Educación, Ciencia, Universidades e FP vén de remitir ás organizacións sindicais para a súa análise na xuntanza da mesa que terá lugar o vindeiro 6 de maio.

Non obstante, no caso das Ensinanzas de Réxime Especial, como xa se fixo no presente curso, tendo en conta as características e particularidades deste tipo de ensinanzas, poderá flexibilizarse o inicio das actividades lectivas ata o 15 de setembro como moi tarde. Tamén cómpre subliñar que no caso de 2º curso de Bacharelato as clases rematarán de acordo coas datas previstas para a Proba de acceso á universidade, PAU.

Os períodos de vacacións escolares irían do día 22 de decembro de 2025 ao 7 de xaneiro de 2026, ambos inclusive, no Nadal; os días 16,17 e 18 de febreiro de 2026 para o Entroido; e desde o día 30 de marzo ao 6 de abril, ambos incluídos, para a Semana Santa. Ademais, serán días non lectivos o 31 de outubro (Día do ensino), o 5 de decembro e as festas laborais de ámbito estatal, autonómico e local.

A proposta de orde de calendario tamén recolle que, para o vindeiro curso, as probas de avaliación de diagnóstico fixadas polo Goberno do Estado a través da LOMLOE para 4º curso de Primaria terán lugar entre o 13 e o 17 de abril, e para 2º de ESO realizaranse entre o 20 e o 24 de abril de 2026.

Canto ao período de adaptación para o alumnado de 4º curso de Educación Infantil, os centros poden optar por unha incorporación gradual que non se prolongará máis aló do 12 de setembro.