O conselleiro de Educación e Ordenación Universitaria, Xesús Vázquez Abad, informou na súa intervención de hoxe no Parlamento queneste curso a Xunta xestiona 4.034 rutas escolares que dan servizo a máis de 88.000 alumnos e alumnas. Todo isto a través de 2.368 vehículos contratados para tal fin por un custo anual de 125,5 millóns de euros.

Vázquez Abad lembrou na súa intervención que "o transporte escolar en Galicia presenta unha serie de características especiais que o converten no máis complexo e custoso do Estado español, pola nosa orografía, a dispersión da poboación, o clima e a estreitura das estradas. Isto supón un investimento con cargo ao orzamento de 2009 duns 125,5 millóns de euros, o que representa un 22% do gasto total do Estado en transporte escolar".

Ademais, o conselleiro recordou que este servizo pon un especial coidado nos casos de alumnos e alumnas con discapacidades, asegurándolles o seu dereito ao ensino sen atrancos. Neste sentido, a Consellería vén subscribindo contratos con empresas e asociacións que dispoñen de vehículos especiais, co obxectivo de prestarlles un transporte adaptado.

Todos eles contan, segundo o subscrito coa Consellería de Educación, coa figura do acompañante escolar que garante a seguridade no transporte escolar de menores, o que supón a contratación de 1.706 persoas.

Ordenación de transporte

Vázquez Abad incidiu na actual situación económica de crise que obriga a buscar medios cos que lograr unha mellor optimización dos servizos e medios públicos, o que é especialmente apreciable no ámbito do transporte escolar. "Como xa indiquei,- recordou o conselleiro- esta actividade representa un custo para as arcas públicas superior ao sufragado por calquera outra comunidade autónoma, polo que resulta inaprazable unha ordenación desta actividade que permita unha mellor optimización de recursos".

Por este motivo se modifican os contratos concertados pola Consellería de Educación para a prestación de servizos de transporte público regular permanente de uso especial de escolares a centros educativos públicos. Deste modo a bonificación de 7% no transporte escolar permitirá un aforro de 110 millóns de euros ao longo dos vindeiros dez anos, 40 deles na presente lexislatura. Un aforro que repercutirá nos servizos públicos, na calidade do ensino e na estabilidade do emprego no sector do transporte de viaxeiros.

Deste modo Xesús Vázquez Abad asegurou que dende a Consellería de Educación todos os estudantes galegos teñen garantido o acceso os centros de estudos de ensinanzas obrigatorias, e facilita a conciliación da vida familiar e laboral da familias.

O Premio de Ensaio Ramón Piñeiro, que convocan a Secretaria Xeral de Política Lingüística e a Editorial Galaxia, coa colaboración de Unión Fenosa, recaeu este ano na obra Retrato da xeración de 1950. Microhistoria do cambio social na Galicia contemporánea, de Manuel Pérez Rúa. Así o anunciaron hoxe en rolda de prensa o director de Galaxia, Víctor Freixanes, e o secretario xeral de Política Lingüística, Anxo Lorenzo, que estiveron acompañados polo coordinador científico do Centro Ramón Piñeiro para a Investigación en Humanidades, Manuel González; a responsable de comunicación de Gas Natural-Unión Fenosa en Galicia, Amalia Baltar; o propio galardoado, Manuel Pérez Rúa; e varios membros do xurado: Henrique Monteagudo, Bieito Silva, Carlos González Lema e Luís Alonso Girgado.

O xurado valorou moi especialmente da obra premiada a orixinalidade tanto do tema como do seu enfoque. Neste sentido, indicaron que "a idea de facer un ensaio a base de testemuños directos, o que entendemos por historia oral, lle outorga ao texto unha importante dose de credibilidade". Así mesmo, o xurado destacou o tema da obra polo seu achegamento a "unha xeración que vive ao longo da súa vida cambios tan importantes como o paso da ditadura do franquismo á democracia e a modernización da sociedade".

Durante a súa intervención, o responsable de Política Lingüística, Anxo Lorenzo, recoñeceu a importancia do labor da Editorial Galaxia e mais do patrocinio de Gas Natural-Unión Fenosa na consolidación do Premio de Ensaio Ramón Piñeiro, que impulsa "un dos xéneros da produción escrita en galego que máis apoio necesita", dixo o responsable da secretaría xeral. Pola súa parte, Víctor Freixanes fixo un repaso pola historia do premio, que naceu, segundo dixo, como "unha contribución ao ensaio", xénero esencial na fundación da Editorial Galaxia. Pola súa parte, o autor da obra, Manuel Pérez Rúa, falou do libro como "unha maneira de entender o cambio social" que se produciu nas últimas décadas no que se fai unha comparativa xeracional a través de trinta entrevistas. Neste sentido, o premiado considerou a obra "un álbum ilustrado con voces", unha forma de "ilustrar o cambio dándolle voz aos participantes".

O autor

O autor da obra gañadora da oitava edición do Premio de Ensaio Ramón Piñeiro é natural de Moaña, localidade na que naceu en 1956. Ex traballador de Ascón, Manuel Pérez Rúa é sociólogo e técnico de cultura no seu concello natal. Entre as obras que publicou atópanse os libros Moaña (Ir Indo) e, xunto con Daniel Romero, Galicia S. L. (Xerais). Ademais, colabora habitualmente en estudos de cultura e territorio coas universidades de Vigo e Santiago de Compostela.

Contribuír á difusión do ensaio breve en galego

Este premio, que naceu na honra do escritor, filósofo e galeguista Ramón Piñeiro López, ten como obxectivo prioritario contribuír á difusión do ensaio breve escrito en lingua galega, un xénero que ao que o escritor de Láncara fixo importantes contribucións.

A obra gañadora do Premio de Ensaio Ramón Piñeiro recibe unha contía de 6.000 euros. O tema dos ensaios que poden optar a este galardón, que deben ser inéditos e estar escritos en galego, é libre, malia que as bases polas que se rexe a convocatoria sinalan que na medida do posible os traballos deben evitar enfoques propios da investigación especializada ou un excesivo carácter académico.

A submisión das masas. Do poder do progreso ó progreso do poder, de Basilio Lourenço; Tempo de vinganza, de Anxo A. Rei Ballesteros; A terra quere pobo, de Xosé Luís Barreiro Rivas; Outro idioma é posible, de Teresa Moure; ou O suxeito posmoderno. Entre a estética e o consumo, de Rebeca Baceirado, foron algúns dos títulos premiados nas pasadas edicións.

O director xeral de Centros e Recursos Humanos, José Manuel Pinal, estivo presente na entrega dos "Premios Marta Mata a la calidad de los centros educativos en el año 2009", esta mañá en Madrid polo ministro de Educación, Ángel Gabilondo. Nesta edición resultou galardoado o IES Luis Seoane, de Pontevedra, centro no que Pinal exerceu como director ata a súa chegada á Consellería de Educación.

Os dez centros premiados, de seis comunidades autónomas, recibiron os galardóns de mans do ministro de Educación, Ángel Gabilondo. Os "Marta Mata" son un recoñecemento o traballo realizado polos centros escolares que se distinguen polas súas boas prácticas e polo esforzo compartido da súa comunidade educativa no labor de acadar unha educación de calidade. Ademais para dar estes premios valórase a traxectoria dos centros no relativo á mellora do rendemento escolar, así como a acción educativa de transmisión de valores en prol da igualdade, o respecto, xustiza e todo o que constitúe unha base da vida en común.

Os premios entregáronse en tres categoría correspondentes os centros de educación infantil e primaria; Secundaria, Bacharelato ou Formación Profesional; e, en último lugar aos de FP inicial, educación especial, Escolas Oficiais de Idiomas ou centros que impartan ensinanzas deportivas ou artísticas. Cada modalidade ten tres niveis, así os primeiros clasificados recibirán 15.000 euros, os segundos, onde quedou o IES Luis Seoane, recibiron 10.000 euros e os terceiros 6.000.

Esta é a terceira edición destes galardóns, cos que se quere honrar a figura da que fora presidenta do Consejo Escolar del Estado, a pedagoga Marta Mata, falecida en xuño de 2006.

Calidade do sistema educativo galego

Tras a entrega do premio, o director xeral de Centros e Recursos Humanos transmitiu as súas felicitacións ao equipo gañador, destacando "a satisfacción da Consellería de Educación por que os centros escolares galegos sexan exemplo de iniciativas para mellorar a calidade do ensino".

Pinal quixo lembrar ademais o recoñecemento recibido a semana pasada polos IES Carlos Casares, do concello ourensán de Viana do Bolo, o Alfonso X O Sabio, de Cambre; e o Colegio La Salle, de Santiago de Compostela; que recolleron en Madrid os premios do concurso nacional de "Boas prácticas para a dinamización e innovación das bibliotecas nos centros escolares no2008". "O feito de recibir estes premios, de ámbito estatal, non fan máis que constatar o excelente estado de saúde do sistema educativo de Galicia, que avanza día a día polo camiño do esforzo cara á excelencia", puntualizou o director xeral de Centros e Recursos Humanos.

O conselleiro de Educación e Ordenación Universitaria, Xesús Vázquez Abad, inaugurou hoxe "Megaxove", o X Salón da Xuventude. No evento, que se celebra ata o 8 de decembro, a Consellería presenta a súa oferta de Formación Profesional aos máis de 9.000 rapaces e rapazas que pasarán durante esta ponte polo recinto de Expourense.

Durante a súa intervención o conselleiro afirmou que ''coa apertura da décima edición queda demostrado o éxito desta iniciativa, na que poden verse de preto todas as alternativas que teñen a súa disposición os mozos e mozas'' e destacou que ''todas as actividades reforzan valores fundamentais para a vida diaria, como son o compañeirismo, a solidariedade, o traballo en equipo, a tolerancia, a igualdade ou o respecto ó Medio Ambiente. Valores- dixo- que nos permiten a todos avanzar na vida e aproveitar todas as oportunidades que temos tanto a nivel educativo, como persoal ou laboral''. Vázquez Abad finalizou desexando a todos os asistentes que ''gocen e aprendan con todas as actividades programadas, e nas que tanta xente traballou na súa preparación''.

Xunto ao conselleiro estiveron no acto de apertura o presidente do Comité Executivo de Expourense, Ovidio Fernández Ojea, e o presidente do Comité Asesor e xefe do Servizo de Deportes en Ourense, José Mario Guede. Posteriormente, e coincidindo co 10º Aniversario de 'Megaxove?, os tres fixeron entrega das placas conmemorativas ás entidades colaboradoras ao longo de varias edicións.

Visita as instalacións

Durante a súa visita, Xesús Vázquez Abad interesouse polas distintas actividades que "Megaxove" ofrece á mocidade, fomentando a súa participación en diversas actividades de ocio, culturais e deportivas. No percorrido tamén estivo o delegado da Xunta de Galicia en Ourense, Rogelio Martínez González.

Neste evento a Consellería de Educación participa activamente proporcionando o transporte escolar gratuíto para os estudantes que desexen visitar as instalacións, nas que tamén haberá un stand de Formación Profesional. Neste punto o conselleiro detívose para ver de preto a atención que recibirán os visitantes interesados nos requisitos de acceso a esta oferta educativa. No stand tamén se informará sobre os plans de estudo ou saídas no mercado de traballo que se poidan plantexar ou futuros estudantes de F.P.

Así mesmo, vanse repartir folletos informativos sobre as distintas familias e ciclos de grao medio e superior, e programas de cualificación inicial. Estes mesmos documentos servirán como unha importante ferramenta para os interesados nestes estudos, ao incorporaren información sobre os perfís profesionais, dando resposta a preguntas como "Que se aprende a facer", "Onde se realiza o traballo", ou "En que postos de traballo".

Os folletos dan conta das innovacións introducidas nos ciclos formativos a partires da implantación da nova Lei Orgánica de Educación (LOE). Con esta adaptación, o alumnado da Nova FP poderá equiparar a titulación acadada a nivel europeo, e incluso validar os seus estudos de grao superior por créditos universitarios. Por outra banda, quen rematen un ciclo, obteñen o certificado de prevención de riscos laborais de nivel básico, contribuíndo así a mellora dos seus currículos.

Un espazo para a educación

O X Salón da Xuventude "Megaxove", é un encontro que ten como obxectivo reunir a mozos, mozas e ás súas familias nun contorno onde o principal fin é gozar dun tempo de lecer conxugando formación e diversión con todo tipo de actividades, e potenciando valores como o compañeirismo, a igualdade, o traballo en equipo ou a convivencia interxeracional, ao tempo que se conxugan formación e diversión.

Ademais haberá unha área formativa; unha Ciber Zona, na que varios profesionais informarán sobre as posibilidades que ofrece a informática e Internet, nomeadamente en canto a recursos educativos e xogos; e un circuíto de Educación Vial. En "Megaxove" contará tamén con espazos para a cultura, o lecer, o deporte, e o citado stand de F.P.

Oferta formativa

Os visitantes que se acheguen a este salón da xuventude terán á súa disposición un amplo catálogo de ofertas formativas, correspondentes aos 900 ciclos formativos de grao medio e superior que se imparten en 252 centros educativos públicos e privados de toda Galicia. Ademais, poderán obter información sobre os Programas de Cualificación Profesional Inicial (PCPI), dos que se ofertan ata 25 perfís distintos, destinados ao alumnado maior de 16 anos que non obtivese o título de graduado en educación secundaria obrigatoria. O obxectivo é que alcancen competencias profesionais que lle permitan unha inserción sociolaboral satisfactoria, e que amplíen as súas competencias básicas para proseguir estudos nas diferentes ensinanzas.

Estes estudos permiten obter a quen superen os módulos de carácter obrigatorio unha certificación académica que dará dereito, se así o solicitan, a un certificado de profesionalidade emitido pola administración laboral. Ademais, os estudantes que cursen módulos voluntariamente recibirán o título de Graduado en Educación Secundaria.

O centro comercial Área Central de Santiago de Compostela acolle desde hoxe e ata o día 9 deste mes a exposición ''O galego é...''. Trátase dunha mostra fotográfica que amosa a visión sobre a lingua e a cultura galegas de dezaseis rapaces do programa Mentor, un proxecto que xestiona o Instituto Galego de Xestión para o 3º Sector (IGAXÉS-3) e que ten como fin formar, orientar e facilitar a inserción laboral destes mozos e mozas de entre 16 e 18 anos tutelados pola Xunta de Galicia.

A entrega de premios aos gañadores do certame ''O galego é...'' e mais a inauguración da exposición coas 46 imaxes dos participantes tiveron lugar hoxe no centro comercial de Área Central de Santiago de Compostela. No acto participaron o director de IGAXÉS-3, Carlos Rosón; o presidente desta entidade, Luis Barreiro; a subdirectora xeral de Planificación e Dinamización Lingüística da Secretaría Xeral de Política Lingüística, Cristina Rubal; e a xefa de servizo de atención a menores en conflito social da Secretaría Xeral de Familia e Benestar, Ángeles González.

Fomentar o galego entre os máis novos

O departamento que dirixe Anxo Lorenzo colaborou no certame ''O galego é...'' a través da convocatoria a entidades sen fin de lucro para promocionar a lingua propia de Galicia nas áreas de transmisión familiar e mais na mocidade. Trátase dun concurso que busca a posta en valor e a reflexión da xuventude sobre a lingua e a cultura galegas, así como o fomento da integración social e comunitaria dos participantes. A Xunta de Galicia tamén colaborou neste certame a través da Secretaría Xeral de Familia e Benestar.

As obras gañadoras

As obras gañadoras do concurso, no que participaron rapaces e rapazas de Galicia e de países como Guinea Ecuatorial, Marrocos ou Brasil, foron Pesqueiros, galardoada co primeiro premio e que recolle a imaxe de varios barcos de pesca no porto de Vigo; O novo enxebre, que recibiu o segundo premio e conxuga elementos da tradición e do futuro de Galicia; e O Entroido, obra á que se lle concedeu o terceiro premio e que representa unha das festas máis características da comunidade galega. Ademais, debido á alta participación e mais á calidade das imaxes, o xurado outorgoulles dous accésits ás fotografías Galicia país de mil ríos e A cruz dos caídos.

O Consello da Xunta autorizou hoxe o conselleiro de Educación e Ordenación Universitaria para a sinatura do convenio de colaboración entre o Ministerio de Educación e a Comunidade Autónoma de Galicia para o programa de apoio á implantación da Lei Orgánica de Educación (LOE). Mediante este acordo, os asinantes comprométense a pór en marcha diversos programas, todos eles encamiñados a facilitar o desenvolvemento da lei e a mellora das competencias do profesorado e do alumnado do ensino non universitario.

Unha vez asinado o convenio, o Ministerio de Educación transferirá un total de 5.390.191 euros para financiar diversos programas, mentres que a achega da Consellería de Educación e Ordenación Universitaria ascenderá aos 7.989.287 euros. A este acordo chégase despois de que o Consello de Ministros decidise o pasado 29 de xuño distribuír axudas entre as comunidades autónomas co fin de impulsar iniciativas tendentes ao logro dos obxectivos da LOE e preparar o sistema para facer fronte ás novas necesidades educativas.

Formación do profesorado

Cinco son os programas obxecto do convenio. En primeiro lugar, destínase máis de 1,1 millóns de euros á formación do profesorado, tendo en conta que a nova ordenación educativa exixe un esforzo suplementario para proporcionar aos docentes a mellor preparación para o desenvolvemento dos currículos que permitan acadar os novos obxectivos do ensino.

Protagonismo especial nesta formación do profesorado ten o Programa de Apoio ao Ensino e Aprendizaxe de Linguas Estranxeiras, concretado fundamentalmente no programa PALE. Grazas ao investimento de 2,3 millóns de euros, os docentes poderán gozar dunha fase de inmersión lingüística nun país na lingua estranxeira que estean a estudar, e distintos cursos de formación intensiva, coa posibilidade de concilialos con a vida familiar.

Ao abeiro do PALE prevese, así mesmo, a posibilidade de contratación de auxiliares de conversación nativos que impulsen a dinamización na aula da competencia comunicativa.

Cara ao éxito escolar

Outro dos eixes sobre os que pivota o acordo asinado é o fomento das iniciativas para a mellora do éxito escolar do alumnado galego. Neste sentido, destínanse 4,9 millóns de euros a accións de reforzos de materias instrumentais -matemáticas e linguas, fundamentalmente-, así como daquelas que presenten un maior grao de fracaso. Por outra banda, refórzanse os departamentos de orientacións nos centros de educación primaria co fin de detectar canto antes as posibles carencias e adoptar medidas para resolvelas nesa mesma etapa educativa.

Na mesma liña, o acordo reserva máis de 3,4 millóns de euros a actuacións que eviten o abandono temperán do período de escolarización, desenvolvidas fundamentalmente a través dos departamentos de orientación.

O principal punto deste proxecto é a loita contra o absentismo escolar, en estreita colaboración cos servizos sociais dos Concellos. Por outra parte, a Consellería de Educación vai achegar ao alumnado información das posibilidades de estudo de que dispoñen: oferta educativa, accesos, validación, recursos e bolsas, etc.

Por último, esta liña de actuación traballa na extensión e modificación do tempo escolar, co fin de favorecer a conciliación coa vida familiar e contribuír á mellora da aprendizaxe dos nenos e nenas fóra do horario escolar. Estas accións, que son desenvolvidas nos centros educativos a través do respectivos concellos, van dirixidas ao alumnado de segundo ciclo de educación infantil e educación primaria e céntranse no ensino de actitudes e hábitos saudables.

O obxectivo último destes programas é propiciar o aumento de rapaces e rapazas galegos que acadan un título en educación secundaria obrigatoria, e acceden ao bacharelato e a ensinanzas superiores. Deste xeito, poderán contar con máis recursos para facer fronte á vida activa.

Ademais, organizaranse xornadas de traballo de ámbito estatal, que servirán de punto de encontro dos profesionais das distintas comunidades autónomas para o intercambio e a análise de experiencias en aspectos formativos.

O Consello da Xunta autorizou hoxe o convenio de colaboración entre a Consellería de Educación e Ordenación Universitaria, a través da Secretaría Xeral de Política Lingüística, e a Federación Galega de Municipios e Provincias (FEGAMP), para realizar actividades en materia de normalización lingüística nas entidades locais de Galicia. O investimento será dun máximo de 602.668 euros, correspondentes á partida dos orzamentos xerais da Comunidade Autónoma de Galicia.

A achega da Xunta de Galicia vaise destinar a financiar a prestación de servizos de normalización lingüística por parte das entidades locais e á organización de programas de dinamización lingüística. O fin último a que se comprometen os asinantes do acordo é a impulsar o proceso normalizador do galego como principal lingua de traballo e comunicación dos funcionarios no seo da Administración local e provincial.

Ao abeiro deste convenio poderán financiarse os gastos en que tivesen incorrido os servizos locais de normalización lingüística destinatarios, como consecuencia da realización das actividades de fomento do galego previstas, aínda que se teñan efectuado con anterioridade á sinatura do acordo, pero sempre que se trate de gastos correspondentes ao actual exercicio económico. Deste xeito tense en conta o importante custo que esta tarefa supón, difícil de manter de forma unilateral polas entidades locais. En todo caso, esta axuda é compatible coa percepción doutras subvencións, ingresos ou recursos para a mesma finalidade.

Para dar conta do uso da axuda, a FEGAMP deberá remitir á Secretaría Xeral de Política Lingüística unha memoria en que se indiquen as actividades realizadas e os resultados obtidos co seu desenvolvemento. Ademais, para o impulso e seguimento das accións, crearase unha comisión de seguimento, composta por representantes de Política Lingüística e FEGAMP.

O convenio asinado é unha iniciativa máis para garantir o cumprimento dos obxectivos da Lei de normalización lingüística e do Plan Xeral de Normalización da Lingua Galega encamiñados a aumentar o uso da lingua a partir do seu emprego no ámbito das entidades locais.

O Consello da Xunta autorizou hoxe a sinatura do convenio para o funcionamento e reserva de prazas para alumnado no centro neuropsicopedagóxico 'O Pelouro', durante o curso 2009/2010. Mediante este acordo subvenciónase a prestación do servizo público da Educación e a reserva de prazas para alumnado con trastornos de personalidade e conduta neste centro de Caldelas, en Tui (Pontevedra).

Serán 549.822 euros os que a Xunta de Galicia achegue para este fin. Así, a Consellería de Educación dá cumprimento ao establecido no Decreto 191/1988, do 21 de xullo, polo que se declara 'O Pelouro' como centro singular experimental de innovación psicopedagóxica e integración. Non en balde vén desenvolvendo desde 1973 a coeducación de escolares con necesidades educativas específicas, con e sen minusvalidez, mediante unha educación completa e integral da persoa, baseada na súa diversidade.

Con ensinanzas de Educación Infantil, Educación Especial e Educación Secundaria Obrigatoria, este centro presta ademais o servizo de internado que, grazas ao convenio, resulta totalmente gratuíto para o alumnado. Ademais, as cantidades aboadas pola Administración autonómica cobren gastos de persoal, funcionamento e material para o correcto desenvolvemento das pertinentes actuacións de educación integradora e interactiva.

Os rapaces e rapazas con necesidades de apoio educativo específicas conviven e aprenden en integración co resto do alumnado ordinario de 'O Pelouro', co obxecto de acadar o máximo desenvolvemento das súas potencialidades, no marco dunha comunidade educativa equilibrada. Esta atención desenvólvese en réxime de internado de diversos tipos, segundo as circunstancias familiares ou de terapia o aconsellen, procurando o réxime máis axeitado a cada alumno ou alumna e ás dinámicas de grupo adaptadas ás súas características.

O Consello da Xunta aprobou hoxe o decreto polo que se autoriza a implantación dos estudos universitarios oficiais de máster universitario e de doutor ou doutora en distintas facultades do Sistema Universitario Galego (SUG) para este curso 2009/2010.

Este cambio nos posgraos enmárcase no proceso de adaptación das titulacións do SUG ao Espazo Europeo de Educación Superior (EEES). Son, en total, 160 títulos (83 de máster e 77 programas de doutoramento) os que se van implantar ao abeiro deste decreto, ben que a maioría deles son transformacións de títulos que están a ser impartidos na actualidade nas respectivas universidades galegas, fundamentalmente dos antigos programas de doutoramento (terceiro ciclo), cuxo período de formación pasa a converterse en máster, e o período de investigación transfórmase no propio programa de doutoramento. Deste xeito, en sentido estrito, autorízanse 30 novos estudos de máster e 24 conducentes ao título de doutor ou doutora; mentres que os 106 restantes son resultado da adaptación ao novo sistema.

Simplificación de títulos

Neste proceso de transformación do SUG ao EEES, que deberá estar finalizado en 2010, a Consellería de Educación e as distintas universidades realizaron un importante esforzo de simplificación para unificar os antigos doutoramentos non viables ou con características moi semellantes, e evitar así duplicidade de contidos. Así, o novo master e programa de doutoramento da Universidade de Vigo (UVIGO) en 'Ordenación Xurídica do Mercado' procede da unión dos antigos de 'Dereito e Mercado', 'Novas Orientacións do Dereito Público na UE', 'Dereito a Libre Circulación' e 'Principios e Categorías Básicas da Fiscalidade Interna e Internacional', todos eles estudos polos cales se obtiña a titulación de doutor ou doutora.

De xeito semellante, as universidades do SUG traballaron para romper a dualidade período de formación (terceiro ciclo), período de investigación dos vellos programas de doutoramento, que conducira a unha oferta sobreaumentada. Grazas a este proceso de transformación, é posible acceder aos novos doutoramentos desde un ou varios máster. É o caso, entre outros, do programa en Ciencias Forenses e Patoloxía, da USC, ao cal se poderá acceder desde os máster en Biomedicina, en I+D de Medicamento, e en Atención Sanitaria, Xestión e Coidados.

Por outra banda, e para fomentar a relación co resto do sistema universitario español, optouse pola elaboración de catro títulos interuniversitarios dentro do propio SUG, e outros catro fóra del.