Un total de 13.993 alumnos incorporaranse a 4º de infantil o vindeiro curso, cun 31,6% das prazas libres

Un total de 13.993 alumnos incorporaranse o vindeiro mes de setembro ás aulas de 4º de infantil, segundo os datos provisionais de admisión no proceso de escolarización. Así o avanzou hoxe o conselleiro de Educación, Ciencia, Universidades e FP, Román Rodríguez, nunha visita ao Colexio Plurilingüe de Sestelo-Baión, en Vilanova de Arousa, onde recordou que este luns cada centro porá a disposición das familias as listaxes provisionais de admitidos.

O titular do departamento educativo da Xunta explicou que esta cifra de admisión supón que quedaron libres o 31,6% das prazas, un total de 6.473 das 20.466 ofertadas polo Goberno galego. “Polo tanto, a oferta é máis que suficiente, tendo en conta a diminución de alumnado que, segundo as estimacións iniciais, é de arredor de 700 alumnos menos en 4º de Educación Infantil respecto do curso anterior”, explicou o conselleiro.

Román Rodríguez destacou, así mesmo, que case o 97% do alumnado que se incorpora ao sistema acadou praza no centro escollido como primeira opción, é dicir, un total de 13.558 alumnos. Ao 3% que non acadou en primeira opción, 435 alumnos, asignaráselle unha praza noutro colexio sostido con fondos públicos da súa contorna a través do proceso de baremación previsto nestes casos. A este respecto, o conselleiro lembrou que Galicia é a comunidade co ensino máis próximo, “de feito o 90% dos concellos teñen un centro de Infantil e Primaria, fronte ao 55% da media estatal”, lembrou.

As prazas libres continuarán a disposición das familias ao longo do proceso de admisión. As listaxes definitivas publicaranse 15 de maio. A partires de aí, deberán proceder á matriculación. Para o alumnado de Infantil e Primaria o prazo abranguerá do 20 ao 30 de xuño, mentres que para o de ESO e Bacharelato será do 23 de xuño ao 7 de xullo.

Cómpre lembrar que estes alumnos estarán en aulas cun máximo de 20 alumnos, unha ratio propia de Galicia, modificada por acordo entre a Xunta de Galicia e os sindicatos CCOO, ANPE, UGT e CSIF. Mentres, a nivel estatal esa ratio segue fixada en 25.

Prazas e solicitudes

Por provincias, en Lugo ocúpanse o 73,5% das prazas (1.671 alumnos), seguida da Coruña co 71,6% (6.009 alumnos), Ourense co 65,9% (1.352 alumnos) e Pontevedra co 64,1% (4.961 alumnos). En canto ás sete cidades, o maior nivel de ocupación dáse en Lugo co 87,5% (607 alumnos), seguida da Coruña co 84,7% (1.377 alumnos), Santiago de Compostela co 81% (648 alumnos), Pontevedra co 79,1% (525 alumnos), Ferrol co 71,3% (358 alumnos), Vigo co 70% (1.578 alumnos) e Ourense tamén co 70% (615 alumnos).

Os datos de prazas ofertadas e cubertas son os reflectidos na seguinte táboa:

Primeira opción

A maiores, case o 97% do alumnado que solicitou praza en 4º de Educación Infantil nos centros educativos galegos para o vindeiro curso 2026/27 obtívoa no colexio escollido como primeira opción, en concreto, a porcentaxe é do 96,9%.

Isto supón unha porcentaxe moi similar á do ano pasado, malia que segue avanzando a implantación progresiva da mellora das rateos de 25 a 20 alumnos por aula, que o curso que vén se aplicará xa a toda a etapa de Infantil.

Os datos de admisión en primeira opción son os reflectidos na seguinte táboa: