O CMUS da Estrada comeza a súa andaina na década dos 80 como filial do Conservatorio da Real Sociedad Económica del País de Santiago e de maneira independente dende o ano 1996.

O Conservatorio está situado no concello da Estrada, a 25km de Santiago de Compostela. A Estrada é un concello que conta con arredor de 20000 habitantes, divididos en 51 parroquias que, exceptuando a parroquia da Estrada, son principalmente de ámbito rural e desenvolven a súa actividade económica no sector servizos e sobre todo nas explotacións agrícolas e gandeiras.

Por outra banda, a área de influencia do centro esténdese a outros concellos limítrofes como Cuntis, Silleda, Teo...así como a un conxunto de comarcas lindantes e núcleos nas aforas, algúns deles pequenos, dispersos e de poboación máis reducida, dos que proceden unha parte dos alumnos.

A Comarca de Tabeirós - Terra de Montes en xeral e A Estrada en particular, goza dunha gran tradición cultural e musical e conta coa existencia de agrupacións de distintas tradicións: grupos de música moderna, agrupacións de música tradicional, orquestras, charangas, bandas de música, etc., que se nutren tamén, de músicos formados no Conservatorio da Estrada.

A proximidade a Santiago de Compostela e que esta sexa unha cidade de enorme tradición universitaria tamén facilita que moitos alumnos que acceden ao Conservatorio poidan compaxinar ao mesmo tempo unha carreira universitaria cos estudos de música.

A avaliación farase en diferentes momentos ao longo do curso:
- Avaliación procesual: Cada trimestre farase avaliación por parte do Claustro, para valorar o estado das accións previstas para dito trimestre, na que se decidirán as posibles modificacións das accións e as propostas de mellora, de ser o caso.
- Avaliación final: A finais de curso, para incluír na memoria e poder definir os obxectivos e accións do seguinte Plan Dixital, realizaremos unha avaliación recollendo a valoración das distintas accións previstas así como o seu estado.

Rematado o curso, compre facer unha valoración do logro dos obxectivos propostos para este curso. Dos tres obxectivos acadouse plenamente un deles, outro de maneira parcial e non foi posible acadar o terceiro por motivos alleos ao Centro.

- Obxectivo acadado: "Colaborar con algunha institución allea ao CMUS". A colaboración con Radio Estrada levouse a cabo cumplindo o plan proposto para todo o curso, contou coa total aceptación e participación do profesorado e alumnado e pódese considerar unha actuación claramente exitosa e con moitas posibilidades de continuidade en sucesivos cursos.

- Obxectivo parcialmente acadado: "Dar a coñecer información precisa sobre as licenzas e dereitos de autor". Realizouse ao comezo do curso unha primeira recopilación e clasificación da información, sen embargo finalmente non se levou a cabo o paso final que era dar a coñecela, xa que non se atopou a forma más axeitada, en parte debido á non consecución do terceiro obxectivo (a creación da nosa páxina web).

- Obxectivo non acadado: "Crear unha nova web do CMUS en drupal (webs dinámicas)". Pese a todos os intentos por parte da Dirección, a Consellería non permite ao noso Centro o acceso a Drupal.

De cara ao próximo curso, acadarase o obxectivo parcialmente realizado neste ("dar a coñecer información precisa sobre as licenzas e dereitos de autor") utilizando a aula virtual do Centro e a páxina web da que dispoñemos actualmente, se continuase sen ser posible a súa migración ao sistema de webs dinámicas da Consellería.

Unha vez coñecido polo Claustro e aprobado no Consello Escolar, este plan publicaráse na páxina web do centro. Comunicarase a súa publicación a toda a Comunidade Educativa a través das canles habituais.