Datos básicos do centro

A EASD Antonio Faílde xorde co Decreto 207/2005 que converte as escolas de arte en escolas de arte e superiores de deseño, cumprindo os requisitos do Real decreto 389/1992 para os centros que impartan ensinos artísticos.

Trátase dun centro público dependente da Consellería de Educación e Ordenación Universitaria da Xunta de Galicia, polo que as súas ensinanzas teñen carácter oficial e validez académica e profesional en todo o Espazo Común Europeo, estando adaptados ao Real Decreto 96/2014 que establece o Marco Español de Cualificacións para a Educación Superior (MECES).

A EASD Antonio Faílde ten adaptada a súa oferta formativa ás directrices do Tratado de Bolonia, e suma aos seus tradicionais ensinos profesionais de ciclos formativos superiores e medios, os títulos de Grao en Ensinanzas Artísticas Superiores de Deseño na especialidade de Gráfico e na especialidade de Interiores (D. 41/2023, art. 2.1).

A EASD Antonio Faílde está integrada na Subdirección Xeral de Aprendizaxe Permanente e Ensinanzas de Réxime Especial dentro da Secretaría Xeral de Educación Formación Profesional e conta cun Regulamento Orgánico propio (ROC), Decreto 61/2011, do 24 de marzo, que establece o Regulamento orgánico das escolas de arte e superiores de deseño da Comunidade Autónoma de Galicia.

A finalidade do centro educativo é que o alumnado aprenda, se forme e se desenvolva, como individuo da sociedade na que vive. En consecuencia, a propia organización vai mellorando a través da súa práctica e da reflexión sobre ela, así como das relacións que establece coa súa contorna. O Plan Dixital de Centro debe encaixar no contexto institucional máis amplo que ven recollido noutros documentos institucionais, como o Proxecto Funcional de Escola e ambos os documentos deben estar en total consonancia e ser complementarios.

A nosa oferta educativa acolle un amplo número de especialidades que impartimos a través de ciclos formativos e as chamadas ensinanzas artísticas superiores de deseño, que son, a todos os efectos equivalentes a unha titulación universitaria.

Visión

O noso proxecto común proponse crear un espazo de relación onde ensinar e promover a cultura do deseño a través das distintas especialidades.

Comprendemos o deseño como un medio poderoso para axudar a resolver os problemas humanos da realidade social nos que se inscribe.

Para materializar os nosos principios confiamos na educación multidisciplinar, a cultura do proxecto e a aposta decidida pola innovación permanente.

Instalacións

A actual e definitiva sede da EASD Antonio Faílde sitúase nun edificio contemporáneo, pensado para responder funcionalmente aos requisitos propios das especialidades que integran o noso proxecto educativo.

Así, ademáis das aulas teóricas, o centro dispón de obradoiros orientados á formación práctica equipados con tecnoloxías específicas en comunicación, prototipos, fotografía ou edición entre outros. De igual modo, a escola conta cunha biblioteca de libre acceso, salón de actos e cafetería.

O procedemento para a avaliación do Plan Dixital consiste en revisar o cumprimento dos obxectivos nas reunións de área. Dita avaliación considérase positiva se cumpre máis do 50% do obxectivo.

Ao longo do presente curso académico, o desenvolvemento do Plan Dixital do centro avanzou de xeito positivo, acadando os obxectivos marcados inicialmente.

O.1. Mellora das competencias dixitais do profesorado en software de deseño

Este obxectivo foi cumprido satisfactoriamente grazas á realización dun curso específico de formación. A coordinación do mesmo desenvolveuse sen incidencias, contando cun relator especializado e uns contidos axeitados ás necesidades do profesorado. As datas establecidas permitiron unha boa participación, e os docentes manifestaron un alto grao de satisfacción coa formación recibida.

O.2. Información e asesoramento sobre o acceso á rede WIFI da Xunta

Neste aspecto, o centro ampliou o seu labor informativo ao alumnado das ensinanzas profesionais, grazas ás recentes instrucións remitidas pola Xunta. A difusión da información asegura que todo o alumnado dispoña dos recursos para conectarse á rede. Ao mesmo tempo, mantívose o acompañamento ao alumnado dos graos.

O.3. Mellora e actualización do equipamento informático

Levouse a cabo unha revisión do estado dos equipos informáticos do centro, identificando necesidades concretas como a actualización dos equipos na aula 203. Realizáronse solicitudes de tabletas gráficas e mellorouse a xestión do equipamento de préstamo para o alumnado. En canto ao software, resolvéronse diversas cuestións: instaláronse os drivers necesarios, solicitouse software específico para a área de Ilustración e detectáronse limitacións nos equipos da aula 203 respecto á compatibilidade coas últimas versións de Adobe Photoshop, o que supón un punto de mellora a ter en conta para o próximo curso.

Pode dicirse que o balance global do plan é positivo. O profesorado mellorou as súas competencias dixitais, o alumnado tivo maior acceso aos recursos tecnolóxicos, e avanzouse na ampliación do equipamento, detectando ademais áreas que permiten unha planificación de renovación a medio prazo.

Para o próximo curso proponsela as seguintes melloras:

1. Formación continua do profesorado. Obxectivo: Ampliar as competencias dixitais do profesorado con enfoque práctico e interdisciplinar.

2. Creación dun Espazo Maker no centro. Obxectivo: Ofrecer un lugar polivalente, accesible e creativo para alumnado e profesorado de todas as disciplinas. que ademasi sirva de apoio a iniciativas do alumnado fóra do horario lectivo e fomente actividades de aprendizaxe inclusiva con metodoloxía activa (learning by doing).

3. Inclusividade no acceso aos recursos dixitais. Obxectivo: Substituír termos como "alumno" e "profesor" por "alumnado" e "profesorado", apostando por linguaxe inclusiva e neutra.

Continuar co sistema de préstamo de equipos e garantir a igualdade de oportunidades no uso das ferramentas dixitais para o alumnado.

4. Consolidación e actualización do equipamento. Obxectivo: Dar continuidade á mellora técnica do centro, atendendo ás limitacións detectadas.

Esta proposta aposta por un plan dixital máis inclusivo e innovador, que fomente a creatividade, a igualdade e a aprendizaxe práctica. A creación dun espazo maker, xunto coa mellora da formación docente e a equidade no acceso aos recursos, situaría ao centro como referente no desenvolvemento das competencias dixitais e na integración tecnolóxica real na educación.

O presente Plan Dixital de Centro faise público entre a comunidade educativa para o seu coñecemento.

A estratexia de publicitación e difusión do Plan Dixital entre a comunidade educativa, será tanto mediante a activacion de sistemas de información na Aula Virtual coma mediante documentos en liña ou na nube para compartir incidencias.