O mércores 22 de xuño, último día de clase, a primeiras horas da mañá, preparouse no Instituto a gravación dun lipdub. Máis tarde, démoslle remate final a este curso académico cun Festival no Centro Cívico de Malpica, cunha especial despedida ao alumnado de 4º ESO que deixa o centro.
Coreografías, teatro, humor, ..., flores, agradecementos, risas, apertas, algunha que outra bágoa; pero sobre todo:
Alegría ante as vacacións que comezan e ...
Ilusión polas novas experiencias que esperan no camiño!
O 31 de maio, o alumnado de 1º ESO, dirixido por profesorado de LL. Galega, C.Naturais e D.Orientación, camiñaron ata a capela de San Adrián, seguindo as "Aventuras de Pelusa" do malpicán Xelucho Abella.
LETRAS GALEGAS 2016
Este ano, a persoa homenaxeada é o escritor que da nome á nosa biblioteca:
MANUEL MARÍA FERNÁNDEZ TEIXEIRO
(Outeiro de Rei, 1929 - A Coruña, 2004)
Enlaces de interese que foron chegando ou seleccionados por nós
Nos días previos, montamos unha Exposición Central con paneis informativos en torno á vida e obra de Manuel María. A partir dela, o alumnado realizou distintos traballos para coñecelas mellor, dirixidos polos respectivos profesores e profesoras de L.L. Galegas.
Radio Seaia, emitiu en torno á semana das Letras versións musicadas dos poemas de Manuel María e algunha grabación feita ao efecto.
Exposición temática na Biblioteca. Con exemplares escritos da súa obra, Cd con versións musicadas dos seus poemas, Fotografías da súa visita ao noso centro e elaboración dun mural de recordo permanente deste evento.
Xoves 19 de maio. Charla de Xan Fraga. Amigo persoal de Manuel María e
profesor do instituto cando este nos visitou a propósito do “bautizo” da nosa
biblioteca co seu nome.
Luns 23 de maio. Saída a Outeiro de Rei e arredores: "De Malpica á Terra Cha". Durante todo o día, o alumnado visitou a Casa Museo de Manuel María, o Cemiterio, a Carballeira de Santa Isabel, as Penas de Rodas e o Castro de Viladonga. Ofrenda floral, recitado de poemas, música e actividades na natureza foron algunha das cousas coas que rendemos un sinxelo homenaxe ao escritor e á Terra Cha que o viu nacer e inspirou boa parte da súa obra.
O 18 de marzo despedimos o trimestre cunha saída promovida polo grupo de senderismo da Ruta dos Faros, Os Traskis. Fixemos un percorrido de case 3 horas pola costa, desde o Instituto ata Barizo. O tempo non axudou, pero compensou a fermosa paisaxe e a alegría dos participantes!!
Mil Gracias pola vosa desinteresada implicación!!
8 de marzo: Día internacional da muller traballadora
Seguindo a proposta que cada ano fai a AELG para conmemorar o aniversario do nacemento de Rosalía de Castro (24-2-1837); nesta ocasión, o EDLG do centro, de acordo co Dep. de L.L.Galega e Biblioteca, faremos as seguintes actividades: Exposición da súa obra na biblioteca; Decoración do tabuleiro da entrada con poemas e fotos seus escritos polo alumnado; Audición de poemas musicados de Rosalía a través da radio durante os recreos do día 24, ….
Este ano, a UNESCO escolleu o tema "Educación de calidade, lingua-s de instrución e resultados de aprendizaxe" para celebrar o Día Internacional da Lingua Materna, facendo fincapé na importancia destas linguas na educación de calidade e a diversidade lingüística, co obxectivo de seguir avanzando na aplicación da nova Axenda 2030 para o Desenvolvemento Sostible.
11 de febreiro: "Programa de Transición EP-ESO"
O alumnado de 6º de EP dos CEIP de Malpica e Buño visitaron pola mañán o noso centro, participando activamente en actividades diversas organizadas para un mellor acercamento á nova etapa educativa que lles espera, a ESO. Á tarde tocoulle o turno ás súas familias.
ENTROIDO 2016
O venres 5 de febreiro tivemos unha xornada festiva para celebrar o Entroido no Instituto.
Coa colaboración de titores e do profesorado en xeral, cada aula organizou previamente e con tema libre, a animación e disfraces da súa propia comparsa, coreografías e pezas teatrais breves que se desenvolverían na Casa da Cultura de Seaia entre as 11 e as 13 horas, nun acto aberto ao público.
Partimos andando cara alí polas rúas da parroquia. Ao remate do festival, volvemos para o Instituto para a degustación de doces típicos de Entroido, aportados por todos os membros da comunidade educativa.
Tendo en conta o lema deste ano das bibliotecas escolares:“Biblioteca escolar, base de exploracións”é a declaración da ONU do ano 2016 como"Ano internacional dos legumes"; en colabaoración coa Biblioteca e o resto dos Departamentos Didácticos, propuxemos conmemorar o "Día da PAZ" diste xeito:
Entre outras actividades; cada clase decorou con legumes nas horas de titoría o propio anagrama da paz (calculado e debuxado en EPV) para colgar logo no tabuleiro da entrada con outros traballos e exposicións. A de legumes, estivo acompañada de varios libros ilustrativos da biblioteca que ampliaban información sobre eles.
Organizamos unha recollida solidaria de legumes que se entregou a CÁRITAS de Malpica e Buño.
Desde o Departamento de Música seleccionáronse pezas musicais para poñer o día 28 e 29 nos recreos, a través da Radio Seaia.
Outros Departamentos colaboraron reflexionando co alumnado sobre esta temática, confección de carteis, etc..
Queremos agradecer desde aquí a todos e todas os que participastes na recollida solidaria de legumes; en especial á ANPA ORXEIRA pola súa colaboración potenciando a recollida solidaria en distintas tendas do lugar: Supermercado Ordoñez de Cerqueda, S. Elías de Buño, Eroski e Froiz de Malpica e M.M de Seaia.
POR UN MUNDO MELLOR, MÁIS SAUDABLE, .., EN PAZ E BENESTAR!!
PETICIÓN DE FONDOS PARA O FOMENTO DO USO DO GALEGO NO CENTRO . 2015-16
Ao longo da última semana do curso, neste ano 2015 que remata, coincidindo co tempo de Nadal, realizamos diversas actividades complementarias e extraescolares, ao tempo que se ambientaba o centro con decoración ao efecto, feita en parte entre todos nós, e se recollían xoguetes para doar.
O alumnado de 3º e 4º, participou na biblioteca en 2 charlas relacionadas co Programa “QUÉROTE” solicitado desde o Dep. de Orientación do centro. Tamén asistiu ao Centro Cívico ao Obradoiro “Cartas de Amor”, organizado polo Concello de Malpica para a prevención da “violencia de xénero”.
O alumnado de 1º e 2º viaxou á Coruña, para o encontro co escritor Jordi Sierra i Fabra no Centro Cívico Ágora.
O día 18, último día de clase, desde 1ª hora, tivemos actividades festivas varias: Concurso 1,2,3 nas respectivas aulas, torneos de pim-pom e futbolín, xogos tradicionais, …. e entrega de xoguetes e dos premios do “Concurso de Postais para o Nadal 2015!!
Tarxetas de Papel:
1º Premio:Yaiza Gómez Tasende 1º A e Iker Gómez Tasende 2ºA
2º Premio: Isabel Santiago, 4º A
Tarxetas Dixitais:
1º Premio: Alba Villanueva Fernández, 1º A
Comezan as merecidas Vacacións de Nadal. Colaboramos coa biblioteca na preparación dunha guía de lecturas e videos recomendados, cos que poder relaxarse visitando e interactuando, como cada quen guste, con xentes e lugares do pasado, presente ou futuro… Boa Viaxe !!
10 de decembro, aniversario da Declaración Universal dos Dereitos Humanos
A 67 anos da Declaración Universal dos Dereitos Humanos, feita pola ONU en 1948, ao finalizar a 2ª Guerra Mundial; continuamos a vivir de preto a falta de: equidade, respecto, liberdade, igualdade, xustiza, tolerancia, solidariedade, ….
Triste adeus a dous grandes galegos das nosas letras:
Neste día, entre as 12:30 e as 13:30, o alumnado de 4º ESO participou dende a nosa biblioteca na videoconferencia que leva por título “A máquina que constrúe a mente e a realidade”; a cargo do doutor Xurxo Mariño Alfonso, especialista en neurofisioloxía.
Está organizada dende a coordinadora dos Equipos de Dinamización da Lingua Galega, nun paso adiante no dereito a gozar da ciencia en galego.
Durante a semana da ciencia, do 9 ao 16 de novembro, os museos científicos coruñeses teñen a entrada libre e gratuíta!!
SAMAÍN 2015
Samaín ( Halloween en zonas anglosaxonas). Ao longo da última semana de outubro, do 26 ao 30, preparámonos para a conmemoración desta festa tradicional e intercultural que, por unha banda serve de homenaxe aos difuntos e, por outra, supón un acercamento desdramatizado e lúdico á morte.
Ao longo da semana ambientouse o centro. Na biblioteca expúxose unha ampla selección de obras diversas relacionadas con esta temática e ofrecéronse, durante os recreos, pases de vídeos na gran pantalla.
O xoves 30,a partir do primeiro recreo, todo o alumnado viu nas súas respectivas clases a película "O Apóstolo", dentro dun proxecto interdisciplinar que continúa ao longo do curso.
Posteriormente, ao tempo que a TV da entrada nos ofrecía vídeos "terroríficos", recolléronse os "quimions" feitos polo alumnado, entregáronse os premios do Concurso de Cabazas e......disfrutamos todos ao final dun gran Magosto no patio!!!
Desde o Equipo de Dinamización Lingüística (EDLG), dámosvos a benvida a este novo curso que comeza 2015-16; en especial, aos novos membros da comunidade educativa: profesorado, alumnado e as súas familias!
O sábado 19 de xuño, démoslle remate final a este curso académico cun Festival no Centro Cívico desde as primeiras horas da mañá. Abriu o acto unha presentación feita polo alumnado de 4º de ESO que este ano deixa o centro, cun amplo abanico de momentos vividos e compartidos nestes 4 últimos anos.
Coreografías, humor, entrega de premios e trofeos,... agradecementos, risas, apertas, algunha que outra bágoa nas despedidas.... pero sobre todo alegría ante as vacacións que comezan e ilusión polas novas experiencias que esperan no camiño.
No acto entregáronse tamén os premios do Certame Literario 2015. Parabéns aus autores dos traballos presentados:
Antía Suárez, Fabián Ceán, Xeila Taibo e Belén Torres
Irmandados polo nome. Xornadas de intercambio entre nós e o IES Urbano Lugrís da Coruña
O luns 18 de maio e o martes 2 de xuño, son as datas elexidas para este encontro entre as 2 comunidades educativas irmandadas polo nome do centro. Primeiro fomos nós á Coruña e logo veñen eles a Malpica; alumnado de 1º e 3º de ESO serán os principais protagonistas deste intercambio en torno á figura do polifacético artista URBANO LUGRÍS GONZÁLEZ.
En torno a esta festa grande das nosas letras, no Instituto, ademais de destacar a obra e a persoa de Filgueira Valverde, levaremos a cabo actividades diversas na honra da nosa lingua: Obradoiros de Xadrez,Hip-Hop, Banda Deseñada e Poesía; Encontros con escritores; Certame Literario, Correlingua....
... estade pendentes!!!!
O fallo do Certame Literario 2015, comunicarase durante o festival de Fin de Curso que se celebrará o día 19 no Centro Cívico.
Unha actividade innovadora levada a cabo polo noso Dep. de Tecnoloxía, en colaboración co de Galego. A través dela, estudantes de primaria do CEIP de Buño aprenden contidos con mediación dos nosos alumnos de 4º de PDC. O 12 de maio os nosos foron "de profes" a Buño e o 13, os pequenos viñeron facer experimentos complementarios ás nósas aulas.
- 8 de marzo "DÍA DA MULLER"
MULLER, DONA DO TEU DESTINO... !!!
Traballo profesionalizador
en calquera campo que ti desexes medrar como persoa;
seguindo ou non, o rol que "de sempre" se espera de ti...
TI ELIXES ... !!!
- 24 de febreiro "DÍA DE ROSALÍA"
Neste día, 178 aniversario do nacemento de Rosalía de Castro, "nós tamén somos Rosalía". Este é o lema elixido dende a AELG, para conmemorar o seu día.
Dinamizarase nas aulas polas respectivas profesoras de lingua e literatura galegas. Na biblioteca organizarase unha exposición da súa obra e pasarase un vídeo da súa vida que se poderá ver ao longo dos recreos da semana:
Coincidindo co Entroido, este ano, o "Día do Amor", pasou un tanto desapercibido. Na nosa biblioteca organizouse unha pequena exposición de obras literarias, musicais e de cine relacionadas con esta temática.
-ENTROIDO 2015
Nesta ocasión, unímonos ao CEIP Milladoiro de Malpica, para celebrar o Entroido. Previos contactos entre os dous centro, decidimos acompañar de "astronautas" aos diversos "países do mundo" de que irían disfrazados os máis pequenos. En colaboración con todos os departamentos, en especial o de EPV, elaboramos no IES os nosos traxes para o desfile pola vila de Malpica, previsto para o día 13 de febreiro. O tempo non acompañou e tivemos que reunírmonos cos alumnos de infantil e primaria no patio do seu centro. O encontro tivo lugar no descanso do Festival que preparamos no Centro Cívico ao longo da mañán: coreografías, "play-backs, música, ... a cargo de alumnado e profesorado; unido a un obradoiro de baile, encheron de alegría e colorido este día.
(máis fotos na galería)
- PROXECTO que presentamos á Consellería de Educación trala Convocatoria da SXPL, aparecida en xaneiro deste ano, de Proxectos de Innovación en Dinamización Lingüística para o curso 2014-15.
- 30 de xaneiro de 2015, DÍA INTERNACIONAL DA PAZ
Lema proposto este ano para a reflexión arredor do Día da Paz
A el chegamos despois de analizar as características das persoas premiadas co último Nobel da Paz e tendo en conta a promoción do Matemático que se fai dende as Bibliotecas Escolares, así como algúns comentarios que escoitamos ás veces no noso alumnado nos que desprecian “a Escola”….
O premio Nobel da Paz foi concedido, na edición de outubro de 2014, a dous heroes da infancia: a paquistaní MALALA YOUSAFZAI e o indio KAILASH SATYARTHI. Curiosamente, Paquistán e India son dous países enfrontados políticamente, con relixións diferentes… Unha oportunidade de unirse por un obxectivo común.
Ámbolos dous premiados son reivindicadores pacifistas dos dereitos dos nenos e nenas á Educación. A educación que te fai pensar, che da coñecemento, liberdade,… e oportunidade de construír en paz un mundo mellor …
Ela, con tan so 17 anos, centrada no dereito das mulleres do seu país á Educación; feito polo que sufriu un atentado que case lle leva a vida. El, tratando de evitar a explotación obreira en menores; dos aproximadamente 12 millóns de nenos menores que se calcula traballan na India xornadas de Sol a Sol, conseguiu liberar xa a uns 80.000…
Nos seguintes enlaces, recóllense un artigo de opinión relacionado co tema e esceas dun documental que se estrea estes días no cine e que reflicte á perfección o que estamos a contar: “Nenos sen dereitos” / “Camino a la Escuela”
No instituto, preparamos frases que inclúen símbolos matemáticos.Foron repartidas ao chou en cada clase cando se lles fixo a foto respectiva. Previa reflexión, dirixida polo profesorado participante (Dp. Historia, Ciencias, Matemáticas, LL.Galega, LL.Castelá e Linguas Estranxeiras), cada grupo prepara a súa propia mensaxe para expoñer na exposición do tabuleiro da entrada. No caso das cancións, inglesa e francesa sobre todo, as profesoras incidiron no contido das letras e a súa idoneidade en relación co que estamos a conmemorar.
(máis fotos na galería)
Durante os recreos do dìa 30, a través da nosa Radio Seaia, ouvimos as seguintes cancións, escritas en cadansúa lingua das que usamos no Instituto:
Comezamos a recta final do 1º trimestre co "Concurso de postais", para ir ambientando o centro neste tempo de NADAL.
Nos seguintes enlaces pódense consultar iniciativas e recursos elaborados para o Nadal pola SXPL (Secretaría Xeral de Política lingüística) da Consellería de Educación (postais eléctrónicas, guías de agasallos para a xuventude, … )
As 3 primeiras sesións: Cine na aula, recreo, entrega de notas, recollida de material, …
Despois das 11:30: Xogos e Torneos diversos en distintos espazos do Instituto, entre eles a Biblioteca. Cara ao final da mañán entregáronse nela os premios aos gañadores-as dos concursos:
TARXETAS DE NADAL
1º premio: ISABEL COUSILLAS 3º B 2º premio: XEILA TAIBO 1º B
FUTBOLIÑO
1º premio: MARTÍN ZAS e BRANDON CASTILLO 3º PDC
2º premio: NICOLÁS POSE 3ºA e JONATHAN RODRÍGUEZ 3ºB
PIM-POM
1º premio: DIEGO SUÁREZ 1º A, 2º premio: ADRIÁN CASTRO 4º B
XADREZ
1º premio: CÉSAR CALVO 4º A, 2º premio: MARCOS AÑÓN 3º A
PARABÉNS !!!!!!!!!!!!!
O ano 2014 remata, aínda queda moito curso por diante ….
agora toca estar coa familia, descansar, disfrutar e repoñer forzas para continuar…
Parabéns ás nosas compañeiras profesoras pola súa participación!!! Recollendo froitos do traballo realizado o curso pasado con esta obra de Xelucho Abella e sementando novas ilusións en torno á literatura xuvenil máis cercana e entrañable.
- "O dereito a gozar da física en galego" , lema do V DÍA DA CIENCIA EN GALEGO, deste ano.Esta celebración servirá tamén para homenaxear as figuras de Isaac Newton e do matemático galego Xosé Rodríguez González.
En colaboración co Equipo de Extraescolares e a Biblioteca, participamos nesta celebración que terá lugar no centro entre os días 27 e 30 de outubro. Comeza con 2 concursos, un de cabazas e outro de carteis e continúa na biblioteca con pases de contacontos, curtametraxes, videoclips e música durante os recreos deses días, relacionados coa obra de E. Allan Poe.
Hoxe, 21 de outubro, visitounos Xosé Manuel Varela para impartir este obradoiro de “Lendas Malpicás”, patrocinado pola Concello de Malpica, entre o alumnado de 1º e 3º de ESO. Despois do segundo recreo, a 5ª hora cos rapaces e rapazas de Primeiro e a 6ª hora cos de Terceiro.
Dun xeito coloquial, foron relatándose entre todos lendas das distintas parroquias e lugares que compoñen o Concello, asociadas a costumes, tradicións, restos arquitectónicos, conmemoracións, etc. Todo un descubrimento para moitos, que invita a ser comentado nas casas coas familias, ou entre os amigos, favorecendo así o longo percorrido da nosa tradición oral dende o pasado cara ao futuro !!.
*A convocatoria de folga de estudantes para estes días, impediu que moitos deles de 3º, poidesen asistir ao obradoiro.
O certame foi declarado deserto en todas as modalidades de 2º Ciclo da ESO, e nas de poesía e teatro do 1º Ciclo.
O premio entregarase durante o festival de Fin de Curso que celebraremos, entre 12 e 13:30, o día 18 de Xuño no Centro Cívico de Malpica (R/ Ventorrillo, 1)
Coma noutras ocasións, este ano tamén participaremos no Correlingua 2014. Ao percorrido, que terá lugar na Coruña o 15 de Maio, asistirá o alumnado de 3º e 4º da ESO baixo o alcume “ARDORA” . Dinamizarán a marcha cunhas camisetas deseñadas ao efecto por chavales de 3º.
Sairemos do centro sobre as 10:00 e voltaremos sobre as 12:00
Trala convocatoria publicada no DOG. 13 de Xaneiro (O: 2-1-2014), remodelamos o Proxecto de Fomento do Uso do Galego presentado na PXA do instituto en Novembro, adaptándoo aos apartados requeridos na orde antes citada e incluíndo os orzamentos previstos. Co visto e prace da Dirección, foi presentado en prazo na Consellería de Educación.
O venres 28 de Febreiro, celebraremos no centro o Entroido: Festival no centro cívico, concurso de comparsas e postres, degustacións con música e sobre todo, moita alegría e bo humor.
A primeira hora, haberá clase normal.
A segunda, comezan os preparativos para disfrazarse; cada grupo nos días previos elaborou o seu disfraz e coreografía.
A terceira, baixamos ao centro cívico de Malpica para o Gran Concurso - Festival de música e baile de comparsas.
A quinta, subiremos de novo ao centro a degustar os postres típicos de entroido que os alumnos traian das súas casas. Antes de marchar, recolleremos e limparemos todo.
Toca descansar uns días, se se pode, entre as grandes festas que na contorna dedican ao ENTROIDO!!!
Aproveitando esta data do aniversario do nacemento de Rosalía de Castro, fixemos unha homenaxe ao escritor Manuel María que da nome á Biblioteca do noso centro.
Ao longo deste curso, temos previsto levar a cabo as actividades recollidas no Proxecto de Fomento do Uso do Galego, enviado á Consellería dentro da Programación Xeral Anual (PXA).
