Actividades na biblioteca

 Celebración do Día da Biblioteca - 2018

 Este ano imos celebrar o Día da Biblioteca dun modo especial grazas ao traballo e as ideas do alumnado de ITI de 1º, con colaboración do de 2º desa materia e de profesorado dalgunhas das materias. Iremos revelando aquí ao longo da semana as nosas actividades. 

Formación de usuarios

Como cada ano, e aproveitando que o mes de outubro celébrase o Día das Bibliotecas Escolares, faremos unha sesión de presentación da nosa biblioteca especialmente ao alumnado de 1º, e de formación de usuarios para todos os grupos, aproveitando as titorías. Este será o noso calendario de este ano:

Mergullámonos na biblioteca           

     Actividade de formación de usuarios    Curso 2018-19

 II Semana do Libro na nosa Biblioteca

23-27 Abril 2018

Argallando coa lectura : unha mensaxe

Dende o equipo de Biblioteca, poñemos voz a un fragmento do libro de Arantza Portabales, Deixe a súa mensaxe despois do sinal. Podedes escoitalo aquí. 

Non leas!!!

Texto conmemorativo do Día do libro de Fran Alonso. Tradución feita polo alumnado de 4º de francés do IES Lamas de Castelo.

Con axuda de alumnado voluntario de 1º ESO, fixemos unha gravación do texto, que montamos con música de fondo de Caxade (voces: Gabriel, Irene, Manuel e Oliva; canción: Sanduicheira), quen moi amablemente nos autorizou para o seu uso. Dende aquí o noso agradecemento.

Durante toda a semana estaremos a realizar actividades dentro e fóra da biblioteca: exposición de materiais, charlas/ lecturas informais, presentacións de diapoitivas, apadriñamentos lectores, concursos... Sede os benvidos!

... E ti, para que les?

• Eu leo para desconectarme do traballo diario,

• eu, para saber máis,

• para divertirme!,

• eu, para medrar,

• eu leo para facer amigos,

• e eu, para estar á última!,

• leo porque me dá a ghana,

• pois eu, leo porque quero e me gusta... e punto!!

Velaquí o programa completo.

I Concurso de adiviñas arredor do mundo do libro e a literatura universal: "Emoticonas+ libros"

Este ano 2018, queremos ir adiantando a celebración da nosa Semana do libro coa convocatoria dun orixinal concurso... Todos e todas estamos moi afeitos a ver e ler mensaxes con emoticonas no móbil, non si? Pois con eles tamén se pode construír frases, e ata parágrafos enteiros! Nós propoñémosvos que adiviñedes uns títulos ben coñecidos nas literaturas galega, española e universal. Velaquí as bases:

• Quen pode participar?Todo o alumnado do centro. O concurso consiste en atopar os títulos agochados nas adiviñas en emoticonasque se publicarán na Biblioteca. Participación só individual ou parellas!

• Bases do concurso: Publicaranse 2 adiviñas por día entre os días 17 e 23 de abril na Biblioteca Escolar. A solución de ambas (título + autor) entregarase por escrito, con nome completo e curso utilizando o modelo que teredes á vosa disposición na propia Biblioteca.

• Prazo de entrega das solucións:ata o día seguinte da súa publicación, durante os recreos, na Biblioteca.

• Premios: Concederase un único premio por día, aos acertantes dos 2 títulos. En caso de haber varias respostas correctas, a gañadora será a primeira por estrita orde de recepción.O premio(sorpresa) consistirá en material escolar. A entrega farasedurante a Semana do libro.

• Xurado: Equipo de Biblioteca: a coordinadora (Francés) e a profesora de LG. 

   

 Ciencia... en galego? 

En novembro, dedicamos o mes á ciencia en galego? na nosa Biblioteca do Lamas de Castelo. As nosas grellas de novidades e exposición transformáronse en escaparates de todo o material que temos sobre a ciencia. Tamén estamos a facer unha maratón de catalogación dos fondos relacionados coa ciencia (seccións dende o 50 ata o 698 da CDU), moitos deles sen catalogar até o de agora.

 Porén... temos que dicir que moito material en galego non hai. A edición en castelán segue sendo a maioritaria (e nin que dicir ten, se un quere meterse en investigación científica, seguro que o seu material de consulta non estará en galego nin en castelán).

De todos os xeitos, temos moitos libros, vellos e novos que son moi interesantes para ler sobre a ciencia, e moitos deles con curiosidades dende as máis coñecidas ás máis estrafalarias e sorprendentes.

Ligazóns de interese
1- páxina das bibliotecas escolares sobre o tema: http://www.edu.xunta.es/biblioteca/blog/?q=node/1030
2- tríptico informativo: http://www.edu.xunta.es/biblioteca/blog/files/mes%20da%20ciencia%20en%20galego%20nas%20bibliotecas.pdf
3- Recompilación de materias sobre ciencia en galego (da Xunta): http://www.edu.xunta.es/biblioteca/ciencia/index.php
4- Selección de materiais sobre ciencia en galego, para as bibliotecas: https://www.pinterest.es/bescolaresgal/ciencia-en-galego-nas-bibliotecas-libros-informati/

Boa lectura!

O curso 2016-17 xa rematou, pero non quixeramos despedilo sen deixarvos un resumo visual das actividades levadas a cabo na Biblioteca (dentro ou fóra dela), organizadas polas profesoras do equipo desta Biblioteca Escolar. Agradecemos dende aquí todas as colaboracións, de profesorado e sobre todo de alumnado que participastes nelas.

Velaquí a nosa MEMORIA DE ACTIVIDADES

En xaneiro e febreiro...

Gran concurso de adiviñas!

Presentamos na nosa Biblioteca Escolar do Lamas o I Concurso de Adiviñas. 

xa rematou este concurso, celebrado todas as semanas na Biblioteca (puntualmente os martes e xoves), dende o 17 de xaneiro  ata o 23 de febreiro.  Velaquí as bases para quen queirades recordalas.

• Participou sobre todo o alumnado de 1º e 2º da ESO. O concurso consistiu en atopar a solución correcta (pensando ou buscando a información) das adiviñas que se publicaron na Biblioteca.

• 

  Premios: a entrega de premios para todos os gañadores será este mércores, 8 de marzo, no recreo e na propia Biblioteca. Concederase un único premio por adiviña e día. En caso de haber varias respostas correctas, a gañadora será a primeira por estrita orde de recepción. O premio (sorpresa) consistirá en material escolar.

• Xurado: estivo composto polo Equipo de Biblioteca: a coordinadora e profesora de L. Francesa e o profesor de LG.
  

 E xa rematamos!

Primeira adiviña: martes, 17 de xaneiro de 2017. ANUNCIO: o gañador desta adiviña foi (por aproximación á resposta correcta) Xurxo, de 2º. Parabéns!

Segunda adiviña: xoves, 19 de xaneiro de 2017. (Queda deserto por falta de participación)

Terceira adiviña: martes, 24 de xaneiro de 2017. (Queda deserto por falta de participación)

Cuarta adiviña: xoves, 26 de xaneiro de 2017. Gañadoras: Rebeca, Lucía, María S. e María T. e Alba L., de 2º. Como participan en grupo, o seu premio ten que ser lixeiramente diferente ao do resto... Sorpresa!

Quinta adiviña: martes, 31 de xaneiro de 2017. Xa temos gañador: Leonardo Caamaño, de 1ºA. Parabéns!

Sexta adiviña: xoves, 2 de febreiro de 2017. Gañador: Xurxo, de 2º. Parabéns!

Sétima adiviña: martes, 7 de febreiro de 2017. Gañadoras: participando en grupo, María T., María S., Rebeca e Alba de 2º, con axuda de Lúa de 1º. Parabéns!

Oitava adiviña: xoves, 9 de febreiro de 2017. Houbo moita participación (7 respostas). Porén, a resposta correcta era "a pataca". Se ben ninguén acertou con ela, decidimos conceder o premio á resposta máis acaída por lóxica. Leva o premio Ainhoa, de 2º. Parabéns!

Novena adiviña: martes, 14 de febreiro de 2017. Temos gañadoras: María T. e María S.,de 2º. Parabéns!

Novena adiviña: xoves, 16 de febreiro de 2017. Os gañadores foron tamén os primeiros en dar a súa resposta; parabéns Antía F. de 2º e Chema, de 1ºA!

Décima adiviña: martes, 21 de febreiro de 2017. A gañadora, finalmente foi María T., de 2ºA. Noraboa!

11ª e derradeira adiviña: xoves, 23 de febreiro de 2017. O gañador foi en realidade o terceiro en dar a súa resposta: parabéns Marcos, de 2ºA!