blogue deadmin

O alumnado da ESO (de 1º, 2º e 3º) recibiu a pasada semana as cartas que lles enviaron as alumnas e alumnos da turma do 7º ano das Escolas de Melgaço (Portugal). Estas cartas, escritas en portugués, chegaron como resposta ás que enviamos dende o noso centro, escritas en galego.

O proxecto de intercambio epistolar Cartas Arraianas partiu do Equipo de Dinamización da Lingua, co obxectivo de explorarmos a Lusofonía e coñecer como vive a rapazada do outro lado da Raia Seca. Para desenvolvelo, contamos co apoio do Agrupamento de Escolas de Melgaço (AEM), en Portugal. Aproveitamos estas liñas para lle agradecer á profesora de Espanhol das Escolas de Melgaço, Paula Cristina Domingues a súa implicación no proxecto.

O curso próximo desexamos continuar coas Cartas Arraianas, en colaboración coas Escolas de Melgaço.

Até o curso próximo! Obrigadas!

O pasado mércores 12 de xuño de 2024, recibimos aos cativos da casa niño "Raíces e Brotes" de Xinzo de Deva.

Os nenos e nenas do cole acolleron con grande entusiasmo aos seus futuros compañeiros e compartiron xogos e actividades na clase de Infantil, na biblioteca dos Mouchiños, na aula de psicomotricidade e no patio. Ata o 11 de setembro para o próximo reencontro!

O luns 3 de xuño de 2024, tivemos a visita de Ramón, traballador social da Consellería de Política Social e Xuventude, que organizou un obradoiro para o alumnado de 3º, 4º, 5º e 6º de Primaria.

Os nenos e nenas participaron en varios xogos cooperativos que pretendían mesturar diversión, valores do voluntariado e da solidariedade e recordar todas as actividades en relación co proxecta de "Voluntariado miúdo: móvete" que se realizaron ao longo deste curso. Ao final da actividade, recibiron un diploma pola súa xenerosa participación nas accións solidarias realizadas dende o centro.

O venres 31 de maio de 2024, o alumnado de 3º, 4º, 5º e 6º de Primaria estivo de excursión na Ribeira Sacra.

A xornada empezou coa visita do mosteiro de San Pedro de Rocas. Despois dunha pequena ruta de sendeirismo polo Camiño Real, o grupo dirixiuse ata o mosteiro de San Estevo de Ribas do Sil e acabou descubrindo o canón do Sil desde un catamarán.

Un día moi completo cheo de sorpresas e de diversión!

O alumnado da ESO celebrou o Maio con Poesía Xeolocalizada, un proxecto desenvolvido dende o Equipo de Dinamización da Lingua Galega (EDLG) e o Departamento de Lingua Galega.

Durante o mes de maio fomos compartindo no blog Padrenda Fala (blog do EDLG), diversos poemas xeolocalizados nos concellos de Padrenda, Pontedeva, Cortegada ou Crecente... A rapazada da ESO tomou unha fotografía nun lugar concreto, o seu favorito, e acompañouna dun texto poético propio, relacionado con ese lugar. 

Finalmente, compartiu connosco as coordenadas deste poema e desta imaxe, para que poidamos visitar este lugar tan especial cando desexemos, e compartir o que para elas e eles significa.

Eis unha mostra do traballo da rapazada:

Se queredes botarlle unha ollada aos poemas, podedes velos entrando no blog Padrenda Fala neste enlace, ou no banner da dereita desta web, facendo clic no de "Equipos de Dinamización da Lingua Galega".

Benvidas e benvidos á poesía xeolocalizada!