Ola rapazada, ola familias!

Un ano máis volta o Entroido ao noso colexio e como non somos de pouca troula... festexámolo a tope!!!

Por aquí deixámosvos un extracto de como fomos disfrazados todos e todas, alumnado e profesorado. Cada ciclo ou cada curso foron do que lles pareceu oportuno, pero todos cunha temática que estamos a traballar no centro este ano, O XOGO. Así atopámonos con MARIO BROS, pezas de LEGO, roles de ELFOS, do xogo de CLUEDO... Despois de facer un pasarrúas ata a Praza do Concello e vir de volta cantando unhas regueifas elaboradas polo alumnado, foi a quenda das merendas nas aulas cos doces típicos do Entroido para posteriormente, desfrutar dun recreo amplo ata a hora de irse para a casiña a desfrutar das vacacións. Picade na imaxe para visualizalas fotos e o vídeo máis abaixo.

Ata a vindeira entroidada!!!

O Entroido está moi preto,

así que pon atención

a todos estes mandados

pola Bruxa Encarnación:

LUNS 13:

O luns, para comezar,

a cabeza engalanada

teremos que levar.

MARTES 14:

Martes, con alegría,

en mandil todo o día!

MÉRCORES 15:

O mércores é un día moi especial

polo que todos xuntos temos que loitar,

apoiando aos nosos compañeiros

un pano na cabeza todos levaremos.

XOVES 16:

O xoves o mandado estará cumprido

cun pixama ben atrevido.

VENRES 17:

O venres chegou a festa:

Ao Concello cantando regueifas!

Mentres xogamos, aprendemos,

os nosos disfraces dan proba delo.

O 30 de xaneiro celebramos o Día da Paz. Para iso, cociñamos a mellor sopa do mundo para a paz de Centieiras. Por grupos cooperativos, levando a cabo a dinámica de lapis ao centro, preparamos as receitas para botar na pota e así cociñar unha sopa chea de agarimo, axuda e respecto.

No mes de outubro decidimos dar un pasiño máis e seguir formándonos en innovación educativa, inscribímonos no proxecto Observa-acción. Como indicamos na infografía, Observa-acción, trátase dun programa que ten como finalidade mellorar a práctica docente a través da observación entre iguais e a posterior posta en común e reflexión sobre o observado.

Na práctica... que supón isto? Supón abrir a aula a ollos atentos e curiosos de compañeiras que nos achegarán outra visión sobre o que pasa, sobre as relacións entre alumnado e mestras, sobre as diferentes actividades propostas, sobre a utilización do espazo, a linguaxe empregada...

Estamos emocionadas e desexando poder aprender as unhas das outras!