Actualidade

Día da Ilustración 2022

 
 
Cada 30 de xaneiro, coincidindo co día do nacemento de Castelao, celébrase o Día da Ilustración. Esta é unha iniciativa da Consellería de Cultura, Educación e Universidade en colaboración coa Asociación de Profesionais da Ilustración. Unha data que serve para reivindicar o papel dos profesionais do mundo da ilustración homenaxeando a un ilustrador ou ilustradora histórico galego. Este ano o protagonista é Reimundo Patiño pintor, gravador e autor de BD. "Pioneiro da arte contemporánea galega."
 
 
Unha ocasión para traballar e reivindicar desde as bibliotecas escolares a historia da ilustración galega que non deixa de ser memoria do noso país. Para achegarnos ao valor propio das imaxes  máis aló dun complemento da escrita.
 
 
Tamén, unha oportunidade para poñer en valor o traballo da ilustradora Paula Mayor autora do cartel deste ano, unha poderosa imaxe da que seguro teremos moitas e variadas lecturas: estéticas, literarias, históricas, mitolóxicas ... ao tempo que viaxamos polo "desacougo creador" do homenaxeado neste 2022.
 
 
Nesta data, desde a Asesoría de bibliotecas escolares queremos poñer en valor o  traballo dos ilustradores e ilustradoras  ao longo de 14 anos de creación e de colaboración na edición dos carteis anuais para as bibliotecas escolares galegas, que iniciáramos en 2008 , e, de paso, celebrarmos estas fermosas imaxes a prol da lectura que fomos quen, entre todos, de poñer nos muros dos centros educativos. Imaxes que xurden dun coidado proceso de creación a partir do lema proposto. Imaxes que son testemuña gráfica da evolución das bibliotecas escolares galegas.
 
 
Ilustradores e ilustradoras dos carteis anuais:  
 

Novos artigos sobre bibliotecas escolares na Revista EDUGA de decembro de 2021

A Consellería de Cultura, Educación e Universidade vén de facer público o novo número da Revista Galega do Ensino (EDUGA), que conta cunha sección fixa de Bibliotecas Escolares. Neste número 82 de decembro de 2021 pubícanse un total de sete artigos, nas tres sub-seccións: Biblioteca escolar, Boas prácticasHora de ler. Nestes artigos, atopamos reflexións e actividades sobre as posibilidades do traballo coa linguaxe oral na biblioteca escolar de xeito xeral e a través de programas como Radio na biblio, Biblioteca Creativa ou Clubs de lectura; sobre a alfabetización mediática e informacional na biblioteca creativa e o traballo por proxectos e a biblioteca como motor de inclusión.
 

Falar e escoitar: outras caras da linguaxe

Aurora Ramilo Alfaya

CEIP P. de Leirado (Salvaterra de Miño-Pontevedra) 

 

A palabra habita a biblioteca escolar

Cristina Novoa Fernández 

 

O club de lectura como escusa

Juan Manuel Vázquez

IES Lama das Quendas (Chantada-Lugo) 

 

Obradoiro na Biblioteca Creativa

Paola Guimerans e Diego Rúa 

 

BiblioMaraña ten a palabra 

Laura Gómez Gómez

CEIP P. Vilar de Barrio (Vilar de Barrio-Ourense) 

 

A biblioteca como motor inclusivo

Nuria Garrido, Cruz Rivas e Fátima Rodríguez

IES Antón Alonso Rivas (Tomiño-Pontevedra) 

 

 

Os instrumentos do Pórtico da Gloria 

Rafael Sánchez-Agustino e Cristina Campos

CEIP A Lama (A Lama-Pontevedra) 

Xornada de Bibliotecas Escolares de Galicia 2021

 
O vindeiro sábado 20 de novembro celebrarase no Palacio de Congresos de Santiago de Compostela a Xornada de Bibliotecas Escolares de Galicia 2021. Retomamos a presencialidade nun encontro con máis de 800 persoas inscritas. Daranse cita equipos de biblioteca, docentes, asesores/as dos centros de formación do profesorado e persoas expertas na temática do lema deste curso "A biblioteca escolar ten a palabra".
 
Unha xuntanza que falará do poder da palabra na narración oral, as novas oralidades, os medios de comunicación... e do papel facilitador da biblioteca a través do diálogo, o debate, a exposición, a radio, os clubs de lectura...
Será, novamente, unha ocasión para o encontro entre o profesorado deste amplo colectivo de docentes que poñen en pé as bibliotecas escolares galegas, o reforzo de vínculos persoais e profesionais e, con toda seguridade, o comezo de novas colaboracións para o presente curso.  
 

Convocatoria do programa Bibliotecas Escolares Solidarias para o curso 2021/2022

 
O Portal Educativo vén de publicar hoxe a Resolución de 15 de novembro de 2021, da Dirección Xeral de Centros e Recursos Humanos, pola que se convoca o programa "Bibliotecas Escolares Solidarias" para o curso 2021/2022. Esta iniciativa lévase a cabo coa colaboración da Dirección Xeral de Xuevntude, Participación e Voluntariado, da Consellería de Política Social.
 
 
O seguinte cadro resume o contido do programa e as datas claves para cada unha das modalidades:
 
 
 Iniciativa  Finalidade  Carcaterísticas
  1 Concesión do Selo “Biblioteca Escolar Solidaria”  Recoñecer bibliotecas que traballan de forma salientable a compensación de desigualdades e fomentan o voluntariado cultural entre os integrantes da comunidade escolar.

 

  •  Convocatoria anual
  • Destinado ás bibliotecas dos centros de Educación Infantil, Educación Primaria, Educación Secundaria, Bacharelato, ciclos formativos ou ensinanzas de réxime especial.
  • Presentación de memorias por parte dos centros interesados: 10 de maio de 2022.
  • Concesión dos selos (un máximo de 15 selos por curso escolar)
  • As candidaturas deberán responder aos obxectivos da Axenda 2030 da ONU de desenvolvemento sustentable.

 

 

 2 Voluntariado na biblioteca escolar (Secundaria)

Recoñecemento de horas de voluntariado na biblioteca escolar para o alumnado colaborador, mediante a emisión de diplomas de acción voluntaria correspondentes.

 

  • Convocatoria anual
  • Destinado a alumnado de Educaión Secundaria, Bacharelato, ciclos formativos ou ensinanzas de réxime especial .    
  •  As bibliotecas escolares deberán adherirse ao programa no momento que se estipule e levar rexistro das actividades do alumnado (data límite: 10/12/2021).
  • Remitir datos alumnado (data límite: 27/05/2022)

 

 3  Voluntariado de lectura-A (Primaria)  Estimular o voluntariado cultural relacionado coa biblioteca e a lectura
  •  Convocatoria anual
  • Destinado a alumnado de 5º e 6º de Educación Primaria.
  • Inscrición con data límite 10/12/2021
  • Os centros inscritos presentarán memoria de actividades (data límite 29/04/2022).
  • Seleccionaranse un mínimo de 10 experiencias.
  • Concreción en convocatoria complementaria (febreiro 2022)

 

24 de outubro, Día das Bibliotecas, de todas as bibliotecas.

 
 
Dende 1997 celébrase o Día das Bibliotecas o 24 de outubro, unha conmemoración impulsada pola Asociación de Amigos del Libro Infantil y Juvenil á que se foron sumando, xa dende hai algún tempo, o propio Ministerio de Cultura e todas as administracións autonómicas. 
 
 
A Dirección Xeral do Libro e Fomento da Lectura, a través da Subdirección Xeral  de Coordinación Bibliotecaria, impulsa a celebración do Día das Bibliotecas, este 24 de outubro de 2021. "A edición deste ano, baixo o lema “Bibliotecas: ler, aprender, descubrir” céntrase en destacar o papel das bibliotecas de diferente tipoloxía como espazos libres, diversos e abertos para o acceso á cultura e o coñecemento, a partir da lectura e do conxunto de recursos que permiten a aprendizaxe e posibilitan o descubrimento doutras ideas, outras persoas, outras culturas e outros mundos."
 
As bibliotecas escolares galegas amosáronse, e continúan facéndoo, como unha ferramenta ao servizo da comunidade educativa ofrecendo recursos, información e apoio. Cómpre reivindicalo e celebrar que son xanelas para ler, espazos onde aprender e lugares para descubrir.
 
A biblioteca escolar, esa biblioteca pola que pasan todas as nenas e todos os nenos do país, a primeira biblioteca que lles aprende, tamén, a usar outras, que os pon en contacto con eses outros espazos do coñecemento e do lecer, eses lugares nos que pasan moitas cousas, que son as bibliotecas públicas, eses lugares que están sempre ao noso carón: as BIBLIOTECAS. 
 
Este curso, o lema das bibliotecas escolares de Galicia A BIBLIOTECA ESCOLAR TEN A PALABRA , quere poñer o foco na palabra e na oralidade. Este lema é aproveitado por algunhas das bibliotecas para esta celebración. 
 
 
Actividades nas bibliotecas escolares galegas:
 

Instrucións sobre organización e funcionamento da biblioteca escolar. Curso 2021/2022

 
 
 O Portal Educativo publica as Instrucións da Dirección Xeral de Centros e Recursos Humanos en relación coa organización e funcionamento da biblioteca escolar, destinadas aos centros públicos de niveis non universitarios, de titularidade da Consellería de Cultura, Educación e Universidade.
 
Estas instrucións inclúen unha cláusula específica relativa á situación xerada pola COVID-19, e actuacións que se consideran necesarias na biblioteca escolar, coordinadas e supeditadas ás instrucións xerais das autoridades sanitarias e educativas para os centros no seu conxunto.
 

Resolución definitiva do Plan de mellora de bibliotecas escolares - centros públicos. Curso 2021/2022

 
 

 
 O DOG do 31 de agosto de 2021 publica o Orde de 13 de agosto de 2021 pola que se resolve o Plan de mellora de bibliotecas escolares en centros públicos de titularidade da Consellería de Cultura, Educación e Universidade  para o curso 2021/2022. Intégranse 27 novos centros e, finalmente, son un total de 729 bibliotecas escolares as que conforman o PLAMBE-públicos neste curso que hoxe comeza.
 
 
As bibliotecas escolares demostraron nos dous últimos cursos que son un instrumento e un valor do centro á hora de enfrontar novas formas de vincular á comunidade educativa, de ofrecer recursos para apoiar as aprendizaxes, de reforzar as competencias clave do alumnado e de facilitar lecturas e actividades que axuden a medrar como cidadáns activos e como lectores críticos da realidade. Cómpre seguir na pescuda de todas as súas potencialidades, adaptándose á situación sanitaria pero con iniciativa para presentar solucións aos problemas que se presentan. 
 
 

  • TEXTO DA RESOLUCIÓN DEFINITIVA DO PLAMBE-públicos no DOG (31/08/2021) 

 
 
 
 

Resolución provisional Plan de mellora de bibliotecas escolares - Públicos (centros de nova incorporación). Curso 2021/2022

 
Portal Educativo publica hoxe, 5 de xullo, a relación provisional de centros que se incorporan ao Plan de mellora de bibliotecas escolares para o curso 2021/2022, co detalle das contías asignadas inicialmente, segundo o previsto na Orde de 19 de abril de 2021 (DOG de 04/05/2021).  Intégranse, segundo esta resolución, 25 novos centros. Este número poderá incrementarse na resolución definitiva en función das baixas ou renuncias ocasionadas. Esta resolución final, que se publicará no DOG, unha vez rematado o proceso, recollerá a totalidade dos centros públicos integrados no PLAMBE para o curso 2021/2022, así como as asignacións destinadas ás intervencións de mellora e actualización das bibliotecas escolares. 
 
Ábrese un prazo de 5 días naturais a contar a partir de mañá 6 de xullo, para a presentación das alegacións que se considere conveniente. 
 

Novos artigos sobre bibliotecas escolares na Revista EDUGA de xuño de 2021

 
 
A Consellería de Cultura, Educación e Universidade vén de facer público o novo número da Revista Galega do Ensino (EDUGA), que conta cunha sección fixa de Bibliotecas Escolares. Neste número 81 de xuño de 2021 pubícanse un total de cinco artigos, nas tres sub-seccións: Biblioteca escolarBoas prácticas e Hora de ler. Nestes artigos, atopamos reflexións e actividades sobre os espazos e tempos que a lectura precisa e as viaxes coas que nos agasalla, a recuperación da memoria da comunidade a través do traballo por proxectos, o proceso de inclusión de alumnado con discapacidade auditiva na biblioteca e a igualdade de oportunidades que as bibliotecas escolares dos centros de ensino rural ofrecen as súas comunidades educativas.
  

Biblioteca escolar no ensino enraízado

Cristina Novoa Fernández 

 

 Pasado, presente e futuro da nosa experiencia na inclusión de persoas con discapacidade auditiva.

Rebeca Ares Iglesias - IES Taboada Chivite (Verín-Ourense) 

 

 A biblioteca en comunidade

Mª Dulcenombre Carro Etchepare - CEIP NIcolás del Río (Cedeira-A Coruña) 

 

 Silencio, estamos lendo!

Covadonga Rodríguez Argüelles - CEP Xosé Mª Brea Segade (Rianxo-A Coruña) 

 

 O noso google maps lector en tempos de pandemia

José María Lores Pérez - IES San Paio (Tui-Pontevedra) 

Letras galegas todo o ano nas bibliotecas escolares, en maio tamén.

 
 
Achégase o día grande das Letras Galegas e as bibliotecas escolares, neste ano 2021, incorporan a Xela Arias ao seu traballo en prol da nosa lingua. A súa mirada incorfomista e creativa, como mestra, editora, tradutora e poeta,  convida a  facer lectores en galego a través da singularidade da súa palabra.
 
Na imaxe, collage de Ana Piñón Vale do IES Agra do Orzán de A Coruña.
 
Velaquí algúns exemplos de actividades nas bibliotecas escolares galegas nestes días de maio de 2021:
 

Materiais dos Encontros PLAMBE 2020/2021

 
Os pasados 15 e 16 de abril de 2021 celebráronse, na Cidade da Culturas de Santiago de Compostela, os Encontros PLAMBE na rede 2020/2021 . Cun formato telemático, debido a situación sanitaria, desenvolvéronse conferencias plenarias e dous itinerarios formativos.
 
No enlace que adxuntamos a redeBE podedes acceder aos vídeos das presentacións e aos materiais aportados  polos poñentes.
 

Plan de mellora de bibliotecas escolares para o curso 2021/2022 - Centros públicos

 
O DOG publica hoxe a Orde do 19 de abril de 2021 pola que se convoca o Plan de mellora de bibliotecas escolares en centros públicos non universitarios da Consellería de Cultura, Educación e Universidade , para o curso 2021/22.
 
Ao igual que en anos anteriores, seleccionaranse un mínimo de 25 centros novos para a súa incorporación ao PLAMBE, podendo ampliarse este número no caso de baixas ou renuncias de centros xa integrados neste programa en convocatorias anteriores. Os centros que se incorporaron nas convocatorias 2005, 2006 e 2007, poderán recibir, ademáis da asignación para fondos, unha asignación complementaria para a renovación de mobiliario e outros equipamentos imprescindibles para o funcionamento da  biblioteca escolar. A continuidade no PLAMBE esixe a solicitude correspondente a través desta convocatoria, coa entrega da documentación que se solicita en cada caso, así como acadar unha valoración positiva na memoria de actividades deste curso 2020/2021.
 
O prazo de presentación será dun mes, contado a partir do día seguinte ao da publicación da presente convocatoria no Diario Oficial de Galicia.
 
 

Telexornal "Xela Arias" desde o CPI dos Dices

 
Desde o CPI Plurilingüe dos DIces (Rois-A Coruña) chéganos, como en anos anteriores, o telexornal adicado á figura homenaxeada no Día das Letras Galegas. Neste ano 2021, as nenas e nenos implicados nesta experiencia de alfabetización mediática traballaron sobre XELA ARIAS, baixo a dirección do profesor Luís Aldegunde, e presétannos un documento imprescindible para achegarnos á autora e a súa obra.
As circunstancias excepcionais nas que nos atopamos obrigaron  a realizar as entrevistas de xeito virtual. 
Parabéns, este ano novamente, por un proxecto de alta calidade e estabilidade. 

Premio dos Clubs de Lectura 2021 para Eva Mejuto

Co gallo da celebración do Día do Libro, a Dirección Xeral de Centros e Recursos Humanos, da Consellería de Cultura, Educación e Universidade , fai pública a Resolución de 23 de abril de 2021 pola que se recoñece a Eva Mejuto co Premio dos Clubs de Lectura 2021. 
 
No ano 2015 creouse este premio co obxecto de recoñecer cada ano a aqueles autores e autoras que, cos seus libros, axudan á construción de lectoras e lectores nestas etapas da adolescencia e a mocidade que, no ámbito da lectura, están consideradas como etapas de risco de abandono, ao ampliarse o abano de estímulos e intereses. Uns creadores comprometidos coa lingua que achegan a materia prima coa que os clubs de lectura poden contribuír á extensión da lectura en galego. Na resolución de creación do premio contemplábase que “o Premio dos Clubs de Lectura poderá entregarse unha soa vez a un autor ou autora. No caso de que o primeiro creador da relación resultante nun curso xa tivese recibido o premio, este seralle concedido ao autor ou autora seguinte na relación”.   Até o momento recibiron este galardón os escritores Agustín Fernández Paz (2015), Ledicia Costas (2016), Miguelanxo Prado (2017), Carlos Negro(2018), María Reimóndez (2019) e Andrea Maceiras (2020).
 
Eva Mejuto é unha das autoras más seguidas polo lectorado infantil e xuvenil galego. Na súa web podemos coñecer toda a súa traxectoria e todos os seus libros. Dous dos seus títulos, Memoria do silencio e 22 segundos están incluídos entre os 50 libros máis lidos nos Clubs de lectura no curso 2019/2020

As/os 40 autoras e autores máis lidos polos Clubs de Lectura no curso 2019-2020

 
Como en anos anteriores, trala revisión das memorias dos Clubs de lectura correspondente ao curso 2019/2020, e á vista das lecturas realizadas polos diferentes grupos integrados no club de lectura de cada centro participante, pódese coñecer a relación dos 50 títulos máis lidos así como o número de lectura realizadas de cada autor ou autora, tendo en conta as diferentes obras lidas de cada un deles.
 
 
Publícase agora a relación dos 40  autores e autoras máis lidos polos clubs de lectura nese período.
 
 

Día Mundial do Libro e do Dereito de Autor - 2021

 
Achégase o Día Mundial do Libro e do Dereito de Autor, en acepción da UNESCO, e desde a Consellería de Cultura, Educación e Universidade  edítase o díptico para conmemorar este día 23 de abril de 2021.
 
Acudiuse, como en anos anteriores a unha persoa referente da literatura galega actual, neste caso a profesora, tradutora e poeta, Elvira Ribeiro, quen creou un texto orixinal cedido xenerosamente para esta pequena peza de difusión do Día do Libro, centrándose nas potencialidades da lectura e que nos agasalla esta evocadora afirmación: 
 
"Talvez é ler un diamante de mil caras, un mar sen varandas."
 
Neste mes, e todo o ano, non agardemos a que os libros peten na nosa porta, naveguemos por un mar de lecturas e deixémonos arrolar polas súas ondas.
 
As imaxes son unha colaboración da nosa compañeira Cristina Novoa, a quen agradecemos as fotografías tomadas en Malta e na Ría de Aldán.
 

VII Concurso de Traballo por Proxectos

O Portal Educativo publica  a Resolución da Dirección Xeral de Centros e Recursos Humanos, do 12 de abril de 2021, pola que se convoca o VII CONCURSO DE TRABALLO POR PROXECTOS, vinculados ou apoiados pola biblioteca escolar, en centros públicos non universitarios de titularidade da Consellería de Cultura, Educación e Universidade, para traballos realizados durante o curso 2020/2021.
 
As modalidades nas que se pode participar son as seguintes:  
 
1. Proxectos de carácter interdisciplinario, ou Proxectos Documentais Integrados , coordinados desde a biblioteca escolar, e que conten coa participación dun mínimo do 40% dos grupos-aula existentes no centro (e un 40% dos departamentos, no caso dos centros de ensinanza secundaria).   
 
2.   Proxectos de investigación dirixidos por profesorado dun grupo, nivel, ciclo ou departamento, nas seguintes sub-modalidades:
a.    Traballos de grupo/nivel
b.    Traballos de ciclo/departamento
c.   Proxectos realizados na materia de libre configuración de 1º/2º de ESO “Investigación e Tratamento da Información”, ou noutras      materias equivalentes en ESO ou primaria. 
 
3.   Proxectos de investigación intercentros, promovidos desde as bibliotecas de ata un máximo de tres centros de ensino co fin de desenvolver un proxecto común, de temática xeral ou científica.
 
4.   Proxectos realizados con metodoloxía científica. Co fin de estimular a curiosidade por distintos fenómenos das ciencias experimentais ou sociais e reforzar o desenvolvemento do pensamento científico do alumnado, establécese unha nova modalidade, á que se poderán presentar traballos realizados co apoio dos recursos e oportunidades da biblioteca escolar, en calquera dos formatos anteriores: proxecto interdisciplinario, grupo-nivel, grupo internivelar/departamento ou na materia de “Investigación e Tratamento da Información” de 1º/2º de ESO, ou semellante en ensino primario, baixo as pautas do método científico. 
 
 
O prazo de presentación de traballos remata o 10 de xullo de 2021. 
 
   
Na imaxe, proxecto "MonteMar" do CEP Brea Segade (Taragoña-Rianxo)

Encontros PLAMBE 2020-2021

 
 
Os vindeiros 15 e 16 de abril celébranse, con formato telemático, os Encontros do Plan de mellora de bibliotecas escolares correspondentes ao curso 2020/2021, con intervención de persoas expertas en diversos ámbitos relacionados coas bibliotecas, a lectura, a literatura, a comunicación, a mediación lectora, a alfabetización mediática e informacional, a Axenda 2030. Ademais, presentaranse un total de 11 experiencias de centros de moi diverso contido (funcionamento da biblioteca escolar, Hora de ler, clubs de lectura, traballo por proxectos, familias na biblioteca escolar e outros). Neste ano de "Xeografías lectoras", viaxaremos polas posibilidades que ofrece a  biblioteca escolar para a construción da persoa lectora a través das actividades que programa e os recursos que pon a disposición da comunidade educativa. Unha ocasión para encontrarnos coa lectura en toda a súa potencialidade.
 
 

 

 

 

 

 

 

 

 

24 de febreiro, Día de Rosalía

 

 

 

Cantarte hei, Galicia,

teus dulces cantares,

que así mo pediron

na veira do mare.


 Cantarte hei, Galicia,

na lengua gallega,

consolo dos males,

alivio das penas. 

("Cantares gallegos") 

 

 

Imaxe do CEIP Milladoiro (Malpica de Bergantiños-A Coruña)

O 24 de febreiro está recollido no Calendario do Libro e a Lectura, publicado pola Consellería de Cultura, Educación  e Universidad, como o aniversario do nacemento de Rosalía de Castro. Cada ano son máis as institucións que se suman á celebración do DÍA DE ROSALÍA, entre elas as bibliotecas escolares promovendo actividades que achegan ao alumnado a súa vida e obra. Traballos de investigación, lecturas compartidas, roteiros, actividades plásticas e creativas, programas de radio, proxectos multimedia... son algunhas das propostas que nestes días salientan a modernidade e actualidade do seu pensamento.

 

Asociación de Escritoras e Escritores en  Lingua Galega convida neste 2021, baixo o lema Teus doces cantares, a celebrar este día co agasallo dun libro en galego e unha flor ás amizades e persoas queridas. Publica un manifesto na voz  de Anna R. Figueiredo e propón múltiples actividades ás que se poden sumar os centros educativos. Unha proposta para traballar o compromiso da nosa poeta a través dos seus doces cantares.

As nosas bibliotecas programan múltiples actividades: programas de radio, roteiros, vídeos, concursos, xogos, recitados interxeracionais en varias linguas... 

 

Actividades nas bibliotecas escolares:


 

 

Día da Ilustración 2021

 

Cada 30 de xaneiro, coincidindo co día do nacemento de Castelao, celébrase o Día da Ilustración. Esta é unha iniciativa da Consellería de Cultura, Educación e Universidade en colaboración coa Asociación de Profesionais da Ilustración. Unha data que serve para reivindicar o papel dos profesionais do mundo da ilustración homenaxeando a un ilustrador ou ilustradora histórico galego. Este ano a protagonista é Lolita Díaz Baliño "... unha pioneira artista multidisciplinar que desafiou as convencións sociais da época."

Unha ocasión para traballar e reivindicar desde as bibliotecas escolares a historia da ilustración galega que non deixa de ser memoria do noso país. Para achegarnos ao valor propio das imaxes  máis aló dun complemento da escrita.

 

 

Tamén, unha oportunidade para poñer en valor o traballo do ilustrador Manel Cráneo autor do cartel deste ano, unha poderosa imaxe da que seguro teremos moitas e variadas lecturas: estéticas, literarias, históricas, mitolóxicas ... ao tempo que viaxamos polas xeografías da ilustración.

 

Nesta data, desde a Asesoría de bibliotecas escolares queremos poñer en valor o  traballo dos ilustradores e ilustradoras  ao longo de 13 anos de creación e de colaboración na edición dos carteis anuais para as bibliotecas escolares galegas, que iniciáramos en 2008 , e, de paso, celebrarmos estas fermosas imaxes a prol da lectura que fomos quen, entre todos, de poñer nos muros dos centros educativos. Imaxes que xurden dun coidado proceso de creación a partir do lema proposto. Imaxes que son testemuña gráfica da evolución das bibliotecas escolares galegas.

 

Ilustradores e ilustradoras dos carteis anuais: 

 

 

Materiais do Encontros Bibliotecas Escolares de Galicia 2020 na rede

 

 

 

Os pasados 19, 20 e 21 de novembro de 2020 celebrouse, no Palacio de Congresos de Santiago de Compostela, o Encontro de Bibliotecas Escolares de Galicia 2020 na rede. Cun formato telemático, debido a situación sanitaria, desenvolvéronse conferencias plenarias e tres itinerarios formativos: Biblioteca Escolar, Xeografías Lectoras e Biblioteca Escolar Fronte á Adversidade.

No enlace que adxuntamos a redeBE podedes acceder aos vídeos das presentacións e aos materiais aportados  polos poñentes.

 

 

 

 

 

 

 

 

Novos artigos sobre bibliotecas escolares na Revista EDUGA de decembro de 2020

 
 
A Consellería de Cultura, Educación e Universidade  vén de facer público o novo número da Revista Galega do Ensino (EDUGA), que conta cunha sección fixa de Bibliotecas Escolares. Neste número 80 de decembro de 2020 publícanse un total de 6 artigos, nas tres sub-seccións: Biblioteca escolarBoas prácticas e Hora de Ler. Nestes artigos, atopamos reflexións e actividades sobre o papel da biblioteca creativa no cambio das dinámicas dos centros e na promoción dos talentos do alumnado, a radio como nexo de unión durante o cese da actividade formativa presencial, o traballo por proxectos e as xeografías lectoras propias e imaxinadas. Unha revisión destes artigos, e do resto de traballos publicados en números anteriores da revista, serve para achegarse á realidade das bibliotecas escolares galegas, autenticos motores de innovación e viveiros de cidadanía, tamén en tempos estranos.
 

 Xeografías lectoras na biblioteca escolar

Asesoría de bibliotecas escolares 

 

As bibliotecas creativas e a diferenciación curricular

Diego Rúa Romero - CEIP Canosa-Rus (Coristanco-A Coruña)

 

Betanzos, 800 anos

Julián Ferrer, Mª Jesús Santamariña e Mª Carmen Suárez

IES Francisco Aguiar (Betanzos-A Coruña) 

 

Onda ti: a radio que une

Diego A. López Rodríguez - CEIP Emilia Pardo Bazán (A Coruña) 

 

 Biblioteca creativa: removendo conciencias

Miriam Area Rodríguez - CEIP P. da Torre-Cela (Bueu-Pontevedra) 

 

Xeografías lectoras: atlas de lugares imaxinarios

Mª Carmen Rubio Piñeiro - CEIP Saco e Arce (Toén-Ourense) 

Obxectivos de Desenvolvemento Sustentable

Desde o ámbito bibliotecario recoñécese a importancia dos Obxectivos da Axenda 2030 e a contribución das bibliotecas como  espazos que ofrecen acceso e oportunidades para todos e todas. As bibliotecas escolares están comprometidas coa Axenda 2030, xa que traballan a prol dunha educación de calidade (Obxectivo 4), na protección e salvagarda do patrimonio cultural (Obxectivo 11.4) e promoven a inclusión do acceso á información e ás tecnoloxías da información e comunicación (Obxectivos 5.b, 9.c, 16.10, 17.8.

A Dirección Xeral de Calidade Ambiental e Cambio Climático (Consellería de Medio Ambiente) achéganos os ODS traducidos ao galego, documento que sabemos será de interese para os proxectos e documentos das bibliotecas escolares.

 
 

Encontro Bibliotecas Escolares de Galicia 2020 na rede

Os pasados 12 e 13 de marzo estaba prevista a realización dos Encontros PLAMBE 2020 que tiveron que ser adiados pola situación sanitaria ocasionada pola COVID-19. Ao longo destes meses foise configurando unha nova actividade na que se recolle a meirande parte do programa daqueles encontros e se inclúen algúns contidos necesarios, como experiencias de bibliotecas no confinamento e outros.Cómpre tamén mudar o formato e o que antes era un encontro gozoso do colectivo do profesorado vinculado ás bibliotecas escolares galegas, debe ser, polas circunstancias sanitarias que vivimos, unha actividade telemática, á que cada quen poderá participar desde os seus dispositivos electrónicos e desde a súa casa. 

Publícase o programa do ENCONTRO BIBLIOTECAS ESCOLARES DE GALICIA 2020 NA REDE que terá un formato telemático e que se celebrará nas tardes do 19 e 20 de novembro e na mañá do sábado 21. A actividade está aberta a todo o profesorado interesado (1.000 prazas), contemplándose como criterio de prioridade a vinculación á biblioteca escolar dun centro PLAMBE, no caso de que haxa máis inscricións que prazas dispoñibles. O profesorado interesado deberá asistir a 8 horas de formación para acceder a certificado. Deberá conectarse 4 horas de sesións plenarias ou obrigatorias, ao longo das tres xornadas, e outras 4 horas a elixir entre a oferta dispoñilbe de experiencias e relatorios, organizado incialmente en tres itinerarios posibles, pero combinables entre si. A asistencia ás 8 horas en total daralle dereito a un certificado de participación. 

Está aberto o prazo de inscrición en FPROFE, co código G2003002. Unha vez superado o proceso de inscrición, admisión e confirmación, o profesorado participante poderá elixir as sesións optativas nas que ten interese, a través dunha ligazón que se lle facilitará, realizando o seu propio itinerario ou escollendo dentro do itinerario de preferencia. Finalmente recibirá os códigos para poder asistir ás sesións do Encontro.

O prazo de inscrición remata o 20 de outubro.

Animamos a todo o profesorado interesado a compartir con nós esta nova aventura formativa.

 

 

#bescolaresgalAbertas polas Letras Galegas 2020

Neste inusual mes de maio, a figura do homenaxeado nas Letras Galegas 2020 asómase á xanela das bibliotecas escolares galegas. Os nosos espazos permanecen abertos, desde a distancia, para traballar a  Ricardo Carvalho Calero e saber máis da súa contribución ao estudo da literatura galega, do seu maxisterio, do seu compromiso coa lingua, da súa poesía e teatro...
Imaxe de María López Pousa
Recursos:

  • Actividades das bibliotecas escolares galegas:
Por mor da crise sanitaria, a Real Academia Galega decidiu que se retomara en outubro a celebración das Letras Galegas de Ricardo Carvalho Calero. E as bibliotecas escolares galegas continuaron coas actividades: