O conselleiro de Cultura e Educación salienta o valor do traballo do profesorado de Tecnoloxía para pór de manifesto as dotes innovadoras do alumnado galego
Xesús Vázquez Abad participou hoxe na inauguración das XII Xornadas de Tecnoloxía
Ven, 31/05/2013 - 18:06
O conselleiro de Cultura e Educación na inauguración das Xornadas de Tecnoloxías
O conselleiro de Cultura e Educación na inauguración das Xornadas de Tecnoloxías

O conselleiro de Cultura, Educación e Ordenación Universitaria, Xesús Vázquez Abad, salientou hoxe o valor do traballo do profesorado da materia de tecnoloxía para pór de manifesto as dotes innovadoras do alumnado galego. Durante a súa participación na inauguración das XII Xornadas de Tecnoloxía, organizadas pola Asociación do Profesorado de Tecnoloxía en Galicia (APETEGA) no IES a Guía (Vigo), o conselleiro sinalou ademais a necesidade de artellar proxectos colectivos para acadar o obxectivo de que Galicia participe nun desenvolvemento tecnolóxico de calidade, propio e baseado no intercambio en igualdade co exterior.

Neste sentido, e referíndose a presenza como conferenciante inaugural de Javier Méndez Zunzunegui, sinalou que o sistema educativo galego xa conta cunha boa base, como demostra a presenza de dúas alumnas do CPI Plurilingüe de Os Dices (Rois) na fase final do certame ‘YouTube Space Lab’, unha competición internacional convocado pola Axencia Espacial Europea (ESA), a NASA e a Axencia de Exploración Espacial de Xapón (JAXA), cun proxecto do que Zunzunegui foi supervisor. Así mesmo, este docente asesorou neste mesmo centro de Rois o proxecto desenvolvido por alumnado de 3º de ESO, que deseñou un robot TRT de trasporte para desprazar mercancías, e que con este traballo - que se presenta nas xornadas- acaban de quedar finalistas do concurso europeo de robótica que organiza a Axencia Espacial Europea.

O conselleiro felicitou aos organizadores e participantes polo seu interese e traballo “en prol da sociedade do futuro”, e desexou o maior dos éxitos para estas xornadas, que expresan “o devezo de renovar a gran rede que sementa a tecnoloxía no ensino galego, a apertura a enriquecer as perspectivas e a compartir as descubertas ou as vías de transformación”.

As Xornadas, que reúnen hoxe e mañá a un cento de docentes de Tecnoloxía, teñen como obxectivo o intercambio e divulgación de experiencias didácticas, material de aula e proxectos relacionados con esta área, así como unha reflexión sobre a materia, de tal modo que os participantes poidan mellorar a súa intercomunicación a prol dunha mellora da calidade do ensino público. Así mesmo ofrécese ao profesorado un afondamento práctico nos distintos ámbitos desta parte do currículo escolar – electrónica, informática...-, facendo especial fincapé nas experiencias innovadoras e nas novas tecnoloxías da información e a comunicación (TIC) como recurso educativo.

Obradoiros prácticos

A duodécima edición deste encontro arrincou hoxe coa conferencia inaugural de Javier Méndez Zunzunegui. O encontro está centrado, na súa maior parte, en obradoiros, a través dos que o profesorado asistente poderá afondar en ferramentas como Google Apps ou Google Inventor, o uso do software libre no ámbito do ensino en xeral e da Tecnoloxía en particular, o moldeo de modelos tridimensionais en parafina, ou diferentes prácticas de fundición, entre outros temas. Ademais, exporanse proxectos, como os elaborados polo alumnado sobre planos reais e a escala 1:10 de instalacións eléctricas.

O programa das xornadas complétase con visitas didácticas para os asistentes, á Escola de Artes e Oficio de Vigo ou ao Citexvi (Cidade Tecnolóxica de Vigo) e mais ao Centro de Interpretación das Illas Atlánticas.