Cultura e Educación propón unha forma alternativa de visitar o Museo de Galicia a través dunha intervención de Mercedes Peón

O 5 de maio, ás 12 horas, o visitante que se achegue á Cidade da Cultura vivirán unha experiencia sonora a través da obra SÓS sen perder de vista a arquitectura
Mercedes Peón instalarase como obra escultórica nunha parte do Museo e estará acompañada pola banda composta por Manuel Alonso, Manuel Cebrián e Ana García
O departamento de Vázquez Abad pon, unha vez máis, este espazo arquitectónico ao servizo dos creadores, converténdose nun lugar para o diálogo entre as artes
Mar, 24/04/2012 - 12:30
Cultura e Educación propón unha forma alternativa de visitar o Museo de Galicia
Cultura e Educación propón unha forma alternativa de visitar o Museo de Galicia a través dunha intervención de Mercedes Peón

Unha outra forma de descubrir o Museo de Galicia. Esta é proposta que a Consellería de Cultura, Educación e Ordenación Universitaria ten preparada para o vindeiro sábado 5 de maio na Cidade da Cultura. Seguindo a proposta de Mercedes Peón, unha das artistas galegas máis carismáticas do circuíto da world music actual, o visitante que se achegue ao Museo de Galicia a partir das 12:00 horas poderá vivir unha experiencia única a última que teña lugar no Museo antes da súa inauguración oficial, prevista para o mes de xuño cando abra as súas portas Gallaecia Petrea.

Con esta actuación, de entrada libre e de balde, o departamento que dirixe Xesús Vázquez Abad pon, unha vez máis, este espazo arquitectónico ao servizo dos creadores, converténdose coas súas intervencións –xa sexan sonoras, plásticas ou conceptuais- nun lugar para reflexión, para a inspiración e, sobre todo, para o diálogo entre as artes.

Mercedes Peón propón unha fuxida conceptual da mera exhibición: intriga, tránsito e o efémero no Museo de Galicia. A artista instalarase como obra escultórica nunha parte do Museo, sen intervir sonoramente no espazo. A proposta xorde a partir de escoitas individuais para que as persoas teñan unha experiencia sonora a través da obra SÓS e sen perder de vista a magnitude da arquitectura.

Esta intervención sonora conta coa colaboración do escultor Suso Basterrechea, quen aporta unha instalación minimalista, chea de tensión e frialdade estática con só movementos naturais provocados pola propia física e pola orixinalidade do seu pensamento. A el súmase a complicidade de Ovidio Aldegunde e da banda que acompañará a Mercedes Peón, composta por Manuel Alonso, Manuel Cebrián e Ana García.

A Consellería outorga, deste xeito, un espazo de representación a unha proposta única pensada para provocar itinerancia en busca da instalación musical. Cincuenta minutos de interrelación entre obras que se ofrecen simultáneas e con vida propia.