Galicia participa na creación da Conferencia de Responsables Autonómicos de Universidade e Investigación, CRAU

Trátase dun órgano de cooperación, debate e discusión entre Comunidades Autónomas no ámbito da política universitaria
O secretario xeral de Universidades, José Alberto Díez de Castro, participou na xornada directores xerais de Universidade celebrada en Baleares
Ven, 05/04/2019 - 13:02
Galicia participa na creación da Conferencia de Responsables Autonómicos de Universidade e Investigación, CRAU
Galicia participa na creación da Conferencia de Responsables Autonómicos de Universidade e Investigación, CRAU

Galicia participa na creación da CRAU (Conferencia de Responsables Autonómicos de Universidade e Investigación), un órgano de cooperación, debate e discusión entre CCAA en materia de política universitaria que se acaba de constituír en Baleares.

Este foi o acordo acadado no marco das Xornadas de Directores Xerais de Universidade celebradas entre onte e hoxe en Palma de Mallorca, onde se deron cita os responsables autonómicos de universidades, e onde en representación de Galicia participou o secretario xeral de Universidades, José Alberto Díez de Castro.

O encontro serviu de marco de traballo para abordar cuestións como os modelos de financiamento das universidades, o proxecto de Real Decreto para establecer o estatuto do persoal docente e investigador, as probas de acceso a universidade, a política de becas e axudas ao estudo, a modificación do Real Decreto que establece a ordenación das ensinanzas universitarias oficiais e a investigación universitaria e a internacionalización, entre outras cuestións.

Actualmente, os responsables de universidade das diferentes comunidades autónomas tratan estes temas a través de grupos de traballo específicos que organizan eles mesmos ou o propio Ministerio. De aí a necesidade de constituírse nun foro estable como a CRAU co obxectivo de impulsar e consolidar espazos de debate e acadar posturas de consenso en torno a cuestións do ámbito universitario.

Ademais de Galicia, nas xornadas participaron os responsables das CCAA de Andalucía, Asturias, Baleares, Canarias, Castela e León, Castela A Mancha, Cataluña, Madrid, Navarra, País Vasco, Valencia e Navarra.