VISITA Á ESCOLA TÉCNICA DE MINAS EN VIGO

O mércores 9 de novembro un grupo de alumnos do  noso centro foi de visita á ETSE de Minas da Universidade de Vigo, con motivo da celebración da Semana da Ciencia. Ali viron como funciona unha cámara termográfica, un motor Stirling,un láser 3D,un laboratorio de ensaio de materiais...e asistiron a unha charla sobre os plans de estudos da Escola e as saídas profesionais.Unha visita interesante para, quizais, futuros enxeñeiros. A visita foi organizada polos profesores Emilio Regueira e Felipe Roget do Departamento de Tecnoloxía.



REMATE XORNADAS DE FORMACIÓN DO PROFESORADO

 

O pasado sábado día 5 de novembro celebrouse a última sesión do curso de Formación do Profesorado que se desenvolveu no noso centro os sábados de outubro- agás o día 29- e este primeiro de novembro. Nesta xornada coordinada por Susana Vázquez tivo lugar unha posta en común das actividades realizadas polo profesorado participante. Parabéns a todos/todas, organizadores e participantes, polo continuo esforzo de estar a mellorar a calidade do noso ensino público.



PARTIDO DE BRILÉ

Paralelamente ao magosto disputouse no patio do centro un intenso partido de brilé organizado por Salvia Martínez Pin, do Departamento de Educación Física. O xogo soubo a pouco así que, probablemente,  haxa que mellorar a técnica cun próximo torneo de brilé para os/as que lle apeteza. Atentos ao anuncio na pantalla do corredor. 



 

MAGOSTO NO VIRXE DO MAR

 

Onte, 7 de novembro, celebramos no Virxe do Mar o tradicional magosto. Un montón de castañas foron asadas grazas á colaboración de Manuel Barreiro e Benigno González, profesores no seu día do noso centro e que agora, aínda que xubilados, veñen axudar cando os precisamos. Grazas a eles e á encargada da supervisión, Rosita Paz, así como a todos aqueles e aquelas que co seu traballo extra fan posible seguir mantendo estes costumes.



EXPOSICIÓN SOBRE TINTIN

Xa podes visitar na Biblioteca María Mariño a exposición sobre Tintin e o seu universo que organiza a propia Biblioteca máis os departamentos de Educación Plástica e Visual con Antonio Sánchez e o Departamento de Francés con Ana Arca e Sandrine Sánchez. Esta mostra completarase nos próximos días cunha excursión a Santiago para ver a película recén estreada sobre este coñecido personaxe creado por Hergé.



SEMANA DA CIENCIA EN GALEGO

Como en moitos outros centros de Galicia o pasado día 4, venres, o IES Virxe do Mar celebrou a Semana da Ciencia en galego e participou na videoconferencia do profesor D. Ángel Carracedo, catedrático e director do instituto de Medicina Legal da Universidade de Santiago. Nela respostou a centros de preguntas que o alumnado galego lle foi facendo e que contestaba desde Brasil, onde se atopaba nese momento.  O alumnado de 4º da ESO do centro foi o que participou nesta actividade coordinada pola profesora Teresa Varela. Parabéns aos organizadores e grazas ao profesor por contribuír a achegar a ciencia, dun xeito claro e didáctico, aos rapaces e rapaza e por facelo na nosa lingua.



Distribuir contido