Obradoiro de Despregamento de Servizos na Nube

Hoxe luns 27 de xaneiro recibimos de novo no noso instituto a Jairo Chapela Martínez, que nesta ocasión impartiu un obradoiro ao alumnado de 2º do CS de Despregamento de Aplicacións Web do réxime ordinario.

Neste obradoiro coñecemos as vantaxes de desenvolver aplicacións con tecnoloxías web facendo uso da nube cunha arquitectura serverless. Falamos da evolución dende as aplicacións monolíticas aos servizos baseados en funcións, pasando polos microservizos.

Programamos unha función FaaS (Function as a Service) en NodeJS e despregámola coma servizo en local e asistimos á demo do despregamento en remoto. Falamos tamén dos posibles custos que supón este despregamento con respecto ao despregamento empregando as tecnoloxías tradicionais, así coma as súas vantaxes e desvantaxes.

Jairo Chapela é enxeñeiro de Telecomunicación. Actualmente traballa por conta propia, levando a cabo proxectos de innovación dixital e dando formación en materias de TIC. Ten como misión contribuír ao achegamento dos avances tecnolóxicos á sociedade, traballando tanto no seu desenvolvemento coma facendo difusión do coñecemento para un uso responsable e sostible das TIC.

Esperamos que poida volver antes de que remate o curso para ofertar este obradoiro ao noso alumnado de 2º do CS Despregamento de Aplicacións Web do réxime para as persoas adultas.