Desafío Tecnolóxico na 3ª Liga Maker Drone

O pasado 27 de outubro 3 alumnas e 5 alumnos de 2º ESO do instituto de Teis visitaron a cidade das TIC para participar con outros 180 estudantes de segundo curso ESO procedentes de toda Galicia no emocionante lanzamento da 3ª Liga Maker Drone. A iniciativa, apoiada pola Fundación Barrié e o Instituto Tecnolóxico de Galicia (ITG), desafiará a estes mozos para mostrar a súa creatividade, enxeño e capacidade para traballar en equipo mentres enfrontan un desafío tecnolóxico.

Durante o evento, os estudantes tiveron a oportunidade de coñecer o DroneFinder, un sistema de procura e localización de desaparecidos desenvolto por ITG, que demostrou como a tecnoloxía dos drons pode ter aplicacións na vida cotiá. Ademais, participaron en talleres prácticos de robótica, programación, circuítos electrónicos, realidade virtual e pilotaxe de drons.

Ao final do evento revelouse o reto tecnolóxico ao que se enfrontarán os estudantes ao longo do curso escolar, un reto que sen dúbida poñerá a proba a súa capacidade de innovación e resolución de problemas. O desafío deste ano consiste en neutralizar niños ficticios de velutina, mediante o lanzamento de cápsulas de insecticida no seu interior utilizando drons modificados con sistemas deseñados polos estudantes.

Nos próximos meses os alumnos e alumnas recibirán formación en pilotaxe de drons, materiais e a súa fabricación, mecatrónica e sistemas avanzados e varias sesións de adestramento en voo.

Os sistemas de drons deseñados para cumprir este desafío presentaranse nunha xornada final de exhibición que terá lugar no mes de maio.

A 3ª Liga Maker Drone promete ser unha emocionante viaxe educativa que desafiará aos estudantes da ESO para desenvolver as súas habilidades STEM e demostrar a súa capacidade para aplicar a tecnoloxía de drons nun contexto do mundo real.

Dispoñen de máis información sobre o evento e a convocatoria da 3º Liga Maker Drone na páxina web: https://ligamakerdrone.com/