Este venres 23 de xuño ás 21:00 comunicaranse as cualificacións a través da plataforma ABALAR  mentres que a entrega de boletíns será o luns 26 ás 10:00 para o alumnado de 1º, 2º e 3º ESO, nas aulas de referencia dos grupos. Para o alumnado de 4ºESO os boletíns entregaranse na aula de 2BAC B, na planta soto do edificio, por grupos escalonadamente segundo o horario que segue:

• 4ESO A - 10.30
• 4ESO B - 11.00
• 4ESO C - 11.30
• 4ESO D - 12.00

Recórdase que ese mesmo día, xusto despois da recollida dos boletíns, o alumnado de 4ESO terá que facer a devolución dos equipos e-Dixgal na aula de 3ESO D, na planta soto, ao lado da aula de música. Xunto co equipo, que terá que devolverese con funda, caixa e cargador, haberá que entregar o "Acordo de devolución" asinado polos responsables, dándoselle unha copia do mesmo como comprobante da recollida do equipo.

Por último, cos boletíns de cualificacións, entregarase o impreso de matrícula que deberá completarse, asinarse e presentarse ata o venres 7 de xullo na secretaría do centro, en horario de 09.00 a 14.00 para formalizar a matrícula no vindeiro curso 2023-24.

Bo descanso e moi feliz verán!

Para poder facer previsións de profesorado e optatividade, é necesario realizar unha prematrícula por parte do alumnado do centro. Esta complétase cubrindo o seguinte formulario (ata o 26 de maio):

Formulario para cubrir a prematrícula 2023-24

Lembra que:

• Para o alumnado que se incorpora a 1ºESO non se realiza prematrícula.
• En caso de presentar varias veces a prematrícula terase en conta só a última entregada.
• En calquera caso, deberase realizar a matrícula oficial do 23 de xuño ao 7 de xullo (ambos incluídos).

Dúbidas:

Para resolver dúbidas sobre orientación educativa, podes contactar coa orientadora e sobre cuestións técnicas co secretario. En caso de non poder facelo no centro, podes escribirnos ao enderezo electrónico: ies.sanpaio@edu.xunta.gal

Volven, na súa cuarta edición, os Encontros con exalumnado. Dezaseis exalumnas/os volven a casa varios anos despois para baleirar a mochila e compartir experiencias, erros, acertos, incertidumes e, en definitiva, o camiño percorrido desde que abandonaron o instituto ata hoxe. O seu público, claro está, será o actual alumnado de 2º Bacharelato; a eles/as falarán, para guialos ou botar luz sobre as súas dúbidas, estudantes que hai non tanto estiveron aquí, nestas aulas, nestes pupitres e neste curso tolo no que agroman de súpeto tantos retos, eleccións e camiños por vivir.

O vindeiro martes 14 será o turno do exalumnado e alumnado de Ciencias, e o xoves 16 será a quenda dos de Ciencias Socias e Humanidades. Hora e media de encontro entre xeracións para compartir experiencias en ciclos, graos, erasmus, másters, prácticas ou incluso no mundo profesional. 

Comeza o proceso de admisión de alumnado en centros escolares sostidos con fondos autonómicos para o curso 2023/24, regulado pola Orde de 21 de outubro de 2022 e co seguinte calendario:

• Do 15 de xaneiro ao 4 de febreiro de 2023: prazo de reserva para o alumnado que finaliza etapa nun centro e pasa a outro.
• 22 de febreiro de 2023: publicación da listaxe de alumnado con posto reservado.
• Antes do 1 de marzo: sorteo público para os efectos de desempate.
• Do 1 ao 20 de marzo de 2023: prazo de solicitude de reserva para o alumnado que se incorpora por vez primeira ao sistema educativo galego ou para os que cambian de centro de maneira voluntaria.
• 25 de abril de 2023: publicación da listaxe provisional de admitidos. Cinco días hábiles para formular reclamacións a partir do día seguinte da súa publicación. 
• 15 de maio de 2023: publicación da listaxe definitiva de admitidos.
• 23 de xuño a 7 de xullo de 2023: unha vez admitido, prazo de formalización de matrícula.

Podes acceder a TODA A INFORMACIÓN DO PROCEDEMENTO na nosa web premendo AQUÍ, no taboleiro da Secretaría do centro ou a través da aplicacion admisiónalumnado.

Benvidos á nova páxina web do noso IES. Nova estrutura, formato e contidos para adaptala aos novos tempos e necesidades, e cos que agardamos se convirta en orgulloso lugar de encontro e de servizo para toda a comunidade educativa do noso centro. Nestes primeiros días, como é lóxico, estaremos aínda facendo axustes, pero desde xa mesmo convidámosvos a navegar por ela segundo os vosos intereses e roles. Desexamos que vos resulte atractiva, intuitiva e útil, e que vos ilusione tanto como a nós.

Na Benvida, contámosvos un pouco máis.