Graduación de 2º de Bacharelato

De seguro que botaremos de menos á rapazada de 2º de Bacharelato que remata este ano os seus estudos no noso centro. Despois de seis anos véndonos decote, na tardiña do 23 de maio desexámoslles a mellor das sortes na nova etapa que comezan. Eis a foto de familia:

Como ben dixo Laura –a profesora que presentou a graduación– o alumnado achega polo menos tantas cousas ás nosas vidas como nós achegamos ás deles. É natural que todos nos emocionemos na hora das despedidas, como nos emocionamos escoitando o discurso de Teresa, que foi titora de moitos destes rapaces cando estaban en 2º da ESO.

Manuel, o director, desexou que a situación económica mellore para que estas rapazas e rapaces poidan expresar tanto talento como teñen. Domitila, a presidenta da ANPA, lembrouse das nais e pais, que a veces sofren nos estudos tanto coma os propios estudantes.

Os pases de fotos lembráronnos que a cambio de nos facer máis vellos enchémonos de experiencias que nos enriquecen como persoas. Se queredes ver as coleccións están colgadas da páxina de Vimeo do centro.

Antes da entrega de orlas foi a quenda de Ignacio Meizoso, que pronunciaba o discurso en nome do alumnado. Ignacio lembrouse de cando era un pequeniño asustado que entraba no centro pola primeira vez e fixo memoria de todas as amizades e vivencias que se levaba deses seis anos. E aínda que non deixou de se queixar do esixente que fora 2º de Bacharelato, concluiu que ben pagaba a pena o esforzo.

Moita sorte a todos! Esta será sempre a vosa casa!

Os vídeos do IES Moncho Valcarce en Vimeo

Uns días atrás abrimos a conta do centro en Vimeo. Estreámola cunha reportaxe que RTV Eume, a televisión local, fixo o 4 de abril sobre a entrega de premios do certame literario A Casa Encantada, que organiza a biblioteca do noso centro. 

 

Os gañadores foron Nerea Guerreiro (1º Ciclo da ESO), Tamara Pérez (2º Ciclo da ESO) e Carmen López (Bacharelato e Ciclo Formativo). Podedes ler os relatos gañadores no enlace que vos deixamos ao blog da biblioteca. No vídeo, amais da entrega de premios, veredes a dramatización dos textos dos gañadores.

Rescatamos tamén unha gravación de marzo de 2012, Cunqueiro nas ondas. Organizada tamén pola biblioteca con ocasión do Ano Cunqueiro, na gravación podedes ver a estudantes, profesoras/es e persoal do instituto lendo poemas de Cunqueiro. Como a anterior a gravación foi realizada por RTV Eume.

Coidado! Regueifeiros á vista!

 

O xoves 4 de abril viñeron ao centro Pinto d'Herbón e Luis O Caruncho para un obradoiro de regueifas co alumnado de 4º da ES0. A noticia foi contraportada do suplemento A Chaira, que se inclúe semanalmente co xornal El Progreso.

Reproducimos literalmente o texto que asina a xornalista Marta Mancebo (quen por certo foi alumna deste centro). Se queredes ler a noticia picade sobre ela:

Excursións a Asturias e Bélxica

Como xa é tradicional, o noso centro ponse viaxeiro na semana antes da Semana Santa. Este anos tivemos dúas viaxes: unha a Asturias para o estudantado de 1º e 2º de Bacharelato, outra a Bélxica para o alumnado de Francés de 3º da ESO a 1º de Bacharelato.

O alumnado de Ciencias e Tecnoloxía de Bacharelato desprazouse a Asturias entre o xoves 14 e o domingo 17. A visita tiña como obxectivo coñecer os restos da actividade mineira e siderúrxica da zona, para o que visitaron museos como o da Minería e a Industria de L'Entregu, o da Siderurxia en La Felguera ou o dos Muíños de Mazonovo, en Taramundi. De paso, aproveitaron para realizar a ruta de sendeirismo de L'Osu, nas proximidades de Oviedo.

En canto ao alumnado de Francés, a viaxe comezou na madrugada do sábado 16. Trinta e tres rapazas e rapaces partiron en avión para Bruxelas, onde permaneceron até o xoves 21. Ademais de se aproximaren á realidade dun país francófono, os estudantes fixeron unha intensísima xira que os levou a Namur, Amsterdam, Brugge e aos puntos máis sonados de Bruxelas, como o Pazo Real ou o Parlamento Europeo. 

Precisamente no Parlamento tiveron a ocasión de coñecer, en compaña do eurodeputado galego Antolín Sánchez Presedo, o día a día dos europarlamentarios. Agradecemos moito a Sánchez Presedo que convidase ao noso alumnado e os guiase polas instalacións do parlamento, onde se discuten e se aproban as leis comunitarias que tanta influencia teñen nas nosas vidas.

Contra a explotación animal

O luns 25 de Febreiro de 2013, o alumnado de 2º ESO asistiu a unha charla no Salón de Actos do centro sobre a explotación animal que se está producindo en zoolóxicos e acuarios. Programouse como actividade complementaria ao temario de Ciencias da Natureza e foi impartida por Juana Pardo, profesora do Departamento de Bioloxía e Xeoloxía e activista da protectora de animais ferrolá Arco da Vella.

Durante a sesión tratáronse puntos tan significativos como:

  • A situación, localización e tipos de zoolóxicos e acuarios en Galicia.
  • Consecuencias que se provocan ao viviren os animais en condicións de cautividade.
  • Observación a través de vídeos dos comportamentos antinaturais que se desenvolven nos animais.
  • Déuselle a coñecer distintas páxinas webs onde recadar e ampliar información sobre esta temática.

Os alumnos, grazas á presentación realizada, acadaron unha visión máis completa do trato que se lles está a dar nestes recintos aos animais.

A valoración por parte dos rapaces foi positiva e considerase que é unha actividade que se pode repetir en vindeiros anos.

Conversa con Xabier P. Docampo sobre O misterio das badaladas

Hai un par de semanas foi Natalia Carou, desta volta era a quenda de Xabier P. Docampo, un dos nosos escritores máis recoñecidos.

Xabier falou durante unha hora coas rapazas e rapaces de 1º da ESO acerca dun libro que xa vai para os trinta anos, pero que segue gustando tanto como o primeiro día: O misterio das badaladas. Nel un grupo de rapaces investigan porque no reloxio da súa vila, cando chegan as doce da noite, soan trece badaladas en lugar de doce.

Conversa con Natalia Carou sobre O alento nas costas

 

Onte visitounos Natalia Carou para presentar a súa primeira novela, O alento nas costas.


Natalia falou durante unha hora co alumnado de 1º de Bacharelato, que están lendo a novela na materia de Lingua Galega. O alento nas costas conta dúas historias que se unen nos soños da protagonista, Mireia. Unha das historias é a do reencontro da protagonista coa súa familia, a outra unha historia de amor durante os anos do medievo coa que Mireia non deixa de soñar.

Coidado co que soñades!

Máis tapóns para a Fundación Seur

Xa hai tempo que no centro realizamos campañas de reciclaxe solidaria. Para iso dispoñemos na entrada do instituto un punto de recollida de pilas, cedés, cartuchos de impresora, móbiles e tapóns de envases de plástico.De cando en cando tamén recollemos roupa usada, na última ocasión entregamos varias ducias de bolsas de roupa usada á ONG Global Humanitaria.

Calquera pode achegarnos estes residuos para que nos os distribuamos entre as entidades oportunas. En especial, estamos moi contentos de como está a funcionar a campaña de recollida de tapóns, que entregamos á Fundación Seur. Xuntamos cada mes preto de dez quilos de tapóns. Con moitas contribucións como a nosa axudaremos a mellorar a vida de moitas persoas.

Moitas grazas a todos pola vosa colaboración!

IX Concurso de fotografía Xurxo Lobato

Que o noso centro é terra de fotógrafos, xa houbo oportunidade de demostralo no concurso As Pontes naturalmente. Poden seguir probando sorte no IX Concurso de fotografía Xurxo Lobato!

Reparto de froitas na semana do 14 ao 18 de xaneiro

Ao abeiro do programa Distribución de froitas aos centros escolares, cofinanciado pola UE e Xunta de Galicia, onte comezou no noso centro unha nova quenda de reparto gratuíto de froita ao alumnado do centro. Onte repartimos plátanos e hoxe seguiremos coas mazás. O mércores iremos coas mandarinas e deixaremos os amorodos e as peras para o xoves e o venres.

http://www.frutanova.es/img/estructura/planConsumo.foto.jpg

Complétase así a segunda quenda do reparto de froitas que iniciamos nas semana do 24 ao 28 de setembro. Naquela ocasión repartimos amorodos, mandarinas, peras e ameixas brancas e vermellas.

Bo apetito!

Distribuir contido