Día de Rosalía, 2014

Xa podedes visionar na nosa canle de Vimeo a gravación que RTV Eume realizou o pasado 24 de febreiro, o día en que se conmemoraban os 137 anos do nacemento de Rosalía de Castro. O escenario é a biblioteca do noso centro. 

O primeiro dos poemas é "Campanas de Bastavales", do libro Cantares Gallegos, o segundo é "Maio longo", de "Follas Novas", e "Castellanos de Castilla", tamén de Cantares Gallegos. Moitas grazas a Nerea López, Tania Pardo, Eros Silvén, Lucía Rivera, Melisa Seco e Eugenia Villar, que se prestaron a ler poemas con firme e clara voz.

Axudas para a realización de actividades de formación en linguas estranxeiras (Xunta de Galicia)

Informamos da publicación da Orde do 13 de marzo de 2014 pola que se convocan axudas para a realización de actividades de formación en linguas estranxeiras no ano 2014, destinadas ao alumnado dos centros docentes sostidos con fondos públicos.

O prazo para a presentación de solicitudes será do 28 de marzo ata o 28 de abril (incluído)

 

Pódese atopar máis información sobre este programa, así como a aplicación "en liña" para tramitar as correspondentes solicitudes na páxina web:

http://www.edu.xunta.es/axudasle

Becas Inmersión Lingüistica Inglés (MECD)

 

Informamos da Resolución de 18 de febreiro de 2014, da Secretaría de Estado de Educación, Formación Profesional e Universidades, pola que se convocan becas para a participación nun programa intensivo de inmersión lingüística en inglés en España, destinadas a estudantes de Bacharelato, de Grao Medio de Formación Profesional, de Artes Plásticas e Deseño, de Ensinos Deportivos, de Ensinos profesionais de Música e Danza e de Idiomas de Nivel Intermedio e Avanzado. 

Serán requisitos necesarios para optar a estas becas: 

a) Ter nacido entre o 1 de xaneiro de 1994 e o 31 de decembro de 1997 e estar matriculado no curso 2013-2014 en calquera curso dalgún dos seguintes estudos: Bacharelato, Ensinos profesionais de música e danza, Grao medio de Formación Profesional, Grao medio de artes plásticas e deseño, Grao medio de ensinos deportivos e Ensinos de idiomas de nivel intermedio ou avanzado. 

b) Obter no curso 2013-2014 a condición de becario do Ministerio de Educación, Cultura e Deporte. 

c) Todos os solicitantes deberán acreditar ter totalmente aprobado o curso inmediato anterior, cunha nota final mínima de 7 na asignatura de inglés. 

d) Estar situado nun lugar da orde de prelación de solicitudes que lle permita a obtención dunha das becas convocadas. 

Cuantía da beca.

 1. A cuantía das becas ascenderá a un máximo de 900 euros que se se aboarán directamente á/s empresa/s que resulte/n adxudicataria/s a este efecto polo Ministerio. A adxudicación da beca dará lugar á asignación dunha praza para participar na actividade. Para completar o prezo total do curso os alumnos aboarán necesariamente 100 euros á empresa que resulte adxudicataria do concurso. 

2. Non se concederá cuantía algunha en concepto de traslado do alumno desde o seu domicilio ao centro de destino nin desde este a o seu domicilio, sendo de conta do alumno devandito traslado.

O prazo para a presentación de solicitudes remata o 2 de abril. 

Máis información

 

 

 

Masterclass de Física de Partículas

Xusto o día en que os científicos atoparon por primeira vez restos da enerxía emitida polo cosmos durante o Big Bang, Cristina Pernas e Pablo Fernández, alumnos de 2º de Bacharelato asistiron na Facultade de Física da USC a unha nova edición da Masterclass Europea de Física de Partículas.

 

Ao longo do luns 17 de marzo o alumnado analizou os datos que se obtiveron nos ensaios físicos do acelerador de partículas do CERN de Xenebra, á procura de candidatos para o bosón de Higgs, a partícula que segundo as teorías dos físicos deu lugar ao nacemento do Universo. O xornal La Voz de Galicia redactou unha pequena noticia sobre a xornada, con declaracións exclusivas de Cristina Pernas, que podedes ler se picades sobre a imaxe:

 

 

Visita a Ourense

 

O venres 14 de marzo 37 alumnas e alumnos de 1º a 4º da ESO desprazáronse a Ourense nunha actividade organizada polo Departamento de Lingua Galega e a Equipa de Dinamización da Lingua Galega.

De mañá acudiron ao Pazo de Trasalba, no concello de Amoeiro. Neste pazo residiu a maior parte da súa vida o escritor Ramón Otero Pedrayo, de quen conserva a biblioteca e o mobiliario orixinal.

Dirixíronse despois á Ourense, á fonte das Burgas, onde pararon para xantar. Á tarde retomaron a visita paseando polo casco histórico de Ourense, onde moraron boa parte dos escritores da Xeración Nós.

 

Enquisa para a EOI Ferrol-Sección As Pontes

Por favor, enche a seguinte enquisa se tes pensado matricularte na Escola Oficial de Idiomas - Sección As Pontes no vindeiro curso académico 2014/2015 (preme na imaxe). ENQUISA AS PONTES

Exposición fotográfica "A miña luzada"

Desde 26 de febreiro até o 12 de marzo pode visitarse no corredor de titorías do noso centro a exposición “A miña luzada”.

A exposición foi deseñada e realizada pola ONG Implicadas no desenvolvemento, que nola cedeu de balde.

 

Implicadas no desenvolvemento está especializada en temas de xénero e desenvolvemento, é dicir, trata de promover a igualdade asesorando e apoiando a mulleres para que consigan a súa autonomía económica. A súa acción céntrase especialmente en Galiza e na India.

Precisamente a exposición “A miña luzada” recolle fotografías realizadas nestes dous lugares. A idea é dar visibilidade ao traballo e a presenza da muller nestas comunidades, así como os lazos de solidariedade que unen a distintas xeracións de mulleres.

 

O alumnado do Ciclo na Unidade de Xestión de Residuos da USC

Na mañá do xoves 13 de febreiro o alumnado do Ciclo de Laboratorio de Análise e Control de Calidade desprazouse á Unidade de Xestión de Residuos da Universidade de Santiago de Compostela. Os 10 estudantes estaban acompañados do profesor Quico da Silva.

Na actividade os estudantes aprenderon como se trasladan, clasifican, etiquetan e almacenan os residuos que produce a universidade. Así mesmo, observaron os distintos tratamentos que reciben os residuos segundo a súa tipoloxía. Hai que ter en conta que a UXR encárgase do tratamento dos residuos que produce a universidade, nomeadamente daqueles máis perigosos e contaminantes que proceden das investigacións médicas ou químicas que realizan os científicos asociados á universidade.

A UXR opera, xa que logo, no mesmo sector que moitas empresas da contorna das Pontes que adoitan empregar a alumnado do noso ciclo, como Sogarisa.

Conferencia de Eva López, do programa Woman Emprende

O mércores 22 de xaneiro tivemos connosco a Eva López Barrio. Eva López é a comisaria da exposición “Con nome de muller”, que se pode ver na entrada do noso centro até o 31 de xaneiro. Licenciada en Ciencias Económicas e Empresariais, Eva López é responsábel do programa Woman Emprende. Este organismo da Universidade de Santiago de Compostela axuda a mulleres universitarias a crearen empresas baseadas en ideas e nichos de mercado innovadores.

Tanto a exposición como a conferencia son parte do traballo do centro no programa Donas de Si, un proxecto educativo que pretende concienciar ao noso estudantado da relevancia que as mulleres tiveron e teñen como motores do desenvolvemento económico e cultural.

Á conferencia asistiu o alumnado de 4º da ESO e 1º e 2º de Bacharelato. Eva López explicounos que Woman Emprende naceu en 2006 da necesidade de fomentar o emprendemento das mulleres universitarias. Ao longo destes anos Woman Emprende axudou a crear empresas de sectores tan diversos como Galchimia, adicada ao deseño de novos fármacos, ou Amallós, unha empresa de psicoloxía deportiva.

1º da ESO na Fundación Sotavento

O alumnado de 1º de ESO visitou o día 22 de xaneiro a Fundación Sotavento Galicia, en Xermade.

Acompañáronos os profesores Paco Dávila e Mariluz Corral. Segundo nos informa Mariluz os rapaces realizaron entre outras as seguintes actividades:

  • Coñeceron o funcionamento dun parque eólico, os tipos de aeroxeradores e compoñentes dos mesmos.
  • Mostráronselles distintas prácticas relacionadas co aforro enerxético e o consumo responsable.
  • Recibiron explicacións do funcionamento dun panel solar térmico e dun panel solar fotovoltaico.
  • Gozaron da visita á Vivenda Bioclimática, comprendendo a relación entre arquitectura bioclimática e aforro enerxético.
  • Tratouse de concienciar aos alumnos para reducir o consumo dos combustibles fósiles e usar enerxías alternativas para asi evitar os problemas de contaminación ambiental.

Xa son expertos en enerxía eólica!

Distribuir contido