Dia da Paz
SEMANA DA PAZ – 2011
Este ano, como é tradicional no IES de Meaño, celebramos a semana da Paz do 31 de xaneiro ó 4 de febreiro con varias actividades.
Durante varias clases os alumnos estiveron traballando durante as clases de Relixión, Historia das Relixións e Atención Educativa con noticias.
Divididos en grupos, estiveron seleccionando unha noticia que despois resumían, logo debían darlle a volta, é dicir, redactala en positivo, tendo como fondo a noticia real, tratar de elaborar unha “boa noticia” desas que non abundan nos xornais.
Todo este traballo expúxose o venres día 4 de febreiro durante as dúas últimas horas no pavillón. Léronse un total de 34 noticias e de cada grupo saían dous representantes. Un alumno lía a real e outro a inventada.
Esta actividade estivo precedida durante toda a semana pola participación dos alumnos que forman parte da radio escolar. Ó longo deses cinco días, aproveitáronse os quince minutos de lectura e durante a terceira hora, os alumnos foron facendo exposicións de varias personaxes célebres.
O departamento de Relixión seleccionou estes:
Luns: GANDHI, figura sobre a que xira todas estas manifestacións e celebracións da xornada da Paz.
Martes: beata TERESA DE CALCUTA
Mércores: MARTIN LUTHER KING
Xoves: ONG “MÉDICOS SEN FRONTEIRAS”
Venres: Coloquio sobre Que é a paz?
Ese día, 4 de febreiro, foi cando se fixo a exposición das noticias.
Unha vez lidas, un grupo de alumnos de primeiro, terceiro e cuarto interpretaron e cantaron en francés a canción “ Vais sur ton chemin” da película “Os nenos do coro”.
Con isto púxose fin á semana da Paz no IES de Meaño.