Biblioteca: instrucións e axuda do PLAMBE

Despois da relatica decepción que supuxeron as instrucións (pola súa nula efectividade) enviadas aos centros en relación coa Biblioteca Escolar para o curso 2013/2014 da Dirección Xeral de Centros e Recursos Humanos pero que recomendamos para coñecer as funcións da Biblioteca, que podedes consultar desde o seguinte enlace: TEXTO das INSTRUCIÓNS hoxe recibimos a boa noticia (tendo en conta os recortes orzamentarios) de que se nos concederon 4.350 € dentro do Plan de Mellora de Bibliotecas Escolares do 2012. Esa cantidade total distribúese do seguinte xeito: 900 € para fondos; 3.000 € para mobiliario e 450 € para gastos de funcionamento.

Estamos satisfeitos coa contía da axuda porque somos un dos catro centros educativos do PLAMBE 2012 que recibimos a máxima cantidade adxudicada. Ademais de permitirnos ofrecer mellores servizos á comunidade educativa, supón un recoñecemento ao traballo realizado no pasado curso, non só por parte do equipo, senón tamén polo resto do profesorado e o alumnado. Parabéns para todas e todos.

EDUCACIÓN DE ADULTOS - Inicio de Curso 2013-2014

No seguinte ficheiro podes consultar as datas de comenzo de curso para a Educación de Adultos.

Inicio de Curso 2013-2014

No seguinte ficheiro podes consultar as datas de comenzo de curso.

Libros de Texto Curso 2013-2014

No seguinte ficheiro podes consultar os libros de texto que utilizaremos para o vindeiro curso 2013-2014

Pisando forte cara á universidade

Os alumnos cos mellores expedientes de Bachillerato dos institutos de Deza e Tabeirós-Montes son tamén os que conseguen as notas máis altas de Selectividad

s.soutelo/a. cela | lalín/a estrada 26.06.2013 | Faro de VigoLaura Filloy, Tania Rey e Sara Bugallo nunha excursión en Celanova

Moitos deles, xa tiñan claro que querían ser de maiores antes de iniciar Bachillerato. Durante o curso que acaba de terminar, preparáronse a conciencia para cumprir ese soño. Acaban de coñecer a nota de Selectividad e esta non fai senón incrementar os excelentes resultados que xa obtiveran durante o ano académico, co que cada vez camiñan máis forte cara á profesión na que queren traballar. Unha vez pasada a criba do Selectivo, coinciden en que a presión e os nervios acaban mitificando un exame que, en realidade, é só un mero trámite.

Os nervios e medos ante a sempre temida Selectividad tornáronse en completa alegría. Cando un ten un expediente excelente, non caben grandes sorpresas. Ao final non atoparon nestes exames a proba insalvable que agardaban e, como se prevía, os alumnos con mellores notas en Bachillerato de Deza e Tabeirós-Terra de Montes saborean agora os doces meles dos resultados máis altos. Confían en que se convertan na chave para abrirlles a porta cara ás carreiras universitarias que desexan cursar.

Cautos, Marco Galego e Antía Igrexas, do IES Laxeiro de Lalín, agardan a coñecer a nota de corte de Medicina (o ano pasado foi de 12,1 sobre 14). Os números inclínanse cara ao si: Marco, cunha media xeral de 9,3, alcanza o 12,53 si tense en conta a nota que conseguiu ao examinarse de materias específicas. Agora séntese "moito máis descansado e libre de toda a presión" dos últimos meses. Marco, que quere facer constar que realizou estas declaracións en galego, apunta que na Selectividad "a hora e media quédase curta para algunhas materias, como Lingua Española". A súa compañeira Antía Igrexas (cun 9,35 de media, que podería subir ao 12,50 coas específicas) acaba de cubrir o tramo jacobeo desde Ou Cebreiro a Compostela. Decatouse en plena ruta das súas cualificacións, e di que "algunhas materias foron máis fáciles do que esperaba", apunta. Os excelentes resultados deste centro son similares aos do Aller Ulloa, con 42 presentados á Selectividad, dos que non resultaron aptos 4. A mellor deste instituto foi Xandra Quiroga, cunha media de 9,39 na proba xeral e un 12,79 na específica. Os seus plans pasan por estudar Farmacia en Santiago.

E de Lalín, a Silleda. No colexio María Inmaculada pasaron a Selectividad os 6 alumnos presentados. Do Pintor Colmeiro, aprobaron 22 dos 23 que concorrían á proba. A mellor nota corresponde a Moisés Pacheco, cun 8,97 na proba xeral. Pacheco foi o mellor expediente académico do centro este ano e quere cursar Ingeniería. Pola súa banda, o instituto Marco do Camballón, de Vila de Cruces, tamén suspendeu só un dos seus 18 presentados. A nota máis alta é a de Cristina López, cun 8,23 na proba xeral e un 11,6 na específica. A moza está de viaxe en Roma, e por iso non puido presentarse ao Premio Extraordinario de Bachillerato.

En Tabeirós-Terra de Montes a maioría dos alumnos que se someteron á Selectividad lograron superala. No IES Manuel García Barros da Estrada só suspendeu un dos 53 que se presentaron. No Antón Losada Diéguez aprobaron 16 dos 17 que se examinaron e no IES Chano Piñeiro de Forcarei lograron superala os catro estudantes que realizaron os temidos exames.

En canto ás notas, a máis alta alcanzouna a alumna do IES Antón Losada Diéguez Laura Filloy Martínez, que conseguiu un media de 9,48. Esta nota aínda se pode ver elevada ata case un 13 si téñense en conta os seus resultados nos exames de materias específicas, que computarían ou non en función da carreira elixida. Esta estudante estradense deposita as súas ilusións en Xornalismo.

Dentro das notas por encima de 9 -serán distinguidas como alumnos de excelencia- a segunda mellor cualificación obtívoa a estudante do instituto Manuel García Barros Nerea Gestoso Uzal, cun 9,44, que tamén podería elevar cos seus bos resultados en dúas específicas. Esta estradense confesa que agora ten dúbidas. Suscítase ir a Salamanca ou Madrid a cursar Biotecnología ou quedarse en Santiago estudando Física. Recoñece que sacar unhas notas así require un esforzo pero, sobre todo, estar en calma e levar ben o curso durante o ano de xeito descansado, facendo outras actividades. Ela en concreto non deixou de adestrar en bádminton.

Outra das notas altas da Estrada correspondeu a Sara Bugallo Porto, tamén alumna do Antón Losada. Obtivo un 9,12 sobre 10, que podería chegar ao 12,2 ou ao 12,9 en función das específicas. Logrou un 8,25 en literatura universal, unha materia que non había cursado e que se preparou buscando incrementar nota. Ten pensado estudar Dereito. No IES Chano Piñeiro de Forcarei a cualificación máis elevada foi a Estefanía Rei Campos, cun 7,736.

Poesía de Filomena Fraga adicada a súa filla, Marga Lesta

Poesía de Filomena Fraga adicada á súa filla, a nosa compañeira, querida e lembrada, Marga Lesta Fraga, falecida hai un ano, a finais de maio de 2012:

 

A Margarita

Tiñas nome dunha flor,
a nosa flor preferida,
o xardín quedou deserto,
sin a flor da margarita.

Eras todo para todos,
boa esposa, boa nai,
boa irmá
e boa filla.

Eras o sol que nos quentaba,
eras a alba do día,
eras o manancial da fonte,
onde a familia bebía.

Eras o anxo da garda,
que a todos protexías,
recibías ós que chegaban,
despedíalos cando se ían.

Amiga dos teus amigos,
nunca a ninguén ofendías,
agora síntense orfos,
ó non estar ti, Margarita.

Eras o puntal da casa,
eras a paz da familia.
¿Como hei vivir sin ti
o que me queda de vida?
¡Milla filliña querida!

 

Filomena Fraga Rey Decembro 2012

Escrito aprobado no Consello Escolar contra a LOMCE

O Consello Escolar do IES Antón Losada Diéguez manifesta o seu rexeitamento ao proxecto de Lei Orgánica para a Mellora da Calidade Educativa (LOMCE) polas seguintes razóns:

A LOMCE pretende trasladar ao ensino público un modelo neoliberal que afonda nas diferenzas sociais, no canto de contribuír a que todas e todos teñamos acceso en igualdade de condicións a unha educación pública de calidade.

A LOMCE facilítalle ao alumnado, se é necesario, a matriculación nun centro privado, pagado por todos e todas nós, para evitar a súa escolarización na nosa Lingua. Procura o máximo control dos contidos a través do Goberno central, uniformiza mediante as reválidas e marxina aínda máis o noso idioma. Impón un modelo lingüístico que elimina o ensino en galego e invade as cativas competencias que temos, coa intención de afastar totalmente o ensino da nosa realidade social, histórica, cultural e lingüística.

A LOMCE reforza a confesionalidade e impide o ensino laico. O proxecto mantén o ensino da relixión no currículo escolar, contemplando unha materia alternativa en Primaria e na ESO, que computarán no expediente académico, converténdose así nun efecto chamada para que o alumnado se matricule en Relixión. No Bacharelato, a materia de Relixión ten a consideración de materia específica, isto é, está situada entre as que o alumnado cursará un máximo de 3 e un mínimo de 2.

É un proxecto profundamente antidemocrático, que traslada o sistema de xestión empresarial ao ensino. Elimina o Consello Escolar como órgano de goberno e baléirao de todas as competencias. A dirección será elixida pola administración e terá plenos poderes para tomar unilateralmente decisións de transcendental importancia para os centros e para propor ou rexeitar o profesorado que sexa proposto pola administración.

Liquida a igualdade de oportunidades ao impor un sistema de continuas barreiras selectivas para que só unha minoría acceda aos estudos postobrigatorios e universitarios. É unha lei elitista, clasista e segregadora, xa que estabelece reválidas para poder acceder á titulación correspondente en 4º de ESO e en Bacharelato. Impón un sistema máis selectivo mediante itinerarios que condena, prematuramente, ao alumnado a optar a titulacións diferentes no ensino obrigatorio, condicionando de maneira temperá o seu futuro académico e laboral.

A LOMCE pretende crear, mediante os programas de calidade e especialización curricular, diferentes categorías de centros e atender, con máis recursos e medios, aqueles que mellor resultados acaden, previa selección do alumnado, no lugar de procurar que todos os centros conten cos recursos necesarios para que todos e todas, con independencia da súa procedencia social ou xeográfica, reciban unha formación de calidade.

Este proxecto de lei desautoriza, desconfía e xerarquiza o profesorado. É profundamente antipedagóxico, xa que a consecución da titulación do alumnado vai depender do resultado azaroso dunha única proba ao rematar o ensino obrigatorio e postobrigatorio.

A isto hai que lle engadir a desvalorización da Formación Profesional e o desvío do alumnado cara a unha FP Básica, que nin sequera conduce á mínima titulación, baixo a escusa de favorecer o emprego.

Por todo isto, pedimos a retirada do proxecto de lei e o inicio dun período de diálogo coa comunidade educativa e con todas as forzas sociais e políticas que permita sentar as bases dun modelo educativo por consenso e sostible.