Volvemos ás aulas con forza!

E queremos comezar lembrando a iniciativa coa que rematamos o 2015: a recollida de xoguetes e libros que entre tod@s doamos á Cruz Vermella para que chegasen a nenos e nenas con dificultades económicas. A recollida fíxose no Espazo Solidario creado como novidade no 1º trimestre por parte de Vicedirección e a nosa Biblioteca. Nese espazo podes ler información de distintas ONG, e sobre iniciativas e conmemoracións, ó igual que hai un libro seleccionado entre os fondos da biblioteca e unha frase escollida polo alumnado, ambos relacionados coa solidariedade, que irán mudando mes a mes. Neste espazo está o contedor dos tapóns de plástico solidarios e estarán os outros obxectos que poidamos recoller en futuras campañas.
Que teñades un bo 2016 cheo de solidariedade!

Boas festas e feliz 2016

Coa postal gañadora do concurso de postais que organizou o Equipo de dinamización lingüística do IES Lois Peña Novo, da nosa alumna de 2º curso do CS de Administración e Finanzas Ainhoa Pita García, desexámosvos unhas boas festas e un feliz 2016.

O Alumnado da FP Básica que supere o ciclo obterá tamén o título da ESO

O ALUMNADO DA FP BASICA QUE SUPERE TODAS AS MATERIAS DOS DOUS CURSOS ADEMAIS DO TITULO DE FP BÁSICA OBTERÁ O TITULO DA ESO.

O Ministerio de Educación aprobou xa a solución transitoria para que os alumnos de Formación Profesional básica non queden sen título este ano e o que vén. 

Estes estudantes poderán obter o título de Educación Secundaria Obrigatoria (ESO) sen pasar, de momento (en principio durante os próximos dous cursos, 2015-2016 E 2016-2017), a reválida que contempla a última lei educativa.

A normativa contemplaba, que tiñan que aprobar a reválida prevista pola Lomce (exames externos obrigatorios ao final de secundaria e bacharelato) para poder obter ese título.

Pero o calendario de aplicación da reforma non inclúe esas reválidas nacionais ata dentro de dous cursos e os primeiros alumnos de FP básica acabarán o próximo xuño. O anterior ministro de Educación, José Ignacio Wert, anunciou en marzo de 2014 no Congreso dos Deputados que aprobaría unha disposición para que estes alumnos se graduaran cun "exame especial", segundo sinalaron entón fontes do seu departamento.

A solución que finalmente adoptou o ministerio, agora con Íñigo Méndez de Vigo á cabeza, é que mentres non se poña en marcha a reválida, conseguirán o título da ESO cando os seus profesores valoren "que alcanzaron os obxectivos da Educación Secundaria Obrigatoria", é dicir, sen ningún tipo de exame adicional.

Esta medida está incluída no decreto que regula as características da proba final de 6º de Primaria, que foi aprobada este venres 20 de novembro polo Consello de Ministros.

 

Poderás formarte no estranxeiro da man do IES Lois Peña Novo

Estamos de noraboa no noso IES. Acábannos de conceder a Carta ECHE, que nos habilita para xestionar proxectos do Erasmus + e, entre outros, enviar alumnado de Ciclos Superiores facer a FCT (Formación en Centros de Traballo) ao estranxeiro.

A convocatoria para este curso xa está aberta. Podedes solicitar a información que precisedes no Departamento de Orientación, no de FOL e na secretaría do IES.

Podes consultar a resolución da concesión aquí.

Campus de emprendemento sostible no IES Lois Peña Novo

 

Neste mes de outubro comezamos coa programación de actividades complementarias e extraescolares, sendo a primeira unha actividade proposta pola deputación Provincial de Lugo, os Campus de emprendemento sostible.

 

- Do 13 de outubro (martes) ao 16 de outubro (venres), celebrarase no noso instituto o Campus de Motivación empresarial, para aquelas persoas que teñen algunha inquietude en montar a súa propia empresa ou en desenvolver unha idea empresarial. O horario, para interromper as clases o mínimo, será de 10.30h a 14.30h (intentarase reducir o descanso para poder saír ás 14.15h). A parte teórica son 12 horas, é dicir, 4 horas diarias de martes a xoves, e o venres será todo o día con visitas aos artesáns da Terra Chá (Aldea da Fraga, Xaneco, Bonxe e Idoia Cuesta).

 

- Do 26 de outubro (luns) ao 29 de outubro (xoves), celebrarase tamén no instituto o Campus de Maduración empresarial, este xa orientado a aquelas persoas que teñan unha idea e queiran avaliala ou mellorala (non está indicado para xente que non teña unha idea de negocio porque se vai traballar sobre esa idea…). O horario será de 16.30h a 20.30h. Igual que no anterior, a parte teórica son 12 horas, é dicir, 4 horas diarias de luns a mércores, e o xoves será todo o día con visitas a empresas da Ulloa (Granxa Maruxa, Arqueixal, Milhulloa e Parada das Bestas).

Estes campus son totalmente gratuítos para os alumnado, incluída a comida que se ofrece o día da visita. Unha vez rematados oscampus, a Deputación de Lugo entregará aos participantes un diploma acreditativo da formación recibida.

 

​As prazas son limitadas a uns 25 participantes, e poden vir tamén participantes externos ó IES. A inscrición faise  através dun teléfono e a web da deputación (http://deputacionlugo.org/campusemprendementosostible/index.html) pero para o noso alumnado farase no propio instituto en Vicedirección ou en Orientación, preferentemente antes do día 6 de outubro para poder garantir que haxa prazas.

Para máis información pódense ver os seguintes vídeos desta experiencia:


- Vídeo con visita ás empresas da Terra Cha: https://youtu.be/Uz0ZYaQjNSk

- Vídeo con visita ás empresas da Ulloa: http://promoveconsultoria.com/detalle.php?id_proy=8&id_area=3&idioma=g

- Coa metodoloxía CANVAS: http://promoveconsultoria.com/detalle.php?id_proy=18&id_area=3&idioma=g

 

 

Becas para estudos postobrigatorios

Ata o 30 de setembro estás a tempo de solicitar unha beca do ministerio para cursar estudos postobrigatorios (bacharelato, ciclos e FP Básica están incluídos).

A solicitude deberase cumprimentar mediante o formulario on line no enderezo https://sede.educacion.gob.es/portada.html no apartado correspondente a «Trámites y Servicios»

ou na web www.mecd.gob.es. Podes pedir máis información e axuda na secretaría do centro, e ver a convocatoria no ficheiro adxunto.

 

Vente formar ó IES Lois Peña Novo, hai prazas libres

Estás a tempo de vir ó IES Lois Peña Novo! Non sabes que estudar ou como formarte para entrar no mundo laboral? Quédanche só unhas cantas materias para rematar a ESO ou o Bacharelato? Hai moitos anos que non estudas e estás desfasad@?

Vén polo IES Lois Peña Novo, has atopar o teu sitio: Bacharelato Semipresencial de Adultos, ESA, Ciclos Formativos medios e superiores...

Infórmate e matricúlate!

 

Horario de presentacións do curso 2015-2016

Este é o horario das presentacións do curso 2015-2016, que se desenvolverán o vindeiro martes día 15.

As clases darán comezo o día 16 en tódolos Ciclos Formativos e FP Básica, o día 22 na ESA e o día 30 en Bacharelato de Adultos.

Podes descargalo no arquivo adxunto.

Prazas libres nos ciclos formativos do noso IES

Inda quedan prazas nos distintos ciclos medios e superiores que se imparten no IES Lois Peña Novo, ven polo instituto antes do día 11 de setembro ás 13:00h e reserva a túa praza nos CICLOS MEDIOS de Electromecánica de Vehículos Automóbiles, Instalacións Eléctricas e Automáticas ou Xestión Administrativa, ou nos CICLOS SUPERIORES de Administración e Finanzas ou Administración de Sistemas Informáticos en Rede.

Podes consultar o número de prazas que quedan en toda Galicia aquí.

Calendario de probas extraordinarias de setembro

Este é o calendario e horario das probas extraordinarias de setembro do 2015, pódese descargar no adxunto. Ánimo a todos os que se presenten!

 

Distribuir contido