Acreditación de Competencias.

Abriuse o prazo para presentar solicitudes para aquelas persoas que queiran ACREDITAR COMPETENCIAS.

O obxecto da acreditación de competencias é recoñecer e acreditar a competencia adquirida a través da experiencia laboral.

O prazo de presentación de solicitudes será desde o 10 de xaneiro ao 3 de febreiro de 2017.

A solicitude de participación no procedemento farase empregando a aplicación infor­mática subministrada pola Consellería de Educación e Ordenación Universitaria, que se atopa no enderezo http://www.edu.xunta.es/acreditacion.

Para calquera tipo de información ou asesoramento poden pasarse polo Departamento de Orientación do IES Lois Peña Novo.

 

+ Info: Pincha aquí

Dectogas, o noso proxecto en Miniempresas Lugo

Este curso participamos no proxecto Miniempresas Lugo cunha das trece iniciativas emprendedoras seleccionadas de toda a provincia (de nove centros escolares diferentes). Dectogas, de segundo do Ciclo Medio de Instalacións Eléctricas e Automáticas, é o noso proxecto de miniempresa, e para desenvolvelo contarase con formación específica para profesorado e alumnado ata o mes de maio, e en xuño participaremos nunha feira na que se exporán tódolos proxectos. Tedes máis información na nova que saíu hoxe no xornal El Progreso e que achegamos en imaxe.

 

 

Programa Atrévete

O noso IES participa no programa Atrévete, incluído en eduemprende, polo que nenos e nenas de primaria e de secundaria visitan centros con formación profesional e empresas. A finalidade é fomentar o emprendemento entre a rapazada e facelos coñecedores do tecido empresarial das súas comarcas a través da colaboración coas asociacións de empresarios. O Lois Peña Novo é un dos dous únicos centros da provincia que participan (o outro é o CIFP Politécnico de Lugo) e, en colaboración coa Asociación de Empresarios Sete Pontes (Vilalba), escolares de Vilalba (do Mato Vizoso e do Insua Bermúdez), da Pastoriza, de Cospeito e doutros lugares xa viñeron ou han vir coñecer as ensinanzas e espazos do noso IES e algunhas empresas de Vilalba como Prestes e Xorsa.

 

A noticia no Progreso online.

Aberta a matrícula para a ESA IV

Se só che falta 4º ou algunha das súas materias pra rematar a ESO, podes facelo no noso IES nun só cuadrimestre na ESA.

Clases do 6 de febreiro ó 23 de xuño, de 18 a 22h de luns a xoves.

PRAZO ABERTO DE MATRÍCULA ATA O 16 DE XANEIRO!

Máis info no teléfono 982.870.860 ou na secretaría do centro.

O noso alumnado de prácticas en Alemaña

Hoxe empezamos unha nova etapa no Lois Peña Novo, custou o seu, pero grazas ó esforzo, a moitas chamadas, xestións e correos logramos abrir unha porta ao mundo. Once rapaces de toda Galiza marcharon estes días de atrás facer prácticas como titulados medios por Europa adiante, e dous son de Vilalba. Pablo e Ángel, técnicos de grao medio en Electromecánica de Vehículos Automóbiles, comezaron hoxe a traballar nos talleres de dous concesionarios en Alemaña. Agardamos que aproveiten a experiencia e que gocen dela, e que nos sigan facendo chegar imaxes e información da súa estancia.

Desde aquí mandámoslles unha aperta e moita forza!

Gañadora do concurso de postais do EDL

Publicamos a tarxeta de Nadal que resultou gañadora do concurso convocado polo EDL do noso IES, da autoría de Fina Paulos Lareo,

nunha montaxe fotográfica coa tarxeta, que está feita e decorada a man polas dúas caras en cartolina e outros materiais.

Di a postal:

"Se o meu sorriso che serve de adorno en Nadal

conta con el

se a miña man che é de axuda

aquí tes as dúas,

se o meu corazón che trae felicidade

é todo teu.

Feliz Aninovo!!!".

 

Sumámonos ós bos desexos para estas festas e o novo ano, e a nosa noraboa á gañadora!

 

Repunte dos Ciclos Formativos no IES Lois Peña Novo neste curso 2016-17

Reportaxe de Xosé María Palacios na Voz de Galicia do día 24 de novembro sobre o repunte dos Ciclos Formativos no IES Lois Peña Novo neste curso 2016-17.

Agradecidos polo seguimento!

 

Guardar

Magosto

 

Chegou o outono e, nunha semaniña, faremos o magosto no Lois, con castañas asadas no noso patio, conversas, xogos populares e concurso de doces de outono. Vaite preparando e, xa sabes, colabora traendo castañas e deixándoas estes días nas caixas que has atopar na entrada do centro.

Estuda o bacharelato no IES Lois Peña Novo

Seguro que escoitaches falar da reválida pra ter o título de Bacharelato. O que se cadra non sabes é que neste curso 2016-2017 a reválida non será vinculante pra ter o título, co cal se aprobas todo o bacharelato obterás o teu título de bacharel. Aproveita este curso e remata o que tes empezado!

Ven rematar o bacharelato ó IES Lois Peña Novo!

E se inda non o empezaches, ven igualmente!

Guardar

Distribuir contido