IES Gregorio Fernández

Antes de dar comezo ás vacacións de Nadal, tivemos unha chocolatada no comedor do noso centro e deseguido celebrouse o festival de Nadal organizado polo departamento de Música.  Os protagonistas foron os alumnos e as alumnas da ESO e BAC no que interpretaron panxoliñas e cancións populares, notas de ledicia e tradición para comezar este tempo de lecer e para desexar os mellores desexos para o vindeiro ano.

O noso centro participa no Programa Finanzas para mortais, que se desenvolve no marco do Plan Eduemprende e que ten como obxectivo fomentar o espírito emprendedor e a cultura financieira no noso sistema educativo. Celebráronse dúas actividades formativas, a primeira delas foi o venres 23 de novembro e a outra o venres 30 de novembro, impartidas por persoal do Banco de Santander. Na primeira xornada introduciron ao alumnado nos términos financieiros máis básicos, como TIR, TAE, contas bancarias e depósitos á vista, tarxetas bancarias, produtos de aforro e produtos de inversión. Na segunda xornada, falaron dos diferentes tipos de endebedamento, deron algunhas claves para conseguir un endebedamento intelixente e tamén explicaron as formas de pago que se poden utilizar no estranxeiro. Mostramos deseguido unha foto dos grupos que participaron activamente nestas sesións presenciais:

O alumnado dos ciclos formativos e da formación profesional básica das familias profesionais de Fabricación Mecánica e de Instalación e Mantemento do noso IES asistiron o día 23 de novembro á Feira Internacional de máquinas, ferramentas e accesorios (EMAF 2018) en Oporto, na que participaron as principais empresas presentando a última tecnoloxía e solucións de futuro para este sector. E aproveitando esta viaxe, o día anterior visitaron a fábrica de FASA RENAULT e tamén INMAPA, ubicadas as dúas en Palencia. Estas dúas empresas están moi vinculadas ás nosas especialidades formativas.

O luns 26 de novembro desenvolveuse no noso centro a Campaña sobre sensibilización dos riscos laborais específicos para as familias profesionais de Fabricación Mecánica, Instalación e Mantemento, Electricidade e Electrónica e Administración promovida polo Instituto Nacional de Seguridade e Hixiene no Traballo (INSHT). O noso alumnado de Formación Profesional valorou a importancia da seguridade no traballo e reflexionou sobre os riscos específicos que se poden dar no seu lugar de traballo e a importancia de aplicar unha eficaz política preventiva por parte das empresas.

No noso IES estanse desenvolvendo unha serie de actividades a favor da eliminación da violencia de xénero, entre elas, a que se celebrou este venres pasado organizada polo departamento de galego, en colaboración coa biblioteca do noso centro. Repartíronse unha morea de pulseiras de cor violeta escritas por cada participante con lemas contra a violencia de xénero e a favor da igualdade. Tamén o equipo da nosa Biblioteca Fiz Vergara Vilariño representou visualmente o poema "Baldosas" de Carlos Negro, para remover a conciencia de todos nós. E ademais, estamos a participar activamente en varios actos dentro da campaña promovida polo concello Sarria en negro. Contra as violencias. 

O venres 9 de novembro celebramos no noso IES o tradicional magosto, unha actividade para confraternizar entre o alumnado e o profesorado e ao mesmo tempo para exaltar as bondades deste froito típico galego, como son as castañas da nosa comarca. 

O noso centro participa neste curso no Programa "Implantación de ferramentas de medios de pagamento en formación profesional"  dentro do convenio de colaboración entre a Consellería de Educación e Abanca e hoxe venres 9 de novembro celebrouse a súa actividade formativa específica na que participou o noso alumnado de FP da familia de Administración: CM de Xestión Administrativa e CS de Administración e Finanzas. Esta actividade que tivo unha duración aproximada de dúas horas tratou sobre o funcionamento dos medios de pagamento, a tipoloxía de tarxetas, novas tecnoloxías relacionadas cos medios de pagamento e a súa evolución, riscos e controis a ter en conta, reclamacións, e dereitos e responsabilidades de comerciantes e compradores.

O xoves 21 de xuño celebrouse no noso IES o festival fin de curso, no cal participaron alumnos e alumnas de 2º e 3º ESO e 1º BAC interpretando varias actuacións musicais e enchendo de ledicia e ilusión os corazóns de tódolos asistentes. Logo procedeuse á entrega dun diploma acreditativo de graduación ao alumnado de 4º ESO e 2º FPB, momento que aproveitaron para expresar o seu agradecemento a todo o profesorado, quen unha vez máis lles desexaron un futuro prometedor.

Agardámosvos o vindeiro curso, bo verán a todos.

Desde o 16 e ata o 19 de xuño, un grupo de alumnos e alumnas de 2º BAC foron de viaxe de fin de etapa a Praga, visitando a cidade e os seus arredores.

Unha vez máis, o noso IES participou no Plan Proxecta, unha iniciativa de innovación educativa da Consellería de Educación, en colaboración con outros organismos públicos. Neste curso, os programas educativos elexidos foron Por 365 días de respecto e igualdade e Fotografía en curso e desenvolvéronse varios proxectos centrados nestas temáticas nos que a implicación do alumnado e do profesorado foi excelente. Podedes ver unha mostra das actividades realizadas no  seu blogue e tedes tamén as ligazóns para visualizar o traballo realizado en cursos anteriores noutros programas educativos:

Curso 2017-2018:  https://por365diasderespectoeigualdade.blogspot.com/

                              Fotografía en curso

Curso 2016-2017:  https://hortogranxavalpaisaxes.blogspot.com/

Curso 2015-2016:  https://porterrasdesarria.blogspot.com/

Curso 2014-2015:  https://riosarria.blogspot.com/

Curso 2013-2014:  https://riosarria.blogspot.com/