IES de Valga

ESO - Bacharelato
CS Construcións Metálicas - CM Soldadura e Caldeiraría - FP Básica
Contacto: +34 886 151 980 - ies.valga@edu.xunta.gal

A poeta Rosalía Fernández Rial é a próxima convidada do Clube de Lectura do IES de Valga: xoves 14 marzo ás 16:30 horas

Mér, 13/03/2019 - 12:25 — IES de Valga

A poeta Rosalía Fernández Rial é a próxima convidada do Clube de Lectura do IES de Valga A poeta carballesa Rosalía Fernández Rial vai participar este xoves 14 de marzo, às 16:30h., nunha nova sesión do Clube de Lectura do IES de Valga, onde se vai falar do seu libro Ningún amante sabe conducir. Trátase dunha actividade aberta a calquera persoa con interese na lectura.

Rosalía Fernández Rial (Carballo,1988) é licenciada en Filoloxía e Doutora en didáctica das linguas e expresión dramática pola Universidade de Santiago de Compostela. Estudou e toca o acordeón, fai teatro e, sobre todo, escribe. A súa tese de doutoramento presentada na USC é Expresión dramática e teatral para a clase de linguas no ensino secundario.

Para alén de Ningún amante sabe conducir, publicou os libros de poesía En clave de sol, Átonos, Vinte en escena, Contra-acción e Sacar a bailar.Tamén cultivou a narrativa en Bonus Track e o ensaio en Aulas sen paredes.

Ningún amante sabe conducir

Esta obra foi publicada pola Edicións Positivas em 2014. En palabras do crítico Xosé Manuel Eyré, “a riqueza simbólica trascende o poemario e áchase tamén inoculada na prosa poética e na teatralización, mais o poemario en si responde a unha concepción como road movie, que á súa vez é un subxénero que sempre se asimila á narrativa”.

O Clube de Lectura

O Clube de lectura quere facer un convite especial a todas as persoas da zona interesadas nas súas actividades –mesmo sen teren relación directa co centro- para formaren parte del. A única condición é ter interese e gusto pola lectura. Para este fin poden contactar co responsábel da Biblioteca, Miguel Fernández.

Alumnado de 1º ESO participa nos Obradoiros Matemáticos de Imatxina en Vigo

Mar, 12/03/2019 - 19:02 — IES de Valga

O martes 12 de marzo, como xa ven sendo habitual nos últimos anos, o alumnado de 1º ESO desprazouse ata Vigo para participar na XV edición dos Obradoiros Matemáticos de Imatxina organizados pola Fundación Escola Rosalía e AGAPEMA. Durante hora e media estiveron tratando de resolver os diferentes retos e problemas que lles propuxeron. Utilizaron tangrams, pentominós, libros de espellos, dados, calculadoras, xogos de enxeño... e outros materiais manipulativos cos que pasaron un bo rato facendo auténticas matemáticas, todo dirixido por monitores que se encargaron de orientar e controlar as diversas actividades. Esta actividade foi organizada polo departamento de Matemáticas.

Alumando de 4º ESO e 1º Bacharelato asiste ao Festival de Teatro Grecolatino en Lugo

Mar, 12/03/2019 - 18:49 — IES de Valga

Alumnado de 4º ESO e 1º Bacharelato, das materias do departamento de Latín e Grego, asistiu o 11 de marzo en Lugo ás xornadas da XVII edición do Festival de Teatro Grecolatino, organizadas pola SEEC de Galicia. Ademais, o alumnado de 4º ESO B, Pedro Ramos, Anabel Villamarín e Lucía Fariña, recolleo o segundo premio logrado no concurso Odisea galego. Parabéns!!!. A actividade foi organizada polo departamento de Cultura Clásica.

Concentración no IES Valga contra o crime machista acaecido no noso concello

Lun, 11/03/2019 - 18:15 — IES de Valga

Alumnado e profesorado do IES Valga xunto ao alcalde, concelleiras de Igualdade e Educación e outros membros da Corporación municipal, concentrámonos no recinto de entrada ao noso centro para dar lectura a un texto de condena e a un poema. O acto rematou gardando un minuto de silencio en memoria de María José Aboy, veciña do concello de Valga vítima de violencia machista. Máis información nestes enlaces:

https://www.facebook.com/vozarousa/videos/1019849874885038/

https://www.facebook.com/ConcellodeValga/

Alumnado de 2º ESO regueifa con Pinto de Herbón

Sáb, 09/03/2019 - 21:00 — IES de Valga

O pasado xoves 7 de marzo na Biblioteca do noso Centro, o alumnado de 2º ESO que participa no Certame Provincial de Regueifa impulsado pola Deputación de Pontevedra, tivo ocasión de asisitir a un segundo obradoiro desta modalidade de cantiga improvisada, ofrecido pola Asociación Oral de Galiza. A sesión contou coa presenza do regueifeiro Pinto de Herbón e serviu para complementar ao primeiro obradoiro do mes de febreiro. A actividade foi organizada polo departamento de Lingua e Literatura Galegas.