Dinamización lingüística

O próximo día 4 de maio vaise celebrar polas rúas da Coruña o Correlingua da nosa comarca, unha actividade que convida á mocidade a  reivindicar a lingua galega publicamente. Este ano, do noso instituto van participar os  alumnos de 4º da ESO que o desexen.

 O Correlingua vénse celebrando de xeito regular desde o 2000 aínda que é unha vella iniciativa promovida na súa orixe por entidades culturais. Na actualidade está organizada pola Asociación Socio-Pedagóxica Galega, a Confederación Intersindical Galega – Ensino, a Mesa pola Normalización Lingüística, os Concellos de Lugo, Pontevedra, Ourense e Vigo e a Vicepresidencia da Deputación de Lugo.

As carreiras pola lingua partirán de Ourense e percorrerán once comarcas galegas (Ferrolterra, A Coruña, Santiago, Lugo, Pontevedra, Vigo, Baixo Miño e O Condado, O Morrazo, Ribeira Sacra e A Mariña) coa participación de centros de ensino de toda Galiza. Cada unha das carreiras rematará cunha festa pola lingua que contará con actuacións teatrais e musicais por parte dos artistas convidados e do propio alumnado.

O 16 de abril, todo o día, 48 alumnos de 2º da ESO, acompañados por catro profesores farán unha visita á cidade de Lugo, como complemento á lectura do libro Contos do Museo. Farán un roteiro literario polo Museo Provincial de Lugo, visitarán a Centro de Interpretación da Muralla, pasearán polo casco histórico e camiñarán polo adarve da muralla.

Pola tarde irán ao Castro de Viladonga.

Os rapaces precisarán levar o xantar e, desgrazadamente, roupa de auga, pois parece que hai moitas posibilidades de que chova.

Aínda así, esperamos aprender moito e disfrutar máis.

Xa contaremos á volta.

 O 24 de febreiro de 1837 nacía, en Santiago, Rosalía de Castro. 175 anos despois a súa obra permanece viva.

                                                                        " Vaguedás", Follas novas, 1880

 Rosalía de Castro é a escritora máis representativa da lingua e da literatura galegas. A publicación do seu libro Cantares Gallegos, o primeiro escrito integramente no noso idioma, desde a vontade firme e inequívoca do seu significado, sinala o inicio da restauración do uso escrito do noso idioma e o final de séculos de silencio e esquecemento.
A súa obra é un retrato do pobo galego e goza dunha total actualidade. Desde o século XIX Rosalía de Castro foi homenaxeada polas galegas e os galegos como poeta nacional, pois reclamou a redención da patria galega e asumiu a voz do seu pobo, voz que guiou permanentemente a súa obra e o seu pensamento. Esta galeguidade intrínseca dos seus textos, esta comunicación e entendemento permanente co seu pobo, ao se dirixir a el no seu idioma propio, foi o que a fixo tamén poeta de todos os pobos, chegando a formar parte da nómina de escritoras máis destacadas da literatura universal de todos os tempos. (Texto extraído da páxina da AELG)

 No IES David Buján queremos contribuír á difusión e promoción da figura e obra de  tan extraordinaria escritora convocando un Concurso de Presentacións.

A continuación apuntamos algúns enlaces de interese e as bases do concurso:

http://www.xunta.es/linguagalega/arquivos/Rosalia_125aniversario.pdf

http://gl.wikipedia.org/wiki/Rosal%C3%ADa_de_Castro

 http://bvg.udc.es/ficha_autor.jsp?id=RosCastr&alias=Rosal%EDa+de+Castro&solapa=obras

 BASES

1. Os Departamentos de Lingua e Literatura Galegas e Dinamización Lingüística convocan un concurso de presentacións en formato dixital para promover o coñecemento da figura e obra de Rosalía de Castro  no ámbito das novas tecnoloxías.

2. As presentacións (en formato .ppt, .pptx ou .odp) deben incorporar texto e este ha ser redactado en lingua galega. Poderase incorporar audio.

Non hai extensión máxima para a presentación.

3. O tema das presentacións debe estar vinculado á figura e obra de Rosalía de Castro.

 4. As presentacións deben ser orixinais e non poden estar publicadas previamente nin premiadas noutros certames.

5. Os traballos seleccionados formarán parte dunha galería de presentacións que  se exhibirán o día 24 no centro. Ditos traballos  poderán estar dispoñibles no espazo web do centro.

 6. O envío das presentacións farase por correo electrónico  ou entregaranse directamento nos Departamentos que convocan o concurso.

7. O xurado estará formado por profesorado do IES David Buján, que escollerá as  mellores presentacións que obterán premio, así como a selección de traballos que formarán parte da galería. 

8. As fotografías, imaxes, mensaxes e, en xeral, calquera contido empregado, así como calquera reclamación en relación cos mesmos, son responsabilidade exclusiva dos autores das presentacións.

10. A participación neste concurso implica a autorización automática ao IES David Buján para publicar a presentación. Así mesmo, os departamentos convocantes reservan para si o dereito de corrixir os erros lingüísticos que poidan aparecer no texto, co fin de evitar a difusión de presentacións con grallas.

11. A participación neste concurso supón a aceptación destas bases e do ditame do xurado.