Skip to Content

Automoción

Departamento de Automoción

Alumnado de Ciclos realiza a FCT no estranxeiro

01/04/2017 09:00
Etc/GMT+1

Este ano volvemos levar a cabo o proxecto Erasmus+ KA102 en Formación Profesional: a realización da formación en centros de traballo ( FCT) relacionados cos seus respectivos ciclos levarase a cabo no estranxeiro, e terá lugar desde o 3 de abril ata o 21 de xuño.

Consideramos prioritario que o noso alumnado se integre nos novos mercados laborais europeos e que poida pór en práctica os coñecementos específicos da súa especialidade nun contexto diferente ao cotián.

Este ano o programa desenvolverase en Portugal, concretamente en Lisboa. É o terceiro ano que realizamos as prácticas neste país veciño, dous en Lisboa e un en Madeira, con resultados óptimos. Non esquezamos o valor engadido para a comunidade dada a situación fronteiriza da nosa localidade e a posibilidade de abrirse un novo e amplo mercado laboral.

O alumnado seleccionado recibiu previamente formación cultural e lingüística coa profesora nativa Sonia Almeida.

As persoas seleccionadas para o programa son:

II Xornadas de Automoción

18/04/2017 08:20
19/04/2017 21:00
Etc/GMT+1

cartel xornadas

As II Xornadas de Automoción do noso centro terán lugar os días 18 e 19 do vindeiro mes de abril. Nelas, o alumnado recibirá dous cursos de relevante importancia para o seu traballo.

Na mañá do día 18 impartirase un curso de primeiros auxilios, reanimación e actuación en caso de accidente de traballo. Pola tarde, o GES da Guarda impartirá nas súas instalacións un curso contra incendios onde o alumnado practicará a extinción dos distintos lumes que se poden atopar nun taller de automoción. Ademais, farán unha práctica de excarceración de coche coa finalidade de sensibilizar ao alumnado sobre a siniestralidade nas estradas.

O mércores 19, no salón de actos, terá lugar unha charla de rehabilitación de motos, unha xornada aberta sobre o mundo da competición, e as saídas laborais que ofrece o ámbito da automoción.

Tamén se fará a inaguración da primeira taquilla de bicis de Galicia: o noso centro é pioneiro neste tipo de actividades de fomento do vehículo do futuro, a bicicleta. Lembremos, ademais, que o día 19 é o Día Mundial da Bicicleta. Para o fomento deste vehículo ecolóxico e saudable pídese a participación dos demais Departamentos, co obxectivo de deseñar actividades conxuntas que fomenten o seu uso.

Viaxe didáctica a Xenebra

09/03/2017 08:20
12/03/2017 20:00
Etc/GMT+1

A semana pasada tivo lugar a excursión de fin de curso do alumnado de segundo curso de Automoción.

O xoves 9 desprazáronse á localidade suíza de Lausana (Lausanne en francés, Losena en arpitano) para visitar a Universidade da devandita localidade e un taller de reparación onde un antigo alumno do centro está a desenvolver o seu traballo. Tamén puideron coñecer a cidade e oír o órgano da catedral, lugar máxico de grande interese cultural.

O venres 10 a excursión tivo a oportunidade de visitar o centro de FP de Xenebra, onde o director do centro educativo e a Directora Xeral de Formación de Suíza acudiron co grupo explicando o funcionamiento interno dun centro de FP suízo, actividade que resultou moi motivadora para as persoas participantes.

Por último, o sábado 11 o grupo de automoción visitou o Salón de Xenebra, salón que viña cargado de grandes novidades técnicas e de presentacións de novos vehículos, e onde o noso alumnado puido gozar de primeira man de diversos vehículos.

Rally solidario con Marrocos

varias imaxes do rally

A pasada semana chegaron de percorrer máis de 4000 kms nun rally solidario seis integrantes entre os que se atopaban dous profesores do IES A Sangriña, Domingo Caldevilla e Luís Carballido. Este rally, que se levou a cabo entre o día 27 de decembro e o 4 de xaneiro, tiña como finalidade facer chegar material escolar ás nenas e nenos das zonas máis desfavorecidas de Marrocos.

En colaboración coa asociación Conrazones, o Departamento de Automoción do noso centro revisou e preparou os vehículos utilizados na travesía para poder soportar as condicións extremas de condución. O bo traballo dos alumnos na preparación dos vehículos fixo que todo transcorrese con total normalidade, sen ningún problema mecánico en toda a viaxe.

A ruta comezou na Guarda camiño Tarifa, e de alí a Tánxer ata Errachidia, atravesando numerosos poboados e tamén as dunas de Merzouga, lugar de extrema dureza para máquinas e pilotos. En total repartiron mais de 300 kg de material escolar e roupa así como lentes de visión para nenas e nenos dos diversos colexios que visitaron.

Coleccións privadas de vehículos da comarca

22/11/2016 08:20
Etc/GMT+1

O pasado martes 22, o alumnado de Automoción, acompañado polo seu profesorado, visitou unha serie de coleccións privadas de vehículos.

A primeira que coñeceron foi a de Manuel Gómez, en Mañufe (Gondomar), onde puideron ver pezas exclusivas e de gran valor. Cabe destacar o primeiro vehículo fabricado en serie en Europa do marqués de Dion, un Dion & Buton que conta cun motor de explosión de 4 tempos e unha soa válvula, unha peza moi especial.

Tamén visitaron a colección de Manolo Ferreira, colección de altísimo valor económico, e nela os alumnos puideron ver moitas pezas únicas de grande interese técnico.

Distribuir contido


by Dr. Radut