Skip to Content

Extraescolares

Actividades que se realizan fora do ambito académico

Visita a Xénese e Imatxina

09/03/2017 08:20
Etc/GMT+1
O pasado 9 de marzo, o alumnado de 3º da ESO foi de excursión a Vigo acompañado pola profesora de Plástica, Beatriz Núñez e as profesoras de Matemáticas, Nieves Lomba e Xoana Alonso. Aproveitando o bo tempo, primeiro asistiron a unha exposición de fotografía na rúa Príncipe: "Xénese" do brasileiro Sebastião Salgado. Despois, o alumnado dispuxo de media hora para ir á Casa do Libro, onde mercou novelas da saga O Exército Negro e comics de Magi, entre outros. Por último, asistiron aos talleres de Imatxina, en EducaBarrié. Grazas a xogos de lóxica, somas, pentacubos, espellos e efectos ópticos, puideron gozar das matemáticas manipulativas nun contexto moi distinto ao que é habitual nas aulas.
momentos da excursión
momentos da excursión 

Contos desde o Polo Norte

14/03/2017 09:10
Etc/GMT+1

Viaxamos ao Polo Norte da man de 4º de Educación Infantil (3 anos), na sétima sesión de Contos do mundo. Desta volta, ante este público tan atento e espontáneo, o alumnado de 2º de ESO B representou, cantando e bailando, o conto Vamos a cazar un oso, que preferiu adapatar como Vamos a buscar un oso. Ademais, na randeeira dos contos, a alumna Laura Rodríguez, leulles a divertida historia do reno Renato.

Velaquí as fotos, cedidas polo CEIP. Máis información en BiblioPepiño.

Viaxe didáctica a Xenebra

09/03/2017 08:20
12/03/2017 20:00
Etc/GMT+1

A semana pasada tivo lugar a excursión de fin de curso do alumnado de segundo curso de Automoción.

O xoves 9 desprazáronse á localidade suíza de Lausana (Lausanne en francés, Losena en arpitano) para visitar a Universidade da devandita localidade e un taller de reparación onde un antigo alumno do centro está a desenvolver o seu traballo. Tamén puideron coñecer a cidade e oír o órgano da catedral, lugar máxico de grande interese cultural.

O venres 10 a excursión tivo a oportunidade de visitar o centro de FP de Xenebra, onde o director do centro educativo e a Directora Xeral de Formación de Suíza acudiron co grupo explicando o funcionamiento interno dun centro de FP suízo, actividade que resultou moi motivadora para as persoas participantes.

Por último, o sábado 11 o grupo de automoción visitou o Salón de Xenebra, salón que viña cargado de grandes novidades técnicas e de presentacións de novos vehículos, e onde o noso alumnado puido gozar de primeira man de diversos vehículos.

Visita didáctica a Porto

09/02/2017 00:20
09/02/2017 18:30
Etc/GMT+1
alumnado en lugares representativos

O Departamento de Portugués xunto co de Relixión organizaron, no pasado mes de febreiro, para o seu o alumnado de 4º de ESO, 1º e 2º de Bacharelato unha saída didáctica a Porto, onde fixeron unha completísima visita aos lugares máis representativos.

Coñeceron a arte sacra barroca de Nicolau Nasoni (Igreja do Carmo, Torre dos Clérigos, talhas de Nosa Senhora, Igreja de São Ildefonso), visitaron tamén a Sé Catedral, o Pelourinho, a livraria Lello e Irmão, e despois do almorzo aínda foron facer un percorrido polo Estadio do Dragão do Porto F.C. 

Visita ao observatorio astronómico de Forcarei

30/01/2017 08:20
30/01/2017 17:40
Etc/GMT+1

 

O pasado 30 de xaneiro o alumnado de 1º e 2º dos Bacharelatos científico e tecnolóxico visitou o observatorio astronómico de Forcarei. A visita fíxose moi amena grazas a Ricardo e Alberto, que foron os encargados de explicarlles o funcionamento do observatorio, cales son as tarefas que se realizan nas instalacións e como é o material que empregan. Sen dúbida, o telescopio de enormes dimensións do que dispoñen (51 cm de diámetro) foi o que máis lles chamou a atención.

Dado que as condicións climáticas non permitiron levar a cabo ningunha actividade, a visita rematou coa proxección de imaxes obtidas desde o observatorio, nas cales se podían ver diferentes obxectos astronómicos como nebulosas, supernovas ou galaxias.

Unha vez finalizada a visita ao Observatorio, continuouse rumbo ao campus universitario de Vigo para coñecer as facultades correspondentes ás Enxeñarías de Minas, Industrial e de Telecomunicacións.

Mágoa que o tempo non nos acompañase nesta saída! Malia isto, hai que agradecer a Ricardo e a Alberto as súas explicacións tan entusiastas que nos recordan, unha vez máis, o grande que é o universo que nos rodea.

Distribuir contido


by Dr. Radut