Skip to Content

Proxecto VEDRA MEDRA

Vedra medra coa xente de oficio. Obradoiro de carpintería no centro

Xov, 27/02/2020 - 11:48 — Anónimo

O venres 14 de febreiro, acudiron ao CPI José Manuel Segade, José María López, e Manuel Vilas, recoñecidos carpinteiros de Vedra e de San Mamede de Ribadulla.

O alumnado de 1.º e 2.º da ESO tivo a ocasión de ver e coñecer o funcionamento dos diferentes útiles que empregaban hai catro ou cinco décadas os máis vellos, José e Manuel, como a torniqueta, o serrón do aire, a serra portuguesa, a eixola, a macheta de carpinteiro ou o acanalador… 

Tamén aprendeu a rapazada que son os ingletes, o lizo, a xabreira, a mortea ou a chazona.

Souberon da laboriosa elaboración dos pipotes nesta terra da Ulla, gran produtora de viño, escoitando a un carpinteiro experto, José.

E revisaron o cuestionario de recollida de campo que nos facilitou o ILG desde o programa Lingua, patrimonio e coñecemento tradicional.

Esta sesión, na que estivo presente o Departamento de Tecnoloxía coa profesora Natividad Penas, difundirase en formato audiovisual no 3.º trimestre como parte dun monográfico destinado á carpintería e á madeira.

A actuación descrita complementarase cun traballo colaborativo que iniciaremos desde a aula coa app Bótame un capio, á que iremos incorporando canta terminoloxía nova fomos aprendendo.

Está tamén iniciado o contacto coa Escola Básica e Secundária de Rebordosa en Porto para intercambiar nestes próximos meses experiencias entre os nosos escolares e os portugueses.

Galería coas fotos do taller

 

Xulia Marqués 

Coordinadora de Vedra medra

Vedra medra. O autor fala da súa obra: HENRIQUE NEIRA

Mar, 11/02/2020 - 13:44 — Anónimo

 

O pasado xoves, 6 de febreiro, estivo con nós o xornalista e investigador Henrique Neira. 

Henrique, aínda que reside en Santiago, ten fortes vínculos con Vedra por vía materna. A este concello e á comarca da Ulla tenlles dedicado numerosas investigacións, hoxe xa publicadas: Vedra da Prehistoria aos inicios do século XX, Vedra da Prehistoria a 1900; é, ademais, coautor de Sarandón, anacos de historia, O lendario río Ulla. As pontes do río Ulla, Gundián, O Val do Ulla e as Coplas Ulláns e Cántigas da Ulla (coa Asociación Raiceiro).

Para adiantarnos o contido do seu próximo libro Vedra. Unha historia visual visitounos no Vedra medra, abrindo así a sección –O autor fala da súa obra-. 

O alumnado de 1º da ESO foi quen escoitou o seu relatorio.

Xulia Marqués, coordinadora Vedra medra

 

Traballo e xénero no rural vedrés

Mar, 11/02/2020 - 13:35 — Anónimo

No marco da nosa investigación sobre a xente con oficio, en Vedra medra quixemos prestarlles unha especial atención ás mulleres maiores da contorna e ao traballo invisible e pouco recoñecido que desenvolveron ao longo da súa vida. 

Para iso organizamos a sección TRABALLO E XÉNERO NO RURAL que inclúe diversas actuacións e que comezaremos a divulgar con ocasión do Día da Muller Traballadora. 

O xoves 6 de febreiro, iniciamos as gravacións das historias de vida e laborais de oito mulleres singulares. Catro responden ao perfil de emigrantes retornadas, as outras catro son residentes e non saíron de Vedra.

Para realizar as entrevistas acompañáronme as seguintes alumnas de 1º e 2º da ESO: María Pereira, Inés Iglesias, Ainara Gómez, Inés Garrido, Paula Asorey, Carlota Costoya, María Garrido, María Honrubia, Claudia Ferreiro , Xiana Gañete, Uxía Carreira, Nagore Picallo e Lucía Turnes. 

O meu agradecemento ás informantes e ás entrevistadoras.

Xulia Marqués, coordinadora de Vedra medra

ALBUM DE FOTOS DO EVENTO

 

 

Cantarelas 2020

Xov, 16/01/2020 - 12:06 — Anónimo

Vedra medra. Revivindo a tradición das cantarelas de Nadal e Reices

O venres 10 de xaneiro realizamos a visita que nos viramos obrigados a adiar por mor do mal tempo antes de Nadal. Con ocasión da celebración do Nadal e dos Reis queriamos revivir a tradición das cantarelas de Nadal e Reis na parroquia de San Miguel de Sarandón. E alí acudimos convidados pola Asociación Cultural San Campio co alumnado de 1.º da ESO e de educación infantil (4 e 5 anos). O obxectivo noso era que 82 rapaces e rapazas puidesen coñecer de preto esta tradición a través do testemuño dalgúns dos seus protagonistas.

A xornada transcorreu entre cantos de Nadal e Reices,charrascos e requintas, aguinaldos e unha visita a tres casas, a de Luís de Zas, a de Marcelino e a de Crespo. Rematamos nesta última recibindo un agasallo ben doce e quentiño, un chocolate con rosca, que moito lles agradecemos…

Aquí podedes ver fotos da saída: https://photos.app.goo.gl/BqKbJyUnrst4bTNx7

 

Xulia Marqués

Coordinadora Vedra medra

Vedra medra coa xente de oficio. O carpinteiro.

Xov, 19/12/2019 - 19:47 — viano

Vedra medra coa xente de oficio. O carpinteiro

O venres 13 de decembro, Manuel Vilas recibiunos na súa carpintería de Vedra e mostrounos os útiles de traballo que el empregaba no seu taller.

20 alumnos/as de 1º e 2º da ESO tiveron ocasión de ver e saber para que utilizaba a garlopa e o garlopín, a eixola, a trencha, o formón, o gramil, o guillame, os cepillos ou o compás, entre outros.

Tamén aprenderon a distinguir o mazo de armar do mazo de tallar, o serrón de cota do serrón de cotilla, o serrón do aire da serra portuguesa ou que diferenza hai entre tronzar e torar.

E de paso aproveitamos para encher o cuestionario sobre a carpintería e a madeira que nos facilitou o programa Lingua, patrimonio e coñecemento tradicional (Consellería de Educación-USC-ILG).

O traballo de investigación sobre os oficios tradicionais, obxecto do Vedra medra neste 2019-20, irase ampliando a outras profesións nos vindeiros meses. 

Xulia Marqués 

Coordinadora de Vedra medra

VER FOTOS: https://photos.app.goo.gl/5P1iFFRBExseEDtF7

O proxecto VEDRA MEDRA no suplemento de La Voz de Galicia

Xov, 28/11/2019 - 14:27 — viano

No suplemento EL COMARCAL de La Voz de Galicia, de hoxe xoves, publícase un artigo dedicado ao proxecto VEDRA MEDRA que desenvolve o centro desde fai catro cursos.

Ler o artigo

Vedra medra visita o Museo do Pobo Galego e o Instituto da Lingua Galega

Ven, 15/11/2019 - 12:12 — Anónimo

O pasado 5 de novembro, data en que se recordaba o vixésimo aniversario do pasamento de don Antonio Fraguas, visitamos o Museo do Pobo Galego ao que el tanto tempo e esforzo lle dedicara.

O alumnado de 2.º da ESO percorreu a exposición dedicada ao autor, a quen se honra este 2019, como protagonista das Letras Galegas e a súa biblioteca. Serviunos de guía o etnógrafo e historiador Clodio González. Logo, os/as alumnos/as foron descubrindo o Museo por medio dun xogo de pistas, o " Entramado de oficios".

Non podía ser doutro xeito porque neste 2019-20 Vedra medra está dedicado a revisar os oficios tradicionais.

O Instituto da Lingua Galega foi a seguinte parada. Alí tivemos a ocasión de coñecer as investigadoras que nos asesoraron o curso pasado no desenvolvemento do programa " Lingua, patrimonio e coñecemento tradicional" e que estarán connosco este 2019-20, Marta e Maruxa. Aprendemos a través da súa explicación a importancia que ten a recollida de léxico tradicional e que recursos temos á nosa disposición para poder levala a cabo. Un presentáronnolo en primicia, "Patrimonio léxico da Gallaecia" (PLG). Nós tamén lles contamos como traballamos coa app "Bótame un capio" e cos cuestionarios de campo e os resultados que temos acadado.

Xulia Marqués

Coordinadora de Vedra medra

Máis imaxes da saída

 

Vedra medra. Comezamos o curso e continuamos co labor divulgativo

Lun, 28/10/2019 - 10:08 — viano

Vedra medra. Comezamos o curso e continuamos co labor divulgativo

O pasado curso poñíamoslle fin ao mes de xuño participando no Seminario Internacional UNISCAPE EN ROUTE "Paisaxe herdadas, paisaxes construídas, paisaxes vividas" co relatorio "De identidad(e) o como decodificar los paisajes heredados a través de los vínculos intergeneracionales. El proyecto Vedra medra" na Universidade da Coruña. 

E este 2019-20, o 19 de setembro, presentamos aos asistentes ás Xornadas de toponimia no ensino de Ames "Coñecendo a contorna e o seu patrimonio da man da toponimia. O proxecto Vedra medra".

Oito días despois, continuamos en Santiago nas III Xornadas de Educación Patrimonial de Galicia con "Vedra medra. Territorio, paisaxe e patrimonio nos proxectos do CPI de Vedra".

En outubro estaremos en Huelva no Congreso Prácticas y Reflexiones en Educación Patrimonial III expoñendo "¿Cómo construir una comunidad patrimonial? preguntas y respuestas para el debate", no que comentarmos os resultados do obradoiro do Entroido tradicional do Ulla que desenvolvemos no centro entre outubro de 2018 e marzo de 2019. E, en novembro, estamos convidados ao Simposio do ILG Lingua, patrimonio e coñecemento tradicional para dar a coñecer "Bótame un capio",  traballo de compilación de léxico tradicional ullán que iniciamos no último trimestre e que seguiremos nos vindeiros meses coa inestimable axuda da app creada para tal tarefa.

Xulia Marqués

Coordinadora de Vedra medra

 

Vedra medra no Pasabodeghas 2019

Mar, 22/10/2019 - 09:48 — Anónimo

O 26 e 27 de outubro Vedra medra está convidada ao Pasabodeghas de San Miguel de Sarandón.

Levaremos a exposición que estivo no Museo do Pobo e que resultou gañadora na X edición do Premio Antón Fraguas. Estará na ADEGA PEDREIRA.

O resultado dos traballos sobre patrimonio, tradicións e costumes que estivemos facendo neste primeiro mes de curso en 1º e 2º da ESO e 5º de educación primaria poderanse ver na ADEGA DE BOUZÓN no espazo "Pegadas".

 

Xulia Marqués

Coordinadora Vedra medra

Presentación da app "Bótame un capio"

Mér, 12/06/2019 - 11:02 — Anónimo

 

 

O proxecto Vedra medra presenta unha app para un traballo de recuperación lingüística para o que solicitamos a colaboración de toda a comunidade educativa.

Esta ferramenta colaborativa nace coa finalidade de recuperar parte dun vocabulario tradicional de Vedra e da comarca da Ulla que non forma parte dos dicionarios ou que presenta acepcións distintas ás que estes inclúen.

Do deseño e realización da app encargouse un pai, José Mejuto, e da parte lingüística a profesora Xulia Marqués, coordinadora do proxecto Vedra medra, no que pasará a integrarse.

"Bótame un capio" é unha expresión que os vedreses utilizaban cando demandaban axuda e que fixemos nosa para denominar a app.

Con ela queremos solicitar a túa colaboración e a de toda a comunidade educativa e a veciñanza nun labor que consideramos tan urxente como necesario, o de recuperación dun léxico parcialmente esquecido relacionado coa nosa cultura tradicional.

Podes descargala indo a:

https://play.google.com/store/apps/details?id=org.consultem.app.capio

Distribuir contido


by Dr. Radut