Novas da Consellería de Educación

 
Distribuir contido
Actualizado: hace 14 horas 18 min

Educación investiu un millón de euros en melloras educativas en Salceda de Caselas e Mos neste curso

Mér, 16/01/2019 - 13:19
Summary: A conselleira Carmen Pomar visitou infraestruturas educativas en ambos concellos esta mañá No CEP Altamira a Consellería levou a cabo unha importante obra de ampliación que permite a dotación de novos aularios, xunto coa creación dunha novidosa aula multisensorial e o acondicionamento dos módulos destinados a comedorNo CEIP Pena de Francia acometeuse unha rehabilitación integral do centro que supón un aforro enerxético do 23,5% Idioma Gallego

A Consellería de Educación, Universidade e Formación Profesional vén de acometer importantes melloras en  infraestruturas educativas dos concellos de Salceda de Caselas e de Mos, no sur da provincia de Pontevedra, que supuxeron un investimento de 978.000 euros.

A conselleira Carmen Pomar supervisou esta mañá o resultado da ampliación do CEP Altamira (Salceda de Caselas) e do CEIP Pena de Francia (Mos), nunha visita na que estivo acompañada do delegado territorial da Xunta en Vigo, Ignacio López-Chaves, do alcalde de Salceda, Marcos Besada, e da alcaldesa de Mos, Nidia Arévalo.

CEP Altamira

A Consellería deseñou un proxecto de ampliación para o CEP Altamira, en Salceda de Caselas, que consistiu na demolición da cuberta do edificio administrativo (que era dun so andar) para construír unha primeira planta con novos espazos para aulas cunha pasarela de comunicación co edificio principal destinado a usos educativos e ximnasio. Isto posibilitou a creación dun novo espazo de preto de 300 metros cadrados distribuídos en catro novas aulas, aseo adaptado, almacén de limpeza e distribuidor.

A planificación desta obra responde á necesidade de atender as demandas educativas deste centro, que no presente curso conta con 587 alumnos matriculados en seis cursos de Primaria repartidos en 30 aulas, incluídas as catro de nova creación que, desde a volta de vacacións de Nadal, foron ocupadas polo alumnado de 6º curso.

Ademais desta ampliación, cómpre destacar tamén o acondicionamento de módulos de comedor, -aos que se dotou de aseos para persoas con mobilidade reducida, lavabos exteriores, novo pavimento e falso teito con acabado vinílico, pintado exterior, rampa de acceso e cuberta diante dos módulos para cubrir o espazo de tránsito-; a instalación de calefacción no ximnasio e a creación dunha aula multisensorial destinada principalmente a alumnos NEAE (Necesidades Específicas de Atención Educativa). Isto é, un espazo dotado con distintos elementos para o xogo e a relaxación, como unha piscina de bolas e música ambiental, para a interacción por parte deste alumnado.

Polo tanto, tan só o ano pasado, o investimento da Consellería de Educación neste centro ascende a preto de 601.000 euros (incluídos os 514.000 € da ampliación, 50.000 € para os módulos de comedor e outros 37.000 € para a calefacción do ximnasio e a dotación da aula multisensorial).

CEIP Pena de Francia

Posteriormente a conselleira desprazouse a Mos para comprobar in situ as obras levadas a cabo no CEIP Pena de Francia, onde a Consellería acometeu unha rehabilitación integral –enerxética e funcional- que supuxo un investimento de case 377.00 euros e que repercute directamente nunha mellor confortabilidade dos seus usuarios.

Así, procedeuse ao illamento da fachada exterior, substituíronse as ventás por carpintería de aluminio con rotura de ponte térmica e dobre vidro, e cambiáronse as luminarias por equipos de alta eficiencia enerxética, medidas que combinadas todas elas supoñen un aforro enerxético anual en torno ao 23,5%. Así mesmo substituíronse os falsos teitos por outros con paneis acústicos, pintáronse e reparáronse os paramentos interiores.

Dentro do apartado de obras de rehabilitación enerxética e funcional, ademais de no CEIP Pena de Francia, na provincia de Pontevedra acometéronse obras deste tipo no CPI Alfonso VII (Caldas de Reis), no CPI Santa Lucía (Moraña). E durante este ano vaise actuar no CEIP Tenorio (Cerdedo-Cotobade) e no CPI Arealonga (Vilagarcía de Arousa), ambas as dúas obras xa licitadas.

En xeral en toda Galicia, desde que se puxo en marcha esta acción, a Consellería leva investidos máis de 13 millóns de euros en obras de rehabilitación enerxética e integral de 29 centros escolares (todos eles foron construídos hai décadas) ao longo de tres anos.

Construcións e mellorasEnsinanzas de réxime xeralConsellería de Educación, Universidade e Formación ProfesionalCentros

Carmen Pomar visita en Lugo as instalacións do Cebiovet e do Hospital Veterinario Universitario Rof Codina

Mar, 15/01/2019 - 14:11
Summary: A Xunta de Galicia investiu máis de 4 millóns de euros na construción e remodelación destes centros, referente de docencia e investigación no eido da produción e sanidade animal a nivel europeoO financiamento captado polos investigadores do Campus de Lugo medrou en tres anos en máis dun 80%A conselleira de Educación asistiu tamén á presentación da agrupación estratéxica BioReDes Idioma Gallego

A conselleira de Educación, Universidade e Formación Profesional, Carmen Pomar, visitou hoxe en Lugo as instalacións do Hospital Veterinario Universitario Rof Codina e do Centro de Biomedicina e Veterinaria (Cebiovet). Pomar destacou estes centros, xunto coa Facultade de Veterinaria, como referente da docencia, investigación e transferencia de coñecemento no ámbito da produción e sanidade animal en España e en Europa.

Estes dous equipamentos permiten formar un complexo docente, asistencial e investigador totalmente inserido dentro da liñas estratéxicas do Campus Terra. O proxecto de especialización intelixente do Campus de Lugo pretende transformalo nun referente científico e social nos ámbitos de coñecemento vinculados á sustentabilidade económica, social e medioambiental do uso da terra.

A conselleira lembrou que o seu departamento investiu máis de 4 millóns de euros na construción do Cebiovet e na remodelación do HVU Rof Codina. Estas melloras deron resposta á especialización do profesorado, que precisaba equipamento e instalacións renovadas para acadar os estándares de calidade esixibles actualmente na normativa de benestar animal.

Neste sentido Carmen Pomar explicou que o investimento realizado pola Consellería na mellora do complexo veterinario desde o ano 2015 está a dar xa os seus froitos. Non en balde, en só tres anos o financiamento captado polos investigadores do Campus de Lugo medrou en máis dun 80%, acadando a cifra récord de máis de 8,2 millóns de euros no 2018. Un 40% dos mesmos foron obtidos en convocatorias internacionais.

Na súa visita a conselleira estivo acompañada polo director xerente da Fundación Rof Codina, Luis Felipe de La Cruz; e polo secretario xeral de Universidades, José Alberto Díez de Castro.

Presentación de BioReDes

A conselleira asistiu tamén esta mañá, xunto co reitor da Universidade de Santiago de Compostela, Antonio López, á presentación da agrupación estratéxica en Xestión e Produción Sostible de Biorrecursos (BioReDeS), enmarcada no Campus Terra, que a maiores de na produción e sanidade animal está centrado na ordenación do territorio, na agricultura, na xestión forestal ou na seguridade alimentaria. Moi vinculada co CEBIOVET e o HVU Rof Codina, a agrupación ten entre as súas áreas de investigación a produción e saúde animal sostible, a produción vexetal e agricultura sostible, a alimentación segura e a xestión forestal sostible.

Na súa intervención a conselleira explicou que a relación directa entre as estruturas de investigación de referencia –como as agrupacións estratéxicas– e o avance científico da sociedade na que se insiren representan a madurez do sistema de investigación universitario galego. Neste sentido destacou que os piares sobre os que se asenta a universidade do futuro son a cooperación, a innovación e a internacionalización, “piares que constitúen unha proposta común para lograr unha universidade de excelencia que, ademais de xerar coñecemento, se converta en axente chave para o progreso, a competitividade e o avance da sociedade”.

Coordinada por Paulino Martínez Portela, BioReDes foi acreditada a finais de 2018 ao abeiro da resolución pola que se conceden axudas para a mellora, creación, recoñecemento e estruturación de agrupacións estratéxicas do Sistema Universitario de Galicia (SUG). A Consellería de Educación concedeulle unha axuda de 405.759 euros.

Con este financiamento, os 16 grupos que a compoñen poderán desenvolver o seu obxectivo de abordar, desde unha perspectiva sistémica e adaptada ás particularidades da contorna galega, os problemas e retos asociados á produción e xestión dos biorrecursos que están a demandar as axendas científicas e sociais sobre o sector primario e o seu entorno social e produtivo. A acreditación de BioReDes amplía as oportunidades de colaboración real do Campus Terra, tanto co sector produtivo de Lugo, como con outros centros de investigación relacionados con estas áreas en toda Galicia.

Información xeralUniversidadeConsellería de Educación, Universidade e Formación Profesional

Carmen Pomar destaca o excelente traballo do CEIP Plurilingüe A Pedra na biblioteca escolar

Lun, 14/01/2019 - 13:48
Summary: O centro conta co selo de Biblioteca Escolar Solidaria e forma parte do proxecto LÍA.2O espazo da biblioteca acaba de ser ampliado na zona dedicada ao audiovisual, ao espazo creativo, á radio e o laboratorio científico Idioma Gallego

A conselleira de Educación, Universidade e Formación Profesional, Carmen Pomar, visitou esta mañá o CEIP Plurilingüe A Pedra (Bueu), do que destacou o seu excelente traballo na biblioteca escolar. Non en balde, este centro acadou xa en 2014 o Premio Nacional ao Desenvolvemento de Competencias de Lectoescritura e Audiovisuais co proxecto "Expresámonos a través de diferentes linguaxes", xestado na biblioteca, entre outros galardóns.

Durante o seu percorrido, a conselleira tivo oportunidade de coñecer as últimas melloras realizadas na biblioteca, coa ampliación da zona destinada ao audiovisual, ao espazo creativo, á radio e ao laboratorio científico; o que fará máis doado desenvolver iniciativas do centro como as xornadas teatrais.

Tal e como explicou Carmen Pomar, este espazo está naturalmente integrado na vida escolar e forma parte de todas as actividades, dado que é concibido como centro de recursos ao servizo da comunidade escolar, para apoiar o proceso de ensino-aprendizaxe. Neste sentido a conselleira salientou o dedicado traballo do equipo da biblioteca e a implicación xeral de docentes, alumnado, equipo directivo e familias no funcionamento da mesma. De feito, o CEIP conta cun punto de lectura para as familias e envía con regularidade Mochilas Viaxeiras aos fogares dos escolares.

O CEIP Plurilingüe A Pedra é, ademais, moi activo nos programas que a Consellería desenvolve en materia de bibliotecas escolares. Así, ademais de formar parte do Plan de Mellora (PLAMBE) desde o curso 2007/08 conta co selo de Biblioteca Escolar Solidaria polo seu traballo na atención á diversidade e na compensación social de desigualdades. Os proxectos documentais integrados, nos que adoitan participar todos os equipos do centro, os itinerarios lectores –formados por lecturas imprescindibles para cada etapa– e os “recreos de conto” son outros dos puntos máis salientables da ampla actividade desenvolvida neste espazo.

LÍA.2

Cómpre salientar que a biblioteca deste centro forma parte do proxecto LÍA.2, impulsado pola Consellería dentro do Plan LÍA de bibliotecas escolares para o período 2016/2020. A través desta iniciativa explóranse as posibilidades de evolución do modelo de bibliotecas escolares cara a un centro creativo das aprendizaxes, un modelo innovador que mira cara ao futuro.

Para ser seleccionados os centros debían contar cunha biblioteca escolar con traxectoria de excelencia contrastada, con espazo suficiente  na biblioteca ou posibilidades de ampliación do existente, con experiencia en traballos por proxectos, e cun equipo de biblioteca e equipo directivo comprometidos a colaborar coa Consellería no desenvolvemento do proxecto. Ademais, deuse prioridade aos centros de zonas rurais.

Compromiso da comunidade escolar

A conselleira de Educación quixo tamén destacar a implicación dos centros educativos de Bueu. Non en balde, todos os centros públicos do concello están integrados no PLAMBE e practicamente todos eles son plurilingües, contan con seccións bilingües ou participan nos contratos-programas.

Ademais, Pomar lembrou que o seu departamento ten investido desde 2009 máis de 2,1 millóns de euros nos colexios e institutos de Bueu, en melloras entre as que destaca a ampliación do IES Johan Carballeira.

A conselleira estivo acompañada na súa visita polo alcalde de Bueu, Félix Juncal, polo delegado da Xunta en Pontevedra, José Manuel Cores Tourís, e polo director xeral de Centros e Recursos Humanos, José Manuel Pinal.

Plan LÍABibliotecas escolaresEnsinanzas de réxime xeralConsellería de Educación, Universidade e Formación ProfesionalDirección Xeral de Centros e Recursos HumanosSubdirección Xeral de CentrosProfesoradoAlumnadoCentros

Convocatoria para a realización de proxectos de innovación educativa en dinamización lingüística para os centros docentes de titularidade da Consellería de Educación, Universidade e Formación Profesional durante o curso académico 2018/2019

Lun, 14/01/2019 - 09:44
Idioma Gallego

A Secretaría Xeral de Política Lingüística e mais a Dirección Xeral de Educación, Formación Profesional e Innovación Educativa convocan a participación en proxectos de innovación educativa en dinamización lingüística para os centros docentes de titularidade pública da Consellería de Educación, Universidade e Formación Profesional durante o curso académico 2018/2019.

Ao abeiro desta convocatoria, seleccionaranse cinco proxectos, que terán a consideración de excelentes; cada un deles recibirá unha dotación económica de 2 000 euros.

O profesorado implicado activamente no desenvolvemento dos 5 proxectos seleccionados recibirá unha certificación de Primeiro Premio de Innovación Educativa, cunha equivalencia de 30 horas de formación permanente do profesorado para a persoa coordinadora e de 20 horas para o profesorado participante.

  • O prazo de presentación das solicitudes rematará o día 15 de febreiro de 2019.​

 

File:  Convocatoria Anexo I Anexo II Anexo III Anexo IV Anexo V Anexo VI Anexo VII Anexo VIIITema: Lingua galegaPlans e actuacións en innovación educativa Ensinanza: Ensinanzas de réxime xeralEnsinanzas de réxime especialEducación das persoas adultasDepartamento: Dirección Xeral de Educación, Formación Profesional e Innovación EducativaColectivo: ProfesoradoCentrosSección: BoletínPortada de boletínInnovación

Relación provisional de persoas seleccionadas e non seleccionadas, a relación de persoas excluídas provisionais e o baremo provisional no procedemento para a elaboración das listas de interinidades e substitucións para impartir docencia na Escola...

Ven, 11/01/2019 - 14:48
Idioma Gallego

Resolución do 11 de xaneiro de 2019, da Dirección Xeral de Centros e Recursos Humanos, pola que se aproba a relación provisional de persoas seleccionadas e non seleccionadas, a relación de persoas excluídas provisionais e o baremo provisional no procedemento para a elaboración das listas de interinidades e substitucións para impartir docencia na Escola Superior de Arte Dramática de Galicia no corpo de profesores de música e artes escénicas, especialidade de expresión corporal (594449).

  •  Prazo de reclamación de tres días hábiles contados a partir do seguinte ao da publicación desta publicación.

 

Anuncio principal: Apertura das listas de interinidades e substitucións para impartir docencia na Escola Superior de Arte Dramática de Galicia no corpo de profesores de música e artes escénicas, especialidade de expresión corporal (594449)Tema: Programas e plansInterinidades e substituciónsEnsinanza: Ensinanzas superiores de arte dramáticaDepartamento: Servizo de Profesorado de Ensinanzas Secundaria, de Formación Profesional e de Réxime EspecialColectivo: ProfesoradoSección: Boletín

Convocatoria para a solicitude de renovación das persoas auxiliares de conversa para o curso 2019/2020. Centros públicos

Ven, 11/01/2019 - 14:01
Idioma Gallego

Información en galego, castelán e inglés relativa ao proceso de renovación no Programa de Auxiliares de Conversa en Galicia. Contén ligazóns á información e aos documentos a descargar. Estas instrucións van dirixidas aos participantes no programa de auxiliares de conversa en activo durante o curso 2018/2019 que desexen renovar no programa durante o curso 2019/2020.

 

File:  Información da convocatoria e instrucións para solicitar a renovación Modelo de informe do centroTema: Programas e plansAuxiliares de conversaColectivo: ProfesoradoSección: BoletínPortada de boletínLinguas estranxeiras

Ampliación do prazo de presentación das solicitudes de participación nos premios a curtas de animación en galego elaboradas no marco do programa Nós tamén creamos! para o curso académico 2018/2019

Ven, 11/01/2019 - 11:59
Idioma GallegoAnuncio principal: Convocados os premios a curtas de animación en galego elaboradas no marco do programa Nós tamén creamos! para o curso académico 2018/2019

A Secretaría Xeral de Política Lingüística da Consellería de Cultura e Turismo e a Dirección Xeral de Educación, Formación Profesional e Innovación Educativa da Consellería de Educación, Universidade e Formación Profesional amplían o prazo para presentar solicitudes para os premios a curtas de animación en galego elaboradas no marco do Programa Nós tamén creamos! para o curso académico 2018/2019, convocados ao abeiro da Resolución da Secretaría Xeral de Política Lingüística da Consellería de Cultura e Turismo e da Dirección Xeral de Educación, Formación Profesional e Innovación Educativa da Consellería de Educación, Universidade e Formación Profesional pola que se aproban as bases e se convocan os premios a curtas de animación en galego elaboradas no marco do Programa Nós tamén creamos! para o curso académico 2018/2019.

  • O novo prazo de presentación de solicitudes rematará o 18 de xaneiro de 2019 (incluído).
Tema: Premios autonómicosLingua galegaEnsinanza: Educación infantilEducación primariaDepartamento: Dirección Xeral de Educación, Formación Profesional e Innovación EducativaColectivo: ProfesoradoAlumnadoCentrosSección: BoletínPortada de boletín

Proxectos de formación para o profesorado de FP para o curso 2018/2019

Xov, 10/01/2019 - 16:19
Idioma Gallego

Publicada a convocatoria de proxectos de formación do profesorado de formación profesional que se van implantar no curso 2018-2019 en centros públicos dependentes da Consellería de Educación, Universidade e Formación Profesional.

 

Tema: Proxectos de formación do profesorado de formación profesionalEnsinanza: Formación Profesional inicialDepartamento: Dirección Xeral de Educación, Formación Profesional e Innovación EducativaSubdirección Xeral de Formación ProfesionalServizo de Xestión da Formación ProfesionalColectivo: ProfesoradoCentrosSección: BoletínPortada de boletín

Galicia aposta por construír un futuro educativo baseado na calidade, na liberdade e na equidade do sistema

Mér, 09/01/2019 - 19:10
Idioma GallegoSummary: Así o manifestou a conselleira na conferencia sectorial celebrada hoxe en Madrid para abordar o anteproxecto de lei orgánica que modifica a LOMCECarmen Pomar rexeitou a volta ao pasado que representa a reforma e reivindica o pacto educativo como única alternativa

A conselleira de Educación, Universidade e Formación Profesional, Carmen Pomar participou hoxe na Conferencia Sectorial de Educación desenvolvida en Madrid, onde apostou por construír un futuro educativo baseado na calidade, na liberdade e na equidade do sistema.

No encontro, centrado na análise do anteproxecto de lei orgánica que modifica a LOMCE, Pomar rexeitou a volta ao pasado que representa esta reforma, e reivindica o pacto educativo como única alternativa. Neste sentido reafirmou a vontade expresada por varias Comunidades Autónomas para establecer un diálogo que leve a unha reforma “que non quede na superficie, que signifique un paso cara adiante”, e que dea resposta ás demandas dos diferentes axentes educativos tras anos de reformas educativas. "Galicia será unha colaboradora leal para todo o que implique mellorar a educación, pero non conten con nós para avalar unha lei que implica volver ao pasado”, sentenciou a titular do departamento educativo da Xunta de Galicia.

Na súa intervención, a conselleira referiuse á falta de lealdade institucional demostrada polo goberno do Estado na tramitación do anteproxecto de lei, feito de costas a algunhas autonomías e á comunidade educativa.

Ademais lamentou o carácter puramente político dos cambios, que non afrontan as verdadeiras necesidades da reforma do sistema educativo, en referencia á carreira profesional docente ou ao impulso da FP Dual, por exemplo. 

Fronte ao documento proposto polo Ministerio, Pomar defendeu o reforzo das liberdades educativas como garantía de calidade, así como unha nova ordenación académica que responda ao desenvolvemento de contidos e competencias conforme ao que precisa o alumnado do século XXI.

Para a conselleira, o modelo educativo debe basearse na flexibilidade, a transparencia e na rendición de contas, con avaliación que sirvan como instrumento de mellora e garantía de igualdade de oportunidades. Avogou polo impulso á FP cunha revisión do mapa de cualificacións e fixo fincapé na necesidade de converter o profesorado no piar fundamental do modelo. A este respecto lamentou que o anteproxecto presentado polo Ministerio non aborde cuestións tan relevantes como a formación e selección dos docentes, mentres que desde Galicia se aposta firmemente por unha reforma de calado neste eido.

A conselleira reivindicou tamén o modelo lingüístico de Galicia, que demostrou que a convivencia harmónica entre linguas é posible, necesaria e positiva para a aprendizaxe. Nesta liña demandou que todas as Comunidades Autónomas plurilingües garantan competencias plenas en todas as linguas oficiais.

Información xeralConsellería de Educación, Universidade e Formación Profesional

Resolución definitiva das axudas para centros privados concertados no ámbito das bibliotecas escolares e o fomento da lectura para o curso 2018/2019

Mér, 09/01/2019 - 09:09
Idioma Gallego

Xúntase a Orde do 26 de decembro de 2018 pola que se resolve a convocatoria de axudas para centros privados concertados da Comunidade Autónoma de Galicia no ámbito das bibliotecas escolares e o fomento da lectura para o curso 2018/19.

 

Anuncio principal: Convocadas as axudas para centros privados concertados da Comunidade Autónoma de Galicia no ámbito das bibliotecas escolares e o fomento da lectura para o curso 2018/2019Tema: BolsasBibliotecas escolaresCentros concertadosEnsinanza: Ensinanzas de réxime xeralDepartamento: Dirección Xeral de Centros e Recursos HumanosSubdirección Xeral de CentrosColectivo: Centros

Apertura das listas de interinidades e substitucións para impartir docencia na Escola Superior de Arte Dramática de Galicia no corpo de profesores de música e artes escénicas, especialidade de dramaturxia (594446)

Mar, 08/01/2019 - 13:54
Idioma Gallego

Resolución do 8 de xaneiro de 2019, da Dirección Xeral de Centros e Recursos Humanos, pola que se convoca un procedemento para a elaboración das listas de interinidades e substitucións para impartir docencia na Escola Superior de Arte Dramática de Galicia no corpo de profesores de música e artes escénicas, especialidade de dramaturxia (594446).

  • O prazo para formular solicitudes será de cinco días hábiles contados a partir do seguinte ao da publicación desta resolución no portal de Internet da Consellería de Educación, Universidade e Formación Profesional.

 

File:  Resolución do 8 de xaneiro de 2019 Modelo de solicitude Modelo de alegación de méritosTema: Programas e plansInterinidades e substituciónsEnsinanza: Ensinanzas superiores de arte dramáticaDepartamento: Servizo de Profesorado de Ensinanzas Secundaria, de Formación Profesional e de Réxime EspecialColectivo: ProfesoradoSección: BoletínPortada de boletín

Educación concede máis de 14 millóns de euros en axudas a 69 grupos de investigación de referencia competitiva e de potencial crecemento nas universidades do SUG

Mar, 08/01/2019 - 12:30
Summary: Deste xeito 179 grupos de investigación do SUG contarán con financiamento estrutural estable dentro do programa de consolidación da investigación nas universidades Idioma Gallego

A Consellería de Educación, Universidade e Formación Profesional publica hoxe no Diario Oficial de Galicia a resolución das axudas a grupos de investigación do Sistema Universitario de Galicia (SUG), o que supón un importe de máis de 14 millóns de euros. Do total das 69 axudas concedidas, 44 son da modalidade de Grupos de Referencia Competitiva e  25 da modalidade de Grupos de Potencial Crecemento.

As 69 axudas outorgadas súmanse ás dos 110 grupos que a teñen vixente, para acadar un total de 179 grupos con financiamento estrutural estable. Deste xeito o departamento educativo da Xunta de Galicia reafirma o seu compromiso coa investigación universitaria de excelencia axudando á consolidación, estruturación e especialización das unidades de investigación máis competitivas do SUG. Non en balde, a convocatoria do ano 2019, que conta cun orzamento de máis de 10,4 millóns de euros tramitouse por anticipado e está pendente de publicarse no DOG.

Grupos de Referencia Competitiva

As axudas para Grupos de Referencia Competitiva van dirixidas á  consolidación de grupos de investigación do SUG que pola súa produción científica e a súa actividade de I+D constitúan unha referencia no Sistema Galego de Innovación. Ao remate da segunda anualidade serán sometidas a unha avaliación que determinará a súa continuidade. Este apoio supón o pago anual dunha contía fixa máis outra variable asociada á evolución na xeración de recursos por parte do grupo como un indicador xenérico da súa competencia e capacidade de consolidación.

Así, a axuda constará de dous módulos. O primeiro deles, estrutural anual, estará composto dun fixo de 30.000 € na anualidade de 2019 e de 35.000 € nas anualidades de 2020 e 2021. A isto engádeselle un variable máximo de 30.000 € na anualidade de 2019 e de 35.000 € nas anualidades de 2020 e 2021, tendo en conta os ingresos medios do grupo. Trátase así  de axustar o orzamento ás posibilidades reais de execución anuais en función do número de solicitudes avaliadas positivamente e dos recursos dispoñibles. O segundo, variable, acumulable ao anterior, en función dos ingresos anuais medios do grupo nos tres exercicios anteriores á concesión, será de entre 20.000 € e 70.000 € ao ano. Isto supón que se destinarán 11.840.000 euros para a financiación de grupos de referencia competitiva.

Grupos con Potencial de Crecemento

No caso dos Grupos con Potencial de Crecemento (GPC), a convocatoria diríxese á consolidación de grupos de investigación do SUG que pola súa produción científica e a súa actividade de I+D amosan potencial de crecemento ata converterse en grupos de referencia do SUG. As axudas serán de aplicación por un período de dous anos, mediante o pago anual dunha contía fixa de 45.000 euros, o que supón unha achega de 2.250.000 euros.

BolsasUniversidadeConsellería de Educación, Universidade e Formación ProfesionalSecretaría Xeral de UniversidadesSubdirección Xeral de Promoción Científica e Tecnolóxica UniversitariaAlumnado

Carmen Pomar visita os centros de investigación da UVigo, nos que a Xunta inviste 12,5 M€

Mar, 08/01/2019 - 11:11
Summary: A conselleira aposta por un modelo científico galego competitivo no eido internacional, para o cal hai que potenciar a excelencia, a especialización e o aproveitamento de sinerxías entre grupos Idioma Gallego

A conselleira de Educación, Universidade e Formación Profesional, Carmen Pomar, desprazouse esta mañá ata Vigo para coñecer de primeira man o traballo que están a desenvolver os centros de investigación dependentes da Universidade de Vigo, e que o departamento educativo da Xunta financia con 12,5 millóns de euros.

A conselleira, acompañada do reitor da UVigo, Manuel Reigosa, e do delegado da Xunta en Vigo, Ignacio López-Chaves, visitou o Centro de Investigacións Biomédicas (CINBIO), a Estación de Ciencias Mariñas de Toralla (ECIMAT) e a Agrupación Estratéxica Consolidada AtlanTIC, onde actualmente están operativos 38 grupos de investigación que aglutinan a preto de 600 científicos.

Carmen Pomar destacou o alto nivel de estudo e investigación que se leva a cabo nestes centros punteiros no seu eido de acción, como proban os máis de 16 millóns de euros de media anual que captan para proxectos de investigación, as solicitudes de patentes que xeran, a creación de spin-off, e a publicación de artigos científicos en revistas internacionais.

A conselleira de Educación recalcou a aposta por establecer un modelo de centros de Investigación do Sistema Universitario de Galicia que se caracterice por unha estratexia definida, pola excelencia investigadora, a especialización, a internacionalización e o aproveitamento de sinerxías entre grupos; co obxectivo último de consolidar estruturas competitivas na escena científica internacional.

De feito Galicia é a única Comunidade Autónoma do Estado que conta cunha liña de financiamento estable a grupos de investigación co obxectivo de despuntar en ámbitos de referencia investigadora.

Así mesmo, no compromiso da busca da excelencia, recentemente vén de constituírse a Comisión Asesora do Programa de Centros de Investigación Singulares e Agrupacións Estratéxicas do Sistema Universitario de Galicia (SUG), impulsado pola Xunta de Galicia. Este órgano está formado por científicos de recoñecido prestixio a nivel nacional e internacional, que se encargarán de asesorar sobre metodoloxías e prácticas de avaliación científica e técnica, así como de aconsellar sobre o seguimento, resultados e impacto das actuacións do mencionado Programa de apoio á investigación, co fin de incorporar estándares internacionais.

Centro de Investigacións Biomédicas (CINBIO)

Dirixido por África González, o CINBIO é un centro multidisciplinar creado en 2010, dedicado á investigación biomédica e que aglutina a 214 científicos. Actualmente ten operativos dez grupos de investigación centrados en catro liñas que son as Bases moleculares das patoloxías, novas técnicas de diagnóstico, novas ferramentas terapéuticas e de prevención, e Bioestatística e modelización.

É un dos dous Centros Singulares de Investigación da UVigo (o outro é o ECIMAT), e dos cinco de toda Galicia, que representan as estruturas máis excelentes do sistema científico galego.

Estación de Ciencias Mariñas de Toralla (ECIMAT)

Creado en 2016, a ECIMAT presta infraestrutura científica de referencia tanto a entidades públicas como privadas. Nel traballan 15 grupos e 170 investigadores, organizados en catro unidades, que son Recursos biolóxicos e cultivos mariños, Medio Mariño, Calidade ambiental e Oceanografía.

AtlanTIC, Research Center for Information and Communication Technologies

AtlanTIC é unha Agrupación Estratéxica Consolidada centrada na investigación científica en áreas relacionadas coas TIC como son as comunicacións dixitais, as redes sen fíos, as comunicacións por satélite, a teledetección, ou a visión por ordenador e procesado de imaxes entre outras.

Neste centro traballa un equipo de 214 profesionais organizados en 13 grupos de investigación.

MTI

No seu percorrido a conselleira achegouse tamén ao Centro de Investigación Tecnolóxico Industrial, no Edificio MTI. Trátase dun centro de apoio á investigación da Universidade de Vigo cuxo equipamento e adecuación foi financiado con 600.000 euros pola Consellería a través dun convenio coa universidade viguesa.

As modernas instalacións do MTI, con talleres dotados coa última tecnoloxía, permiten incrementar a operatividade e a interactividade dos grupos, así como propiciar a creación de novas oportunidades de colaboración entre os diferentes grupos de investigación, o que fai posible levar a cabo proxectos multidisciplinares

Información xeralUniversidadeConsellería de Educación, Universidade e Formación ProfesionalSecretaría Xeral de UniversidadesProfesoradoAlumnado

Curso de actualización para o desenvolvemento da función directiva

Mar, 08/01/2019 - 08:50
Idioma Gallego

Resolución do 20 de decembro de 2018, da Dirección Xeral de Educación, Formación Profesional e Innovación Educativa, pola que se convoca o Curso de actualización para o desenvolvemento da función directiva.

  • O prazo de presentación de solicitudes será de dez días hábiles a partir do día seguinte ao da publicación deste anuncio no Diario Oficial de Galicia.

A Lei orgánica 8/2013, de 9 de decembro, para a mellora da calidade educativa, modificou o artigo 134.1 da Lei orgánica 2/2006, do 3 de maio, de educación, incluíndo entre os requisitos para poder participar no concurso de méritos para a selección de directores e directoras de centros públicos "estar en posesión da certificación acreditativa de ter superado o curso de formación sobre o desenvolvemento da función directiva".

Este curso de formación proporcionará as competencias xenéricas e especificas para o desenvolvemento da función directiva, e as súas características quedaron recollidas e reguladas polo Real Decreto 894/2014, do 17 de outubro, do Ministerio de Educación, Cultura e Deporte. Nel se recolle, na disposición transitoria única, respecto da participación nos procedementos selectivos de dirección de centros públicos, a suficiencia do curso de actualización de competencias directivas para quen estea en posesión de habilitacións ou acreditacións de dirección de centros públicos expedidas con anterioridade á data de entrada en vigor da Lei Orgánica 8/2013, e para quen se atopase ocupando postos de director ou directora en centros docentes públicos á data de entrada en vigor da Lei Orgánica 8/2013 ou durante os cinco anos seguintes.

A inscrición e xestión deste curso de actualización realizarase a través da aplicación FProfe: https://www.edu.xunta.es/fprofe

Ofértanse as seguintes prazas:

Provincia

Prazas

A Coruña

75

Lugo

50

Ourense

50

Pontevedra

75

Total

250

O curso terá unha duración de 75 horas que se desenvolverán en rede, a través de Platega (https://www.edu.xunta.es/platega2), contando tamén con sesións presenciais que se realizarán de xeito centralizado. A súa temporalización está prevista para os meses de xaneiro a marzo de 2019, e constará de sete módulos temáticos, que será preciso superar para obter a certificación. Quen, resultando admitido, estea en posesión dun máster ou título de posgrao de carácter oficial sobre a dirección e xestión de centros docentes quedará exento da realización e avaliación de todos os módulos troncais, agás o referido ao Proxecto de dirección.

 

File:  Resolución do 20 de decembro de 2018 (DOG) Resolución do 20 de decembro de 2018Servizo relacionado: FPROFETema: FormaciónDirectores/asEnsinanza: Ensinanzas de réxime xeralEnsinanzas de réxime especialEducación das persoas adultasDepartamento: Servizo de Formación do ProfesoradoColectivo: ProfesoradoCentrosSección: BoletínPortada de boletín

Concesión das axudas para a consolidación e estruturación de unidades de investigación competitivas e outras accións de fomento nas universidades do SUG, nos organismos públicos de investigación de Galicia e outras entidades do Sistema de I+D+i para 2018

Mar, 08/01/2019 - 08:42
Idioma Gallego

Xúntase a Resolución do 14 de decembro de 2018, conxunta da Consellería de Educación, Universidade e Formación Profesional e a Consellería de Economía, Emprego e Industria, pola que se conceden as axudas correspondentes á modalidade A: grupos de referencia competitiva e á modalidade B: grupos con potencial de crecemento no ámbito do Sistema universitario de Galicia, da Orde do 23 de maio de 2018 pola que se establecen as bases reguladoras para a concesión, en réxime de concorrencia competitiva, das axudas para a consolidación e estruturación de unidades de investigación competitivas e outras accións de fomento nas universidades do Sistema universitario de Galicia, nos organismos públicos de investigación de Galicia e noutras entidades do Sistema galego de I+D+i e se procede á súa convocatoria para o exercicio 2018.

 

Anuncio principal: Axudas para a consolidación e estruturación de unidades de investigación competitivas e outras accións de fomento nas universidades do SUG, nos organismos públicos de investigación de Galicia e noutras entidades do Sistema galego de I+D+i e para o 2018Tema: BolsasEnsinanza: UniversidadeDepartamento: Secretaría Xeral de UniversidadesSubdirección Xeral de Promoción Científica e Tecnolóxica UniversitariaServizo de Planificación e Estruturación de InvestigaciónColectivo: Alumnado

A Consellería de Educación facilita que o alumnado de francés certifique o seu nivel neste idioma nas probas DELF escolar

Dom, 06/01/2019 - 12:00
Summary: En pasadas convocatorias os estudantes galegos conseguiron unha taxa de aprobados superior á da media nacional, do 100% no nivel A2, do 98,87% no B1 e do 97,20% no nivel B2 Idioma Gallego

A Consellería de Educación, Universidade e Formación Profesional facilitará que as alumnas e alumnos de centros públicos de ensino secundario de Galicia que estuden a materia de Francés como primeira ou segunda lingua estranxeira, estean matriculados nunha Sección Bilingüe en Francés ou cursen o programa de Bacharelato de dobre titulación BachiBac se presenten ás probas DELF Escolar (Diplôme d’Études en Langue Française), no marco do Convenio de colaboración asinado entre esta Consellería e a Embaixada de Francia. Cómpre salientar que se trata dun recoñecemento oficial de lingua francesa expedido polo Ministerio de Educación Nacional de Francia e recoñecido internacionalmente por 174 países.

O prazo de matricula estará aberto do 1 ao 28 de febreiro de 2019 e realizarase na Alianza Francesa correspondente. As probas escritas desenvolveranse os días 29 de abril (niveis A2 e B2) e 30 de abril (nivel B1). Os exames orais terán lugar entre o 24 de abril e o 17 de maio.

A Consellería e as Alianzas Francesas da Coruña, Santiago e Vigo convocarán os centros e alumnado interesados no lugar de realización das probas que lles corresponda nas datas previstas. Os centros educativos onde se realizarán as probas do DELF Escolar son o IES Plurilingüe Eusebio da Guarda (A Coruña), IES Arcebispo Xelmírez I (Santiago de Compostela), IES Eduardo Nosa Señora dos Ollos Grandes (Lugo), IES Blanco Amor (Ourense), IES Sánchez Cantón (Pontevedra) e IES de Teis (Vigo).

Cada un destes centros está vinculado a un centro oficial acreditado polo CIEP -Centre International d’Études Pédagogiques- das Alianzas Francesas de Galicia (A Coruña, Santiago de Compostela e Vigo) que conta con profesorado con formación pedagóxica específica e habilitado oficialmente como examinador e corrector do DELF.

As probas do diploma DELF Escolar están adaptadas para o alumnado adolescente e as taxas de exame son reducidas para o alumnado ao abeiro do devandito convenio.

Alto nivel de aprobados

Desde a implantación destas probas en Galicia, no curso 2016/17, o número de alumnas e alumnos inscritos aumenta cada ano. Na convocatoria de 2018 concorreron 730 persoas candidatas, o que representa un 18% máis respecto da convocatoria de 2017 e un aumento de máis do 200% de alumnado matriculado tras a sinatura do Convenio entre a Consellería e a Embaixada de Francia. Deste xeito Galicia sitúase como a cuarta Comunidade Autónoma en número de alumnado participante.

Ademais do alto número de alumnos e alumnas que poden gozar das vantaxes do Convenio, é importante subliñar o excelente resultado do alumnado galego nas probas, que acada o 100% de aprobados no nivel A2, o 98,87% no B1 e o 97,20% no nivel B2 (93% na media nacional), outorgando a Galicia unha taxa de aprobados superior á da media nacional. No que respecta aos niveis, o máis demandado é o nivel B1, que supón o 73% da matrícula total e aglutina un 44% do total das inscricións

Curso de habilitación

A Consellería de Educación, Universidade e Formación Profesional acaba ademais de facer pública unha nova convocatoria de dous cursos de formación para profesorado PES de Francés. Ambos os dous cursos serán impartidos por formadores acreditados polo CIEP -Ministerio de Educación de Francia a través do Servizo de Cooperación e de Acción Cultural da Embaixada de Francia en España- e contarán cunha certificación de 8 horas de formación permanente do profesorado respectivamente xa que serán homologados pola Consellería.

Lingua estranxeiraEnsinanzas de réxime xeralConsellería de Educación, Universidade e Formación ProfesionalAlumnadoCentros

Resolución definitiva da convocatoria de Clubs de Lectura para o curso 2018/2019

Ven, 04/01/2019 - 13:03
Idioma Gallego

A Dirección Xeral de Centros e Recursos Humanos publica con data 31 de decembro a Resolución da convocatoria de Clubs de lectura, de 4 de setembro, destinada a centros públicos de ensino secundario para o curso 2018/2019.

Xúntase arquivo coa relación definitiva de solicitudes admitidas e excluídas, xunto coas contías asignadas.

Anuncio principal: Convocatoria de Clubs de Lectura para o curso 2018/2019Tema: Plan LÍABibliotecas escolaresEnsinanza: Ensinanzas de réxime xeralEnsinanzas de réxime especialEducación das persoas adultasDepartamento: Dirección Xeral de Centros e Recursos HumanosSubdirección Xeral de CentrosServizo de Xestión de Programas EducativosColectivo: ProfesoradoCentrosSección: BoletínPortada de boletín

Dezasete centros públicos acadan os premios do V Concurso de traballos por proxectos na biblioteca escolar

Ven, 04/01/2019 - 11:21
Summary: A iniciativa enmárcase no Plan LÍA, que ten entre os seus obxectivos propiciar as metodoloxías activas e fomentar o traballo en equipo Idioma Gallego

Un total de 17 centros educativos públicos acadaron os premios do V Concurso de Traballos por Proxectos baixo a coordinación da biblioteca escolar, convocados pola Consellería de Educación, Universidade e Formación Profesional para estimular o deseño e desenvolvemento de iniciativas interdisciplinarias ou de investigación nestes espazos.

O concurso conta con tres modalidades. A primeira delas vai dirixida a proxectos de carácter interdisciplinario ou Proxectos Documentais Integrados nos que participe un mínimo do 40% dos grupos existentes no centro (e un 40% dos departamentos no caso dos centros de Secundaria). Nesta modalidade foron galardoados o CEIP Nicolás del Río (Cedeira), o CEIP de Cervo (Cervo), o IES Plurilingüe Aquis Celenis (Caldas de Reis), o CEIP Plurilingüe Meaño-As Covas (Meaño), o CEIP de Leirado (Salvaterra de Miño), o CEIP Alfonso D. Rodríguez Castelao (Vigo), o CEIP de Barouta (Ames), o IES Francisco Aguiar (Betanzos), o CEIP Valle- Inclán (O Grove) e o IES Pedra da Auga (Ponteareas).

A segunda modalidade, de proxectos de investigación dirixidos por profesorado dun grupo, nivel, ciclo ou departamento, está dividida en tres sub-modalidades. Na de traballos de grupo/nivel resultaron premiados o IES Punta Candieira (Cedeira), o IES Celanova Celso Emilio Ferreiro (Celanova) e o CEIP Plurilingüe Condesa de Fenosa (O Barco de Valdeorras). No caso dos proxectos de investigación de ciclo/departamento os galardoados foron o CEIP da Torre-Cela (Bueu) e o CEIP Frián-Teis (Vigo). Na terceira sub-modalidade, de proxectos realizados ao abeiro da materia Investigación e Tratamento da Información (ou noutras similares), foi recoñecido o traballo do CPI San Vicente (A Baña) e do IES Xoán Montes (Lugo).

Finalmente na terceira modalidade, de proxectos  de investigación intercentros –ata un máximo de tres centros– os premiados foron o CEIP Nicolás del Río e o IES Punta Candieira, ambos de Cedeira, por un proxecto en común.

Esta convocatoria enmárcase no Plan LÍA (Lectura, Información e Aprendizaxe) de Bibliotecas Escolares 2016/20, que ten entre os seus obxectivos propiciar a aprendizaxe por proxectos e outras metodoloxías activas, empregando os recursos e servizos da biblioteca. Deste xeito favorécese o traballo en equipo, intercentros, así como o desenvolvemento das competencias clave e, en concreto, a mellora da competencia informacional e mediática (ALFIN/AMI).

Premios autonómicosPlan LÍABibliotecas escolaresEnsinanzas de réxime xeralConsellería de Educación, Universidade e Formación ProfesionalSubdirección Xeral de CentrosProfesoradoCentros

Oito centros escolares participarán nun intercambio de boas prácticas educativas con centros de fóra de Galicia

Xov, 03/01/2019 - 11:11
Summary: No marco do programa de innovación educativa “Observa_Acción”, a Consellería de Educación acaba de seleccionar os participantes nesta iniciativa que inclúe estadías no estranxeiro, en Castela e León, Asturias e A Rioxa Idioma Gallego

A Consellería de Educación, Universidade e Formación Profesional acaba de seleccionar os oito centros escolares galegos que participarán nun intercambio de boas prácticas educativas con centros de fóra a través do programa de innovación educativa Observa_Acción: Innovación docente dende a observación e o intercambio entre iguais (pode consultarse a resolución no enderezo  http://www.edu.xunta.gal/portal/node/26694 ).

Na provincia da Coruña, os centros participantes son o IES Arcebispo Xelmírez II (Santiago de Compostela) na modalidade A; e os CPI O Cruce (Cerceda) e CEIP Plurilingüe do Camiño Inglés (Oroso) na modalidade C.

Na provincia de Lugo resultaron seleccionados o CEIP Santa Rita (Viveiro) na modalidade A; e o CEIP de Cervo na modalidade C.

Pola súa parte na provincia de Pontevedra inclúense na iniciativa o IES de Meaño e o CEIP Plurilingüe da Espiñeira-Aldán (Cangas), ambos na modalidade B; e o IES Frei Martín Sarmiento (Pontevedra) na modalidade C.

De cada un dos centros seleccionados participarán neste programa de innovación cinco persoas do claustro, incluído un membro do equipo directivo.

A iniciativa -que involucra 40 docentes- ten como finalidade fomentar o desenvolvemento profesional nas Competencias Profesionais Docentes para a cooperación e colaboración, construción conxunta de coñecemento e o liderado e xestión de centros a través do intercambio de boas prácticas e a observación entre iguais.

A modalidade A, vai dirixida aos centros que xa participaron en Observa_Acción  no curso 2017/18, e consiste nunha visita de observación a centros de referencia no espazo internacional europeo; mentres que a modalidade B se basea o intercambio de observación interautonómico cun centro de cada unha das comunidades participantes, nomeadamente Asturias, Castela e León e A Rioxa. No caso da modalidade C, o intercambio producirase só cun centro de Castela e León.

A Consellería de Educación recoñecerá a participación dos docentes nesta iniciativa como actividade de innovación educativa cunha equivalencia de 30 horas de formación. Ademais, o Centro Autonómico de Formación e Innovación (CAFI) coordinará o programa e fará o seguimento do seu desenvolvemento ao longo de todo o proceso.

Fases

Observa_Acción desenvolverase ao longo do presente curso a través de varias fases. A primeira delas será de formación inicial para todos os participantes no programa, a través do CAFI; mentres que a segunda pasará pola toma de contacto entre centros irmandados previa á observación. Para iso en cada centro estableceranse dúas modalidades de observación paralelas que serán desenvolvidas por dous perfís diferentes.

Por unha banda, unha persoa do equipo directivo cooperará con persoas dos equipos directivos dos centros irmandados en observación relativa a competencias para o liderado, xestión de recursos propios e alleos e estratexias comunicativas e colaborativas. Por outra, o grupo de persoas docentes cooperará co profesorado dos centros irmandados en observación relativa ás Competencias Profesionais Docentes nas que fose detectada unha necesidade específica ou compartindo boas prácticas de innovación educativa. Neste caso prestarase especial atención ás que estean a desenvolver en materia de novas propostas didácticas, metodoloxías activas e colaborativas, transformación na organización de centro, convivencia, inclusión,  aprendizaxe integrado de linguas, competencia dixital, STEM ou avaliación.

Tras esta fase procederase ao intercambio propiamente dito, ben cun desprazamento ata as sedes dos centros anfitrións dentro do ámbito xeográfico europeo (modalidade A), ben cunha visita de dúas xornadas lectivas completas (modalidades B e C) a centros educativos dalgunha das outras comunidades participantes.

Por último realizarase unha coavaliación e avaliación final que inclúa unha reflexión para a innovación e a mellora da propia práctica docente a nivel individual e de centro.

Novas vías para a innovación

Este programa procura experimentar novas vías de formación do profesorado e favorecer a innovación educativa entre os docentes de centros educativos de Galicia, así como con outros centros doutras Comunidades Autónomas e doutros países socios en proxectos internacionais.

Non en balde, os intercambios inter-centros e inter-pares facilitan que os docentes  observen de forma directa metodoloxías, distintos enfoques didácticos nos procesos de ensino-aprendizaxe, outras formas de relación e comunicación, ou diferentes vías de xestión dos recursos propios e alleos, fomentando a adaptación e a aplicación do aprendido na súa praxe diaria.

Ademais, o proceso que leva consigo o programa contribúe a fomentar o traballo en equipo dentro do propio centro, entre aqueles que teñen intereses compartidos e mesmo favorece a internacionalización, abrindo as súas portas a proxectos transfronteirizos, tanto no Estado español coma fóra del.

OBSERVA_ACCIÓNEducación infantilEducación primariaEducación secundaria obrigatoriaConsellería de Educación, Universidade e Formación ProfesionalSubdirección Xeral de Ordenación e Innovación Educativa e Formación do ProfesoradoServizo de Formación do ProfesoradoProfesoradoCentros