COLEXIOS POLA PAZ

O CEP Pilar Maestu Sierra de A Pobra xunto co CEIP Cespón realizaron unha sinxela PREZI sobre Alfred Nobel, Nobel da Paz e Nelson Mandela. Está pensada para o alumnado de primaria.

ALUMNADO DO CEIP CESPÓN ACADA CINCO PREMIOS

Adrián Hermo, Marcos Lorenzo de terceiro de primaria e Antía Sánchez, Sergio Rial e Javier Torrado de 6º de primaria obtiveron premios no VI Certame Literario Ramón Martínez López,  convocado pola Concellería de Cultura e a Biblioteca Municipal. O acto de entrega tivo lugar o venres, 18 de xaneiro na Biblioteca Municipal . NORABOA AOS PREMIADOS/A e a todos e todas os/as que participástedes. Animarvos a seguir escribindo, a deixar voar a imaxinación...Aquí vos deixamos algúns momentos da entrega: lectura dos relatos, foto de grupo e fotos do noso alumnado con Mª José concelleira de educación do Concello de Boiro.

 

 

PAPÁ NOËL VISITA O CENTRO

E como vén sendo costume ao longo dos anos por estas datas, Papá Noel achegouse ás aulas para visitar ao alumnado e profesorado ao tempo que repartiu caramelos.

 

BOS DÍAS, PRINCESA

Para celebrar de xeito conxunto o premio acadado polo vídeo "Bos días,  princesa" , o venres 20 de decembro tivo lugar unha chocolatada con churros e con posterioridade realizouse a proxección do vídeo de xeito simultáneo en varias aulas e na biblioteca do centro. Ambas actividades estiveron abertas  ás familias. Visitounos tamén a TVG que realizou unha conexión en directo para o programa A Revista. Entrevistaron a Manuel Villar, artífice do proxecto e a Carla e Anxo, protagonistas principais desta tenra historia.

O NADAL A TRAVÉS DO GUSTO!

A profesora Emilia, unha vez máis foi a encargada de coordinar e de elaborar galletas e polvoróns para festexar a chegada do Nadal. Grazas ao forno donado pola ANPA e as mans do noso alumnado, tan maxistralmente dirixidas pola profe de inglés, elaboraron unhas exquisitas sobremesas. Foron pasando as distintas titorías, desde os maiores ata os máis peques do centro. Esa semana no colexio o recendo coábase por corredores, aulas...

 

ADEUS A NELSON MANDELA

A biblioteca do centro reparte entre as distintas titorías unha pequena reseña do político, pacifista...Nelson Mandela con motivo do seu pasamento , o pasado 5 de decembro. O alumnado de 6º decide afondar no tema e... prensa en man ponse ao labor. Infórmanse nos distintos xornais e elaboran un gran mural con texto e imaxes que colocan na entrada do centro.

 

O ALUMNADO DE 6º CELEBRA OS ANIVERSARIOS

Como xa ven sendo habitual o alumando de 6º celebra os aniversarios de xeito conxunto. Grazas ás familias que colaboran para que o alumnado realice esta celebración de xeito san, tomando alimentos cociñados nas casas, fuxindo así das típicas lambonadas. PARABÉNS A TODAS E TODOS!

 

O ALUMNADO DO 2º CICLO VISITA CARTOGAL

Nenas e nenos de 3º e 4º xunto coas titoras visitan a fábrica de Cartogal no polígono industrial "A Tomada" de A Pobra do Caramiñal. Resultou moi interesante coñecer unha serie de procesos de elaboración de papel, cartón e caixas. Vimos o funcionamento de varias máquinas que expresamente as apagaron e volveron a acender para que visualizásemos todo o proceso. Queremos agradecer ao persoal encargado e aos traballadores polas medidas de seguridade que adoptaron e as explicacións ao alcance do noso alumnado.

 

ESTREAMOS BLOG EN PRIMEIRO

O alumnado de 1º de primaria estrea blog. O obxectivo principal deste blog de aula é servir de canle de comunicación entre a familia e a escola e dar a coñecer parte do traballo que realizamos. ESPERAMOS QUE VOS GUSTE!

http://www.mestratamara.blogspot.com.es/

Distribuir contido