Iniciar sesión: Acceso

Actividades complementarias e extraescolares

CEA DE FIN DE CURSO.

O pasado venres celebramos unha cea no comedor do CEIP da Pobra do Brollón. Tiña como finalidade recaudar fondos para a excursión de 5º e 6º de primaria programada para o 17 de xuño ao 21 a Cantabria.

Esta cea está organizaca polo  Centro e as familias dos nenos de quinto e sexto. Acaba sendo unha convivencia entre as famlias, ex alumn@s, ex profes, e xente  vinculada dalgún xeito ao centro polo que se convirte unha xornada moi entrañable de reencontros.

A excursión ábrelle ao noso alumnado a posibilidade de desfrutar duns días de  vivencias e experiencias moi enriquecedoras tanto a nivel cultural como de relacións entre o grupo.

Participarán na excursión a totalidade do alumnado de 5º e 6º, 10 alumn@s acompañados pola titora Paula Lapido e a Directora Dori Fernández.

Sairemos de Pobra o luns 17 de xuño  sobre as 8:30 da mañá para aproveitar a xornada. Comeremos en León donde visitaremos a catedral.  Chegaremos a Cantabria  sobre as 16:30 para visitar un parque multiaventura.

Serán uns días intensos nos que pretendemos descubrir, ver, empaparnos de información  e divertirnos. Visitaremos  Altamira, Santillana do Mar,  Santander, o Palacio da Magdalena e o museo de Guggenheim en Bilbao e xa de volta o museo Jurásico en Asturias.

Temos que agradecer a todos os asistentes a súa participación   que convertiron esta xornada nunha experiencia entrañable, ao profesorado que se implicou tamén colaborando na organización, ás familias de quinto e sexto que traballaron moi eficazmente para que todo estivese perfectamente organizado, e como non a todos os proveedores do centro que colaboraron aportando alimentos  ou con agasallos que se sortearon durante a cena cos números de entradas.

Unha xornada estupenda, de relacións humanas que indudablemene crean lazos afectivos na comunidade educativa, e de camiño, a recaudación de fondos para que coa colaboración de todos esta excursión sexa aequible a todas as familias.

Podedes disfrutar das imaxes da cea premendo aquí. 

 

CONVIVENCIA CON SAN CLODIO.

O xoves 11 de marzo realizamos a convivencia con San clodio como cada curso. Este ano tocávanos a nós a visita a San Clodio.

Saímos do colexio ás 9:45 con ganas de pasálo ben e facer moitos amigos. Chegamos ao colexio de San Clodio e recibíronnos cunha pancarta de benvida e nos anunciaban que a visita ía estar relacionada co xeoparque de Ribas de Sil. Hai unha proposta dos tres concellos: Ribas de Sil, Caurel e Quiroga que comparten territorio denominado xeoparque para ser candidato á declaración de Patrimonio munidal da UNESCO.

Despois de saudarnos tomamos todos xuntos a merenda da mañá, un zume, plátano e chocolate e ás 11:00 dispuxémonos para visitar os museos. Infantil, 1º e 2º de ambos centros visitamos o museo etnográfico de Quiroga. Coñecemos moito do modo de vida dos nosos avós e avoas, e tamén dos aperos que utilizaban para traballar. O mel e a roupa que usaban, os aperos para cuidar as castañas e secalas, vimos un tear e o proceso de  traballo dende a lá ou o liño,. Tamén vimos a lareira e sorprendeunos a mesa que recibía o nome de escano.

Outra dependencia que nos chamou moito a atención foi a da escola: os materiais que usaban, as mesas, a pluma….como cambiou todo grazas ao progreso!.

Saimos deste museo e dirixímonos ao museo arqueolócio que visitaran o alumnado de 3º,4º,5º e 6º. Aquí puidemos ver a historia da formación do nosos planeta, como o home foi unha das últimas esepcies en aparecer….e as libélulas son uns dos animáis máis antiguos do planeta….moito máis que os dinosaurios.

Ás 12:30 saímos deste museo e dirixímonos ao parque da área fluvial de San clodio…facía unha mañá expléndida, así que aproveitamos para xogar todos suntos e disfrutar, do parque e dos amigos.

Disfrutade das imaxes premendo aquí

Os maiores do cole, os nenxs de 3º a 6º de primaria fomos cos compañeiros de San Clodio de ruteo. Despois do almorzo, saimos nos sutobuses dirección ao Museo Xeolóxico de Quiroga. Alí proxectaronnos un fermoso video onde puidemos disfrutar das imaxes donxeoparque mentres nos explicaban como se formaron as espectaculares ladeiras das montañas que nos rodean así como os canóns que a atravesan. 

Despois, comezamos o paseo polo museo, onde puidemos ver dende fósiles recuperados con milleiros de anos, ata réplicas dos cráneos das persoas e a súa evolución ao longo dos anos. O noso guía explicounos como se formaron as terras qur rodean as nosas vilas dun xeito moi didáctico, comparándo as placas continentais cun bocata de nocilla. seguro que non se nos olvida a explicación!

Tras a visita ao museo subimos aos buses e puxemos rumbo ao xeoparque das Terras do Courel para poder verncos nosos ollos todo o aprendido. Paramos en varios miradoiros onde o anoso guía nos explicaba as rochas que formaban o chan, a súa formación, a vexetación que aparecía... sen dúbida estamos rodeados de moita beleza. 

No seguinte enlace podedes vernas imaxes da nosa ruta.

Cando chegamos ao centro para xantar pasaba das duas, tiñamos fame e ademáis a comida estaba moi boa así que seguimos disfrutando todos xuntos. As 15:00 horas chegou o momento de intercambiar os agasallos que sempre  facemos os maiores do cole, nós levamoslles un calendario do colectivo estiño, no que colaborarmos e o libro de Olga Novo, “Feliz Idade” asinado por ela  e  eles déronnos un libro que editaron os tres concellos ribas de Sil, Quiroga e Caurel sobre o xeoparque  e un CD de música da banda folk de Ribas de Sil “courel mountains”. Despois despedímonos concertando xa unha nova cita para o ano que vén que tocará na Pobra.

Aqué tedes as imaxes da comida e a foto final de grupo.  

XOVES DE COMADRES.

O xoves, 28 de febreiro celebramos o xoves de comadres. Os mestres e nenos tivéronas gardadas con moito segredo baixo chave ata o xoves pola mañá.  Alí estaban as mestras e cociñeiras moi ben caracterizadas baixo a temática de “As anciás de Brollón”.  Estaban moi simpáticas!! Preme aquí para ver como quedaron. 

Como o xoves anterior na última sesión da tarde, xuntámonos todos na entrada do cole. Agora tocoulle ás mestras ler a cada unha a súa historia que escribiron os Mestres. Rimos un anaco e logo dispuxémonos para rematar o dá das comadres como manda a tradición. As nenas saen ao patio e esperan a que saian os nenos co compadre. Sácano os máis pequenos…e despois duns minutos de paseo: un, dous, tres!  a tentar salvar a comadre de ser queimada.

 

Nin librará de ser queimada, nin se manterá enteira moito tempo.  Pronto se converte en anacos que seguen inentar salvar.  Son uns momentos de liorta nos que hai que ter en conta aos máis pequenos e non mancarse,  de camiño que vivenciamos a celebración e nos achegamos  a esta tradición para que a nosa cultura non se perda.

Disfrutade das imaxes da nosa celebración no seguinte enlace: 

 

                            Xoves de comadres. 

XOVES DE COMPADRES

O martes, día 19 de febreiro iniciamos o entroido no centro coa celebración de dous obradoiros para realizar os compadres e as comadres no colexio como vén sendo tradición.

Tentamos acercar aos nenos e nenas a estas actividades moi celebradas  nesta zona, e por iso procuramos revivir na medida do posible a celebración atendendo á maneira tradicional de cómo o celebraban os nosos avós e avoas.

 Establécense dous bandos moi diferenciados  nun atópanse os nenos a partires de 3º e os Mestres que realizan as comadres nas que caracterizan ás mestras. No outro as nenas a partires de 3º tamén e as mestras que realizan os compadres, no que tamén caracterizan aos Mestres  baixo un tema ou parodia.

Os dous grupos han de gardar moi ben o segredo sen contar nada do tema que elixiron para caracterialos nin donde están gardados  ata que saen o xoves os compadres e ao xoves seginte as comadres.

Toca vivir bromas, un pouco de astucia, tentando saber uns dos outros….para ;  roubarllos ao equipo contrario. Así é como se facia tradicionalmente.

O pasado xoves saíron os compadres. Como están en reformas no cole, e temos uns profes moi habilidosos este ano a historia titulábase: “ Mans á obra”. Alí estaban o xefe de obra, o carpinteiro,  o albañil e o pintor caracterizados nos catro Mestres.

Alí estiveron expostos todo o día. Na última sesión da tarde, reunímonos todos na entrada do cole.  Os profes acompañados dos nenos de 6º leron a súa historia. Despois as nenas sacaron o compadre ao patio e os nenos tentaron sacarllo seguindo tamén a tradición.

O boneco durou cinco minutos enteiro; deseguida a disputa e o tira por un lado e outro fixo que quedara en anacos que logo tamén seguindo a tradición queimamos.

Podedes ver as imaxes da celebración premendo aquí. 

Foi un xoves estupendo, no que simulamos un enfrentamento entre homes e mulleres, seguindo a tradición e que nos serve tamén para coñecer parte do noso pasado, como se divertian e para  valorar  o progreso  así como o camiño percorrido no avance da sociedade.

 

EXCURSIÓN Á LUGO

 

O martes, 12 de febreiro fomos de excursión a Lugo. Saimos do cole ás 9:30, Así que cando soou o timbre para entrar ás clases dirixímonos ao autobús coas pilas ben cargadiñas  para aproveitar  o día.

 

Chegamos a Lugo, ao Gadis do CEAO. Pois participamos na campaña "Alimentes", promovida por esta entidade. Alí dividímonos en dous grupos; infantil e primeiro e segundo por un lado e 3º,4º,5º e 6º polo outro.  Acompañounos unha monitora polas  distintas seccións  dos alimentos a medida que nos ía explicando os distintos grupos seguindo a pirámide, as súas características, os beneficios na nosa saúde e a frecuencia recomendada de consumo.

 

Coñecemos verduras e froitas novas que non acostuman a cultivarse na nosa zona, os tipos de pescado, de carne… e tamén visitamos a zona das chuches!!!  Unha boa mágoa, o que máis nos gusta é do que menos se debe comer….pero en fín! Aprender sempre está ben.

Tedes todas as imaxes da nosa visita polo Gadis premendo aquí.

 

Despois tomamos un pequeno  tente en pé, que ademáis nos deron alí: unha bolsa que contiña unha botella de auga, un plátano e un kit de leite.

 

Ás 12:30 visitamos o centro de interpretación do Rio Rato. Alí coñecemos un resto etnográfico de Lugo, pois as instalacións están nun muiño restaurado.

 

Coñecemos a flora e a fauna da reserva da Biosfera, é dicir, da ribeira do Miño. Foi estupendo, coñecer os animáis, as súas curiosidades, así como as pistas que nos dan moitas veces a presenza dalgúns animáis nas augas para coñecer a súa calidade e o grao de limpeza.

 

Escoitamos unha canción e vimos unha pequena reportaxe, onde unha vez máis  nos demos conta do moito que podemos facer para manter a nosa contorna limpa e en bo estado.

 

Saimos ás 14:00, cargados de información e material que nos deron: un caderno de actividades, marcapáxinas con motivos da reserva, e unha baralla de animáis.

Aquí podedes ver o atentos que estivemos ás explicacións dos monitores.

 

 Dirixímonos a Outeiro de Rei, donde iamos  comer e disfrutar da seguinte visita: o parque das formigas de San Clodio.

 

Despois de comer un bo bocata,  froita e descansar un anaquiño, apareceu J. Ramón, o constructor deste parque e dono da explotación gandeira .

 

Comezamos unha visita pola natureza, e viaxamos a un pobo donde os habitantes son formigas. Todo o que  alí hai está elaborado con material de refugallo, e dicir, reciclado creado a partir dunha historia.

 

No lugar donde comemos as luces do teito forman o noso sistema solar. A sala contigua, para celebracións  tamén está decorada  deste xeito, as columnas son árbores . Todo está elaborado con material de refugallo.

 

O porche conta cun forno, un espazo para facer o churrasco, bancos……. Comezamos a visita,  acompañados de J. Ramón,  pola  explotación , unha fermosa paraxe natural:  poboada de prados e árbores: carballos centenarios, chamounos a atención un que foi capaz de partir unha rocha para saír á natureza, e outro que non foron capaces de abrazar os 9 nenos e nenas de Educación infantil.

 

 O recurso económico ademáis deste poboado de figuras recicladas é a agricultura ecolóxica. Coñecemos a súa explotación gandeira, con vacas dunha raza especial, todas teñen a cabeza branca e o corpo a manchas pardo claro e blanco…proveñen de Irlanda.

 

Visitamos o curral, o horto ecolóxico que nestes intres, dada a época do ano aínda non está plantado….e percorremos o parque seguindo as historias distintas destes personaxes, as formigas: A situación dun control da garda civil de tráfico multando, o cobrador do frac, os pescadores, a nave espacial preparada para despegar…e un pequeno parque donde se atopaban algúns animáis: unha araña, un polbo, cogumelos….e un helicóptero que irrumpe para traernos a chave dun tesouro que nos permitiu visitar un túnel…..

 

Visitamos tamén un recinto que contiña unha cabaña elaborada con material de refugallo e unha pequena charca diante. Un lugar ideal para soñar e crear historias…

Mirade aquí ás nosas novas amigas e todos os sitios que descubrimos!

 

En fin, fixemos un paseo de dúas horas pola natureza, visitando estas historias espalladas…que nos encantaron, e nos fixeron sentir unha vez máis a importancia de reciclar para manter limpo  o noso fogar;  pero ademáis, tamén  nos invitou á deixar viaxar a nosa imaxinación a creatividade e  unha clara mensaxe: antes de tirar, reflexionar, seguro que xa non serve para nada?

 

Despois merendamos e voltamos para a casa. Chegamos ao cole, cargados de información e bos propósitos,  ás sete, onde nos agardaban as nosas familias.

 

Cartas por San Valentín.

O día 14 de Febreiro clébrase o día do AMOR e no cole de Pobra do Brollón tamén quixemos celebralo. Calqueira excusa é boa para expresar os bos sentimentos ás persoas que nos rodean e coas que compartimos tantos ratos ao longo do ano. E que mellor forma que facelo a través das palabras. 

Durante toda a semana tivemos aberto un buzón no que todos puidemos depositar as nosas cartas, mensaxes, debuxos, dedicatorias... para os nosos compañeiros, profes, etc... Así, o xoves tiñamos un montón de correspondencia. Os carteiros puxéronse a traballar e repartiron todas as cartas, ninguén quedou sen ela e os bos desexos doutra persoa. Que ben senta saber que alguén pensou en ti!

Aquí podedes ver as imaxes deste ratiño tan fermoso. Fixádevos nas caras de ilusión de todos ao recibir as cartas. 

Amor polos amigos, polos compañeiros, polo que facemos, pola familia, pola natureza... Todo tipo de amor hai que celebralo. 

A quererse moito e ben!

XOGO DE PILLABÁNS: CONCERTO DIDÁCTICO.

Este martes, os nenos e nenas de 3º, 4º, 5º e 6º de primaria saímos de excursión á Monforte. O motivo da viaxe foi a invitación a un concerto didáctico no que tamén estaban outros moitos centros da zona. 

A obra que se representaba era "Xogo de pillabáns" unha peza de teatro musical que está baseada na Novela Ejempar  de Miguel de Cervantes Saavedra. Os actores e músicos contáronnos a historia de dous mozos pillabáns, Rinconete e Cortadillo, que se coñecen e fan unha longa viaxe ata Sevilla para buscar unha mellor vida, pero teñen que decidir cal é o camiño axeitado para conseguir riqueza.

A música foi interpretada polos propios autores que nos mostraron diferentes instrumentos de vento: frauta, óboe, clarinete, trompa e fagot. 

Como imaxinaredes, disfrutamos moito da obra e aprendemos un montón de cousas. 

Á saída, esperábannos os intérpretes para que puideramos falar con eles e incluso sacar fotos. Podedes velas premendo aquí. 

 

CELEBRAMOS O MAGOSTO.

 

O venres, 16 de novembro celebramos o magosto. Como cada ano, achegámonos ao por qué desta celebración tradicional en Galicia que, como outras moitas tradicións, debemos coñecer e conservar. E  qué mellor maneira que vivila en directo e disfrutala  celebrando o magosto.

Durante esa semana trouxemos castañas e algunha leña. Deste xeito celebramos  o magosto coa colaboración de tod@s.

Coa axuda de Ósca, fomos pintando por cursos as plantillas para construír un castiñeiro tridimensional que está espido. Agora coas nosas indagacións en torno a refráns, ditos populares e cantigas, ou adiviñas en relación ao magosto irémolo vestindo con ourizos, castañas e follas…nas que plasmamos esta información, recollida na casa e a través das TICs. Así construímos a nosa árbore de refráns, adiviñas e ditos populares, tamén coa aportación de todxs. Se premedes aquí  podedes ver imaxes da nosa árbore. 

Os nenos e nenas de sexto, despois do recreo, preparamos todo…para asar as castañas coa axuda de Paco. Xantamos deseguida e marchamos con Paco a prender o lume e asar as castañas.

Os nenos de cuarto prepararon con Pablo, o seu titor, un xogo de pistas que o profe colocou moi sixilosamente polo patio e o cole. Así que a tarde estaba amenizada. Os nenos e nenas de sexto asando castañas con Paco e o resto do cole formaron equipos nos que había nenxs de infantil a sexto e a buscar as pistas para atopar o trofeo. Tiñan como norma estar o equipo sempre xunto e polo tanto completo así que había que respetar o paso dxs máis pequenxs…nada de carreiras!.

Pasámolo xenial lendo nas pistas que nos ían levando dunha a outra  polo percorrido ata atopar o trofeo….

Gañou o equipo de Eli, Senén, Marcos, Candela, Nuno, Emma, Martiño e Andrea.

Mentras transcurría o xogo acabáronse de asar as castañas. Despois collemos un cucurucho coas castañas e unha fanta ou cocacola e puxémonos a comelas  que estaban deliciosas!

Pero aínda estabamos impacientes  por outra actividade que nos gusta moito: embadurnar as mans na cinsa e pintar aos compañeiros e por suposto aos profes…

Encántanos!! Corremos para pintar, ou para non ser pintados, pero ninguén libra a non ser que teña un motivo. Os profes tentan poñerse serios, ameazan con baixar a nota pero estamos de broma e festa! Así que tampouco libraron!

Despois de disfrutar e rirnos do simpáticos que nos atopamos pintados hai que lavarse para rematar a festa e subir ao autobús limpos.

Así rematamos esta festa, na que compartimos xogo, traballo, e sobre todo disfrutamos dunha extraordinaria convivencia.

No seguinte enlace, podedes ver as imaxes que resumen un día estupendo de convivencia e disfrute arredor dunha tradición da nosa terra. 

                      Imaxes da celebración do magosto.

Grazas tamén familias que sempre estades ahí pola colleita de refráns, adiviñas, ditos… coas que vestimos o noso castiñeiro espido.

 

SAMAÍN E HALLOWEEN NO CEIP DA POBRA DO BROLLÓN.

Chegan as datas de Samaín e Halloween, dúas festividades que nos achegan a cultura de dous países: o noso, coa celebración de Samaín e o culto aos antepasados e Halloween, festa  inglesa que celebramos para coñecer tamén a cultura do país do que estudiamos a lingua   relacionada tamén co Samaín.

Ninguén é alleo no centro a esta celebración. Entroncamos a materia de inglés, o EDLG, Activ. Complementarias e Extraescolares e a Biblioteca

Na biblioteca aparece no expositor da actualidade os contos e escritores de medo,  do que gardamos unha boa recopilación en Galicia  e que leremos na hora de ler ou no club de lectura durante este tempo. Alí temos a Agustín ferrnández Paz: “Malos tempos para os fantasmas”, “Fantasmas no corredor”; Xavier Docampo:  “O misterio das badaladas” “Corre corre cabaciña”, “Indo para o Samaín”, “A miña amiga a escuridade” obras de Marilar Aleixandre…

AS FAMILIAS CONTAN:

Durante esa semana o centro invita ás familias a vir contar un conto de medo  na hora de ler, Unha actividade que nos encanta a todxs ademáis de sorprender coa calidade do relato e ata as súas propias adaptacións e creacións. O certo  é que o alumnado de 3 a 12 anos queda  totalmente enganchado e  intrigrado mantendo a atención dun xeito asombroso.

O luns acudiron ao centro: Eva, tía de Marina e Lidia nai de Martín e Emma. Eva contounos  maxistralmente o conto de “Corre corre cabaciña”. Lidia contounos  unha historia de nen@s ambientada nun cemiterio “A alianza”. Mezcla de lectura e contar….pero mantívonos en suspense dende o principio ao fin no que nos deixou unha clara mensaxe:  “Nunca collas o que non é teu”.

O martes acudiou ao centro Sandra, nai de Senén. Contounos un conto de Anxel Fole, ambientado no Courel, a historia dun capador que despois da celebración da matanza se foi para a súa casa  noutro pobo nunha noite escura de inverno a pesar da invitación dos veciños a quedarse. Os lobos acompañárono todo o camiño….rodeábano…entón coñeceu o  medo.

O mércores   Toño, Silvia, Mª José e Pablo papás  e mamás de  Antía e Pedro  prepararon un conto de guiñol. Unha posta en escea de auténticos profesionales.  Unha historia de bruxas  que  fomentaba a lectura e que foi creada por Silvia e Mª José. Pasará a ocupar un lugar especial no recuncho das creacións. Podédela ver  neste vídeo.

Todos eles auténticos contacontos e de tal calidade, que nos deu mágoa non compartir estas historias. Así que as que non están en vídeo  serán contadas na radio escolar.  Teredes a oportunidade de   escoitalas próximamente en Radioguimariño.

Premendo aquí podedes ver as imaxes dos nosos contacontos.

MENÚ TERRORÍFICO

Ese día no comedor disfrutamos dun menú terrorífico. Comprobamos  as mañas e creatividade de Mercedes a cociñeira, e Óscar o encargado de comedor como podedes ver nestas imaxes.

HALLOWEN E SAMAÍN.

No tempo de lecer despois do xantar o alumnado de 5º e 6º disfrazouse para visitar as clases e asustar aos seus compañeiros. Deste xeito entroncamos as dúas festividades: halloween e Samaín. A fin de paliar os medos, os titores cóntanlles aos máis pequenos que o alumnado de 5º e 6º lles vai a dar unha sorpresa.  Nas visitas ás aulas, despois de intentar asustalos reparten caramelos para recompensar o primeiro susto, este ano chocolatinas….

Despois baixamos todos ao comedor e os nosos biblioaxudantes, o alumnado de 5º e 6º que recolleron relatos de medo da nosa zona contaránnolos  á carón da exposición das cabazas.

Aquí tedes as imaxes que resumen a nosa celebración.

CONCURSO DE CABAZAS:

Dende hai anos  convócase un concurso de cabazas con material de refugallo. Unha tarefa que fan nas casas. Acadamos unha exposición de creacións orixinais e de calidade donde de novo estiveron implicadas as familias. A calidade dos traballos era alta, difícil seleccionar unha por curso, así que o premio consisitiu nun lote de libros para cada aula, un diploma e chuches terroríficas para todxs.

Infantil: levou o premio das cabazas máis terroríficas.

Primeiro e segund levou o premio das cabazas máis ecolóxidcas  pois abundaban os elementos naturais.

Terceiro e cuarto levou o premio ás cabazas máis estrambóticas.

5º e 6º Levou o premio ás calabazas máis monstruosas.

A Cociñeira levou o premio á cabaza máis sabrosa.

Se premedes aquí podedes ver imaxes de todas as cabazas que chegaron ao centro.

Foron días de traballo colaborativo, no que estivo implicada toda a comunidade educativa. Moitas grazas especialmente ás familias que viñeron a contar, que axudaron a facer cabazas… Gracias á implicación de todxs vivimos días emocionantes, que romperon a monotonía  do dia a día das aulas, nos que non deixamos de compartir experiencias e aprender…

MARTES, 16 DE OUTUBRO, TOCOU EXCURSIÓN

 

O pasado martes, era esperado con ilusión pois tocaba excursión e eses días, para empezar, son distintos ademáis de pasalo sempre xenial

O alumnado de infantil e primeiro e segundo, acompañados dos seus titores, Óscar e Paco visitaron a panadería Roelma. Alí Rosa explicoulles como traballaban para facer o pan, as empanadas e algún doce, e despois chegou a hora da verdade: coas mans na masa!

Foi estupendo poder facer cada  un de nós e seu propio boliño coa masa que nos deu Rosa a cada un. Deixamolo a cocer e marchamos a xogar ao parque de Sanugueiros.

De volta para o cole paramos na panadería e recollemos o noso boliño que levamos para a casa e compartimos coas nosas familias.

Grazas Rosa polo teu tempo, pola masa e por ensinarnos a facer un pan que estaba boísimo.

Pasámolo xenial como podedes comprobar nas imaxes que podedes ver aquí.

 

O alumnado de 3º, 4º, 5º e 6º tamén tiñamos visita pois tocaba a III andaina que organiza a Asociación Amigos do Camiño pola Ribeira Sacra cada curso.

Ë unha convivencia multitudinaria pois participan os colexios públicos e privados e os IES da zona. Este curso escolleuse un tramo entre os concellos do Saviñao e Chantada polo que se sumaron a esta andaina.

O punto de encontro foi en Diamondi á carón da igrexa romana de San Paulo de Diamondi, unha das mellores mostras do arte románico da Ribeira Sacra. Sorprendeunos a grandiosidade desta igrexa e o seu campo, alí naquela pequena parroquia.

Comezamos a camiñar, e baixamos ata Belesar por unha calzada romana, inda que era baixar seguido…disfrutamos da naturaleza.

En Belesar, collemos unha botella de auga, cruzamos o Miño e comezamos a subir ata facer unha parada na adega Via Romana. Aquí dábannos unha mazá e unha chocolatina para coller forzas e seguir subindo!. Tamén falamos pola radio a través da emisora onda cero.

O que quedaba de subida foi duro…. A algúns costounos ben pero por fin chegamos á igrexa, tamén románica, de San Pedro de Líncora no concello de Chantada.

Preme aquí para ver o resumo e datos técnicos da nosa andaina. 

Foi un día fermoso no que descubrimos paraxes naturais espectaculares, e tamén historia, ingredientes máis que suficientes para presumir de país porque Galicia, e en especial a Ribeira Sacra garda recunchos naturais únicos, cargados de historia, que temos pois que coñecer, valorar e conservar.

O resumo do día tédelo neste vídeo e imaxes. 

Distribuir contido