Iniciar sesión: Acceso

Obradoiros sobre a conservación do medio ambiente

O pasado mércores, día 21 de marzo, coincidindo co Día Mundial da árbore, o Grupo de Desenvolvemento da Ribeira Sacra, propúxonos unha actividade ao alumnado de 3º, 4º, 5º e 6º dos centros escolares da zona.

No viveiro dos Trollos, en Bóveda, realizamos diversos obradoiros de sensibilización cara o coidado e protección do medio ambiente:

Elaboración dunha maceta de papel, para plantar un carballo. Trátase dunha das árbores autóctonas de Galicia, que está perdendo o seu hábitat a favor doutras coma por exemplo o eucalipto.

Despois, repuxemos forzas xa que quedaba moita mañá por diante.

O segundo obradoiro consistiu na realización de diferentes comedeiros para os paxaros.

O último obradoiro permitiunos decorar unha mochila baixo o lema de sementar, sementarei

Unha gran iniciativa, que lle permite ao noso alumnado afondar nunha temática de moito interese, xa que a conservación e valoración da natureza é un valor imprescindible na súa formación.

Almorzando saudablemente no CEIP da Pobra do Brollón

Hoxe compartimos mestres e alumn@s, un almorzo saudable. É a comida máis importante do día xa que pasa un período bastante longo dende que inxerimos alimentos por última vez. Vainos permitir obter os nutrientes necesarios para afrontar todas as actividades que realizamos durante a mañá. Por tanto, debe ser un almorzo saudable, variado e equilibrado.

Nun almorzo saudable non pode faltar a froita (uvas, melón, fresas, kiwi), torrada con tomate e xamón, zume de laranxa, leite con cereais…

Aproveitamos a ocasión para facer unha pequena entrega de premios da liga de tenis de mesa que vimos de rematar.

Un obxectivo innegociable, que debe primar sempre que facemos deporte é pasalo ben, disfrutar, compartir sorrisos… e iso foi o que buscamos con esta iniciativa. Todos merecen ser premiados polo seu esforzo, por buscar sempre a diversión, por sorrir co deporte.

Liga de tenis de mesa

Durante os meses de xaneiro e febreiro xogamos unha liga de tenis de mesa no tempo de lecer dos martes e xoves. Tivo éxito este deporte durante o curso pasado, polo que seguimos con esta iniciativa.

É unha maneira de achegalos aos deportes de raqueta, unha nova posibilidade. Amosaron gañas de disfrutar, de compartir momentos lúdicos cos seus amigos/as, de esforzarse, de superarse

Xogamos en tres grupos:

- 1º e 2º: Pretendemos que se inicien, que coñezan o tenis de mesa, que disfruten xogando.

- 3ºe 4º: Buscamos que o pasen ben , que sexa un momento de divertimento.

- 5º e 6º: Incidindo un pouco máis nas regras, en algún aspecto técnico sinxelo.

Últimas novas

Temos moitas novas que contarvos, xa que os últimos días foron moi intensos: aprendemos coa axuda dos escornabots, a posta en marcha de Radio Guímaro, o Día de Rosalía, a semana da prensa e o Día da Muller Traballadora.

Nos últimos días chegaron uns “amigos moi especiais” ao centro, os escornabots, co obxectivo de aproveitar as vantaxes que ofrece a robótica e a programación no ámbito educativo. Estámonos iniciando neste mundo, comprobando o alto grao de motivación do alumnado, a construción de aprendizaxes significativas que proporciona…Deixámosvos unhas fotos desta primeira toma de contacto.

Outra nova oportunidade que se nos abre para a aprendizaxe é o fascinante mundo da radio, un medio de comunicación que ten algo especial, diferente, único…Nos últimos días contámosvos que instalamos no centro unha radio escolar. Non vos podedes imaxinar a expectación que provocou no alumnado, a ilusión que tiña porque este novo proxecto botase a andar.

Por tanto, están emocionados, intrigados, participativos, felices…Condicionantes idóneos para unha aprendizaxe significativa. Poñen en práctica competencias como a expresión escrita e oral, a capacidade de síntese, de respectar as opinións dos demais,  amosan autonomía, iniciativa, traballo en equipo, empatía, responsabilidade,  habilidades para buscar, contrastar e comunicar información…aprenden disfrutando e disfrutan aprendendo.   

A nosa radio, a radio na que todos vós nos podedes seguir leva o nome de Radio guímaro. Hoxe saen á luz os primeiros programas gravados durante estes días; a temática estivo centrada en Rosalía, na importancia de reivindicar o papel da muller na sociedade e na semana da prensa, temas dos que falaremos deseguido.

Se facemos un percorrido pola historia, Rosalía de Castro merece unha mención especial. Cada día, e dunha forma especial cada 24 de febreiro, Rosalía segue abrindo fiestras.

As nenas e os nenos, nestes días empapáronse de Rosalía de Castro:

O alumnado de infantil recitou poemas.

1º e 2º puxéronlle a súa voz a “adiós ríos, adiós fontes”.

Radio Guímaro.

 

3º e 4º “entrevistaron” a Rosalía de Castro, e recitaron un poema. 

Radio Guímaro entrevista. Radio Guímaro poema.

5º e 6º repasou a súa obra e algúns dos poemas máis significativos.

Radio Guímaro.

Deixámosvos unhas fotos dalgúns dos murais que elaboramos sobre a súa obra.

O 8 de marzo celébrase o Día Internacional da Muller, aínda que todos os días debemos loitar pola igualdade, polos dereitos da muller, pola non discriminación, para que sexan valoradas xustamente…porque o Día da Muller son os 365 días do ano. Agardemos que o mundo progrese polo camiño correcto e algún día non sexa preciso conmemorar esta data.

Se miramos ao noso arredor vemos ás nosas avoas, nais, irmáns, compañeiras…que son un exemplo para nós, mulleres loitadoras, cunha serie de valores dos que nos debemos impregnar.

Dende Radio Guímaro, ademais de falar sobre Rosalía, demos a coñecer algunhas das moitas mulleres que loitaron polos seus dereitos, pola igualdade…

- Martes 6 de marzo

Simone Veil foi a protagonista do día, da man de Roi, Xulia, Aday e Carlos.

Radio Guímaro.

- Mércores 7 de marzo

 Lorena, Noé e Xana lembráronnos a vida de Simone de Beauvoir

Radio Guímaro.

- Xoves 8 de marzo

Moraima, Jéssica, Sarai e Lucía amosáronnos a vida de Clara Campoamor.

Radio Guímaro.

Vivimos na sociedade da información, polo que para facer fincapé nisto, e aproveitando a conmemoración da semana da prensa, Rafa Aguiar e María Valcarce, da cadea Ser Monforte, visitáronnos para coñecer máis sobre o xornalismo, descubrir un chisco máis a maxia que envolve o mundo da radio…

Escoitade o programa de Radio Guímaro que gravamos con eles para descubrir de primeira man a entrevista que lles realizamos.

- Venres 9

Na Casa da Cultura de Monforte asistimos á presentación do conto dedicado no pasado curso a Balbina López, farmacéutica do Saviñao. É coordinado polo CIM de Monforte de Lemos e no que colabora o Colectivo Lemos Le, integrado polos colexios e bibliotecas municipais da zona.

De camiño coñecemos á muller sobre a que traballaremos este ano, Genoveva González, unha mestra do concello de Bóveda.

Este mesmo día, xuntámonos na biblioteca para escoitar os programas que levamos feito, e para reflexionar sobre o traballo realizado.

 

Lembrade: escoitade Radio Guímaro.

Obradoiro de Regueifeiras e Brindos

Onte, xoves 22, tivemos ocasión de disfrutar dun obradoiro de regueifas e brindos. Esta actividade estivo promovida e financiada  polo Concello. Para coñecer pois a nosa historia, asistiron ao centro dúas regueifeiras: Sara e Alba, acompañadas de Sara que colaborou e Mónica, a concelleira de eventos. 

Explicaron primeiro que eran os brindos e as regueifas; os dous son xéneros de improvisación oral cantados  moi semellantes, pero non son o mesmo. A regueifa é un canto como unha disputa e o brindo é para alabar a alguén ou a algo.

As regueifas son logo disputas e van acompañadas de bailes. Facíanse especialmente nas vodas antes de repartir o pan para disputarse precisamente o privilexio de partir o pan de trigo ou pan branco que se daba nestas celebracións.

Antes de partir o pan, colocábano na cabeza e bailaban e disputábanse cantando de forma improvisada e en verso a disputa de repartilo e creando así a regueifa.

O brindo tamén é un xénero de improvisación oral, cantado en verso  pero non provoca disputa, senón todo o contrario, é para alabar a alguén.

No noso concello, no Courel e nos Ancares houbo persoas que creaban e cantaban brindos; por iso, nós fixemos fincapé no coñecemento dos brindos. No Courel queda unha persoa de 90 anos que fai brindos. Na Pobra tamén sabemos que os facía Luis de Forgas.

Estamos orgullosos de contribuír a recuperar parte do noso pasado e sobre todo de saber que este foi o primeiro obradoiro de brindos.

E, como se fai un brindo?

Son coplas de catro versos de oito sílabas. E para crealo estes son os pasos:

1º: Empézase polo último verso, pois aquí vai a idea principal

2º: Riman o segundo co cuarto (pode ser asonante ou consoante) co que despois do último hai que facer o segundo.

3º: Despois, faise o terceiro que soe ser contestación.

4º: Por último, faise o primeiro.

Primeiro, aprendemos a melodía con Alba e Sara que cantan de marabilla!, e despois…

Continuou sendo emocionante xa que aprendemos a facer brindos en grupos de tres…baixo unha idea que ademais pedíronnos que dixeramos  nós:

“os brindos”. Así que… puxémonos a crea e cantar coa súa axuda.

 

A segunda parte do obradoiro fixémola no patio: o “pano regueifeiro”, no que tivemos que improvisar para enfrontarnos a outro día.

 

Foron un par de horas moi divertidas, nas que coñecemos tradicións do noso pasado e ás cales debemos de contribuír, xa que son sinais de identidade. Gustounos isto da improvisación.

O entroido

Chegou seguramente a data máis esperada por todos/as: O ENTROIDO, tempo de festa, de emoción, dalgunhas trasnadas….

Fixemos unha paréntese esquecéndonos da igualdade e establecendo dous bandos moi claros: mestres e nenos por un lado, e mestras e nenas no outro. Deste xeito, o venres 26 de xaneiro creamos no centro un obradoiro a partir de 3º de primaria para comezar a facer os Compadres e as Comadres. Uns e outros son os mestres baixo algunha caracterización e…a partir dese momento reina a intriga por saber uns dos outros.

- Xoves de Compadres (1 de febreiro)

Á primeira hora apareceron os compadres: "os científicos do mal e os seus secuaces".
Unha historia realmente interesante.

Despois as nenas sacaron o Compadre para queimalo e os nenos trataron de impedilo. Son uns minutos de carreiras, onde finalmente se queima.

- Xoves de Comadres (8 de febreiro)

O xogo invértese. As comadres do cole apareceron caracterizadas como “as asesoras de Puigdemont”. Deixámosvos a historia para que disfrutedes delas.

A continuación, os nenos saíron coa Comadre; as nenas intentaron salvala; finalmente quéimase.

- Esta semana de Entroido, do 5 ao 9, estivo acompañadas das Ordes do Meco. Así que cada día tocou algo que nos caracterizase a todos cunha gotiña de Entroido que se ía agrandando en gracia , xa que era acumulativo:

• Luns: Coloretes.

• Martes: Unha prenda ao revés.

• Mércores: Sombreiro.

• Xoves: Un zapato de cada.

O venres 9 tocou o tradicional desfile de entroido, que este ano por mor da choiva viuse acortado considerablemente. Caracterizámonos baixo a temática de Romanos, de acordo cun dos proxectos que desenvolveremos neste curso.

Sobre as 12h visitamos o centro de día, como non podía ser doutro xeito. Compartimos todos xuntos un ratiño moi animado; ían disfrazados do servizo de limpeza e parodiaron unha canción baixo a clara mensaxe de “deposita”. Uns verdadeiros artistas.

Temos que seguir mantendo viva unha festa popular de Galicia, algo que nos fai únicos. Disfrutade destes días que veñen por diante.

¡¡¡Viva o Entroido!!!

Día da Paz

O 30 de xaneiro  conmemoramos o Día da Non Violencia e a Paz. É de vital importancia inculcar valores que sustenten  a tolerancia, a solidariedade, o respecto aos demais, a igualdade… e que deben reinar nunha sociedade que en moitas ocasións dista disto.

Por tanto, todos os días deben estar moi presentes.

Nestes días, reflexionamos co alumnado sobre os incendios; unha temática moi presente na nosa zona e que fai uns meses devastou a contorna. Está á vosa disposición no seguinte enlace o material que empregamos.

https://www.edu.xunta.gal/centros/ceippobrabrollon/aulavirtual2/pluginfile.php/1158/mod_resource/content/1/D%C3%ADa%20da%20paz%202018/index.html 

Con todas estas reflexións, elaboramos un mural no que plasmamos as nosas mellores intencións para seguir loitando pola Paz, pola comprensión, a igualdade de oportunidades…

A temática das lecturas destas semana tivo como eixe central a Paz; destacamos "O valo" de Carlos Labraña.
No medio dun deserto, que se estende até onde alcanza a nosa vista, o Soldadiño de chumbo, un neno soldado, chanta unha bandeira e coloca un valo de arame, xusto onde no seu mapa marca a fronteira. Do outro lado do valo, Sahara, a rosa do deserto, unha rapaza abandonada, que foxe da guerra, trata de convencelo de que a deixe pasar, xa que está procurando un pozo onde saciar a súa sede. Xaora, sentados de costas, mirando as estrelas fugaces no firmamento, Sahara e o Soldadiño comparten idéntico ceo e comprenden que só na procura dos seus soños atoparán a liberdade.
Por tanto, este libro propón unha emocionante reflexión sobre a igualdade e a paz entre todas as persoas e comunidades.

Outra das actividades foi cantar  unha canción que compuxo o noso mestre de música, Pablo, co alumnado de 5º e 6º.

Festival de Nadal

Esta mañá tivo lugar o Festival de Nadal, un día que mestura ilusión, gañas, ledicia, emoción, traballo, satisfacción… Un día que plasma o traballo realizado por todos durante o último mes.

Comezou as 11h pasadas, tendo como presentadores a Xana, Moraima e Noé. O programa foi o seguinte:

1º,2º : “Acrosport“.

3º,4º,5º, e 6º : “Acrosport”.

Infantil. Baile: ”Isto bailase así“.

5º e 6º: “Sketch Land Rober “Os xubilados van ao Mcdowells”.

1ºe 2º. Panxoliñas en inglés: “Christmas Tree” “We wish you a Merry Christmas”.

3º e 4º. Teatro: “A carapuchiña vermella”.

5º e 6º. Sketch Land Rober: “Os Gorrillas ao caldeiro”.

Entrega da cesta de Nadal.

Todo o colexio queremos ir de excursión de fin de curso. O lugar aínda non o temos decidido. Para recadar fondos para a excursión vendemos rifas. O sorteo celebrouse onte mércores no comedor.

5º e 6º. Teatro: “ Recobrou o sorriso o Eleuterio”.

Entrega de premios XXVII Certame Contos de Nadal.

A través destas composicións, da lectura de contos…descubrímonos a nós mesmos, enriquecémonos; consideramos que é a mellor maneira de medrar. Noraboa a todos e a todas por participar, polo voso traballo.  Os gañadores deste ano son:

     - 2º: Alejandra e Candela

     - 3º: Marcos

     - 4º: Fabián

     - 5º: Roi

     - 6º: Xana

Infantil 1º,2º,3º,4º,5º, e 6º: panxoliña, “ O carapuchiño ”.

Rematamos o festival entregándolle a cada alumno/a unha postal navideña.

Como todos os anos colaboramos co colectivo Pedagóxico Estiño elaborando un calendario para recadar fondos para as escolas de Nicaragua; témolos á venta no centro por 1,50 euros.

Querémosvos dar unha vez máis as grazas pola vosa asistencia:

Aos profesionais e aos usuarios do centro de día, uns veciños moi entrañables para nós. Do mesmo xeito, queremos agradecer a presenza e que compartisen con nós este día, aos pais,nais, avós, avoas, irmáns e todos aqueles familiares presentes.

A todos os mestres polo súas horas para que este festival tivese tanto éxito e nos fixese disfrutar: Óscar, Pablo, Dori, Paco, Félix,  Nieves, Vanesa, Julio.

Os verdadeiros protagonistas, os nenos e nenas, levan un mes de ensaios, sen descansos, con exames, traballos… Sempre con alegría, con ilusión, con gañas.

Como non, a Mercedes e a Lola, que nos alimentan cada día.

Agradecer tamén a colaboración do Concello, que cada ano nos presta o equipo de megafonía.

Grazas aos provedores do Comedor Escolar, que colaboraron con donativos para facer a cesta.

É un luxo, poder contar con esta comunidade educativa. ¡GRAZAS!

 

A comida foi o punto e final a este ano que chega á súa fin, un momento moi especial, de moita unión e ledicia.

Despedímonos ata o próximo ano, cos nosos mellores desexos, e mandándolle moita forza ao noso amigo Félix, que recentemente perdeu a Ana, a súa compañeira. Este festival foi dedicado a eles.

Desexamos que este Nadal:

teñas ao teu carón o afecto, un

soño polo que loitar….

Que te involucres no

compromiso de avanzar no

percorrido do 2018 polo

camiño da xustiza, a paz,

o respeto, a igualdade,

o compromiso coa sostibilidade..

 

¡¡¡Bo Nadal e Próspero Aninovo!!!

 

Festival de Nadal

Este xoves, 21 de decembro, ás 11h FESTIVAL DE NADAL.

Virá cargado de acrosport, humor, teatro, panxoliñas, agasallos…Estades tod@s convidados! Deixámosvos o programa para que o consultedes.

Dende o CEIP da Pobra do Brollón desexámosvos unhas felices festas.

Merendas saudables

Ao longo desta semana, do 11 ao 15 de decembro, dentro do Proxecto Deportivo de Centro, realizamos un calendario de merendas durante o período de lecer.

O calendario que seguimos foi o seguinte:

- Luns: Froita

- Martes: Bocadillo ou sandwich

- Mércores: Lácteos ou derivados

- Xoves: Froita

- Venres: Libre

Con esta actividade tratamos de  concienciar ao alumnado da importancia dunha dieta suficiente e variada; que sexan conscientes de que alimentarse ben é fundamental para a práctica de actividade física, entre outras cousas.

Distribuir contido