Iniciar sesión: Acceso

FONDOLIBROS

FONDOLIBROS

Publicacion da adxudicación provisional da adxudicación de libros de texto para o curso 2016/17.

Non quedou ningún alumn@ excluido.

Os que están en branco están pendentes da adxudicación dos exempñlares que merque o centro.

O vindeiro luns farase a publicación definitiva.

Para consultar a publicación pulsa aquí.

Convivencia co CEIP Rosalía de Castro (Bóveda)

O venres 17 de xuño visitounos o C.E.I.P Rosalía de Castro, de Bóveda. Agardábamos esta convivencia con moita ansia, con ilusión, con emoción…Nuns anos nen@s de ambos centros serán compañeiros no instituto, así que cremos que é unha boa oportunidade para coñecerse, facer amizade, compartir xogos, conversas, unha comida xuntos.

Recibímolos sobre as 10:30h, cunha morea de globos e un pequeno aperitivo.

Tiñamos preparada unha xornada de iniciación á orientación. Son moitos os beneficios que nos aporta: permite un enfoque real e práctico das actividades no medio natural, é unha actividade moi motivadora, que fomenta o traballo en grupo, a integración, o esforzo. Na orientación adquire unha vital importancia a toma de decisións, de comprobar a cada instante se son correctas ou non. O manexo do mapa e da brúxula son básicos.É unha actividade interdisciplinar, entre outras moitas cousas que poderíamos citar.

Desafortunadamente non puidemos  desenvolver esta actividade dadas as adversas condicións metereolóxicas. Tivemos que adaptala ao espazo do que dispoñemos.

O alumnado de infantil estivo  no patio cuberto e alí fixeron xogos co paracaídas, circuítos, carreiras de relevos, xogos dos bolos, zancos…non había máis que mirar a súa cariña para darnos conta do ben que o pasaban.

Por outro lado, o alumnado de primaria estivo no pavillón e tiña que superar diferentes probas. Para conseguilo é moi importante o traballo en equipo, a cooperación, a comunicación

Fixemos 8 grupos mesturando nenos/as de Pobra e de Bóveda. As probas foron:

Proba 1: Escorre a esponxa

2 caldeiros colocados a uns 3 metros; un baleiro e outro cheo. O obxectivo é levar a auga dun a outro coas esponxas.

Proba 2: Colle aire e a soprar

Puxemos a proba os nosos pulmóns. Debíamos inchar 15 globos cada equipo e atalos; despois, amarralos todos xuntos a unha corda.

Proba 3: Busca nomes

Na sopa de letras hai agochados 10 nomes de deportes que debemos buscar.

Proba 4: Cruza a tea de araña

De un en un, foron atravesando a tea de araña o máis axiña posible.

Proba 5: Demostro a miña axilidade

Un circuíto de axilidade para percorrer sen a axuda.

Proba 6: Mural de mans

Na cartolina cada compoñente do grupo estampa unha das súas mans con pintura de dedos.

Proba 7: A ambulancia

Entre todos/as  levan ao enfermo dun punto a outro sen que caia para que non se fira máis. Todos pasan polo rol de enfermo.

Proba 8: Acrosport

Sobre as colchonetas realizaron unha das figuras propostas.

 

Ao superar cada proba, o responsable íalles selando a parte correspondente; así cada equipo completou a súa ficha.

Máis tarde, quedounos un ratiño para o ansiado partido de fútbol. Xa é un clásico nas nosas convivencias.

Ás 13h repuxemos forzas logo dunha intensa e divertida maña. Sempre axuda a seguir coñecéndonos, a entrelazar a nosa amizade…

Saíron cara Bóveda sobre as 14:30h; quedámonos con bos momentos, bos recordos. Sempre desexando que chegue o seguinte reencontro. Foi unha mañá moi especial.

 

 

CELEBRACIÓN DUN PLENO NO CONCELLO

Onte, día 10 de xuño, os nenos e nenas de 4º, 5º e 6º celebraron un pleno no noso Concello. Tivemos a oportunidade de coñecer en primeira persoa o funcionamento dos concellos, como se organizan… xa que nos convertemos en Concelleiros de Medio ambiente. Despois de investigar sobre o noso ecosistema e sentir a necesidade de coidar a contorna, pareceunos importante estudar unha batería de propostas para coidar o noso medio ambiente e levalas a un pleno.

Recibiunos o Señor alcalde, que escoitou as nosas propostas, e Dori fixo de secretaria. O alcalde íanos dando a quenda para falar e Dori tomaba nota das votacións.

Distribuímos as medidas en catro grupos relacionadas cos 4 erres. Cada equipo fixo as súas propostas que logo foron votadas; esta vez dixo o alcalde que daba gusto pois aprobamos todo por unanimidade.

 

Reducir: Manuel, Candela, Xana.

Antes de nada hai que tirar só aquilo que sexa imposible de reutilizar, reciclar ou doar a alguén.

Reducir é evitar a compra de produtos que realmente non son necesarios, outros con exceso de embalaxe, non reutilizar, ..

Podemos reducir a contaminación evitando o uso do coche se non é necesario, usando os transportes públicos, aproveitar ao máximo as botellas reutilizables, construír xoguetes con material de refugallo, doar os produtos a un centro social antes da data de caducidade se non os consumimos, facer carteis informativos de quen os pode recoller, utilizar os folios polas dúas caras, ensinar a reciclar papel, organizar charlas informativas das pequenas cousas que cada un de nós pode facer antes de tirar, promover levar as propias bolsas á compra, ensinarlle á xente a facer compostaxe, que sería un abono para as súas hortas…

Non usar pratos nin vasos de plástico se non é necesario...

 

Reutillizar: Sheila, Zaro, Estrella 

Antes de tirar temos que pensar se nos serve a nós ou a alguén.

A roupa que deixamos de usar pode serlle de utilidade a outra xente. Se está moi vella podes facer trapos para a cociña, para manualidades… Ademais, tamén se poden intercambiar produtos usados, libros, discos, mobles.

Organizar algún mercadillo de segunda man.

A materia orgánica pode converterse nun excelente abono se facemos compostaxe; teremos un abono ecolóxico.

Reutilizar gafas usadas, facer un punto de recollida xa que diversas ONG colaboran para que as gafas vellas podan servir en países en desenvolvemento.

Reutilizar augas grises. Importante informar de sistemas de depuración e poñelos ao alcance dos veciños para poder usar a auga usada da cociña, lavadora…

 

Reciclar: Vero, Joel, Moraima, Lorena, Noé

Tirar o lixo nos colectores adecuados é fundamental para poder recuperar e dende logo non tirala no chan dando lugar a vertedoiros, nin nos ríos…

Cada cousa no seu lugar,tendo en conta que o plástico non debe ter elementos de vidro, nin de papel e cartón.  Os envases, como botellas, non deben levar os tapóns que ademais os precisan moitas asociacións. Os papeis e cartóns  non deben ter elementos metálicos como grapas.

Usar ben os puntos limpos, xa que temos que informar do horario á xente e darlle facilidades para que leve así o lixo voluminoso.

Nalgúns lugares tamén hai colectores para pilas, medicamentos...

 

Recuperar: Marcos, Leila.

Facer carteis publicitarios par recuperar sempre antes de tirar.

Facer cursos de recuperación nos locais sociais de todo o municipio. Os rapaces  podemos  facer xoguetes, bonecos, crear historias con eles…

Pero se sabemos reciclar, facilitamos as cousas para poder recuperar: o lixo pódese converter en enerxía calorífica e en enerxía eléctrica;  algúns texidos  son feitos con material reciclado….Por tanto, non debemos esquecer que está nas nosas mans depositar o lixo no seu lugar para recuperalo.

 

Coa nosa participación tamén nos abonan unha subvención para a vindeira excursión de fin de curso os días 21 e 22 de xuño. Participamos dende infantil ata 6º de primaria así que seguro que o pasaremos en grande.

Agradecemos pois ao concello por dobre partida: por darnos a oportunidade de coñecer como funciona un concello e por colaborar no financiamento da nosa excursión.

Excursión Voz Natura

O sábado 4 chegou a xuntanza anual dos colexios participantes no Programa Voz Natura. O lugar de encontro foi  Culleredo.

Traballamos sobre os ecosistemas da nosa contorna (elementos, árbores, animais, plantas…) , e tratamos de sintetizar o traballo nun libro.

Saímos do colexio ás 9, e en torno ás 11 horas estábamos na Coruña, con gañas de baixar do autobús e disfrutar do tan ansiado día que tíñamos por diante.

Os xogos e talleres funcionaban de 11 a 13:15 e de 15:30 a 19:30.

Tivemos inchables, taller de maquillaxe, globoflexia, taller de reciclaxe con botellas de coca cola, taller de chapas, taller de experimentos con auga e electricidade. Había cabalos moi bonitos: montamos neles  e vimos demostracións, ao igual que por parte dos bombeiros.

Gustounos moito ver o helicóptero da Garda Civil, os coches de tráfico, as motos, salvamento mariño, protección civil ( en todos puidemos subir e velos por dentro). Fixéronnos un carné de tráfico.

Aquí podedes ver máis fotos deste día.

Ás 13:30h vimos a actuación de “Furios Monkey House” e tivo lugar a entrega de premios dos coles gañadores desta edición.

Ás 14h foi o momento de facer unha parada e repoñer forzas, para afrontar con enerxía o resto do día. Comemos todos xuntos.

Logo deste descanso, na xornada de tarde  vimos os traballos de todos os colexios, fixemos un taller de prensa e incluso nos fixeron  caricaturas. Ademais, seguimos disfrutando dos xogos e talleres.

A iso das 18:30 merendamos para poñernos rumbo a Brollón. Chegamos ao colexio ás 21 h aproximadamente, logo dunha xornada de convivencia, de bos momentos, de xogos…

Letras Galegas

Na última semana rendémoslle homenaxe ás Letras Galegas, as nosas Letras. O poeta Lucense Manuel María é o protagonista deste ano; representa a conciencia e o compromiso inquebrantable coa lingua galega.

Manuel María Fernández Teixeiro nace en Outeiro de Rei (Lugo) o 6 de outubro de 1929. Como fillo de labregos pasa a súa nenez e adolescencia no medio rural.

Vai á escola en Outeiro de Rei e fai o bacharelato en Lugo. Con 19 anos imparte a primeira conferencia no Círculo das Artes en Lugo.

Coñece e mantén amizade con escritores como Luís Pimentel, Álvaro Cunqueiro, Ánxel Fole, Carballo Calero…

En 1950 escribe o seu primeiro libro de poemas “Muiñeiro de Brétemas”. Despois virán poesías, novelas, teatro…

En Santiago coincide con Uxío Novoneyra, Otero Pedrayo e funda a Editorial Xistral.

Coñece a Saleta Goi, a súa compañeira e musa coa que casa.

Instálase en Monforte onde exerce de procurador, forma parte do goberno municipal como concelleiro e rexenta a libraría Xistral.

Intensifica a súa creación como poeta, narrador e dramaturgo, comprometido coa fala, co pobo, coa xustiza do país

Recibe numerosos premios, homenaxes e recoñecementos. Con 73 anos entra como académico numerario na Real Academia Galega.

Falece o 8 de setembro de 2004 na Coruña e é trasladado a Outeiro de Rei. Hoxe en día, a casa onde naceu é a Casa Museo Manuel María.

 

Ao longo dos últimos días tivemos os seguintes actos:

Luns 9: Profundamos na vida e obra de Manuel María.

Martes 10: Coñecemos os nomes das partes do carro e do arado coa colaboración  de Chinco.

Mércores 18: Obradoiro “A música e Manuel María” (“A vaca”, “A cidade”)

Xoves 19: Intercambio co CEIP Santa María de Castro (Boiro) para contar Lendas da zona e recitar poemas de Manuel María.

Obradoiro de poesía.

 

Venres 20: Festival Letras Galegas.

Comezou ás 11h. Este ano presentárono dous alumn@s de 6º: Manuel e Sheila que tamén nos deron a coñecer  ao escritor homenaxeado.

Tivemos as seguintes actuacións; disfrutade das fotos para que vexades ou lembredes o acontecido na mañá do venres.

   - Infantil: Teatro “Pedro e o Lobo”.  Cantiga “O tren que me leva polo meu camiño”

Como de costume  comezamos cos máis pequenos e grandes a vez,  porque en idade serán pequenos pero en  espontaneidade e artes son  moi grandes

Na obra vemos o importante que é non  gastar algunhas bromas, non mentir nunca.

Logo, cantaron unha fermosa canción de Andrés Dobarro.

Estiveron dirixidos por Óscar.

   - 4º: “O club do chiste”

Os alumnos/as de 4º seguiron poñéndolle pingas de risa, de bo humor ao festival para que todos nos rísemos. Dirixidos por Julio.

   - 1º e 2º: Canción do poema “O Carro”

Manuel María móstranos a vida galega  e  o mundo do rural dedicando poemas ós  labregos e ás súas ferramentas como o carro. Estiveron dirixidos por Belén.

   - 5º: Peza de Guiñol “O ovo esférico”

O cuco anúncianos a chegada da primavera. Como non fai niño, en vez de traballar canta. Esta vez non fixo o niño e quería chocar un ovo alleo. Dirixidos por Dori.

   - 3º e 4º: Canción “Canto ao idioma galego”

Dirixidos por Belén, cunha mensaxe moi clara e entrañable: temos unha lingua que hai que coidar para que medre, camiñe…e a mellor maneira é falala.

    - 3º e 4º: Teatro “Berenguela”

Unha das pezas teatrais máis coñecidas de Manuel María dirixida aos nen@s, xa que el botou de menos lecturas infantís cando era neno. Nela son protagonistas unha folla de carballo e unha espiña de toxo, que finalmente queda ceibe.

Estiveron dirixidos por Dori e Julio.

   - 5º e 6º: Canción e baile “Rap de Manuel María”

Esta canción foi creada e composta por un profesor que hoxe está no CEIP de Oural pero que hai anos estivo neste cole, José Manuel Cabana. Dende aquí tamén lle damos os parabéns por este traballo tan fermoso, e o alumnado coa axuda de Belén recreárono..

   - 3º, 4º, 5º e 6º: “Recital de poesías de Manuel María”

Dirixidos por Dori e Julio recitaron algúns dos poemas máis característicos do poeta homenaxeado neste 2016.

   - 5º e 6º: Teatro “O cambio climático”

Unha obra que nos fixo reflexionar sobre a importancia de coidar o noso planeta, para que as persoas medremos sans e libres. Ademais, os nen@s fixeron un repaso dos mestres; a verdade que houbo para tod@s. Estiveron dirixidos por Dori.

   - “Entrega de premios do XXV Certame de Contos Letras Galegas 2016

Os premiados foron:

1º: Álvaro

2º: Fabián

3º e 4º: Moraima e Noé

5º: Candela

6º: Sheila

   - 5º e 6º: “Himno Galego”

A mellor maneira de rematar este festival foi cantando tod@s xuntos o noso himno, unha dos nosos sinais de identidade.

Queremos dar as grazas a tod@s polo voso gran de area para conseguir un Festival tan bonito, tan enriquecedor. Un Festival que significa moito, que nos da moitas cousas.

Grazas aos nosos amigos/as do centro de día, cos que compartimos actividades que nos fan medrar, madurar, aprender…

Grazas a todos os familiares que puidestes estar presentes, por alentarnos cos vosos aplausos, coas vosas miradas.

Grazas ao Concello por prestarnos coma sempre a megafonía.

Grazas a tod@s os mestres polo seu traballo, polas súas horas dedicadas ao longo destas últimas semanas: A Dori pola súa organización, o seu sacrificio e esforzo, a enerxía que transmite cada día.  Ao equipo de actividades plásticas polo mural que fixeron: Belén á cabeza, axudada por Estefanía, Nieves, Óscar, Dori.

A Belén por poñerlle música ao Festival. A Óscar por facer dos máis peques uns verdadeiros artistas, que sacan un sorriso con só miralos.

A Estefanía, Nieves, Paco, Félix…grazas polo traballo diario, a constancia.

A Lola e a Mercedes por axudarnos a repoñer forzas logo dunha maña intensa, sentida e produtiva.

A verdade que este equipo merece todos os eloxios posibles.

E…como non, as Grazas tamén para os nosos artistas, os verdadeiros protagonistas, que unha vez máis estiveron á altura á que nos teñen acostumados. Estamos moi orgullosos deles.

Este ano despediremos a Verónica, Manuel, Marcos e Sheila. Cerran unha etapa para comezar outra nova. O futuro significa camiñar e iso será o que fagan.

Foi unha mañá  na que floreceu o traballo de días anteriores, e sobre todo unímonos un pouco máis para seguir loitando por coñecer  a nosa historia, para que este pasado sexa cada día máis valorado,  e para que a nosa lingua estea cada día máis presente nas nosas vidas ocupando o lugar que se merece, medrando cara un  bo futuro.

A mellor homenaxe  ás nosas Letras é a de medrar facendo que Galicia teña a súa propia historia: falando a nosa lingua e coidándoa para que sexa cada día máis  forte e coñecida.

 

Queremos rematar cunha das grandes obras de Manuel María.

 

Galiza

 

Galicia docemente
está ollando o mar:
¡ten vales e montanas
e terras para labrar!

Ten portos, mariñeiros,
cidades e labregos
¡cargados de traballo
cargados de trafegos!

Galiza é unha nai
velliña, soñadora:
¡na voz da gaita rise,
na voz da gaita chora!

Galiza é o que vemos:
a terra, o mar, o vento…
¡Pro hai outra Galiza
que vai no sentimento!

Galiza somos nós:
a xente e mais a fala
¡Si buscas a Galiza
en ti tes que atopala!

Solta de troitas

Dous axentes forestais, Sindo e Camino, acompañáronnos o pasado luns 9. Soltamos troitas nos ríos Rubín e Sa aproveitando o bo tempo.

Trouxeron dúas garrafas, cada unha con 500 troitas. Metemos a garrafa no río, pouco a pouco, para que se vaian adaptando á temperatura da auga; así o desfase térmico será o menor posible.

Máis tarde, xa no centro, explicáronnos cales son os motivos desta actividade.

A través dunha proxección en power point ensináronnos todos os pasos que seguen ata a solta dos alevíns; hai que cubrir un longo proceso de análise xenético, reprodución, desove, extracción dos espermatozoides, embrionaxe, selección e clasificación cada mes.

Para chegar ao resultado final o proceso é complexo e custoso.

Aprendemos que por cada quilo de peso de troita nacen uns 1800 ovos.

Vimos imaxes de piscifactorías, escalas, filtros, os termómetros que usan para medir a temperatura da auga,  onde nacen os alevíns..

Debido ás grandes choivas das últimas datas, a auga dos ríos estaba turbia; isto provoca que os alevíns collan infeccións e morran. Por tanto, estes días de bo tempo son un momento idóneo para soltar as troitas, debido a que auga está máis limpa.

Os cambios no PH das augas, motivados pola contaminación (purín, vertidos industriais sen depurar), polos incendios forestais, pola falta de limpeza nas ribeiras que impide a axeitada insolación das augas… poderían estar detrás da escaseza de alevíns. Cada vez vemos menos troitas nos ríos do sur lucense.

Foi unha mañá moi amena, entretida e na que aprendemos máis sobre a natureza, da man de Sindo e de Camino, que seguro nos visitarán en máis ocasións. Moitas grazas.

Coidar o noso medio depende de todos

Convivencia co CEIP Ribas de Sil

O venres, 29 de abril, tivemos a convivencia co CEIP Ribas de Sil; sempre é agardada por todos con moita ilusión, xa que unha das características do noso centro é a apertura ao exterior e ás convivencias.

Este ano fomos nós os anfitrións. Ás 10:30 h chegaron ao colexio, onde os agardábamos cunha morea de globos que tiramos dende unha aula do primeiro andar. Queríamos que dende o primeiro momento sentisen que estaban na súa casa.

Logo deste recibimento, explicámoslles en que ía consistir a xornada e distribuímonos en grupos.

• O alumnado de infantil, 1º e 2º visitou as panaderías da localidade.

Infantil estivo na panadería Herbella; 1º e 2º na panadería de Guadalupe. Aproveitamos para darlles as grazas pola súa colaboración, sempre dispostos a participar en actividades do centro.

Lupe, Eva e outros panadeiros advertíronnos que estaban case sen durmir; isto débese a que é unha profesión moi sacrificada na que hai que traballar mentres todo o mundo dorme, para que cando amence estea todo listo.

Vimos de preto a máquina onde se mestura a levadura coa fariña e a auga para facer a masa.

Logo chegou o mellor momento para nós. Convertémonos en panadeiros e fixemos a nosa propia bola de pan. Puxémoslle os nosos nomes a cada peza antes de metelas no forno. Mentres se facían, aproveitamos para tomar unha merendiña e xogar no parque; tíñamos que repoñer forzas.

Cando nos demos conta xa tíñamos as nosas bolas de pan. Quedamos moi satisfeitos.

O alumnado de 3º, 4º, 5º e 6º coñeceu o fermoso pobo de Vilachá.

Fomos ata alí en autobús onde nos agardaba Puri, unha adegueira que leva toda a vida vivindo nese paraíso. Tomamos un pequeno aperitivo nada máis baixarnos do autobús.

A primeira parada neste pobo foi no museo; aprendemos moitas cousas sobre o proceso de obtención do viño, vimos o carro e a arca para transportalo que se empregaba antigamente…

Para seguir aprendendo e coñecendo aspectos moi importantes sobre este mundo, non había mellor maneira de facelo que visitando a súa adega (puidemos ver as cubas antigas e as actuais, contounos algúns segredos para facer un bo viño…).

Fixo un día moi bo, así que facer unha ruta de sendeirismo por estes paraxes é impresionante; máis aínda no día previo á celebración da súa festa. A ruta levounos ata o mirador da Capela, cunhas vistas espectaculares do Sil , de Torbeo...Deixámosvos unhas fotos para compartir con vós esta experiencia.

Puri foi unha anfitrión exemplar que nos achegou á vida en Vilachá, ao mundo das adegas.

A mañá pasou axiña e ás 14:30h chegamos ao colexio para xantar; seguimos compartindo momentos, coñecéndonos mellor. Ademais, intercambiámonos uns agasallos como sinal da gran amizade que nos une con este centro.

Despois de comer disfrutamos dun ratiño de xogo: os “forofos” do fútbol no polideportivo, outros no areeiro, outros optaron pola pista descuberta…

Este día pasou deseguida. Foi extraordinario, compartimos xogos e experiencias, e sobre todo afianzamos esa amizade que  a través deste tipo de actividades se vai agrandando ano a ano.

Este mesmo día tocou dicirlle un ata logo a Mercedes, que volverá no mes de setembro. Unha persoa moi activa, con enerxía, sempre disposta a colaborar. Unha das nosas cociñeiras, que nos alimentou con moito agarimo nos últimos meses.

Querémoslle dar as grazas polo seu traballo diario, por todo o que nos aporta. Vémonos moi pronto.

Día do Libro

Cada 23 de abril conmemórase o Día do Libro, unha data escollida pola UNESCO, para render homenaxe ao pracer da lectura.

A UNESCO elixe cada ano unha capital mundial do libro cuxo mandato comeza o 23 de abril. Este ano a cidade de Wroclaw (Polonia) foi a elixida.

Os libros teñen moito poder; invítannos a vivir outras vidas, colaboran para que vivamos as nosas con máis intensidade, con máis alegría, con máis preguntas…

Os libros son amigos que nos acompañan, son fontes de información, son ventás, puntos de vista, novas oportunidades. Momentos para compartir, para sentir, para disfrutar, para ser libres, para voar, para viaxar…

Nos libros dende sempre se acumulou o saber, o coñecemento. O desenvolvemento humano difundiuse a través deles ás novas xeracións. Gran parte do noso saber está nos libros. O libro é hoxe un dos representantes máis claros e máis importantes da cultura. Chega a calquera recuncho do planeta.

Ler estimula a creatividade, a imaxinación, a intelixencia, a expresión oral, a concentración, axuda a relaxarnos. Fai que as persoas sexamos máis amables e empáticas; ao ler intercambiamos a nosa vida coa de alguén máis, sempre hai una conexión.

Ler é fundamental para funcionar na sociedade de hoxe en día. Se os nenos len, serán adultos que pensen. Permítenos aprender cousas novas.

Ler mellora a escritura. Ao ler o noso vocabulario expándese, leemos novas palabras que gardamos na nosa mente para usalas despois,

Desenvolve a mente, precisa exercicio coma o noso corpo, necesitamos que a nosa mente sexa habilidosa.

A día de hoxe, o avance de soportes tecnolóxicos fíxolle perder un pouco a súa popularidade; pero “un libro sempre será un libro”, unha creación única que nos permite unha morea de beneficios.

 

Realizamos unha serie de actividade este pasado venres:

“Apadriña un conto”. O alumnado de infantil, 1º e 2º escolleu ao azar a un neno/a de 3º,4º,5º e 6º para que lle contase un conto.

Deixámosvos algúns dos que seleccionamos para este día.

Despois, fixeron un traballo de reflexión, no que analizaron o que sucedeu, as personaxes que interviron…

“O conto viaxeiro”. Ao longo desta semana creamos entre todo o colexio o noso propio conto: “Os soños de Martiño”. Comezaron os máis peques e logo foi viaxando de aula en aula.

Disfrutamos del léndoo tod@s xuntos.

Todos tivemos como premio un marcapáxinas e unha chapa para fomentar o hábito lector.

Foi o momento tamén de premiar aos nosos lectores; os nenos/as que máis libros leron foron:

3º e 4º:

    -1º Lorena

   - 2º Xana

   - 3º Sarai

5º e 6º:

   - 1º Candela / Marcos

   - 2º Verónica

   - 3º Sheila

 

Rematamos cunha frase de Irina Bokova, Directora Xeral da UNESCO:

“Non hai nada coma un libro. Un libro é un vínculo entre o pasado e o futuro. É unha ponte entre xeracións e entre culturas. É unha forza para crear e compartir a sabedoría e o coñecemento”.

Semana do deporte

Acabamos de vivir unha semana moi enriquecedora no centro, a semana do deporte,  coa que buscamos fomentar no alumnado a práctica de actividade física.

O deporte é un medio moi apropiado para educar ás persoas, para inculcar valores coma o compañeirismo, o traballo en equipo, o respeto polo demais, acatar unhas normas. Fai que medre o noso afán de superación.

A semana comezou o luns cas miniolimpiadas, onde o atletismo se elixiu protagonista. Aínda que socialmente non o ten recoñecido, é o deporte rei. Combina habilidades que facemos de forma innata xa dende pequenos: correr, saltar e lanzar. Aporta un alto grado de coordinación.

Comezamos con carreiras de velocidade, salto de lonxitude e carreiras de vallas.

O martes seguimos coas miniolimpiadas; fixemos carreiras de fondo, lanzamento de peso e carreiras de relevos.

O mércores…case nada. Ir con bicicletas, patinetes, patines ao colexio…Caras de felicidade, de ilusión, de entusiasmo, de disfrutar co que fan… Ver iso é unha gran satisfacción.

Querémosvos dar as grazas pola vosa participación para que esta actividade se levase a cabo. Xuntámonos con máis de 40 “vehículos”. A actividade “sobre rodas” buscou fomentar o uso da bicicleta, de patíns...  medios de transporte sans, que son moi recomendables para os nosos nenos/as. Aproveitamos para traballar a educación viaria: coñecer sinais coma o stop, o ceda, dirección prohibida; así como cumprir o que nos ordenan os semáforos, respectar os pasos de peóns…

Deixámosvos unha morea de fotos para que vexades o que disfrutamos; é certo iso de que unha imaxe vale máis que mil palabras.

O xoves, foi o momento de coñecer un pouco máis de preto o deporte de alta competición. Para iso, tivemos con nós a Manuel Martínez e a Verónica Contreras.

Manuel Martínez é todo un emblema no deporte Monfortino. É o creador do equipo de voleibol da Pinguela entre outras moitas cousas. Unha persoa que loitou moito para que o deporte medrase, unha persoa incansable que así o demostra día.

Verónica é unha xogadora internacional, participou nuns xogos olímpicos, o máximo para un deportista. É de Perú, pero conta coa dobre nacionalidade.

Hai que salientar o importantísimo traballo de canteira que están facendo coas categorías inferiores da Pinguela. Sempre formando persoas, deportistas, profesionais do voleibol.

Prestamos moita atención a todo o que nos contaron: diferentes aspectos do voleibol, como foron os seus comezos, como é o deporte de alta competición, que nos aporta...

A parte práctica fíxonos deleitar. Como recordo temos un balón firmado por eles e os nosos autógrafos personalizados.

Achegámonos a un deporte que merece moita máis repercusión do que a sociedade lle outorga.

Despois do recreo, repetimos a actividade do parque de tráfico debido a grandísima aceptación que tivo.

Chegou o venres case sen darnos de conta; unha semana intensa na que o deporte foi o fío condutor.

Este día, o alumnado, dirixido por Belén, xogou un partido de baloncesto e despois de fútbol fronte os mestres/as. Fíxonos moitísima ilusión. Levábamos meses agardando por esta cita.

Corremos, rimos, cansámonos…foi un gran momento. Miras ao teu arredor e ves unha gran familia feliz.

Tod@s quedamos moi satisfeitos con esta semana; foi unha experiencia positiva, enriquecedora, proveitosa. Foron momentos de moita unión, de ilusión, de divertimento. É moi fácil de resumir estes días se nos lembramos da cara dos nenos/as en moitas ocasións.

Este venres, á vez, tamén resultou amargo.

Hai 4 meses chegou Eva ao centro. Non precisou moitos días para gañarse ao alumnado e aos mestres/as co seu traballo diario, coas súas gañas de facernos progresar a todos. Sempre aportando ideas, sempre cun sorriso.

Todos a imos botar moito de menos, e intentamos demostrarllo un pouquiño onte.

Desexamos que sexa un ata pronto,e que Eva volva ao colexio para seguir aportando cada día  un gran de area moi valioso. Deixa unha gran pegada en todo nós.

Eva Gracias.

Vantaxes e perigos do uso de internet

Hoxe tivemos con nós a un enxeñeiro informático para falar do uso de internet e dos perigos que iso pode ocasionar.

Comezou a charla preguntándonos para que empregamos internet (buscar información, xogar en liña, mandar correos electrónicos, visitar as redes sociais, consultar enciclopedias…).

Cales son os puntos chave de internet? O acceso é “anónimo”, pero sempre se pode seguir o noso rastro. É un acceso case permanente,  xa que estamos conectados dende todas as partes dun xeito cada vez máis doado.

Internet ofrécenos unha serie de comodidades, de vantaxes que medran cada día: obter información, mensaxería instantánea…Pero debemos ter coidado coa publicidade enganosa, coa información falsa, con virus que se meten nos nosos ordenadores; chégannos correos pesados que pretenden captar a nosa atención co obxectivo de obter cartos a cambio de nada, por exemplo. Aínda que soe a tópico, en internet podémonos encontrar con cousas boas e con outras non tan boas.

Nas redes sociais, moi presentes hoxe en día, temos que pararnos e reflexionar un pouquiño. É practicamente imposible borrar unha foto unha vez que se colga na rede; quedan aí para sempre, porque google ten unha memoria prodixiosa. Debemos coidar a nosa privacidade e a dos demais. Non é axeitado difundir información ou fotos sen o consentimento das persoas implicadas. Temos que pensar con detemento antes de actuar.

Outro tema de actualidade é o ciberbullying, que é un acoso psicolóxico e persistente contra unha persoa a través de medios telemáticos. Debemos estar sempre alerta, denuncialo se acontece  e gardar as probas.

A charla ía avanzando, e agora detivémonos no PEGI dos xogos, que nos indica a idade para a que se recomenda. Cumprindo iso, os contidos serán apropiados e educativos; aprenderemos de xeito lúdico.

Lembrounos tamén a importancia de protexer os nosos ordenadores e dispositivos con antivirus; coñecemos unha serie de ligazóns interesantes cun gran aproveitamento pedagóxico.

Á hora de crear os usuarios e contrasinais non debemos poñer os nosos nomes; recoméndase mesturar maiúsculas e minúsculas, 8 caracteres como mínimo… Moito ollo cos datos persoais, non hai regalos gratuítos.

Nas conexións sen fíos que son abertas non sabemos o que hai detrás delas; pódennos extraer información dun xeito moi sinxelo. Somos moi vulnerables.

 

Queremos resaltar a importancia de conservar a ortografía cando empregamos redes sociais, mensaxería instantánea… xa que ás veces coas presas ou co uso de abreviaturas  cometemos erros moi graves.

Finalizamos, lembrando que é bo aproveitar as vantaxes que nos ofrece a rede, pero non fagas nada en internet que non farías na túa vida real.

Non hai que ter medo a usala, farémolo dun xeito prudente e conservando tanto a nosa privacidade como a dos demais.

Distribuir contido