Iniciar sesión: Acceso

Viaxando pola Ribeira Sacra

Como ben sabedes, estamos participando na proposta do Consorcio de Turismo Ribeira Sacra que nos ofreceu unha actividade titulada: “Move ficha pola Ribeira Sacra”.

O pasado luns 8 de maio, tivemos un obradoiro no centro para coñecer máis sobre a Ribeira Sacra. Onte, martes, realizamos unha saída co CEIP Virxe do Carme de Sober, para poñer en práctica o que aprendemos no obradoiro, e para coñecer os encantos que agocha a Ribeira Sacra. Non hai mellor maneira de aprender que experimentar, vivenciar,

Así que o obxectivo desta segunda parte da actividade é continuar coñecendo o noso patrimonio, as nosas raíces, a beleza da Ribeira Sacra…

O alumnado de 4º, 5º e 6º saímos do centro ás 9.30h con destino a Sober, onde nos esperaban os nosos compañeiros/as.

Os puntos nos que estivemos ao longo do día, foron:

- Belesar: Coñecemos os encantos do pobo, fixemos unha pequena parte da ruta dos viñedos, achegámonos á presa…

- Pesqueiras: Visitamos a igrexa, que data do século XII, adentrámonos pola ruta disfrutando das súas vistas, do aire puro que se respira…

As 14.00h fixemos unha parada na Devesa do Saviñao para comer tranquilamente, descansar un anaco e xogar cos nosos compañeiros de Sober.

- Aproveitamos a ocasión para visitar a Biblioteca Municipal de O Saviñao que nos brindou a oportunidade de coñecer  máis sobre Balbina López, muller homenaxeada polo colectivo Lemos Le neste curso.  Estivemos tamén no primeiro edificio no que viviu esta muller loitadora.

- A última parada levounos ao Dolmen de Abuime, no que puidemos ver os restos que quedan del e coñecer máis sobre a nosa historia.

 

É moi importante indagar sobre o noso patrimonio para que nos axude a medrar como persoas, e por suposto, valoralo antóxase unha cuestión esencial.

Graciñas a Bea, a monitora que nos acompañou nesta ruta,  e que nos ensinou unha morea de aspectos que descoñecíamos, así como a Mónica, Bibliotecaria do Saviñao.

 

Festival Letras Galegas e Cena Pro-excursión 5º e 6º

Na última semana rendémoslle homenaxe ás Letras Galegas, as nosas Letras. Carlos Casares, o autor deste ano, é un deses Galegos, que viviu comprometido co seu pobo, traballando e loitando pola vida digna dos galegos, polo medrar e o recoñecemento social  da nosa lingua.

Carlos Casares Mouriño nace na cidade de Ourense o 24 de agosto de 1941. Sendo un neno, a súa familia trasládase a Xinzo de Limia, onde o pai traballa como mestre.

No ano 1952 ingresa no seminario de Ourense, onde descobre a súa faceta de escritor. Nesta etapa escribe un xornal semanal, El Averno, do que era o "director e único redactor".

Abandona o seminario, pois descubre que non quere ser crego e segue os estudos de bacharelato por libre en Xinzo de Limia. En 1959 gaña un concurso de relatos breves e isto permítelle coñecer a Vicente Risco, membro do xurado, e participará nos seus faladoiros literarios onde coñece máis escritores.

No ano 1961 trasládase a Santiago de Compostela para estudar Filosofía e Letras e incorpórase ao grupo de galeguistas liderado por Ramón Piñeiro. En Compostela participa, como dirixente da Asociación Democrática de Estudantes, no movemento universitario de protesta contra o franquismo.

En 1967 publica a súa primeira obra, “Vento ferido”, un libro de relatos xuvenís  nos que aparecen xa os temas que se repetirán na súa obra, como a violencia, a opresión e a intolerancia nas relacións humanas.

Ao ano seguinte publica a primeira obra de relatos infantís, “A galiña azul” e, de alí a pouco, a primeira obra infantil de teatro,” As laranxas máis laranxas de todas as laranxas”.

 En 1969 empeza a impartir docencia en Viana do Bolo pero é inhabilitado por defender o dereito ao comedor gratuíto para os nenos pobres e ten que marchar a Bilbao. En 1974, despois de aprobar as oposicións, exercerá como profesor en Cangas do Morrazo e posteriormente en Nigrán.

No ano 1971, nun tren que se dirixe a Santiago de Compostela, coñece unha rapaza sueca, Kristina Berg, coa que casa e que lle abre as portas de Suecia. Este país converterase nunha especie de modelo ideal para a súa Galicia soñada.

Nestes tempos afiánzase como escritor e inicia a súa  colaboración coa prensa, primeiro no xornal La Región de Ourense e posteriormente en La Voz de Galicia.

En 1981 preséntase como galeguista independente nas listas do PSdeG ás primeiras eleccións ao Parlamento e é elixido deputado. Como parlamentario, participa na redacción e aprobación da Lei de normalización lingüística de 1983, na creación do Consello da Cultura Galega e da Radio e Televisión de Galicia e na elaboración da campaña Fálalle Galego.

Son anos de intensísima actividade intelectual nos que preside o Consello da Cultura Galega, dirixe a revista Grial, colabora activamente coa Real Academia Galega (da que é membro desde 1977), dirixe a Editorial Galaxia. Ademais, desde 1992 escribe a columna "Á marxe" para o xornal La Voz de Galicia e segue a publicar títulos de narrativa.

Da súa  obra cómpre salientar obras como: “Cambio en tres”, “Xoguetes pra un tempo prohibido”, “Os escuros soños de Clío”, “Ilustrísima”  e “Os mortos daquel verán”.

 Deixounos tamén moitas publicacións  para nenos: “A galiña azul”, “As laranxas máis laranxas de todas as laranxas” “Lolo anda en bicicleta”, “Un polbo xigante”, ou a serie Toribio.

Cómpre tamén subliñar o seu papel como biógrafo de Ramón Otero Pedrayo, Manuel Curros Enríquez, Ramón Piñeiro ou Vicente Risco. Traduciu ao galego obras como O Principiño.

Ao longo da súa traxectoria como escritor recibiu numerosos recoñecementos e premios.

Falece en Vigo o 9 de marzo de 2002, despois de entregar na imprenta a versión definitiva de O sol de verán.

Gracias a escritores como el contamos cun rico patrimonio lingüístico, social e cultural. O galego ten pois historia de seu. Na nosa man está que teña presente e por suposto un futuro.

Ao longo dos últimos días tivemos os seguintes actos:

Luns 22: Profundamos na vida e obra de Carlos Casares. No comedor podedes visitar a súa exposición

Martes 23: Presentación do 2º libro de teatro “Comedias para un pobo” de Javier González.

Mércores 24: Visionado da obra de teatro a galiña azul.

Xoves 25: Obradoiro de poesía.

 

Venres 25: Festival Letras Galegas.

Comezou ás 11h. Este ano presentárono alumn@s de 6º: Zaro, Leila e Candela, que tamén nos deron a coñecer  ao escritor homenaxeado.

Tivemos as seguintes actuacións; disfrutade das fotos para que vexades ou lembredes o acontecido na mañá do venres.

   - Infantil: Teatro “O casamento do piollo e a pulga”.

   - 1º e 2º: Danza Hawaiana “Hoe Ana”

   - 3º e 4º: Teatro “A consulta da doutora Casilda”.

   - 5º e 6º: Baile “Rock and Roll”.

   - 1º e 2º: Teatro “A nubiña Pascual”.

   - 5º e 6º: Skets Land Rober “Os gorrillas”.

   - 3º e 4º: “Danza dos machetes”.

   - 5º e 6º: Teatro “O camiño de Santiago”. 

   - “Entrega de premios do XXVI Certame de Contos de Letras Galegas 2017":

Os premiados foron:

1º e 2º: Lola e Elena.

3º: Fabián.

4º: Roi

5º: Noé

6º: Zaro

       - 5º e 6º: Skets Land Rober “Xubilados polo mundo”.

A mellor maneira de rematar este festival foi cantando tod@s xuntos a Rianxeira.

Queremos dar as grazas a tod@s polo voso grao de area para conseguir un Festival tan bonito, tan enriquecedor. Un Festival que significa moito, que nos da moitas cousas.

Grazas aos nosos amigos/as do centro de día, cos que compartimos actividades que nos fan medrar, madurar, aprender…

Grazas a todos os familiares que puidestes estar presentes, por alentarnos cos vosos aplausos, coas vosas miradas.

Grazas ao Concello por prestarnos coma sempre a megafonía.

Grazas a tod@s os mestres polo seu traballo, polas súas horas dedicadas ao longo destas últimas semanas: A Dori, óscar, Paco, Vanesa, Pablo, Nieves, Félix…

A verdade que este equipo merece todos os eloxios posibles.

E…como non, as Grazas tamén para os nosos artistas, os verdadeiros protagonistas, que unha vez máis estiveron á altura á que nos teñen acostumados. Estamos moi orgullosos deles.

Este ano despediremos a Zaro, Leila, Candela e Joel. Cerran unha etapa para comezar outra nova. O futuro significa camiñar e iso será o que fagan.

Foi unha mañá  na que floreceu o traballo de días anteriores.

A mellor homenaxe  ás nosas Letras é a de medrar facendo que Galicia teña a súa propia historia: falando a nosa lingua e coidándoa para que sexa cada día máis  forte e coñecida.

Logo, tocou repoñer forzas.

Este venres non rematou aquí…

Como sabedes, os nenos e nenas de 5º e 6º van de excursión a Madrid na última semana de curso, do 19 ao 22 de xuño; levan tempo traballando para sacar cartos para ela: vender rifas en Nadal, camisetas e…onte fixemos unha cea / convivencia, na que enchemos o comedor entre toda a comunidade educativa (pais, nais, familiares, alumn@s, mestres deste ano e de anteriores). 140 persoas, case nada…

En primeiro lugar, GRACIAS A TOD@S POR ASISTIR (familias, veciños, ex - alumnos, ex – mestres…). 

Ás 4 da tarde estas familias e os mestres puxémonos mans á obra cos preparativos: colocar o comedor, poñer as mesas, preparar a cea, os regalos…en definitiva, que todo estivese a punto para as 9. Pouco a pouco foi collendo forma..

Tamén lles queremos agradecer ás familias o seu traballo, colaboración e implicación. E como non, á hora de dar gracias temos que mencionar dun xeito moi moi especial aos nosos cociñeiros/as: Lola, Mercedes e Felipe; sería moi inxusto non mencionar a Óscar, encargado do comedor, e a Dori.

O menú foi:

   - Entremeses  

   - Melón con xamón

   - Empanada de atún, empanada de zorza

   - Costela con ensalada

   - Biscoito con queixo

   - Xeado

   - Café

A  cea comenzou a iso das 21.30h.

O  noso agradecemento aos provedores que colaboraron con alimentos para a cea: Panadería Roelma, Panadería Herbella, Comercial Buxán, Comercial Ana, Pescados Topi, Santorini, Comercial Sánchez Vado, Distribucións a Pinguela, Secundino Docampo, Disrela, Mafer Asturias, Discibrán, Frutas Yoli, O Fogón, Carnicería Real, Bonfrig.

Do mesmo xeito para o Concello, xa que recibimos unha subvención de 500 euros.

Foi unha gran noite, na que a comunidade educativa compartimos momentos, falamos, rimos, intercambiamos opinións

Rematamos cuns agasallos que se obtiñan co número da entrada. Estes agasallos para o sorte foron doados por:

Perruquería Bolboreta, Ferretería Vicente Chaos, Librería Núñez, farmacia Cristina Touza, panadería Roelma, Leónides, Comercial Agro, Librería Fénix, Agrasar e Carlín

 

Descubrindo o noso PATRIMONIO

Estamos desenvolvendo un proxecto en torno ao noso patrimonio: cultura, lingua, personaxes relevantes…

O pasado venres, 19 de maio, fixemos un roteiro: visitamos lugares emblemáticos da Pobra do Brollón e percorremos unha etapa do camiño de inverno. Para iso, contamos coa participación dunha grandísima persoa que ten as súas raíces no noso concello, o arqueólogo e investigador Xurxo Ayán. Unha persoa moi sinxela que unha máis engaiolou as nenos/as. Estamos moi agradecidos pola súa amabilidade e interese en pasar a mañá con nós.

O itinerario que elaborou para o alumnado de 3º, 4º, 5º e 6º, tivo o seu punto de partida no colexio, onde comezamos a adquirir novos coñecementos sobre o noso patrimonio. No caderno de notas fomos anotando e debuxando unha morea de contidos que vos resumimos a continuación.

1ª Parada: Rotonda da entrada ao concello. Nela está simbolizado o escudo da Pobra; a coroa simboliza a realeza, o vínculo da xente de aquí cos reis; a vide presenta un elemento característico da Ribeira Sacra.

• 2ª Parada: A Fontela. Unha casa, ubicada no alto da Pobra, á par dun camiño de entrada á localidade; hoxe pouco usado, pero naquela época era o Camiño Real.

A casa Conserva un escudo de pedra de granito traída do Incio. O escudo identifica a casa dos nobres, ou señor, donos das terras que á súa vez dependían dos condes de Lemos.

Aquí aproveitou moi ben para contarlles como era a sociedade na Idade Media.

• 3ª Parada: Ponte de San Antón. O nome fai honra ao seu patrón, que protexe ás persoas e aos animais. Está a carón da Ponte Medieval, da que só se conserva unha parte, dado que foi reparada con cemento.

Esta ponte era a entrada á vila da Pobra. Descubrimos que a Pobra tiña unha muralla, aínda que non quedan restos dela. Antigamente non había casas fóra da muralla, e agora case non vive ninguén no casco vello.

• 4ª Parada: Posible concello antigamente. Paramos nunha casa que conserva un arco, posiblemente a antiga casa do concello, xa que está nunha rúa principal. Consérvase pouca documentación do noso pobo, pois cando entraron os franceses arrasaron parte de Monforte e tamén da Pobra. Queimaron a casa do Concello antiga e tamén os arquivos que contiñan documentación.

Logo, comezando a baixar puidemos disfrutar dunha vista panorámica da localidade e ao Lonxe vense os Castros que rodearon esta localidade: O de Chavaga, Castroncelos, Castrosante, Ferreirúa...

Galicia conta con 6000 castros, dos cáles 15 se encontran na Pobra. Isto é importante para entender como os Guímaros loitaban cos condes.

5ª parada:  Analizamos a arquitectura de fai 600 anos. Explicounos o material empregado para construír unha casa aproveitando os existentes na zona. Vimos unha casa en ruínas, o seu pombal, as 3 rúas paralelas que lle dan unha forma de améndoa ao casco vello.

6ª parada: Cuartel da Garda Civil. O avó de Xurxo traballou na súa construción.

Chegados a este punto, seguimos a aventura cara Cereixa. Na última parte do camiño asfaltado, e antes de adentrarnos no camiño tradicional, falounos de que as primeiras fotos aéreas do noso concello datan dos anos 50. Descubrimos que Afonso IX fundou a Pobra, concedéndolle unha serie de privilexios.

Lembrouno a importante do ouro na nosa zona, explotado polos Romanos.

Xa inmersos no camiño tradicional cara Cereixa, analizamos as árbores da que hai ao noso arredor (sobreiras, castiñeiros, piñeiros…).

Un dos mellores momentos do día foi que puidemos facer unha escavación arqueolóxica no camiño do Escorial.

Outra parada moi interesante foi o Castro de San Lourenzo, que sobreviviu a todo e no que nos demos conta do poder que ten a natureza. Neste castro Xurxo Ayán está realizando un proxecto arqueolóxico, levando o nome de Cereixa fóra da Comunidade. Explicounos a súa estrutura, a súa historia…

As pedras de San Lourenzo é un documental no que podedes coñecer máis de preto o gran traballo que está desenvolvendo Xurxo Ayán.

Xa no colexio, ensinounos en primicia os obxectos atopados no castro, antes de que vaian para o castro de Viladonga.

 

Como podedes ver foi unha mañá desas que nos fan sentir a todos repletos de información e tamén de valores. Aprendemos moito da historia da Pobra, e sobre todo a mirar todo con máis respecto.

 

Non hai mellor maneira de rematar que…

En cada camiño hai unha historia agochada que hai que saber ler. Para saber a onde imos é vital coñecer de onde vimos.

Compartindo momentos co centro de día

A estreita relación que levamos cos nosos amigos/as do centro de día é algo que nos caracteriza, que nos fai medrar como persoas.

Nas últimas dúas semanas, acudimos ao centro de día os xoves. Queriamos  contarvos que estamos compartindo experiencias únicas, enriquecedoras, que nos enchen.

Realizamos debuxos en pequenos grupos, mesturando a súa experiencia e a nosa creatividade. Participaremos nun concurso interxeneracional, que organizan os centros de día e que leva por título de 0 a 100. O concurso é o de menos, a nós o que nos encanta é cruzar a rúa e aprender deles, con eles, emocionarnos, ilusionarnos, conversar cos nosos amigos…

Resúltanos moi complexo explicar con palabras os sentimentos que nos invaden alí dentro. Deixámosvos unhas fotos, co pequeno obxectivo de intentar transmitir o que vai por dentro, aínda que a mellor maneira de facelo é sendo espectador do seu traballo conxunto, dos seus diálogos, da súa sintonía, da súa complicidade, da felicidade que se respira…

Cada vez o lazo de unión é maior. Seguirémosvos informando dos nosos intercambios.

Move ficha pola Ribeira Sacra

Participamos na proposta do Consorcio de Turismo Ribeira Sacra que nos ofreceu unha actividade titulada: “Move ficha pola Ribeira Sacra”.

Esta actividade consta de dúas partes: Un obradoiro no centro, con dúas monitoras, que ocupou a mañá do luns 8 de maio e unha saída posterior, que se fará o día 30 de maio conxuntamente co CEIP Virxe do Carme de Sober.

O obradoiro empapounos de coñecementos da Ribeira Sacra, algo do que formamos parte, e démonos conta de canto nos queda por coñecer, e dende logo por valorar… pois o seu encanto e valor patrimonial a través de toda unha historia é incalculable.

O obradoiro constou de dúas partes:

Dende o comezo estivemos en equipos de cinco compostos por nen@s de 3º, 4º, e 5º e 6º tomando apuntes; ao final, estaba esperándonos un xogo con probas e preguntas sobre o que viramos.

Unha primeira parte expositiva, na que a través dunha presentación en power point as dúas monitoras, contáronnos de forma moi lúdica  información da Ribeira Sacra.

Comezaron falándonos dos aspectos xerais:

- A Ribeira Sacra é unha comarca natural bañada polos ríos Miño e Sil, que comprende 21 concellos tales como A Pobra do Brollón, Monforte (que é o máis grande), Portomarín, Chantada, Sober, a Teixeria (o concello máis pequeno)…Déronnos a coñecer cada un dos concellos que a forman; por exemplo, en Esgos, descubrimos que se atopa o Mosteiro máis antigo de Galicia; en Parada de Sil un mirador chamada os “balcóns de Madrid”; en Castro Caldelas o Castelo; en Quiroga o Museo Xeolóxico…

En fin, coñecemos as festas, os costumes, o Patrimonio, a riqueza da Ribeira Sacra. Por tanto, nesta zona, que comprende o norte da provincia de Ourense e o sur da de Lugo, o turismo é un gran motor económico.

- Analizamos os ríos Miño e Sil (onde nacen, os seus afluentes….).

- Flora: atopamos oliveiras en Quiroga polo clima que presenta; pero se miramos ao noso arredor vemos castiñeiros, carballos, sobeiras, vides, cerdeiras… e nalgunhas zonas tamén especies invasoras como o eucalipto.

- Fauna: Contamos con raposos, coellos do monte, donicelas, corzos, aguias, píntegas comúns, cóbregas, anguías, troitas….

- Mosteiros: Ribeira Sacra significa (ribeira dos ríos e sagrada). Por tanto, despois dos ríos, podemos dicir que o máis importantes son os Mosteiros.

A maior parte deles creáronse no século X. A partir do ano 1103 sepáranse en masculinos e femininos.

Podemos diferenciar dous tipos: San Benito (van vestidos de negro) e San Bernando (van vestidos de branco).

Un exemplo do primeiro, os Benedictinos, é o de San Vicente do Pino en Monforte.

Un exemplo de Cistercienses é o de Santa María de Montederramo.

Os seus principais elementos son a igrexa, sala capitular (onde se realizan as reunións), o claustro e o refectorio (comedor).

- Arte Románica: moitos turistas visíntannos para disfrutar a arte románica, que nace no século XI, influenciada pola arte romana, e chega á Ribeira Sacra entre o século XII e o XIII.

Nela, destaca a horizontalidade e a curvatura. Podémolo comprobar nas numerosas igrexas románicas que hai na nosa zona.

-Arquitectura románica: Destaca unha nave única e unha cabeceira curva, recta ou triple. Chaman a atención os elementos decorativos xeométricos (axadrexado, os arcos de medio punto…); os elementos decorativos vexetais (tallaban as plantas da zona); e os elementos decorativos animais e mitolóxicos (Basilisco, sereas paxaro, becerros, centauros…).

Da escultura románica conservamos pouco na Ribeira Sacra.

- Oficios tradicionais: Oleiros, barquilleiros, afiadores…

 

Logo desta primeira parte interesante, na que non deixamos de estar moi atentos, chegou o momento de facer un pequeno descanso.

 

Despois do recreo, coñecemos o aspecto cultural e social da Ribeira sacra:

Discorren por ela parte dos dous camiños de Santiago: o camiño Francés que pasa por Portomarín e o Camiño de Inverno… Información moi valiosa pois neste tema estamos investigando co obxectivo de coñecer máis profundamente o Camiño de Inverno que pasa pola nosa localidade, Pobra do Brollón.

Soubemos que para ter acreditado o camiño é suficiente percorrer 100km; por iso, aínda que nace en Francia, facendo o último tramo Sarria - Santiago é suficiente.

A ruta do camiño en Galicia comeza no Cebreiro, onde se bifurca por Piedrafita, Sarria…. (Camiño Francés) ou Barco, Rúa,  Quiroga, Pobra… (Camiño de Inverno).

Lembramos os símbolos e complementos dos peregrinos, sobre os que xa traballaramos cando nos disfrazamos de peregrinos no entroido: o bordón  (bastón), a cabaza para beber, a cuncha colgada tamén para beber directamente na fonte, o fito (os km que faltan) a cruz (símbolo do apóstolo).

Coñecemos vestixios que proban que realmente existiu este camiño de inverno, pois a súa oficialidade é moi recente. Nun pobo,  Codos de Belesar consérvase un tramo dunha calzada romana.

Outro tema do que nos falaron foi do entroido da Ribeira Sacra que ten dúas zonas nas que esta celebración ten moita tradición; xa sabíamos algo delas: tamén investigamos cando celebramos o entroido:

- Unha das zonas celebran o entroido Ribeirao de Chantada. Celébrase especialmente nun pobo, Santiago de Abaixo. Aparecen personaxes como os volantes, con moito colorido, un pucho moi pesado, campaniñas… saltan e bailan; os mecos métense coa xente, e os maragatos vístense con peles de ovella, representan oficios tradicionais…..

- Outro entroido que xa coñeciamos moi ben é o de Salcedo. A figura máis representativa é o oso. Sae o luns acompañado de criados que  collen á xente e acércanlla  para que este a pinte. O oso simboliza o comezo da primavera, o ciclo agrícola no que volve a brotar todo.

Outras figuras son as madamas e os danzantes, parellas moi ben vestidas.  Os danzantes de traxe e as madamas de branco e con sombreiros con cintas de cores.

Máis tarde, coñecemos un produto moi típico de aquí cultivado dende a época dos romanos. Cultívase a vide que da uns viños excelentes, de aí o nome de Ribeira Sacra.

A mañá foi pasando case sen ser conscientes; e así chegou a parte final, na que tíñamos que por en práctica todo o aprendido.

 

O xogo é unha especie de trivial. Consiste en que cada equipo vai movendo a ficha por un taboleiro. Segundo no lugar no que caias pasas unha proba de debuxar, mímica, pregunta, describir sen dicir algunhas palabras….

Un membro do equipo fai a proba ou a pregunta e os outros compañeiros/as deben acertar. O equipo que consiga primeiro os cinco ladrillos (distintivos da ribeira sacra) é o gañador.

 

Pasou a mañá nun suspiro, tan pronto que cando tocou o timbre para comer, preferimos rematar o xogo.

Moitas grazas por ensinarnos tanto. Agora agardamos esa excursión na que seguro nos seguiremos adentrando nos encantos da Ribeira Sacra.

Así que os nosos parabéns para o Consorcio de turismo por esta iniciativa e ás monitoras que nos acompañaron.

"Navega con rumbo"

O pasado xoves, 4 de maio, tivemos unha charla baixo o título de “navega con rumbo”, unha iniciativa da Consellería de Educación,  co obxectivo de analizar os beneficios e perigos do uso de internet.

Analizamos, en primeiro lugar, os usos que facemos de internet no día a día.

Cales son os puntos chave de internet? O acceso é “anónimo”, pero sempre se pode seguir o noso rastro. É un acceso case permanente,  xa que estamos conectados dende todas as partes dun xeito cada vez máis doado.

Internet ofrécenos unha serie de comodidades, de vantaxes que medran cada día: obter información, mensaxería instantánea…Pero debemos ter coidado coa publicidade enganosa, coa información falsa, con virus que se meten nos nosos ordenadores. Aínda que soe a tópico, en internet podémonos encontrar con cousas boas e con outras non tan boas.

Nas redes sociais, moi presentes hoxe en día é practicamente imposible borrar unha foto unha vez que se colga na rede; quedan aí para sempre. Debemos coidar a nosa privacidade e a dos demais. Temos que pensar con detemento antes de actuar.

Outro tema de actualidade é o ciberbullying, que é un acoso psicolóxico e persistente contra unha persoa a través de medios telemáticos. Debemos estar sempre alerta, denuncialo se acontece  e gardar as probas.

Lembráronnos tamén a importancia de protexer os nosos ordenadores e dispositivos con antivirus.

Á hora de crear os usuarios e contrasinais non debemos poñer os nosos nomes, recoméndase mesturar maiúsculas e minúsculas, 8 carácteres mínimo…

Nas conexións sen fíos que son abertas non sabemos o que hai detrás delas; pódennos extraer información dun xeito moi sinxelo. Somos moi vulnerables.

Queremos resaltar a importancia de conservar a ortografía cando empregamos redes sociais xa que ás veces coas presas ou co uso de abreviaturas  cometemos erros moi graves.

A aprendizaxe desta mañá queda resumida do seguinte xeito: Non fagas nada en internet que non farías na túa vida real.

 

Día do libro

O próximo domingo,23 de abril, conmemórase o Día do Libro. É un día simbólico para a literatura mundial, xa que neste día no ano 1616 faleceron Cervantes ou Shakespeare.

Os libros teñen moito poder: son ventás abertas á diversidade de culturas, enriquecen o patrimonio inmaterial da humanidade, son fontes de información, de pracer, son novas oportunidades. Permítennos compartir, sentir, voar, experimentar…

Ler mellora a escritura, a expresión oral, estimula a creatividade, a imaxinación, a intelixencia, a concentración, axuda a relaxarnos, a pensar…

Hoxe venres, realizamos unha serie de actividades:

“Apadriña un conto”. O alumnado de infantil, 1º e 2º, escolleu ao azar un neno/a de 3º, 4º, 5º e 6º para que lle contase un conto.

Despois,  falaron sobre o que sucedeu, as personaxes que interviñeron, o que aprenderon do conto…

“O conto dos disparates”. Ao longo desta semana creamos entre todo o colexio o noso propio conto. Cada grupo fixo unha parte (introdución, nó, desenlace). O divertido e enriquecedor é non saber nada do que escriben os demais. Hoxe, cando o limos, tocounos darlle coherencia, unificar todo o que escribimos nun só conto.

Repartímolo da seguinte maneira:

- Infantil: Quen? Había unha vez…

-1º e 2º:  Cando? e onde? Describen o lugar no que se desenvolve a acción…

- 3º e 4º: Os personaxes facían…

- 5º: Pero un día…

- 6º: Ao final…

 Cada aula, elaborou unha parte do mesmo, sen saber nada dos demais. Infantil “había unha vez”, 1º e 2º, 3º e 4º, 5º e 6º “ao final”. Loxicamente foi un conto disparatado que nos serviu para aprender da importancia de traballar en equipo, de

“Gustoume ler”: Cada neno/a elixiu o seu libro favorito para recomendarlle aos seus compañeiros/as. Deixámosvos unha mostra das distintas propostas que xurdiron.

Foi o momento tamén de premiar aos nosos lectores; os nenos/as que máis libros leron ao longo deste curso foron:

-1º: Alejandra

- 2º: Marcos

- 3º: Erea

- 4º: Xulia

- 5º: Xana e Lorena

- 6º: Candela

Todos tivemos como premio un marcapáxinas para fomentar o hábito lector, e un poema de Rosalía Fernández Rial sobre o libro e o acto de ler, un agasallo para as Bibliotecas Escolares de Galicia.

Aproveitamos a ocasión para presentarvos as camisetas que acabamos de facer. Son dous modelos, verde e branco, con dúas mensaxes moi claras relacionadas coa lectura, coa maxia dos libros. Están deseñadas integramente polo alumnado.

“Un libro aumentará as marabillas do saber”.

“A mellor ruta de viaxe é abrir un libro e contemplar as súas paisaxes”.

Nos vós quededes sen ela!!!

O que se recade será destinado á excursión de fin de curso que realizará o alumnado de 5º e 6º.

Hoxe estreámolas no colexio.

Rematamos cunha frase do escritor británico Robert Louis Stevenson:

“Sempre levo dous libros no peto, un para ler e outro para escribir nel”.

Semana do Deporte

Acabamos de vivir a semana do deporte,  coa que buscamos fomentar no alumnado a práctica de actividade física. Desenvolveuse do 3 ao 7 de abril, coincidindo nesta semana o Día do deporte (6 de abril) e o Día Mundial da saúde (7 de abril).

O deporte é un medio moi apropiado para educar ás persoas, para inculcar valores coma o compañeirismo, o traballo en equipo, o respeto polo demais, acatar unhas normas. Fai que medre o noso afán de superación.

A semana comezou o luns cas miniolimpiadas, onde o atletismo se elixiu protagonista. O deporte rei combina habilidades que facemos de forma innata xa dende pequenos: correr, saltar e lanzar. Aporta un alto grado de coordinación.

Carreiras de velocidade, salto de lonxitude, carreiras de vallas, lanzamento de peso e carreira por relevos.

O martes, o alumnado de 3º, 4º, 5º e 6º, realizou coreografías en grupo que levaban practicando dende semanas atrás. Despois, continuaron coas coreografías individuais. Coordinación, ritmo, sentimento, ilusión…para esta mañá de martes.

O mércores todos/as con bicicletas, patinetes, patíns ao colexio

Querémosvos dar as grazas pola vosa participación para que esta actividade se levase a cabo. Xuntámonos con máis de 40 “vehículos”. A actividade “sobre rodas” buscou fomentar o uso da bicicleta, de patíns...  medios de transporte sans, que son moi recomendables para os nosos nenos/as. Aproveitamos para traballar a educación viaria: coñecer sinais coma o stop, o ceda, dirección prohibida; así como cumprir o que nos ordenan os semáforos, respectar os pasos de peóns… Os maiores, cos seus carnés por puntos, concienciáronse da importancia de adquirir uns bos hábitos viarios.

Onte, venres,  repetimos a actividade do parque de tráfico debido a grandísima aceptación que tivo.

Máis tarde, o alumnado, dirixido por Nieves, xogou un partido de baloncesto e despois de fútbol fronte os mestres/as. Fíxonos moita ilusión. Levábamos días agardando por esta cita.

Corremos, rimos, cansamos…foi un gran momento.

Puxemos o broche final a esta semana, coa visita de Sergio Cabanelas: porteiro Monfortino, formado no Calasanz e durante 6 anos nas categorías inferiores do Real Madrid.

Contounos as súas vivencias no mundo do fútbol,o que lle aportou, a súa etapa adestrando en Valdebebas, aconsellounos que o máis importante é disfrutar facendo deporte… Aprendemos moitas cousas da man dun deportista da nosa zona.

Actualmente recupérase dunha lesión no ombreiro e milita no Atlético Escairón.  Seguro que moi pronto o vemos onde se merece, entre os grandes porteiros do panorama nacional.

Foi un auténtico pracer poder compartir este tempo con el, escoitalo, xogar un partido no pavillón

Tod@s quedamos moi satisfeitos con esta semana; foi unha experiencia positiva, enriquecedora, proveitosa. Foron momentos de moita unión, de ilusión, de divertimento. É moi fácil de resumir estes días se nos lembramos da cara dos nenos/as en moitas ocasións.

 

Un día en Santiago

Este pasado xoves visitamos Santiago de Compostela. O noso calendario de actividades complementarias fixo que a capital de Galicia fose o lugar no que pasaríamos esta xornada.

Saímos do centro pasadas as 9h. Ás 11h xa estabamos en Santiago dispostos a coñecer Museos, Meteogalicia…

Logo, dunha pequena merenda, a primeira parada foi o Museo do Pobo Galego: institución dedicada ao estudo, promoción e a difusión do patrimonio histórico – antropolóxico e da cultura galega en todos os seus ámbitos.

Puidemos acceder nel a un compendio da diversidade  cultural de Galicia, dos elementos que nos definen e dos obxectos que nos caracterizan.

A través dun xogo de preguntas tipo test, fomos recorrendo as diferentes salas (sección de mar, de campo, de oficios, de indumentaria, de arquitectura popular, de sociedade…).

A carón das 12:30h o alumnado de infantil, 1º e 2º fixo unha parada para descansar e xogar baixa unha soleada mañá.

O resto do alumnado visitou Meteogalicia (Axencia Meteorolóxica en Galicia),  que prové aos cidadáns dunha serie de servizos relacionados tanto coa observación como coa predición meteorolóxica e outros relacionados co estudo do clima do país. 

Coñecemos as súas instalacións, unha caseta que mide a calidade do aire…

A sorpresa da mañá chegou á hora de comer, cando nos dirixidos ao McDonalds. Unha boa maneira de recuperar forzas para a xornada de tarde que nos levou ao MUPEGA (Museo Pedagóxico de Galicia).

Disfrutamos dunha exposición didáctica co obxectivo de amosar o rico patrimonio escolar ás novas xeracións para facelas partícipes do mesmo.

Exploramos o Museo a través de diferentes actividades.

No andar de abaixo exhíbense pezas singulares relacionadas coa escola e o xogo, e unha solaina de personaxes destacados na historia de Galicia.

No primeiro andar, baixo o epígrafe “A infancia, os ensinantes e a escola” acolle varias seccións: Mundo infantil, a administración educativa, escolas chegadas alén do Mar, o sistema educativo…

O segundo andar, está dedicado ao “ensino nas aulas”

Unha vez rematada esta visita, foi o momento da merenda de media tarde e de poñer rumbo á Pobra, ao onde chegamos pasadas as 20.30h.

Un día de moita aprendizaxe, convivencia, bo tempo…

Distribuir contido